ወንጌል ዘማርቆስ 9

ምዕራፍ 9

1 # ማቴ. 16፥28፤ ዮሐ. 21፥23። ወይቤሎሙ አማን እብለክሙ ሀለዉ እምእለ ይቀውሙ ዝየ እለ ኢይጥዕምዎ ለሞት እስከ አመ ይሬእይዋ ለመንግሥተ እግዚአብሔር እንዘ ትመጽእ በኀይል።

ዘከመ ተወለጠ ራእዩ በደብረ ታቦር

2 # ማቴ. 17፥1-3፤ ሉቃ. 9፥28-37። ወአመ ሰዱስ ዕለት ነሥኦሙ እግዚእ ኢየሱስ ለጴጥሮስ ወለያዕቆብ ወለዮሐንስ ወአዕረጎሙ ደብረ ነዋኀ በባሕቲቶሙ ወተወለጠ ራእዩ በቅድሜሆሙ። 3ወአልባሲሁኒ በረቀ ወጻዕደወ ጥቀ ዘኢይክል መሃፒል ከማሁ አጻዕድዎቶ በዲበ ምድር። 4ወአስተርአይዎሙ ሙሴ ወኤልያስ እንዘ ይትናገሩ ምስለ እግዚእ ኢየሱስ። 5ወአውሥአ ጴጥሮስ ወይቤሎ ለእግዚእ ኢየሱስ ረቢ ይኄይሰነ ንንበር ዝየ ወንግበር ሠለስተ ማኅደረ አሐደ ለከ ወአሐደ ለሙሴ ወአሐደ ለኤልያስ። 6ወኢየአምር ዘይብል እስመ ድንጉፃን እሙንቱ። 7#2ጴጥ. 1፥16-18። ወመጽአ ደመና ብሩህ ወጸለሎሙ ወመጽአ ቃል እምደመና ዘይብል ዝንቱ ውእቱ ወልድየ ዘአፈቅር ወሎቱ ስምዕዎ። 8ወእምዝ ግብተ ነጺሮሙ አልቦ ዘርእዩ ዘእንበለ እግዚእ ኢየሱስ ባሕቲቱ ምስሌሆሙ። 9#8፥30። ወእንዘ ይወርዱ እምደብር አዘዞሙ እግዚእ ኢየሱስ ኢይንግሩ ወኢለመኑሂ ዘርእዩ ዘእንበለ አመ ተንሥአ ወልደ ዕጓለ እመሕያው እምነ ምዉታን። 10ወዐቀቡ ቃሎ ወተኃሠሡ በበይናቲሆሙ እንዘ ይብሉ ምንት ውእቱ ተንሥኦ እምነ ምውታን።

በእንተ ተስእሎተ አርዳኢሁ

11ወተስእልዎ ወይቤልዎ በእፎ ይብሉ ጸሐፍት ወፈሪሳውያን ኤልያስ ይቀድም መጺአ። 12#ኢሳ. 53፥3። ወአውሥአ ወይቤሎሙ ኤልያስ ይመጽእ ቅድመ ወያስተራትዕ ኵሎ ወእፎ ጽሑፍ በእንተ ወልደ ዕጓለ እመሕያው ከመ ብዙኀ ያሐምምዎ ወይሜንንዎ። 13#ማቴ. 11፥14፤ 1ነገ. 19፥2-10፤ ሚል. 4፥5። ወባሕቱ እብለክሙ ኤልያስ ወድአ መጽአ ወገብሩ ላዕሌሁ ኵሎ ዘፈቀዱ በከመ ጽሑፍ በእንቲኣሁ። 14#ማቴ. 17፥14-21፤ ሉቃ. 9፥37-42። ወበጽሐ ኀበ አርዳኢሁ ወረከበ ብዙኀ ሰብአ ኀቤሆሙ ወጸሐፍትኒ እንዘ ይሴአልዎሙ። 15ወሶበ ርእይዎ ኵሎሙ ሰብእ ደንገፁ ወሮጹ ሶቤሃ ወአምኅዎ፤ 16ወተስእሎሙ ለጸሐፍት እንዘ ይብል ምንተኑ ትትኃሠሥዎሙ።

