ኀበ ሰብእ ዕብራውያን 13

ምዕራፍ 13

በእንተ ፍቅር ወተወክፎ ነግድ

1 # ሮሜ 12፥10፤ 2ጴጥ. 1፥7። ወሀልዉ በተፋቅሮ ምስለ ቢጽክሙ። 2#ሮሜ 12፥13፤ ዘፍ. 19፥2-3። ወኢትርስዑ ተቀብሎ ነግድ እስመ በእንቲኣሁ ቦ እለ ከፈሎሙ ከመ ይትቀበሉ ነግደ መላእክት እንዘ ኢየአምሩ። 3#ማቴ. 25፥36። ተዘከሩ ሙቁሓነ ዘከመ ተሞቃሕክሙ ምስሌሆሙ ወእለ ተሣቀዩ ከመ ዘሀለውክሙ በሥጋክሙ። 4#ዘፀ. 20፥14፤ 1ቆሮ. 6፥9፤ ኤፌ. 5፥5። ክቡር አውስቦ በኵለሄ ወለምስካቦሙኒ አልቦቱ ስእበት ለዘማውያንሰ ወለእለ ያረኵሱ ሥጋሆሙ ይኴንኖሙ እግዚአብሔር። 5#ዘዳ. 31፥6፤ 1ዮሐ. 1፥5፤ ኢያ. 1፥5። ወእንዘ ኢታፈቅሩ ንዋየ ሀልዉ ወባሕቱ የአክለክሙ ዘብክሙ እስመ ውእቱ ይቤ «ኢየኀደገከ ወኢይትሄየየከ።» 6#መዝ. 56፥5፤ 118፥7። ወይእዜኒ ተአሚነነ ንበል እግዚአብሔር ይረድአኒ ወኢይፈርህ ዕጓለ እመሕያው ምንተ ይሬስየኒ። 7#1ቆሮ. 4፥16። ተዘከሩ መኳንንቲክሙ ዘነገሩክሙ ቃለ እግዚአብሔር ወእንዘ ትሬእዩ ሠናየ ግዕዞሙ ወሞፃእቶሙ#ቦ ዘኢይጽሕፍ «ወሞፃእቶሙ» ተመሰሉ በሃይማኖቶሙ። 8#1ቆሮ. 3፥11፤ ራእ. 1፥17-18፤ ዮሐ. 8፥58። እስመ ኢየሱስ ክርስቶስ ውእቱ ዘትማልም ወዮም ወክመ ውእቱ እስከ ለዓለም። 9#ኤፌ. 4፥14፤ ሮሜ 14፥17፤ 13፥10። ኢታምጽኡ ካልአ ነኪረ ትምህርተ እስመ ይኄይስ ጸጋሁ ያስተፍሥሕ ልበክሙ ወአኮ በመባልዕት ዘኢይበቍዖሙ ለእለ ያንሶስዉ ቦቱ። 10#8፥4-5። ወብነ ምሥዋዕ ዘኢይከውኖሙ ይብልዑ እምኔሁ እለ የሐርምዋ ለደብተራ። 11#ዘሌ. 16፥27፤ ዘፀ. 29፥14። እስመ ዘይሠውዑ እንስሳ ደመ ያበውእ ሊቀ ካህናት ውስተ ቅድስተ ቅዱሳን በእንተ ኀጢአት ወያውዕይዎ ሥጋሁ በአፍኣ እምትዕይንት። 12#ዮሐ. 19፥16-17። ወበእንተዝ ኢየሱስኒ ከመ ይቀድሶሙ ለሕዝብ በደሙ በአፍኣ እምትዕይንት ተቀትለ። 13#11፥26። ወይእዜኒ ንፃእ ኀቤሁ አፍኣ እምትዕይንት እንዘ ንጸውር ትዕይርቶ። 14#11፥10፤ 12፥28። ዘአኮ ብነ ዝየ ሀገር ዘይነብር አላ እንተ ትመጽእ መንግሥተ ነኀሥሥ። 15#መዝ. 49፥14፤ ሆሴ. 14፥3፤ 1ጴጥ. 2፥5። ቦኑ እንከ ኢይከውነነ ናብእ መሥዋዕተ ስብሐት በኵሉ ጊዜ ለእግዚአብሔር ፍሬ ከናፍሪነ ከመ ንእመን በስሙ። 16#ፊልጵ. 4፥18። ወኢትርስዑ ምሒረ ነዳያን ወተሳትፎቶሙ እስመ ዘከማሁ መሥዋዕት ይኤድሞ ለእግዚአብሔር።

በእንተ አክብሮተ መምህራን

17 # ሕዝ. 3፥18፤ 33፥6-9። ተአዘዙ ለመኳንንቲክሙ ወተኰነኑ ሎሙ እስመ እሙንቱ ይተግሁ በእንተ ነፍስክሙ ከመ ዘይትሐሰብዎሙ በቅድመ እግዚአብሔር በእንቲኣክሙ ከመ በፍሥሓ ይግበርዎ ለዝንቱ ወኢይንሀኩ። 18#2ቆሮ. 1፥10-12። ወዝንቱ ይደልወክሙ ከመ ትጸልዩ በእንቲኣነ ወንትአመን ከመ ታፈቅሩ ወትፈቅዱ ሠናየ ለኵሉ። 19ወፈድፋደ ትግበሩ ዘንተ አስተበቍዐክሙ ከመ ፍጡነ እብጻሕክሙ።

አምኃ ወበረከት

20 # ኢሳ. 40፥11፤ ሕዝ. 34፥26፤ ዮሐ. 10፥11። ወአምላከ ሰላም ዘአንሥኦ እምዉታን ለሊቀ ኖሎተ አባግዕ በደመ ሥርዐት ዘለዓለም ለእግዚእነ ኢየሱስ ክርስቶስ። 21ያጽንዕክሙ ከመ ትግበሩ ፈቃዶ በኵሉ ምግባረ ሠናይ እንዘ ውእቱ ይገብር ለክሙ ሥምረቶ በኢየሱስ ክርስቶስ ዘሎቱ ስብሐት ለዓለመ ዓለም አሜን። 22አስተበቍዐክሙ አኀዊነ ተወከፉ ቃለ ትምህርት ዘመሀርኩክሙ እስመ በኅጹር አዘዝኩክሙ። 23ወአእምሩ ከመ ጢሞቴዎስ እኁነ ዘተፈነወ እምኀቤነ ኀቤክሙ ወእመሰ አፍጠነ መጺአ እሬእየክሙ። 24አምኁ ኵሎ መኳንንቲክሙ ወኵሎ ቅዱሳነ አምኁክሙ ኵሎሙ እለ በኢጣልያ። 25ወጸጋሁ ለእግዚእነ ምስለ ኵልክሙ አሜን።

ተፈጸመት መልእክት ኀበ ሰብእ ዕብራውያን ወተፈነወት በእደ ጢሞቴዎስ ወተጽሕፈት በአጣልያ።

ወስብሐት ለእግዚአብሔር።

Currently Selected:

ኀበ ሰብእ ዕብራውያን 13: ሐኪግ

Highlight

Copy