መልእክተ ዮሐንስ ሐዋርያ 1 4

ምዕራፍ 4

ዘከመ ይደሉ ተዐቅቦ እምሐሳውያን ነቢያት

1አኀዊነ ለኵላ መንፈስ ኢትእመንዋ አላ አመክርዋ ለመንፈስ ለእመ እምኀበ እግዚአብሔር ይእቲ እስመ ብዙኃን ሐሳውያን ነቢያት መጽኡ ውስተ ዓለም እለ ኢየአምርዎ ለኢየሱስ ክርስቶስ። 2#1ቆሮ. 12፥3። ወበዝንቱ ተአምርዋ ለመንፈሰ እግዚአብሔር ወለመፈሰ ሐሰት ኵላ መንፈስ እንተ ተአምን ከመ ኢየሱስ ክርስቶስ መጽአ በሥጋ ሰብእ እምነ እግዚአብሔር ይእቲ። 3ወኵላ መንፈስ እንተ ኢተአምን በኢየሱስ ክርስቶስ ከመ መጽአ በሥጋ ሰብእ ኢኮነት እምነ እግዚአብሔር ወዝንቱ ውእቱ ሐሳዌ መሲሕ ዘሰማዕክሙ ከመ ይመጽእ ወይእዜኒ ወድአ መጽአ ወውስተ ዓለም ሀሎ። 4#2ዜና መዋ. 32፥6። ወአንትሙሰ እምነ እግዚአብሔር አንትሙ ደቂቅየ ወሞእክምዎ ለእኩይ እስመ የዐቢ ዘሀሎ ምስሌክሙ እምነ ዘውስተ ዓለም ሀሎ። 5#ዮሐ. 3፥31፤ 15፥19። ወእሙንቱሰ እምነ ዓለም እሙንቱ ወበእንተ ዝንቱ እምነ ዓለም ይነብቡ ወዓለምኒ ይሰምዖሙ። 6#ዮሐ. 8፥47። ወንሕነሰ እምነ እግዚአብሔር ንሕነ ወዘየአምሮ ለእግዚአብሔር ይሰምዐነ ወዘኢኮነ እምእግዚአብሔር ኢይሰምዐነ ወበዝንቱ ነአምራ ለመንፈሰ ጽድቅ ወለመንፈሰ ሐሰት። 7አኀዊነ ለንትፋቀር በበይናቲነ እስመ ተፋቅሮ እምነ እግዚአብሔር ውእቱ ወኵሉ ዘይትፋቀር እምነ እግዚአብሔር ውእቱ ተወልደ ወየአምሮ ለእግዚአብሔር። 8ወዘሰ ኢያፈቅር ቢጾ ኢየአምሮ ለእግዚአብሔር እስመ እግዚአብሔር ፍቅር ውእቱ። 9#ዮሐ. 3፥16፤ ቲቶ 2፥11። ወበዝንቱ ተዐውቀ ፍቅሩ ለእግዚአብሔር ላዕሌነ እስመ ለወልዱ ዋሕድ ፈነዎ ውስተ ዓለም ከመ ንሕዮ በእንቲኣሁ። 10#ሮሜ 5፥10፤ 2ቆሮ. 5፥19፤ ቈላ. 1፥20። ወዝንቱ ውእቱ ፍቅሩ ለእግዚአብሔር ወአኮ ንሕነ ዘአፍቀርናሁ አላ ውእቱ አፍቀረነ ወፈነዎ ለወልዱ ይኅድግ ለነ ኀጣውኢነ። 11#ማቴ. 18፥33። አኀዊነ እመሰ ከመዝ አፍቀረነ እግዚአብሔር ንሕነኒ ይደልወነ ንትፋቀር በበይናቲነ። 12#ዘፀ. 33፥20፤ ዮሐ. 1፥18፤ 1ጢሞ. 6፥16። ለእግዚአብሔርሰ አልቦ ዘርእዮ ግሙራ ወእመሰ ተፋቀርነ በበይናቲነ እግዚአብሔር ይነብር ምስሌነ ወፍቅሩሂ ፍጹም ሀሎ ምስሌነ። 13ወበዝንቱ ነአምር ከመ ምስሌሁ ንነብር ወውእቱኒ ምስሌነ እምነ መንፈሱ ቅዱስ ዘወሀበነ። 14ወንሕነኒ ርኢነ ወሰማዕነ፥ ከመ አብ ፈነወ ወልዶ መድኅነ ዓለም። 15#5፥5። ወኵሉ ዘየአምን ከመ ኢየሱስ ውእቱ ወልደ እግዚአብሔር እግዚአብሔር ይነብር ምስሌሁ ወውእቱኒ ምስለ እግዚአብሔር። 16ወንሕነሰ አእመርነ ወአመነ እንተ ቦ ፍቅረ እግዚአብሔር ምስሌነ እግዚአብሔርሰ ፍቅር ውእቱ ወዘኒ ነበረ በተፋቅሮ ምስለ እግዚአብሔር ይነብር ወእግዚአብሔርኒ ምስሌሁ። 17#3፥21። ወበዝንቱ ትትፌጸም ፍቅሩ ለእግዚአብሔር ምስሌነ ከመ ንርከብ ገጸ በዕለተ ደይን በኀቤሁ እስመ በከመ ኮነ ውእቱ ኮነ ንሕነኒ ውስተ ዝንቱ ዓለም። 18ወአልቦ ፍርሀት ውስተ ተፋቅሮትነ አላ ተፋቅሮሰ ፍጽምት አፍኣ ታወፅኣ ለፍርሀት እስመ ፍርሀትሰ መቅሠፍት ባቲ ወዘሰ ይፈርህ ኢኮነ ፍጹመ በተፋቅሮ። 19ወንሕነኒ ንትፋቀር በበይናቲነ ወናፍቅሮ ለእግዚአብሔር እስመ ውእቱ ቀደመ አፍቅሮተነ። 20#2፥4-11። ወእመሰ ቦ ዘይብል አፈቅሮ ለእግዚአብሔር ወይጸልእ ቢጾ ሐሳዊ ውእቱ እስመ ዘያፈቅሮ ለቢጹ ዘይሬኢ ለእግዚአብሔርኒ ያፈቅሮ ዘኢይሬኢ ወዘሰ ኢያፈቅር ቢጾ ዘይሬኢ እፎ እንከ ይክል አፍቅሮቶ ለእግዚአብሔር ዘኢይሬኢ። 21#ማር. 12፥31። ወዝንቱ ትእዛዝ እንተ ብነ እምኔሁ ከመ ናፍቅሮ ለእግዚአብሔር ወናፍቅር ቢጸነ ወኵሉ ዘያፈቅሮ ለእግዚአብሔር ያፈቅር ቢጾ።

Currently Selected:

መልእክተ ዮሐንስ ሐዋርያ 1 4: ሐኪግ

Highlight

Copy