ኀበ ሰብእ ዕብራውያን 12

ምዕራፍ 12

በእንተ ተሊዎተ እግዚእ

1 # 10፥36። ወበእንተ ዝንቱ ንሕነኒ እለ ብነ እሙንቱ ሰማዕት ኵሎሙ ዘየዐውዱነ ከመ ደመና ንግድፍ እምላዕሌነ ኵሎ ክበደ ወሁከተ ኀጢአት ወንሩጽ በትዕግሥት ኀበ ዘጽኑሕ ለነ ተስፋነ ዘሃይማኖት። 2#2፥10-13፤ ፊልጵ. 2፥8። ወንትልዎ ለፍጹም መልአክነ ኢየሱስ ክርስቶስ ዘተዐገሠ ኀፍረተ መስቀል አናሕስዮ በእንተ ፍሥሓሁ ዘጽኑሕ ሎቱ ወመነና ለኀፍረት ወነበረ በየማነ መንበረ እግዚአብሔር። 3#ሉቃ. 2፥34፤ ዮሐ. 15፥18-21። ኀልይዎ እስኩ ለዘከመዝ ተዐገሠ እምኃጥኣን ወተናገርዎ በበይናቲክሙ ከመ ኢትስራሕ ነፍስክሙ ወኢትድክሙ። 4እስመ ዓዲክሙ ኢጸናዕክሙ እስከ ለደም ትበጽሑ ተጋደልዋ ለኀጢአት ወእበይዋ ወአብድርዋ ለትምህርተ ተስፋክሙ።

5 # 3፥11-12፤ ኢዮብ 5፥17፤ ምሳ. 3፥11-12፤ ራእ. 3፥19። እስመ ከመ ውሉድ ይብለክሙ «ወልድየ ኢታስተጽሕብ ተግሣጸ እግዚአብሔር ወኢትትገኀሥ እምኔሁ ሶበ ይዘልፈከ እምገሠጸከ። 6እስመ ለዘአፍቀረ እግዚአብሔር ይጌሥጽ ወይቀሥፍዎ ለኵሉ ውሉድ ዘይትፈቀድ።» 7#ዘዳ. 8፥5፤ 2ሳሙ. 7፥14። ለተግሣጽክሙ ተዐገሡ እስመ ከመ ውሉዱ ያፈቅረክሙ እግዚአብሔር መኑ ውሉድ ዘኢይጌሥጾ አቡሁ። 8#መዝ. 73፥13-15። ወእመሰ ኢገሠጹክሙ አንደበራ አንትሙ ወኢኮንክሙ ውሉደ ወዐረይክሙ ኵልክሙ። 9#ዘኍ. 16፥22-27። ወእመሰ አበዊነ እለ ወለዱነ በሥጋ ይጌሥጹነ ወነኀፍሮሙ እፎ እንከ ፈድፋደ ንግነይ ወንትአዘዝ ለአበ መንፈስነ ይደልወነ ወንሕየው። 10#1ጴጥ. 1፥15-16። ወእሙንቱሰ ለስላጤ ለኅዳጥ መዋዕል ይጌሥጹነ በከመ ፈቀዱ ወውእቱሰ ለእንተ ትኄይስ ለነ ከመ ንርከብ ቅድሳቲሁ። 11#ኢሳ. 57፥3-15፤ ያዕ. 3፥18። ኵሉ ተግሣጽ ኢይመስል ትፍሥሕተ ለጊዜሁ ዳእሙ ኀዘን ውእቱ ወድኅረሰ ትፈሪ ሰላመ ለእለ ተገሠጹ ወተዐስዮሙ ጽድቀ። 12#ኢሳ. 35፥3። ወበእንተዝ አርትዑ እደ ፅውስተ ወእግረ ፅቡሳተ። 13#ምሳ. 4፥26። ወግበሩ መንኰራኵረ ርቱዐ ለእገሪክሙ ከመ ይሕየው ሕንካሴ ልብክሙ ወኢትትዐቀፉ። 14#ሮሜ 12፥18፤ 2ጢሞ. 2፥22፤ ማቴ. 5፥8። ወሩጹ ኀበ ሰላም ምስለ ኵሉ ወኢትኅድጉ ቅድሳቲክሙ ወዘእንበሌሁሰ አልቦ ዘይሬእዮ ለእግዚአብሔር።

