ወንጌል ዘማቴዎስ 26

ምዕራፍ 26

1 # ማር. 14፤ ሉቃ. 22። ወኮነ እምዘ ፈጸመ እግዚእ ኢየሱስ ዘንተ ኵሎ ነገረ ይቤሎሙ ለአርዳኢሁ። 2#16፥21፤ 20፥17-20። ተአምሩሁ ከመ እምድኅረ ክልኤ መዋዕል ይከውን ፋሲካ ወይእኅዝዎ ለወልደ ዕጓለ እመሕያው ወይሰቅልዎ። 3ወእምዝ ተጋብኡ ሊቃነ ካህናት ወጸሐፍት ወሊቃናተ ሕዝብ ውስተ ዐጸደ ሊቀ ካህናት ዘስሙ ቀያፋ። 4ወተማከሩ ከመ በሕብል የአኀዝዎ ለእግዚእ ኢየሱስ ወይቅትልዎ። 5ወይቤሉ ባሕቱ አኮኬ በበዓል ከመ ኢይኩን ሀከክ በውስተ ሕዝብ።

በእንተ ብእሲት እንተ ቀብዐቶ ለእግዚእነ ዕፍረተ

6ወበጺሖ እግዚእ ኢየሱስ ቢታንያ ቦአ ቤተ ስምዖን ዘለምጽ። 7#ሉቃ. 7፥37። ወመጽአት ኀቤሁ ብእሲት እንተ ባቲ ቢረሌ ዘምሉእ ዕፍረተ ዘአልባስጥሮስ ዘብዙኅ ሤጡ ወሶጠት ዲበ ርእሱ ለእግዚእ ኢየሱስ እንዘ ይረፍቅ። 8ወርእዮሙ ዘንተ አርዳኢሁ ተምዑ ወአንጐርጐሩ ወይቤሉ ለምንት ዘመጠነዝ ዕፍረተ አኅጐለት ዛቲ ብእሲት። 9እምኢተሠይጠኑ ለብዙኅ ንዋይ ወይትወሀብ ምጽዋተ ለነዳያን። 10ወአእመሮሙ እግዚእ ኢየሱስ ወይቤሎሙ ለምንት ታሰርሕዋ ለዛቲ ብእሲት ሠናየ ግብረ ገብረት ላዕሌየ። 11#ዘዳ. 15፥11። ወለነዳያንሰ ዘልፈ ትረክብዎሙ ወጊዜ ፈቀድክሙ ታሤንዩ ሎሙ#ቦ ዘኢይጽሕፍ «ወጊዜ ፈቀድክሙ ታሤንዩ ሎሙ» ወኪያየሰ አኮ ዘልፈ ዘትረክቡኒ። 12ወዘንተሰ ዕፍረተ ዘሶጠት ዲበ ርእስየ ለቀበርየ ገብረት። 13አማን እብለክሙ በኀበ ተሰብከ ዝ ወንጌል በውስተ ኵሉ ዓለም ያንብቡ ላቲ ዘገብረት ዛቲ ብእሲት ወይዝክርዋ።

በእንተ ይሁዳ አስቆሮታዊ

14ወእምዝ ሖረ አሐዱ እምዐሠርቱ ወክልኤቱ አርዳኢሁ ዘስሙ ይሁዳ አስቆሮታዊ ኀበ ሊቃነ ካህናት። 15#ዘካ. 11፥12። ወይቤሎሙ ሚ መጠነ ትሁቡኒ እመ አገብኦ ለክሙ ወተናገሩ ምስሌሁ ወተሰናአዉ የሀብዎ ሠላሳ ብሩረ። 16ወእምይእቲ ዕለት ኮነ የኀሥሥ ሣኅተ ከመ ያግብኦ ሎሙ።

