ወንጌል ዘማርቆስ 2

ምዕራፍ 2

1 # ማቴ. 9፥1-18፤ ሉቃ. 5፥17-38። ወቦአ ካዕበ ሀገረ ቅፍርናሆም ወጐንድዮ ሕቀ ሰምዑ ሰብእ ዜናሁ ከመ ሀሎ ውስተ ቤት። 2ወተጋብኡ ኀቤሁ ብዙኃን ሰብእ እስከ ኢያገምሮሙ መካን ወኢኀበ ኆኅት ወኮነ ይነግሮሙ ቃሎ ለእለ መጽኡ ኀቤሁ።

በእንተ መፃጕዕ

3ወአምጽኡ ኀቤሁ ድዉየ መፃጕዐ ወይጸውርዎ በዐራት አርባዕቱ ዕደው። 4ወሶበ ስእኑ አብኦቶ ኀቤሁ እስመ ጽፉቅ ሰብእ ኀበ ሀሎ እግዚእ ኢየሱስ ዐርጉ ናሕሰ ወነሠቱ ጠፈረ ወአውረድዎ ምስለ ዐራቱ ዘዲቤሁ ይሰክብ ውእቱ መፃጕዕ። 5ወርእዮ እግዚእ ኢየሱስ ሃይማኖቶሙ ይቤሎ ለውእቱ መፃጕዕ ወልድየ ተኀድገ ለከ ኀጢአትከ። 6ወሀለዉ ህየ ጸሐፍት ይነብሩ ወኀለዩ በልቦሙ። 7#ዘፀ. 34፥7፤ ኢሳ. 43፥25። ወይቤሉ ምንትኑ ዝ ዘከመዝ ይነብብ ፅርፈተ ወመኑ ይክል ኀዲገ ኀጢአት ዘእንበለ አሐዱ እግዚአብሔር ። 8#ግብረ ሐዋ. 2፥24-25። ወአእመሮሙ እግዚእ ኢየሱስ በመንፈሱ ከመ ከመዝ ይኄልዩ ወይቤሎሙ ለምንት ከመዝ ትኄልዩ በልብክሙ። 9ምንት ይቀልል እምብሂሎቱ ለዝ መፃጕዕ ተኀድገ ለከ ኀጢአትከ ወእምብሂሎቱ ተንሥእ ወንሣእ ዐራተከ ወሑር በእገሪከ። 10ከመ ታእምሩ ከመ ብዉሕ ሎቱ ለወልደ ዕጓለ እመሕያው ይኅድግ ኀጢአተ በዲበ ምድር። 11ወካዕበ ይቤሎ ለውእቱ ድዉይ ለከ እብለከ ተንሥእ ወንሣእ ዐራተከ ወእቱ ቤተከ። 12#1፥27። ወተንሥአ ሶቤሃ ወነሥአ ዐራቶ ወወፅአ በቅድመ ኵሉ ሰብእ ወደንገፁ ኵሎሙ ወአእኰትዎ ለእግዚአብሔር ወይቤሉ ግሙራ ኢርኢነ ዘከመዝ። 13ወእምዝ ሖረ እግዚእ ኢየሱስ ካዕበ መንገለ ጽንፈ ባሕር ወሖሩ ኀቤሁ ኵሉ ሕዝብ ወመሀሮሙ።