በእንተ ዘነገርጋር

17ወአውሥአ አሐዱ እምውስተ ሕዝብ ወይቤሎ ሊቅ አምጻእክዎ ለወልድየ ኀቤከ እስመ ጋኔን በሃም አኀዞ። 18ወኀበ ረከቦ ይነፅኆ ወያስተራግፆ ወያሤውኖ ወያሐቅዮ ስነኒሁ ወያየብሶ ወእቤሎሙ ለአርዳኢከ ያውፅእዎ ወስእንዎ ፈውሶቶ። 19ወአውሥአ ወይቤሎሙ ኦ ትውልድ እንተ አልባቲ ሃይማኖት እስከ ማእዜኑ እሄሉ ምስሌክሙ ወእስከ ማእዜኑ እትዔገሠክሙ አምጽእዎ ዝየ ኀቤየ። 20ወወሰድዎ ኀቤሁ ወሶበ ርእዮ ውእቱ ጋኔን ነጽኆ ሶቤሃ ውስተ ምድር ወአስተራገፆ ወአሥወኖ። 21ወተስእሎ እግዚእ ኢየሱስ ለአቡሁ ወይቤሎ እማእዜኑ ዘአኀዞ ወይቤሎ እምንእሱ። 22ወዘልፈ ያወድቆ ኀበ ጸድፍ ወውስተ እሳት ወማይ ከመ ይቅትሎ ወባሕቱ በዘትክል ርድአኒ ወመሐረኒ። 23#11፥23። ወይቤሎ እግዚእ ኢየሱስ እስመ ትቤ እመ ትክል ርድአኒ እመሰ ተአምን ኵሉ ይትከሀል ለዘየአምን። 24#ሉቃ. 17፥5። ወጸርሐ አቡሁ ለውእቱ ወልድ ወይቤ አአምን እግዚኦ ባሕቱ ርድኦ ለኢአሚኖትየ። 25ወርእዮ እግዚእ ኢየሱስ ከመ ይትራወጽ ሰብእ ገሠጾ ለውእቱ ጋኔን እኩይ ወይቤሎ ጋኔን በሃም ወጽሙም አነ እኤዝዘከ ትፃእ እምኔሁ ወኢትግባእ እንከ ላዕሌሁ። 26#1፥26። ወአግዐሮ ብዙኀ ወአስተራገፆ ወወፅአ ወኮነ ከመ በድን እስከ ይብሉ ብዙኃን ሞተ። 27ወአኀዞ እግዚእ ኢየሱስ በእዴሁ ወአንሥኦ ወተንሥአ። 28ወበዊኦሙ ቤተ ይቤልዎ አርዳኢሁ በባሕቲቶሙ በእፎ ስእነ ንሕነ አውፅኦቶ። 29ወይቤሎሙ ዝንቱ ዘመድ ኢይክል ይፃእ ዘእንበለ በጾም ወበጸሎት። 30#ማቴ. 17፥22-23፤ ሉቃ. 9፥43-45። ወወፂኦ እምህየ ሖረ እንተ ገሊላ ወኢቀፈደ ያእምርዎ።

በእንተ ሕማሙ ወሞቱ

31 # 8፥31፤ 10፥32፤ ሉቃ. 18፥31-35። ወመሀሮሙ ለአርዳኢሁ ወይቤሎሙ ሀለዎ ለወልደ ዕጓለ እመሕያው ይግባእ ውስተ እደ ሰብእ ኃጥኣን ወይቀትልዎ ወበሣልስት ዕለት ይትነሣእ። 32ወኢያእመሩ ዘይቤሎሙ ወይፈርህዎ ተስእሎቶ።