በእንተ በዓለ ፍሥሕ

17 # ዘፀ. 12፥18-20። ወበቀዳሚት ዕለተ ፍሥሕ ቀርቡ አርዳኢሁ ለእግዚእ ኢየሱስ ወይቤልዎ በአይቴ ትፈቅድ ናስተዳሉ ለከ ትብላዕ ፍሥሐ። 18#21፥3። ወይቤሎሙ እግዚእ ኢየሱስ ሑሩ ውስተ ሀገር ኀበ እገሌ ወበልዎ ለበዓለ ውእቱ ቤት#ቦ ዘኢይጽሕፍ «ለበዓለ ውእቱ ቤት » ይቤለከ ሊቅ ጊዜየ ቀርበ ወበኀቤከ እገብር ፋሲካ ምስለ አርዳእየ። 19ወገብሩ አርዳኢሁ በከመ አዘዞሙ እግዚእ ኢየሱስ ወአስተዳለዉ ፍሥሐ። 20ወምሴተ ከዊኖ ረፈቀ ምስለ ዐሠርቱ ወክልኤቱ አርዳኢሁ። 21#ዮሐ. 13፥21-26። ወእንዘ ይበልዑ ይቤ አማን እብለክሙ ከመ አሐዱ እምኔክሙ ያገብአኒ። 22ወተከዙ ጥቀ ወአኀዙ ይበልዎ በበ አሐዱ አነሁ እንጋ እግዚኦ። 23#ዮሐ. 13፥18። ወአውሥአ ወይቤሎሙ ዘያወርድ እዴሁ ምስሌየ ውስተ መጽብሕየ ውእቱ ያገብአኒ። 24#ማር. 14፥43-47። ወወልደ ዕጓለ እመሕያውሰ የሐውር በከመ ተሠርዐ በእንቲኣሁ፥ ወባሕቱ አሌ ሎቱ ለውእቱ ብእሲ ዘያገብኦ ለወልደ ዕጓለ እመሕያው እምኀየሶ ለውእቱ ብእሲ ሶበ ኢተወልደ። 25ወአውሥአ ይሁዳ ዘያገብኦ ወይቤ አነሁ እንጋ ረቢ ወይቤሎ ለሊከ ትቤ።

በእንተ ሥርዐተ ምሥጢር ዘቍርባን

26 # 1ቆሮ. 11፥23-29። ወእንዘ ይበልዑ ነሥአ ኅብስተ እግዚእ ኢየሱስ ወባረከ ወፈተተ ወወሀቦሙ ለአርዳኢሁ ወይቤሎሙ ሕንክሙ ብልዑ ዝ ውእቱ ሥጋየ። 27ወነሥአ ጽዋዐኒ ወአእኰተ ወወሀቦሙ እንዘ ይብል ስትዩ እምኔሁ ኵልክሙ። 28#ዘፀ. 24፥8፤ ኤር. 31፥31፤ ዘካ. 9፥11። ዝ ውእቱ ደምየ ዘሐዲስ ሥርዐት ዘይትከዐው ለቤዛ ብዙኃን ወለኅድገተ ኀጢአት። 29ወናሁ እብለክሙ ኢይሰቲ እንከ እምዝንቱ አፂረ ፍሬ ወይን እስከ እንታክቲ ዕለት አመ አስትዮ ሐዲሰ ምስሌክሙ በመንግሥተ አቡየ። 30#ማር. 14፥26። ወሰቢሖሙ ወፅኡ ውስተ ደብረ ዘይት። 31#ዘካ. 13፥7፤ ዮሐ. 16፥32። ወእምዝ ይቤሎሙ እግዚእ ኢየሱስ ኵልክሙ ተዐልዉኒ#ቦ ዘይቤ «ትክሕዱኒ» በዛቲ ሌሊት እስመ ይቤ መጽሐፍ እቀትሎ ለኖላዊ ወይዘረዉ አባግዐ መርዔቱ። 32#28፥7። ወእምከመ ተንሣእኩ እቀድመክሙ ገሊላ። 33ወአውሥአ ጴጥሮስ ወይቤሎ እመሂ ኵሎሙ ዐለዉከ አንሰ ኢየዐልወከ ግሙራ። 34#ዮሐ. 13፥38። ወይቤሎ እግዚእ ኢየሱስ አማን እብለከ ከመ በዛቲ ሌሊት ሥልሰ ትክሕደኒ ዘእንበለ ይንቁ ዶርሆ። 35#ማር. 14፥31፤ ሉቃ. 22፥33። ወይቤሎ ጴጥሮስ እመውትሂ ምስሌከ ወኢይክሕደከ ወከማሁ ይቤሉ ኵሎሙ አርዳኢሁ።

