ወንጌል ዘማርቆስ 10

ምዕራፍ 10

ዘከመ ኢይደሉ ኀዲገ ብእሲት

1 # ማቴ. 19፥1-9። ወተንሢኦ እምህየ ሖረ ብሔረ ይሁዳ እንተ ማዕዶተ ዮርዳኖስ ወሖሩ ካዕበ ምስሌሁ ሕዝብ ወመሀሮሙ በከመ ያለምድ። 2ወመጽኡ ፈሪሳውያን ወተስእልዎ ወይቤልዎ ይከውኖሁ ለብእሲ ኀዲገ ብእሲቱ እንዘ ያሜክርዎ። 3ወአውሥአ እግዚእ ኢየሱስ ወይቤሎሙ ምንተኑመ አዘዘክሙ ሙሴ። 4#ዘዳ. 24፥1፤ ማቴ. 5፥31። ወይቤልዎ አዘዘነ ሙሴ ንጽሐፍ ላቲ መጽሐፈ ኅዳጋቲሃ ወንድኀራ። 5ወአውሥአ እግዚእ ኢየሱስ ወይቤሎሙ በከመ እከየ ልብክሙ ወሀበክሙ ሙሴ ዘንተ ትእዛዘ ትድኀሩ አንስቲያክሙ። 6#ዘፍ. 1፥27። ወእምፍጥረትሰ ተባዕተ ወአንስተ ገብረ እግዚአብሔር ። 7#ዘፍ. 2፥24። ወበእንተ ዝንቱ የኀድግ ብእሲ አባሁ ወእሞ ወይተልዋ ለብእሲቱ። 8ወይከውኑ ክልኤሆሙ አሐደ ሥጋ ናሁኬ ኢኮኑ ክልኤተ አላ አሐዱ ሥጋ እሙንቱ። 9#1ቆሮ. 7፥10። ዘእግዚአብሔር እንከ አስተፃመረ ሰብእ ኢይፍልጥ። 10ወበቤት ካዕበ ተስእልዎ አርዳኢሁ በእንተ ዝንቱ ነገር። 11ወይቤሎሙ ዘደኀረ ብእሲቶ ወሖረ ካልእተ ዘመወ ላዕሌሃ። 12ወእንተሂ ደኀራ ምታ ወሖረት ካልአ ዘመወት።

ዘከመ ባረኮሙ እግዚእ ኢየሱስ ለሕፃናት

13 # ኢሳ. 49፥22፤ ማቴ. 19፥13-15፤ ሉቃ. 18፥15-17። ወአምጽኡ ኀቤሁ ሕፃናተ ይግሥሦሙ ወገሠጽዎሙ አርዳኢሁ ለእለ አቅረብዎሙ። 14ወርእዮ እግዚእ ኢየሱስ ተምዐ ወይቤሎሙ ኅድጉ ሕፃናተ ይምጽኡ ኀቤየ ወኢትክልእዎሙ እስመ ለዘከመ እሉ ይእቲ መንግሥተ እግዚአብሔር ። 15#ማቴ. 18፥3-6። አማን እብለክሙ ዘኢተቀበላ ለመንግሥተ እግዚአብሔር ከመ ሕፃን ኢይበውኣ። 16#9፥36። ወአንበሮሙ ውስተ ሕፅኑ ወወደየ እዴሁ ዲቤሆሙ ወባረኮሙ።