በእንተ ትሕትና ወትዕግሥት

33 # ማቴ. 18፥1-14፤ ሉቃ. 9፥46-50። ወበጺሖ ቅፍርናሆም ወበዊኦ ቤተ ይቤሎሙ ምንተኑ ኀለይክሙ በፍኖት በበይናቲክሙ። 34ወአርመሙ እስመ ተባሀሉ በበይናቲሆሙ በፍኖት መኑ እንጋ የዐቢ እምኔሆሙ። 35#ማቴ. 20፥26። ወነበረ ወጸውዖሙ ለዐሠርቱ ወክልኤቱ ወይቤሎሙ ዘይፈቅድ ይኩን ሊቀ ለያትሕት ርእሶ ለኵሉ ወይኩን ላእከ ለኵሉ። 36#10፥16። ወነሥአ ሕፃነ ወአቀሞ ማእከሎሙ ወአንበሮ ውስተ ሕፅኑ ወይቤሎሙ፤ 37#ማቴ. 10፥39-40። ዘተወክፈ አሐደ ዘመጠነዝ ሕፃን በስምየ ኪያየ ተወክፈ ወዘኒ ኪያየ ተወክፈ አኮ ኪያየ ባሕቲቶ ዘተወክፈ ዘእንበለ ዘፈነወኒ። 38#ሉቃ. 9፥49። ወአውሥአ ዮሐንስ ወይቤሎ ሊቅ ቦ ዘርኢነ ዘያወፅእ አጋንንተ በስምከ ወከላእናሁ እስመ ኢተለወከ ምስሌነ። 39#1ቆሮ. 12፥3። ወይቤሎሙ እግዚእ ኢየሱስ ኢትክልእዎ እስመ አልቦ ዘይገብር ኀይለ በስምየ ወይክል ፍጡነ አሕሥሞ ቃል ላዕሌየ። 40#ማቴ. 12፥30። እስመ እምከመ ኢኮነ ዕድውክሙ ቢጽክሙ ውእቱ። 41#ማቴ. 10፥42። ወዘአስተየክሙ ጽዋዐ ማይ ቈሪር በስምየ እስመ እለ ክርስቶስ አንትሙ አማን እብለክሙ ኢየኀጕል ዕሴቶ። 42ወዘአስሐቶ ለአሐዱ እምእሉ ንኡሳን እለ የአምኑ ብየ ይኄይሶ ይስቅሉ ማኅረጸ አድግ በክሣዱ ወያስጥምዎ ውስተ ባሕር። 43#ማቴ. 5፥30፤ 18፥8። ወእመኒ እዴከ ታስሕተከ ምትራ እስመ ይኄይሰከ ምቱረ እድ ትባእ ውስተ ሕይወት፤ 44እምትባእ ምስለ ክልኤሆን እደዊከ ውስተ እሳተ ገሃነም ኀበ ዕፄሁ ኢይነውም ወእሳቱ ኢይጠፍእ። 45ወእመኒ እግርከ ታስሕተከ ምትራ እስመ ይኄይሰከ ሐንካሰከ ትባእ ውስተ ሕይወት፤ 46እምትባእ ምስለ ክልኤሆን እገሪከ ውስተ እሳተ ገሃነም ኀበ ዕፄሁ ኢይነውም ወእሳቱ ኢይጠፍእ። 47#ማቴ. 5፥29። ወእመኒ ዐይንከ ታስሕተከ ምልሓ እስመ ይኄይሰከ ነቋረከ ትባእ ውስተ መንግሥተ እግዚአብሔር ፤ 48እምትባእ ምስለ ክልኤሆን አዕይንቲከ ውስተ ገሃነም ዘእሳት ኀበ ዕፄሁ ኢይነውም ወእሳቱ ኢይጠፍእ።

በእንተ ፍቅር

49 # ዘሌ. 2፥13። እስመ ለኵሉ በእሳት ይሜልሕዎ ወኵሉ ዘይጠባሕ ይትሜላሕ በጼው። 50#ሉቃ. 14፥32፤ ቈላ. 4፥6። ሠናይ ውእቱ ጼው ወእመሰ ጼው ለስሐ በምንት እንከ ይቄስምዎ። ጼወ ርከቡ በበይናቲክሙ ወተሰናአዉ።

Currently Selected:

ወንጌል ዘማርቆስ 9: ሐኪግ

Highlight

Copy