ዘከመ ጸለየ እግዚእ ኢየሱስ በጌቴሴማን

36ወእምዝ ሖረ ምስሌሆሙ ውስተ ዐጸደ ወይን ዘስሙ ጌቴሴማን ወይቤሎሙ ለአርዳኢሁ ንበሩ ዝየ እስከ ሶበ አሐውር ከሃ ወእጼሊ። 37#ዕብ. 5፥7። ወነሥኦሙ ለጴጥሮስ ወለክልኤቱ ደቂቀ ዘብዴዎስ ወአኀዘ ይተክዝ ወይኅዝን። 38#ዮሐ. 12፥27። ወእምዝ ይቤሎሙ ተከዘት ነፍስየ እስከ ለሞት ንበሩ ዝየ ወትግሁ ምስሌየ፤ 39#ዮሐ. 18፥11፤ ዕብ. 5፥8። ወተአተተ ሕቀ እምኔሆሙ ወሰገደ በገጹ ወጸለየ ወይቤ አቡየ እመሰ ይትከሀል ይኅልፍ እምኔየ ዝንቱ ጽዋዕ ወባሕቱ ፈቃደ ዚኣከ ይኩን ወአኮ ፈቃደ ዚኣየ። 40ወሖረ ኀበ አርዳኢሁ ወረከቦሙ እንዘ ይነውሙ ወይቤሎ ለጴጥሮስ ከመዝኑ ስእንክሙ ተጊሀ አሐተ ሰዓተ ምስሌየ። 41ትግሁ፥ ወጸልዩ፥ ከመ ኢትባኡ ውስተ መንሱት እስመ መንፈስ ይፈቱ፥ ወሥጋ ይደክም። 42ወካዕበ ሖረ ወጸለየ ወይቤ ኦ አቡየ እመ ይትከሀል#ቦ ዘይቤ «ኢይትከሀል» ዝንቱ ጽዋዕ ይኅልፍ ዘእንበለ እስተዮ ወባሕቱ ይኩን ፈቃድከ። 43ወገብአ ካዕበ ኀበ አርዳኢሁ ወረከቦሙ እንዘ ይነውሙ እስመ ከብዳ አዕይንቲሆሙ በድቃስ። 44ወኀደጎሙ ወሖረ ካዕበ በሣልስ ወጸለየ ኪያሁ ክመ ቃለ እንዘ ይብል። 45ወገብአ ካዕበ ኀበ አርዳኢሁ ወይቤሎሙ ኑሙ እንከሰ ወአዕርፉ ናሁ በጽሐ ጊዜሁ ወያገብእዎ ለወልደ ዕጓለ እመሕያው ውስተ እደ ኃጥኣን። 46ተንሥኡ፥ ንሑር ናሁ ቀርበ ዘያገብአኒ።