በእንተ ሌዊ መጸብሓዊ

14 # ማቴ. 9፥9፤ ሉቃ. 5፥27። ወኀሊፎ እምህየ ርእዮ ለሌዊ ወልደ እልፍዮስ እንዘ ይነብር ኀበ ምጽባሕ ወይቤሎ ትልወኒ ወተንሥአ ወተለዎ። 15#ሉቃ. 6፥17። ወእምዝ መስሐ በቤቱ እግዚእ ኢየሱስ ወብዙኃን ኃጥኣን ወመጸብሓን ረፈቁ ምስለ እግዚእ ኢየሱስ ወአርዳኢሁ ወብዙኃን እሙንቱ እለ ተለውዎ። 16ወጸሐፍት ወፈሪሳውያን ርእዮሙ ከመ ይበልዕ ወይሰቲ ምስለ ኃጥኣን ወመጸብሓን ይቤልዎሙ ለአርዳኢሁ ለምንት ይበልዕ ወይሰቲ ሊቅክሙ ምስለ ኃጥኣን ወመጸብሓን። 17#ማቴ. 9፥13፤ ሉቃ. 5፥31፤ 1ጢሞ. 1፥15። ወሰሚዖ እግዚእ ኢየሱስ ይቤሎሙ ሕሙማን ይፈቅድዎ ለዐቃቤ ሥራይ ወአኮ ጥዑያን ኃጥኣነ እጸውዕ መጻእኩ ወአኮ ጻድቃነ።

በእንተ ጾም

18ወአርዳኢሁሰ ለዮሐንስ ወእለሂ ፈሪሳውያን ኮኑ ይጸውሙ ወመጽኡ ወይቤልዎ አርዳኢሁ ለዮሐንስ ወአርዳኢሆሙ ለፈሪሳውያን ይጸውሙ ወአርዳኢከሰ በእፎ ኢይጸውሙ። 19#ማቴ. 9፥14-18፤ ሉቃ. 5፥33-39። ወይቤሎሙ እግዚእ ኢየሱስ ይክሉኑ ደቂቁ ለመርዓዊ ጸዊመ አምጣነ ሀሎ መርዓዊ ምስሌሆሙ። 20ወባሕቱ ይበጽሕ መዋዕል አመ ይነሥእዎ ለመርዓዊ እምኔሆሙ ወይእተ አሚረ ይጸውሙ። 21ወአልቦ ዘይጠቅብ ግምደ ድርግሐ ውስተ ሥጠተ ልብስ ብሉይ ወእመአኮሰ ያነቅዖ ጥቅበቱ ሐዲስ ለብሉይ ወያዐብዮ ለሥጠቱ። 22ወአልቦ ዘይወዲ ወይነ ሐዲሰ ውስተ ዝቅ ብሉይ እስመ ያነቅዖ ወይን ሐዲስ ለዝቅ ብሉይ ወወይኑሂ ይትከዐው ወዝቁሂ ይትኀጐል ወለወይንሰ ሐዲስ ውስተ ዝቅ ሐዲስ ይወድይዎ።

በእንተ ሰንበት

23 # ማቴ. 12፥1-8፤ ሉቃ. 6፥1-5። ወእምዝ ካዕበ ወፈረ እግዚእ ኢየሱስ በሰንበት እንተ ገራውህ ወአርዳኢሁኒ ምስሌሁ ወአኀዙ ይምሐዉ ሰዊተ ወይጺሑ ሎቱ ፍኖተ። 24ወይቤልዎ ፈሪሳውያን ርኢ ዘይገብሩ አርዳኢከ ዘኢይከውን ገቢረ በሰንበት። 25ወይቤሎሙ እግዚእ ኢየሱስ ግሙራ ኢያንበብክሙኑ ዘገብረ ዳዊት አመ ርኅበ ውእቱኒ ወእለሂ ምስሌሁ። 26#ዘሌ. 24፥9፤ 1ሳሙ. 21፥1-7፤ 22፥20። ዘከመ ቦአ ቤተ እግዚአብሔር እንዘ አብያታር ሊቀ ካህናት ወበልዐ ኅብስተ መሥዋዕት ዘኢይከውኖ ለበሊዕ ዘእንበለ ለካህናት ለባሕቲቶሙ ወወሀቦሙ ለእለ ምስሌሁ። 27#ዘዳ. 5፥14። ወይቤሎሙ ሰንበትሰ በእንተ ሰብእ ተፈጥረት ወአኮ ሰብእ በእንተ ሰንበት። 28ወወልደ ዕጓለ እመሕያው ውእቱ እግዚኣ ለሰንበት።

Currently Selected:

ወንጌል ዘማርቆስ 2: ሐኪግ

Highlight

Copy