በእንተ ወሬዛ ባዕል

17ወእንዘ የሐውር በፍኖት መጽአ አሐዱ ብእሲ ወሰገደ ሎቱ ወይቤሎ ሊቅ ኄር ምንተ እግበር ከመ እረስ ሕይወተ ዘለዓለም። 18ወይቤሎ እግዚእ ኢየሱስ ምንተ ትብለኒ ኄር አልቦ ኄር ዘእንበለ አሐዱ እግዚአብሔር ። 19#ዘፀ. 20፥12። ተአምር ትእዛዛተ ኢትሑር ብእሲተ ብእሲ ኢትቅትል ነፍሰ ኢትስርቅ ኢትኩን ስምዐ በሐሰት ኢትሂድ ወአክብር አባከ ወእመከ። 20ወአውሥአ ወይቤሎ ሊቅ ዘንተሰ ኵሎ ዐቀብኩ እምንእስየ። 21#ማቴ. 6፥19-22፤ 10፥38። ወነጸሮ እግዚእ ኢየሱስ ወአፍቀሮ ወይቤሎ እመሰ ትፈቅድ ፍጹመ ትኩን አሐቲ ተርፈተከ ሑር ሢጥ ኵሎ ዘብከ ወሀብ ለነዳያን ወትረክብ መዝግበ በሰማያት ወጹር መስቀለ ሞትከ ወነዓ ትልወኒ። 22ወተከዘ በእንተ ዝንቱ ነገር ወሖረ ትኩዞ እስመ ብዙኅ ጥሪቱ። 23ወነጸሮሙ እግዚእ ኢየሱስ ለአርዳኢሁ ወይቤሎሙ እፎ ዕፁብ ለዘቦ ንዋይ በዊእ ውስተ መንግሥተ ሰማያት። 24#መዝ. 62፥10-11፤ 1ጢሞ. 6፥17። ወአንከሩ አርዳኢሁ ዘንተ ነገረ ወካዕበ ይቤሎሙ እግዚእ ኢየሱስ ለአርዳኢሁ ደቂቅየ እፎ ዕፁብ ለእለ ቦሙ ንዋይ#ቦ ዘይቤ «ለእለ ይትአመኑ በንዋዮሙ» በዊእ ውስተ መንግሥተ እግዚአብሔር ። 25ይቀልል ይኅልፍ ገመል እንተ ስቍረተ ሐጽ እምባዕል ይባእ ውስተ መንግሥተ እግዚአብሔር ። 26ወፈድፋደ አንከሩ ወተባሀሉ በበይናቲሆሙ መኑ እንከ ይክል ድኂነ። 27ወነጸሮሙ እግዚእ ኢየሱስ ወይቤሎሙ በኀበ ሰብእ ኢይትከሀል ዝ ወበኀበ እግዚአብሔርሰ ኵሉ ይትከሀል።

በእንተ ዕሴቶሙ ለእለ ይተልውዎ ለእግዚእ ኢየሱስ

28ወአኀዘ ጴጥሮስ ይበሎ ናሁኬ ንሕነ ኀደግነ ኵሎ ወተሎናከ። 29ወአውሥአ እግዚእ ኢየሱስ ወይቤሎሙ አማን እብለክሙ አልቦ ዘየኀድግ አብያተ ወአኀወ ወአኃተ ወአበ ወእመ ወብእሲተ ወውሉደ ወገራውሀ በእንቲኣየ ወበእንተ ወንጌልየ። 30ዘኢይትዐሰይ ምእተ ምክዕቢተ በዝንቱ ዓለም አብያተ ወአኀወ ወአኃተ ወአበ ወእመ ወውሉደ ወገራውሀ በስደት ወበዓለምሰ ዘይመጽእ ሕይወተ ዘለዓለም። 31ወብዙኃን ቀደምት ይከውኑ ደኀርተ ወደኀርትኒ ይከውኑ ቀደምተ።

በእንተ ሕማማቲሁ ወሞቱ ወትንሣኤሁ

32ወበፍኖት እንዘ የዐርጉ ኢየሩሳሌም ይቀድሞሙ እግዚእ ኢየሱስ ወደንገፁ ወእለሂ ይተልውዎ ፈርሁ ወነሥኦሙ ለዐሠርቱ ወክልኤቱ ወአኀዘ ይንግሮሙ ዘሀለዎ ይርከቦ። 33#ማቴ. 20፥17-19፤ ሉቃ. 18፥31-34። ወይቤሎሙ ናሁ ነዐርግ ኢየሩሳሌም ወይእኅዝዎ ለወልደ ዕጓለ እመሕያው ሊቃነ ካህናት ወጸሐፍት ወይኴንንዎ በሞት ወይሜጥውዎ ለአሕዛብ፤ 34ወይሣለቁ ላዕሌሁ ወይዌርቅዎ ወይቀሥፍዎ ወይቀትልዎ ወይትነሣእ በሣልስት ዕለት።