ዘከመ ተእኅዘ እግዚእ ኢየሱስ

47ወእንዘ ዘንተ ይትናገር ናሁ በጽሐ ይሁዳ እምዐሠርቱ ወክልኤቱ አርዳኢሁ ወምስሌሁ መጽኡ ብዙኃን ሰብእ ምስለ መጣብሕ ወዕፀው እምኀቤሆሙ ለሊቃነ ካህናት ወሊቃናተ ሕዝብ። 48ወዘያገብኦ ወሀቦሙ ትእምርተ እንዘ ይብል ዘእስዕሞ ውእቱ ኪያሁ አኀዙ። 49ወቀርበ ይእተ ጊዜ ይሁዳ ኀበ እግዚእ ኢየሱስ ወሰዐሞ ወይቤሎ በሓ ረቢ። 50#መዝ. 54፥14። ወይቤሎ እግዚእ ኢየሱስ በእንተዝኑ መጻእከ ካልእየ ወእምዝ ቀርቡ ወአንሥኡ እደዊሆሙ ወአኀዝዎ ለእግዚእ ኢየሱስ። 51#ዘዳ. 18፥19። ወናሁ አሐዱ እምእለ ምስሌሁ ለእግዚእ ኢየሱስ ሰፍሐ እዴሁ ወመልሐ መጥባሕቶ ወዘበጦ ለገብረ ሊቀ ካህናት ወመተሮ እዝኖ ዘየማን።#ቦ ዘኢይጽሕፍ «ዘየማን» 52#ዘፍ. 9፥6፤ ራእ. 13፥10። ወይቤሎ እግዚእ ኢየሱስ አግብኣ ለመጥባሕትከ ውስተ ቤታ እስመ ኵሎሙ እለ መጥባሕተ ያነሥኡ በመጥባሕት ይመውቱ። 53#ዳን. 7፥10። ይመስለከኑ ዘኢይክል አስተብቍዖቶ ለአቡየ ይፈኑ ሊተ ዘይበዝኁ እምዐሠርቱ ወክልኤቱ ሠራዊተ መላእክት። 54#ኢሳ. 53፥4-10። ወእፎ እንከ ይትፌጸም ቃለ መጽሐፍ ዘይቤ እስመ ከመ ዝ ሀለዎ ይኩን። 55#ሰቈ. ኤር. 4፥2፤ ዮሐ. 8፥20። ወይቤሎሙ እግዚእ ኢየሱስ ለሕዝብ ሶቤሃ ከመ ሰራቂኑ መጻእክሙ ትዴግኑኒ ወተአኀዙኒ በዕፀው ወበመጣብሕ ወዘልፈ እነብር ምስሌክሙ በምኵራብ ወእሜህር ወኢአኀዝክሙኒ። 56#ግብረ ሐዋ. 13፥27። ወዝ ኵሉ ዘኮነ ከመ ይብጻሕ ቃለ ነቢያት ወእምዝ ኵሎሙ አርዳኢሁ ኀደግዎ ወጐዩ። 57#ዮሐ. 18፥13-24። ወእለሰ አኀዝዎ ለእግዚእ ኢየሱስ ወሰድዎ ኀበ ቀያፋ ሊቀ ካህናት ወኀበ ተጋብኡ ጸሐፍት ወሊቃናት። 58ወተለዎ ጴጥሮስ እምርኁቅ እስከ ዐጸደ ሊቀ ካህናት ወቦአ ውስጠ ወነበረ ምስለ ወዐልት ይርአይ ማኅለቅቶ ለነገር። 59ወየኀሥሡ ሊቃነ ካህናት ወጸሐፍት ወሊቃናት ወኵሉ ዐውድ ሰማዕተ ሐሰት በዘይቀትልዎ ለእግዚእ ኢየሱስ ወኢረከቡ ሎቱ ጌጋየ።#ቦ ዘኢይጽሕፍ «ሎቱ ጌጋየ» 60ወመጽኡ ብዙኃን ሰማዕተ ሐሰት ወስእኑ ወድኅረ መጽኡ ክልኤቱ። 61#ዮሐ. 2፥19-24። ወይቤሉ ይቤ ዝንቱ እክል ነሢቶቶ ለቤተ እግዚአብሔር ወበሣልስት ዕለት አሐንጾ። 62ወተንሥአ ሊቀ ካህናት ወይቤሎ ኢትሰምዕኑ፥#ቦ ዘይቤ «ኢትሰጠውኑ» እንዘ መጠነዝ ያስተዋድዩከ። 63#27፥12-15። ወኢያውሥኦ እግዚእ ኢየሱስ ወይቤሎ ሊቀ ካህናት አምሐልኩከ በእግዚአብሔር ሕያው ከመ ትንግረኒ እመ አንተሁ ክርስቶስ ወልዱ ለእግዚአብሔር። 64#16፥27፤ 25፥31፤ ሮሜ 14፥10። ወይቤሎ እግዚእ ኢየሱስ አንተ ትቤ ወባሕቱ እብለክሙ እምይእዜሰ ትሬእይዎ ለወልደ ዕጓለ እመሕያው እንዘ ይነብር በየማነ ኀይል ወእንዘ ይመጽእ በደመና ሰማይ። 65#ዮሐ. 10፥33። ወሶቤሃ ሠጠጠ አልባሲሁ ሊቀ ክህናት እንዘ ይብል ምንተ እንከ ትፈቅዱ ሎቱ ሰማዕተ ናሁ ፀረፈ ወሰማዕክሙ ጽርፈቶ ምንተ እንከ ትብሉ፤ 66#ዮሐ. 19፥7። ወአውሥኡ ወይቤሉ ዝንቱ ድልው ለሞት። 67#ኢሳ. 50፥6፤ ማር. 14፥65። ወእምዝ ወረቁ ውስተ ገጹ ወኰርዕዎ ርእሶ በኅለት ወጸፍዕዎ እንዘ ይብሉ። 68ተነበይ ለነ ክርስቶስ መኑ ውእቱ ዘጸፍዐከ።

በእንተ ክሕደተ ጴጥሮስ፥ ወንስሓሁ

69 # ሉቃ. 22፥51-70፤ ዮሐ. 18፥15-27። ወጴጥሮስሰ ይነብር አፍኣ ውስተ ዐጸድ ወመጽአት አሐቲ ወለት ወትቤሎ አንተሂ ምስለ ኢየሱስ ገሊላዊ ሀለውከ። 70ወክሕደ በቅድመ ኵሉ እንዘ ይብል ኢየአምሮ ለዘትብሊ። 71ወወፂኦ ኆኅተ ርእየቶ ካልእት ወትቤሎሙ ለእለ ይቀውሙ ህየ ዝኒ ሀሎ ምስለ ኢየሱስ ናዝራዊ። 72ወክሕደ ካዕበ ወመሐለ ከመ ኢየአምሮ ለውእቱ ብእሲ። 73ወጐንድዮ ሕቀ መጽኡ እለ ይቀውሙ ወይቤልዎ ለጴጥሮስ አማን አንተሂ እምኔሆሙ አንተ ወነገርከ ያዐውቀከ። 74ወሶቤሃ መሐለ ወተረግመ ከመ ኢየአምሮ ለውእቱ ብእሲ ወበጊዜሃ ነቀወ ዶርሆ። 75ወተዘከረ ጴጥሮስ ቃሎ ለእግዚእ ኢየሱስ ዘይቤሎ ሥልሰ ትክሕደኒ ዘእንበለ ይንቁ ዶርሆ ወወፅአ አፍኣ ወበከየ ብካየ መሪረ።

Currently Selected:

ወንጌል ዘማቴዎስ 26: ሐኪግ

Highlight

Copy