ወንጌል ዘማቴዎስ 25

ምዕራፍ 25

በእንተ ዐሥሩ ደናግል

1 # ሉቃ. 12፥36፤ ራእ. 19፥7። አሜሃ ትመስል መንግሥተ ሰማያት ዐሥሮን ደናግለ እለ ነሥኣ መኃትዊሆን ወወፅኣ ለቀበላ መርዓዊ። 2ወኀምስ እምውስቴቶን አብዳት እማንቱ ወኀምስ ጠባባት። 3ወአብዳትሰ ነሢኦን መኃትዊሆን ኢነሥኣ ቅብዐ ምስሌሆን። 4ወጠባባትሰ ነሥኣ ቅብዐ በገማዕዊሆን ምስለ መኃትዊሆን። 5ወጐንድዮ መርዓዊ ደቀሳ ኵሎን ወኖማ። 6#1ተሰ. 4፥17። ወከዊኖ መንፈቀ ሌሊት ውውዓ ኮነ ናሁ መርዓዊ መጽአ ፃኡ ውስተ ቀበላሁ። 7#ሉቃ. 12፥38። ወእምዝ ነቅሓ እልኩ ደናግል ኵሎን ወአሠነያ መኃትዊሆን ወወፅጽኣ ለቀበላ መርዓዊ። 8ወእልኩ አብዳት ይቤላሆን ለጠበባት ሀባነ ቅብዐ እምቅብዕክን እስመ መኃትዊነ ጠፍኣነ። 9ወአውሥኣሆን ጠበባት ወይቤላሆን አልቦ ዘየአክል ለነ ወለክን አላ ሑራ ኀቤሆሙ ለእለ ይሠይጡ ወተሣየጣ ለክን። 10ወሐዊሮን ይሣየጣ በጽሐ መርዓዊ ወቦአ ምስሌሁ እልኩ እለ ድልዋት ውስተ ከብካብ ወተዐጽወ ኆኅት። 11ወድኅረ መጽኣ እልክቱሂ ደናግል ወይቤላ እግዚኦ እግዚኦ አርኅወነ። 12#7፥23። ወአውሥኦን፥ ወይቤሎን አማን እብለክን ከመ ኢየአምረክን እስመ ስእንክን ተጊሀ ወአምስዮ አሐተ ሰዓተ ምስሌየ#ቦ ዘኢይጽሕፍ «እስመ ስእንክን ተጊሀ ወአምስዮ አሐተ ሰዓተ ምስሌየ»። 13#24፥42፤ ማር. 13፥33። ትጉሁኬ እስመ ኢተአምሩ ዕለታ ወሰዓታ እንተ ባቲ ይመጽእ ወልደ ዕጓለ እመሕያው።

በእንተ እለ ነሥኡ መካልየ ብሩር

14 # ሉቃ. 19፥12-27። እስመ ከመ ብእሲ ዘይነግድ ወጸውዐ አግብርቲሁ ወወሀቦሙ ንዋዮ ይትገበሩ ቦቱ። 15#ሮሜ 12፥7፤ 1ቆሮ. 12፥4። ቦ ለዘወሀቦ ኀምስተ መክሊተ ወቦ ለዘወሀቦ ክልኤተ መክሊተ ወቦ ለዘወሀቦ አሐደ መክሊተ ወለለአሐዱ እምኔሆሙ በአምጣነ ይክሉ ወሀቦሙ ወነገደ በጊዜሃ። 16ወሖረ ዝኩ ዘኀምሰ መካልየ ነሥአ ወተገበረ ቦቶን ወረብኀ ካልኣተ ኀምሰ መካልየ። 17ወከማሁ ዘሂ ክልኤተ መካልየ ነሥአ ረብኀ ካልኣተ ክልኤተ መካልየ። 18ወዘአሐተሰ መክሊተ ነሥአ ኀለፈ ወከረየ ምድረ ወኀብአ ወርቀ እግዚኡ። 19#18፥23። ወእምድኅረ ብዙኅ መዋዕል አተወ እግዚኦሙ ለእሉ አግብርት ወአኀዘ ይትሐሰቦሙ፤ 20ወቀርበ ዘኀምሰ መካልየ ነሥአ ወአምጽአ ካልኣተ ኀምሰ መካልየ እንዘ ይብል አኮኑ እግዚኦ ኀምሰ መካልየ ወሀብከኒ ወናሁ ኀምስ መካልይ እለ ረባኅኩ ዲቤሆን። 21#24፥45፤ ሉቃ. 16፥10፤ ዕብ. 12፥2። ወይቤሎ እግዚኡ ኦ ገብር ኄር ወምእመን ዘበውኁድ ምእመነ ኮንከ ዲበ ብዙኅ እሠይመከ ባእ ውስተ ፍሥሓሁ ለእግዚእከ። 22ወመጽአ ዘክልኤተ መክሊተ ነሥአ ወይቤ እግዚኦ አኮኑ ክልኤተ መካልየ ወሀብከኒ ናሁ ክልኤተ ካልኣተ መካልየ እለ ረባኅኩ ዲቤሆን። 23ወይቤሎ እግዚኡ ኦ ገብር ኄር ወምእመን ዘበውኁድ ምእመነ ኮንከ ዲበ ብዙኅ እሠይመከ ባእ ውስተ ፍሥሓሁ ለእግዚእከ። 24ወመጽአ ዘአሐተኒ መክሊተ ነሥአ ወይቤ እግዚኦ አአምረከ ከመ ድሩክ ብእሲ አንተ ተአርር እምኀበ ኢዘራዕከ ወታስተጋብእ እምኀበ ኢዘረውከ። 25ወፈሪህየ ሖርኩ ወኀባእኩ መክሊተከ ውስተ ምድር ናሁ እንከ መክሊትከ። 26ወአውሥኦ እግዚኡ ወይቤሎ ኦ ገብር ሀካይ ወእኩይ ተአምረኒኑ ከመ ድሩክ ብእሲ አነ ወአአርር እምኀበ ኢዘራዕኩ ወአስተጋብእ እምኀበ ኢዘረውኩ። 27እምደለወከ ታግብእ ወርቅየ ውስተ ማእድየ ወመጺእየ እምአስተገበርክዎ ለልየ በርዴ። 28ወይቤሎሙ ለእለ ይቀውሙ ህየ ንሥኡ እምኀቤሁ ዘንተ መክሊተ ወሀብዎ ለዘቦቱ ዐሠርቱ መክሊት። 29#13፥12። እስመ ለዘቦ ይሁብዎ ወይዌስክዎ ወለዘሰ አልቦ እለሂ ቦ የሀይድዎ። 30#24፥51። ወለገብርሰ እኩይ ወሀካይ አውፅእዎ አፍኣ ወደይዎ ውስተ ጸናፌ ጽልመት ኀበ ሀሎ ብካይ ወሐቅየ ስነን።