ዘከመ ኢይደሉ አስትቶ ጸጋ እግዚአብሔር

15 # ዘዳ. 29፥18። አስተሐይጹ አልቦ ዘያሰትት ጸጋ እግዚአብሔር ወአልቦ ዘይትረከብ ሥርው መሪር እንተ ታሠርጽ ሕማመ እንተ ታስሕቶሙ ወታረኵሶሙ ለብዙኃን። 16#ዘፍ. 25፥29-34፤ ኤፌ. 5፥3፤ ራእ. 21፥8። አልቦ ዘይከውን ዘማዌ ወርኩሰ ከመ ዔሳው ዘሤጠ ብኵርናሁ ለአሐዱ መብልዕ። 17#ዘፍ. 27፥30-39። ተአምሩ ከመ ድኅሬሃ ፈቀደ ይረስ በረከተ ወአውፅእዎ እስመ ተስእኖ ወኀጥአ ፍኖተ በዘይኔስሕ ወኀሠሣ እንዘ ይበኪ። 18#ዘፀ. 19፥12-20፤ ዘዳ. 5፥22-23። እስመ ኢመጻእክሙ ኀበ እሳት ዘያስተርኢ ዘይነድድ ወጽልመት ግፍትዕት ወቆባር ወዐውሎ ወጣቃ። 19#ዘፀ. 20፥18-19። ወድምፀ መጥቅዕ ወቃለ ነገር ዘሰምዑ እሙንቱ ወኢፈቀዱ ዳግመ ይትናገሮሙ። 20#ዘፀ. 19፥12-13። እስመ ስእንዎ አጽምዖቶ ለዘተናገሮሙ ወእመኒ እንስሳ ቀርቦ ለውእቱ ደብር ይዌግርዎ። 21#ዘዳ. 9፥19። ወዝንቱ ኵሉ በእንተ ውእቱ ግሩም ዘአስተርአዮሙ ወሙሴኒ ይቤ ርዑድ ወድንጉፅ አነ። 22#መዝ. 67፥18፤ ዳን. 7፥10፤ ራእ. 3፥12። ወአንትሙሰ በጻሕክሙ ኀበ ጽዮን ሀገረ እግዚአብሔር ሕያው ኢየሩሳሌም እንተ በሰማያት ወኀበ አእላፍ መላእክት ፍሡሓን። 23#11፥16-40፤ ሉቃ. 10፥20፤ ራእ. 19፥11። ወማኅበረ በኵር እለ ጽሑፍ አስማቲሆሙ በሰማያት ወኀበ እግዚአብሔር መኰንነ ኵሉ ወኀበ መንፈሰ ጻድቃን ፍጹማን። 24#9፥15፤ ዘፍ. 4፥10። ወኀበ ኢየሱስ ኅሩይ ወመርሕ ለሐዳስ ሥርዐት ወለንዝኀተ ደም ነባቢ ዘይኄይስ ተናግሮ እምዘ አቤል ዑቁ እንከ ኢትእበይዎ ለዘተናገረክሙ እምሰማይ። 25#2፥2-10። ሶበ እሙንቱ ኢድኅኑ እስመ አበይዎ ለዘአስተርአዮሙ በደብር እፎ እንከ ፈድፋደ ንሕነ ለእመ ሜጥነ ገጸነ እምኔሁ ለዘመጽአ እምሰማያት። 26#ሐጌ 2፥6፤ ማቴ. 24፥29-35። ወአድለቅለቃ ለምድር ቃሉ ይእተ አሚረ ወይእዜኒ ነገረ ወይቤ ዓዲ ምዕረ አነ አድለቅለቃ ለምድር ወአኮ ለምድር ባሕቲታ ዓዲ ለሰማይኒ። 27#መዝ. 101፥26። ወዘይቤ ዓዲ ምዕረ ያሬኢ ከመ ያፈልሶ ወያኀልፎ ለዘያንቀለቅል እስመ ፍጡራን እሙንቱ ከመ ይንበር ዘኢያንቀለቅል። 28#ዳን. 2፥44፤ 7፥14፤ መዝ. 2፥11። ወበእንተዝ ንነሥእ ንሕነ መንግሥተ ዘኢያንቀለቅል ወብነ ጸጋሁ እንተ በእንቲኣሁ ንሠውዕ ለእግዚአብሔር ወናሠምሮ በጸሎት ወበስኢል ወበፍርሀት ወበረዓድ። 29#ዘዳ. 4፥24። እስመ አምላክነ እሳት በላዒ ውእቱ።

Currently Selected:

ኀበ ሰብእ ዕብራውያን 12: ሐኪግ

Highlight

Copy