መልእክተ ዮሐንስ ሐዋርያ 1 3

ምዕራፍ 3

በእንተ ፍቅረ እግዚአብሔር

1 # ዮሐ. 1፥12-13፤ 16፥3፤ ሆሴ. 1፥10። ወርእዩ ዘከመ እፎ ፍቅሩ ዘወሀበነ አብ ከመ ውሉደ እግዚአብሔር ንኩን ወኮነሂ ወበእንተዝ ኢፈተወነ ዓለም እስመ ሎቱኒ ኢያእመሮ። 2#ሮሜ 8፥16፤ ቈላ. 3፥4። አኀዊነ ይእዜሰ ደቂቀ እግዚአብሔር ንሕነ ወዓዲ ኢተዐውቀ ለነ ምንተ ንከውን ነአምር ባሕቱ ከመ እምከመ ተዐውቀ ለነ ከማሁ ንከውን እስመ ንሬእዮ ሎቱ በከመ ውእቱ። 3#ኢሳ. 53፥4-5፤ 1ጴጥ. 2፥24፤ ዮሐ. 1፥29። ወኵሉ ዘተወከለ ኪያሁ ያነጽሕ ርእሶ በከመ ውእቱ ንጹሕ። 4ወኵሉ ዘይገብራ ለኀጢአት ወለአበሳኒ ገብራ ውእቱ እስመ ኀጢአት አበሳ ይእቲ። 5ወተአምሩ ከመ አስተርአየ ዝክቱ ከመ ያሰስላ ለኀጢአት ወኀጢአትሰ አልቦ ኀቤሁ። 6#ሮሜ 6፥14። ወኵሉ ዘቦቱ ይነብር ኢይኤብስ እስመ ኵሉ ዘይኤብስ ኢይሬእዮ ወኢየአምሮ። 7#2፥29። ደቂቅየ ኢያስሕቱክሙ ወኵሉ ዘይገብራ ለጽድቅ ጻድቅ ውእቱ በከመ ዝክቱ ጻድቅ ውእቱ። 8ወዘሰ ይገብራ ለኀጢአት እምነ ጋኔን ውእቱ እስመ ቀዳሚሁ ሰይጣን አበሰ ወበእንተ ዝንቱ አስተርአየ ወልደ እግዚአብሔር ከመ ይስዐር ግብሮ ለጋኔን። 9#5፥18፤ ሉቃ. 8፥11። ወኵሉ ዘይትወለድ እምእግዚአብሔር ኢይገብራ ለኀጢአት እስመ ዘርዐ ዚኣሁ ወቦቱ ይነብር ወኢይክል አብሶ እስመ እምእግዚአብሔር ተወልደ። 10ወበዝንቱ እሙራን ውእቶሙ ደቂቀ እግዚአብሔር ወደቂቀ ጋኔን ወኵሉ ዘኢይገብራ ለጽድቅ ኢኮነ እምእግዚአብሔር ወከማሁ ዘኢያፈቅር ቢጾ።

ዘከመ ይደሉ ንትፋቀር በበይናቲነ

11 # ዮሐ. 13፥34። እስመ ዛቲ ይእቲ ትእዛዝ እንተ ሰማዕክሙ ትካት ከመ ንትፋቀር በበይናቲነ። 12#ዘፍ. 4፥8፤ ማቴ. 23፥35፤ ይሁዳ 11። ወአኮ በከመ ቃየን ዘእምእኩይ ውእቱ ወቀተሎ ለእኁሁ ወበእንተ ምንት ቀተሎ እስመ ምግባረ ዚኣሁ እኩይ ውእቱ ወዘእኁሁሰ ጻድቅ ውእቱ። 13#ማቴ. 5፥11፤ ዮሐ. 15፥18-19። ወኢታንክሩ አኀዊነ እመሂ ዓለም ጸልአክሙ። 14#2፥11፤ ዮሐ. 5፥24። ንሕነሰ ነአምር ከመ ዐደውነ እሞት ውስተ ሕይወት እስመ ናፈቅር ቢጸነ ወዘሰ ኢያፈቅር ቢጾ ውስተ ጽልመት ይነብር። 15#ማቴ. 5፥21-22። ኵሉ ዘይጸልእ ቢጾ ቀታሌ ነፍስ ውእቱ ወተአምሩ ከመ ለቀታሌ ነፍስ አልቦ ሕይወት ዘለዓለም እንተ ትሄሉ ላዕሌሁ። 16ወበዝንቱ አእመርናሁ ለተፋቅሮ እስመ ውእቱ መጠወ ነፍሶ በእንቲኣነ ወንሕነኒ ይደልወነ ንመጡ ነፍሰነ በእንተ ቢጽነ። 17#4፥20፤ ያዕ. 2፥15። ወዘቦቱ መንበርተ ዝንቱ ዓለም ወይሬኢ ቢጾ ጽኑሰ ወየዐጹ ምሕረቶ እምኔሁ እፎ ይነብር ፍቅረ እግዚአብሔር ላዕሌሁ። 18#ያዕ. 1፥22። ደቂቅየ ኢንትፋቀር በቃል ወበልሳን ዘእንበለ በምግባር ወበጽድቅ። 19ወበዝንቱ ነአምር ከመ እምጽድቅ ንሕነ ወንሕነሰ ቅድሜሁ ናመክሮ ለልብነ። 20ወእመሰ ያርስሐስሐነ ልብነ እምአበሳነ የአብዮ እግዚአብሔር ለልብነ ወየአምር ኵሎ። 21#2፥28፤ 4፥17። አኀዊነ እመሰ ኢቀለየነ ልብነ ገጽ ብነ ኀበ እግዚአብሔር። 22ወዘሂ ሰአልናሁ ንነሥእ እምኀቤሁ እስመ ትእዛዞ ነዐቅብ ወንገብር ዘይኤድሞ ቅድሜሁ። 23#ዮሐ. 6፥29፤ 13፥34፤ 15፥12-17። ወዛቲ ይእቲ ትእዛዙ ከመ ንእመን በወልዱ ኢየሱስ ክርስቶስ ወንትፋቀር በበይናቲነ በከመ ወሀበነ ትእዛዞ። 24#ዮሐ. 14፥31። ወዘሰ የዐቅብ ትእዛዞ ቦቱ ይነብር ወውእቱኒ ቦቱ ወበዝንቱ ነአምር ከመ ይነብር ምስሌነ እምነ መንፈሱ ቅዱስ ዘወሀበነ።

Currently Selected:

መልእክተ ዮሐንስ ሐዋርያ 1 3: ሐኪግ

Highlight

Copy