በእንተ ዳግም ምጽአቱ ለክርስቶስ

31 # 1ተሰ. 4፥13፤ 2ተሰ. 1፥7። ወአመ ይመጽእ ወልደ ዕጓለ እመሕያው በስብሐቲሁ ወኵሎሙ መላእክቲሁ ቅዱሳን ምስሌሁ አሜሃ ይነብር ዲበ መንበረ ስብሐቲሁ። 32#ሮሜ 14፥10፤ ራእ. 20፥11። ወይትጋብኡ ኵሎሙ አሕዛብ ቅድሜሁ ወይፈልጦሙ ዘዘዚኣሆሙ ከመ እንተ ይፈልጥ ኖላዊ አባግዐ እምአጣሊ። 33ወያቀውም አባግዐ በየማኑ ወአጣሌ በፀጋሙ። 34#ኢሳ. 65፥23፤ ዮሐ. 17፥24። አሜሃ ይብሎሙ ንጉሥ ለእለ በየማኑ ንዑ ኀቤየ ቡሩካኑ ለአቡየ ትረሱ መንግሥተ ሰማያት ዘድልው ለክሙ እምቅድመ ይትፈጠር ዓለም። 35#ኢሳ. 58፥7፤ ሕዝ. 18፥7-9። እስመ ርኅብኩ ወአብላዕክሙኒ ጸማእኩ ወአስተይክሙኒ ነግደ ኮንኩ ወተወከፍክሙኒ። 36ዐረቁ ወአልበስክሙኒ ደወይኩ ወሐውጽክሙኒ ተሞቃሕኩ ወመጻእክሙ ኀቤየ ወነበብክሙኒ። 37አሜሃ ያወሥኡ ጻድቃን ወይብሉ እግዚኦ ማእዜኑ ርኢናከ ርኁበከ ወአብላዕናከ ወጽሙአከ ወአስተይናከ። 38ወማእዜ ርኢናከ እንግዳከ ወተወከፍናከ ወዕሩቀከ ወአልበስናከ። 39ወማዕዜ ርኢናከ ድዉየከኒ ወሐውጽናከ ወሙቁሐከኒ ወመጻእነ ኀቤከ ወነበብናከ። 40#10፥40፤ ያዕ. 2፥13። ወእምዝ ያወሥኦሙ ንጉሥ ለእለ በየማኑ ወይብሎሙ አማን እብለክሙ ኵሎ ዘገበርክሙ ለአሐዱ እምእሉ ንኡሳን አኀውየ እለ የአምኑ ብየ፥ ሊተ ገበርክሙ። 41#7፥23፤ ኢሳ. 30፥33፤ ሉቃ. 13፥27፤ ራእ. 20፥10-15። ወእምዝ ይብሎሙ ለእለ በፀጋሙ ሑሩ እምኔየ ርጉማን ውስተ እሳት ዘለዓለም ዘድልው ለሰይጣን፥ ወለመላእክቲሁ። 42#ኢዮብ 22፥6-7፤ ያዕ. 4፥17። እስመ ርኅብኩ ወኢያብላዕክሙኒ ጸማእኩ ወኢያስተይክሙኒ። 43ነግደ ኮንኩ ወኢተወከፍክሙኒ ዐረቁ ወኢያልበስክሙኒ ደወይኩ ወኢሐወጽክሙኒ ተሞቃሕኩ ወኢመጻእክሙ ኀቤየ ወኢነበብክሙኒ። 44አሜሃ ያወሥኡ እለ በፀጋሙ ወይብሉ እግዚኦ ማእዜኑ ርኢናከ ርኁበከ ወኢያብላዕናከ ወማእዜ ርኢናከ ጽሙአከ ወኢያስተይናከ ወእንግዳከ ወኢተወከፍናከ ወዕሩቀከ ወኢያልበስናከ ወድዉየከኒ ወኢሐወጽናከ ወሙቁሐከኒ ወኢነበብናከ። 45ወእምዝ ያወሥኦሙ ንጉሥ እንዘ ይብል አማን እብለክሙ ዘኢገበርክሙ ለአሐዱ እምእሉ ንኡሳን አኀውየ ሊተ ኢገበርክሙ። 46#ዳን. 12፥2፤ ዮሐ. 5፥29። ወየሐውሩ እሉሂ ውስተ ኵነኔ ዘለዓለም ወጻድቃንሰ ውስተ ሕይወት ዘለዓለም።

Currently Selected:

ወንጌል ዘማቴዎስ 25: ሐኪግ

Highlight

Copy