Popular Bible Verses from ራእዩ ለዮሐንስ 12

Share

ወሞእዎ እሙንቱ በእንተ ደመ በግዑ ወበእንተ ቃለ ጽድቆሙ እስመ ኢያብደሩ ነፍሶሙ እስከ ለሞት።

ወሰማዕኩ ቃለ ዐቢየ በውስተ ሰማይ ዘይብል ኮነት መድኀኒት ወኀይል ወመንግሥት ለአምላክነ ወሥልጣን ለመሲሑ እስመ ወድቀ መስተዋድይ ዘአስተዋደዮሙ ለአበዊነ ቅድመ እግዚአብሔር መዐልተ ወሌሊተ።

ወወድቀ ውስተ ምድር ውእቱ አርዌ ዐቢይ ወአርዌሰ ዐቢይ ውእቱ ቀዲሙ ዘአስሐቶ ለኵሉ ዓለም ዘስሙ ሰይጣን ወወድቀ ውስተ ምድር ወመላእክቲሁኒ ወድቁ ምስሌሁ ውስተ ምድር።

ወበእንቲኣሆሙ ተፈሥሑ ሰማያት ወእለ ይነብሩ ውስቴቶን አሌ ላ ለምድር ወለባሕር እስመ ወረደ ሰይጣን ውስቴቶሙ ምስለ ዐቢይ ሕምዙ እስመ የአምር ከመ ውኁድ መዋዕል ተርፎ።

ወጸብእዎ በሰማይ ለውእቱ አርዌ ሚካኤል ወመላእክቲሁ ወተጻብኦሙ ውእቱ አርዌ ምስለ መላእክቲሁ።

ወተምዐ ውእቱ አርዌ ላዕለ ይእቲ ብእሲት ወሖረ ይጽብኦሙ ለእለ ተርፉ ውሉዳ ወለእለ የዐቅቡ ትእዛዘ እግዚአብሔር ወይሄልዉ በጽድቁ ለኢየሱስ ክርስቶስ።

ወአስተርአየ ተኣምር ዐቢይ በውስተ ሰማይ ብእሲት እንተ ትለብስ ፀሓየ ወወርኅ ታሕተ እገሪሃ ወዲበ ርእሳኒ አክሊል ዘዐሠርቱ ወክልኤቱ ከዋክብት። ወፅንስት ይእቲ ብእሲት ወትግዕር ወተሐምም ለወሊድ።

ወወለደት ወልደ ተባዕተ ዘውእቱ ይርዕዮሙ ለኵሉ አሕዛብ በበትረ ኀጺን ወመሠጥዎ ለውእቱ ሕፃን ወወሰድዎ ኀበ እግዚአብሔር ወኀበ መንበሩ። ወጐየት ይእቲ ብእሲት ውስተ ገዳም ወውስተ መካን ዘአስተዳለወ ላቲ እግዚአብሔር ከመ ትትዐቀብ በህየ በኵሉ መዋዕል ዐሠርተ ወክልኤተ ምእተ ወስሳ ዕለተ።

ወአስተርአየ ካልእ ተኣምር በውስተ ሰማይ አርዌ ዐቢይ ወቀይሕ ዘሰብዐቱ አርእስቲሁ ወዐሠርቱ አቅርንቲሁ ወውስተ አርእስቲሁ ሰብዐቱ ቀጸላ። ወበዘነቡ ይስሕብ ሣልስተ እዴሆሙ ለከዋክብተ ሰማይ ወያወርዶሙ ውስተ ምድር ወቆመ ውእቱ አርዌ አንጻረ ይእቲ ብእሲት ከመ ሶበ ወለደት ይብላዕ ሕፃና።

ወተውህባ ለይእቲ ብእሲት ክልኤ ክንፍ ከመ ዘዐቢይ ንስር ከመ ትሥርር ውስተ ገዳም ወውስተ መካን ኀበ ትትዐቀብ በኵሉ መዋዕል ዘመነ ወአዝማነ ወመንፈቀ ዘመን እምቅድመ ገጹ ለውእቱ አርዌ ወሠረረ ወዴገና ውእቱ አርዌ። ወአውፅአ እምነ አፉሁ ውእቱ አርዌ ማየ ብዙኀ እንተ ድኅሬሃ ለይእቲ ብእሲት ከመ ፈለግ ዐቢይ ከመ ይንሥኣ ውኂዙ። ወረድአታ ምድር ለይእቲ ብእሲት ወአርኀወት አፉሃ ምድር ወሰረበቶ ለውእቱ ውኂዝ ዘአውኀዘ ውእቱ አርዌ እምነ አፉሁ ወኢያእመረ ከመ ተውህበ ላቲ ክንፍ።