በእንተ ደቂቀ ዘብዴዎስ

35 # ማቴ. 20፥20-28። ወእንዘ የሐውሩ ምስሌሁ ያዕቆብ ወዮሐንስ ክልኤሆሙ ደቂቀ ዘብዴዎስ ይቤልዎ ሊቅ ንፈቅድ ትግበር ለነ ዘሰአልናከ። 36ወይቤሎሙ ምንተ ትፈቅዱ እግበር ለክሙ። 37ወይቤልዎ ሀበነ ንንበር አሐድነ በየማንከ ወአሐድነ በጸጋምከ በውስተ ስብሐቲከ። 38#14፥36፤ ሉቃ. 12፥50። ወይቤሎሙ እግዚእ ኢየሱስ ኢተአምሩ ዘትስእሉ ትክልኑ እንከ ሰትየ ጽዋዕ ዘአነ እሰቲ ወጥምቀትየኒ ዘአነ እጠመቅ ትጠመቁኑ። 39#ግብረ ሐዋ. 12፥2። ወይቤልዎ እወ ንክል ወይቤሎሙ እግዚእ ኢየሱስ ጽዋዕየሰ ዘአነ እሰቲ ትሰትዩ ወጥምቀትየኒ ዘአነ እጠመቅ ትጠመቁ። 40ወነቢረሰ በየማንየ ወበጸጋምየ አኮ አነ ዘእሁበክሙ አላ ለካልኣን አስተዳለወ ሎሙ አቡየ ዘበሰማያት። 41ወሰሚዖሙ ዐሠርቱ ተምዑ ዲበ ክልኤቱ አኀው ያዕቆብ ወዮሐንስ። 42ወጸውዖሙ እግዚእ ኢየሱስ ወይቤሎሙ ኢተአምሩኑ ከመ መላእክቲሆሙ ለአሕዛብ ይኴንንዎሙ ወዐበይቶሙ ይቀንይዎሙ። 43ወለክሙሰ አኮ ከማሁ አላ ዘይፈቅድ እምኔክሙ ይኩን ሊቀ ይኩንክሙ ገብረ። 44#9፥35። ወዘይፈቅድ እምኔክሙ ይኩን ዐቢየ ይኩንክሙ ላእከ። 45እስመ ወልደ ዕጓለ እመሕያውኒ ኢመጽአ ከመ ይትለአክዎ ዘእንበለ ዳእሙ ከመ ይትለአክ ወከመ ይቤዝዎሙ ለብዙኃን በነፍሱ።

በእንተ ዕዉር በርጤሜዎስ

46 # ማቴ. 20፥29-34፤ ሉቃ. 18፥35-43። ወቦአ ኢያሪሆ ወወፂኦ እምኢያሪሆ ወአርዳኢሁኒ ምስሌሁ ወሰብእኒ ብዙኅ ወሀሎ ጤሜዎስ ወልደ በርጤሜዎስ ዕዉር ይነብር ውስተ ፍኖት ወይስእል። 47ወሰሚዖ ከመ ኢየሱስ ናዝራዊ ውእቱ ከልሐ ወይቤ ተሣሀለኒ ኢየሱስ ወልደ ዳዊት። 48ወገሠጽዎ ብዙኃን ከመ ያርምም ወአፈድፈደ ከሊሐ ወይቤ ወልደ ዳዊት ተሣሀለኒ። 49ወቆመ እግዚእ ኢየሱስ ወአዘዘ ይጸውዕዎ ለውእቱ ዕዉር ወጸውዕዎ ወይቤልዎ እመን ወተንሥእ ወይጼውዐከ ሊቅ። 50ወተንሥአ ወገደፈ ልብሶ#ቦ ዘይቤ «ወለብሰ ልብሶ» ወመጽአ ኀበ እግዚእ ኢየሱስ። 51ወአውሥአ እግዚእ ኢየሱስ ወይቤሎ ምንተ ትፈቅድ እግበር ለከ ወይቤሎ ውእቱ ዕዉር ረቡኒ ከመ እርአይ። 52ወይቤሎ እግዚእ ኢየሱስ ሑር ሃይማኖትከ አሕየወተከ ወርእየ ሶቤሃ ወተለዎ በፍኖት።

Currently Selected:

ወንጌል ዘማርቆስ 10: ሐኪግ

Highlight

Copy