ወንጌል ዘማርቆስ 7

ምዕራፍ 7

በእንተ ፈሪሳውያን ወሥርዐቶሙ

1 # ማቴ. 15፥1-20። ወተጋብኡ ኀቤሁ ጸሐፍት ወፈሪሳውያን መጺኦሙ እምኢየሩሳሌም። 2#ሉቃ. 11፥38። ወርእይዎሙ ለአርዳኢሁ እንዘ ይበልዑ እክለ ዘእንበለ ይትኀፀቡ እደዊሆሙ። 3እስመ ፈሪሳውያንሰ ወኵሎሙ አይሁድ ለእመ በሕቁ ኢተኀፅቡ እደዊሆሙ ኢይበልዑ እክለ እስመ የዐቅቡ ሥርዐቶሙ ለረበናት። 4ወዘሂ ተሣየጡ እምሥያጥ ኢይበልዑ ለእመ ኢያጥመቅዎ በማይ ወባዕደኒ ብዙኀ ሕርመተ ዘይትዐቀቡ ወያጠምቁ ጽዋዓተኒ ወቈሳቍሳተኒ ወጽህርታተኒ ወዐራታተኒ። 5ወይቤልዎ ጸሐፍት ወፈሪሳውያን ለምንት ኢየሐውሩ አርዳኢከ በከመ ሠርዑ ረበናት ወዘእንበለ ይትኀፀቡ እደዊሆሙ ይበልዑ እክለ። 6ወአውሥአ እግዚእ ኢየሱስ ወይቤሎሙ ኦ መደልዋን ሠናየ ተነበየ ኢሳይያስ ላዕሌክሙ በከመ ጽሑፍ «ዝንቱ ሕዝብ በከናፍሪሆሙ ያከብሩኒ ወበልቦሙሰ ነዋኀ ይርኅቁ እምኔየ። 7#ኢሳ. 29፥13። ወከንቶ ያመልኩኒ ወይሜህሩ ሥርዐታተ ትእዛዛተ ሰብእ።» 8ወየኀድጉ ትእዛዘ እግዚአብሔር ወየዐቅቡ ትእዛዛተ ዕጓለ እመሕያው ጥምቀታተ ቈሳቍሳት ወጽህርታት ወጽዋዓት ወባዕደኒ ብዙኀ ዘይመስሎ ለዝንቱ ይገብሩ። 9ወይቤሎሙ ርቱዕኑ ትዕልዉ ትእዛዘ እግዚአብሔር ከመ ትዕቀቡ ትእዛዘ ርእስክሙ። 10#ዘፀ. 20፥12፤ 21፥17፤ ዘሌ. 20፥9፤ ዘዳ. 5፥16፤ ምሳ. 20፥20፤ ኤፌ. 6፥2። ወሙሴ ይቤለክሙ፤ «አክብር አባከ ወእመከ ወዘአሕሠመ ቃለ ላዕለ አቡሁ ወእሙ ሞተ ለይሙት።» 11ወአንትሙሰ ትብሉ ዘይቤሎ ለአቡሁ አው ለእሙ ቍርባን ዘረባኅከ እምኔየ ብሂል። 12ወኢታበውሕዎ ይግበር ምንተኒ ለአቡሁ ወለእሙ። 13ወትስዕሩ ቃለ እግዚአብሔር በእንተ ትእዛዝ ዘሠራዕክሙ ወዓዲ ብዙኀ በአምሳለ ዝንቱ ዘትገብሩ። 14ወጸውዖሙ ካዕበ ለሕዝብ ወይቤሎሙ ስምዑ ኵልክሙ ወለብዉ። 15አልቦ ዘይበውእ እምአፍኣ ውስተ አፉሁ ለሰብእ ዘይክል አርኵሶቶ ዘእንበለ ዳዕሙ ዘይወፅእ እምልቡ ለሰብእ ውእቱ ያረኵሶ ለሰብእ። 16ዘቦ እዝን ሰሚዐ ለይስማዕ። 17ወበዊኦ ቤተ እምኀበ ሕዝብ ተስእልዎ አርዳኢሁ ዘንተ አምሳለ። 18ወይቤሎሙ ከመዝኑ አንትሙሂ ኢትሌብዉ ኢተአምሩኑ ከመ ኵሉ ዘእምአፍኣ ይበውእ ውስተ ሰብእ ኢይክል አርኵሶቶ። 19#ቲቶ 1፥15። እስመ ኢይበውእ ውስተ ልቡ ዘእንበለ ዳእሙ ውስተ ከርሡ ክመ ወጽመ ይትከዐው እንዘ ያነጽሕ ኵሎ መባልዕተ። 20ወይቤሎሙ ዘይወፅእ እምኔሁ ለሰብእ ውእቱ ያረኵሶ ለሰብእ። 21እስመ እምውስጠ ልቡ ለሰብእ ይወፅእ ኵሉ ኅሊና እኩይ ዘውእቱ ዝሙት ወስርቅ ወቀቲል። 22ወሐዊረ ብእሲተ ብእሲ ወትዕግልት ወእከይ ወጕሕሉት ወጽልሑት ወምርዓት ወፅርፈት ወትዕቢት ወሕመሜ ዐይን ወእበድ። 23ዝንቱ ኵሉ እኩይ ዘይወፅእ እምውስጥ ወያረኵሶ ለሰብእ። 24#ማቴ. 15፥21-28። ወተንሢኦ እምህየ ሖረ ብሔረ ጢሮስ ወሲዶና ወቦአ ቤተ ወኢፈቀደ ያእምሮ መኑሂ ወስእነ ተከብቶ።

በእንተ ብእሲት ሲሮፊኒቂሳዊት

25ወእምዝ ሰምዐት ብእሲት በእንቲኣሁ እንተ ጋኔን እኩይ አኀዘ ባቲ ወለታ ወቦአት ወሰገደት ሎቱ ታሕተ እገሪሁ። 26#ሮሜ 1፥14-17። ወአረማዊት ይእቲ ብእሲት ወሲሮፊኒቂሳዊት ወሰአለቶ ያውፅእ ጋኔነ እምወለታ። 27ወይቤላ እግዚእ ኢየሱስ ኅድጊ ቅድመ ምዕረ ይጽገቡ ውሉድ እስመ ኢኮነ ሠናየ ነሢአ ኅብስተ ውሉድ ወውሂብ ለከለባት። 28ወተሰጥወቶ ወትቤሎ እወ እግዚኦ ከለባትኒ ይበልዑ በታሕተ ማእድ ፍርፋራተ ዘያወድቁ ደቂቅ። 29ወይቤላ በእንተዝ ቃልኪ ሑሪ ወፅአ ውእቱ ጋኔን እምወለትኪ። 30#ማቴ. 15፥21-28። ወአተወት ቤታ ወረከበታ ለወለታ ልብስታ ወትነብር ዲበ ዐራታ ወኀደጋ ጋኔና። 31#ማቴ. 15፥29-31። ወኀሊፎ ካዕበ እምጢሮስ ሖረ እንተ ሲዶና ላዕለ ገሊላ ማእከለ ዐሠርቱ አህጉር።

በእንተ በሃም ወጽሙም

32 # 5፥23። ወአምጽኡ ኀቤሁ በሃመ ወጽሙመ ወአስተብቍዕዎ ከመ ይደይ እዴሁ ላዕሌሁ። 33#8፥23። ወአግኀሦ እምኀበ ሰብእ በባሕቲቱ ወወደየ አጻብዒሁ ውስተ እዘኒሁ ወተፍአ ወገሠሠ ልሳኖ። 34#6፥41። ወነጸረ ሰማየ ወአስተምሐረ ወይቤ ኤፍታሔ ኤፍታሔ ተረኀው ብሂል። 35ወሶቤሃ ተከሥታ እዘኒሁ ወተፈትሐ ማእሰረ ልሳኑ ወተናገረ ርቱዐ። 36#5፥43። ወገሠጾሙ ኢይንግሩ ወኢለመኑሂ ወአምጣነ ይከልኦሙ ውእቱ ፈድፋደ ይነግሩ ሎቱ። 37ወፈድፋደ ያነክሩ እንዘ ይብሉ ሚ ሠናይ ኵሎ ሠናየ ገብረ ለጽሙማንሂ ያሰምዖሙ ወለበሃማንሂ ያነብቦሙ።

Currently Selected:

ወንጌል ዘማርቆስ 7: ሐኪግ

Highlight

Copy