Wongeela Maarqoos 11

Yesus Ulfinna Ol Aana'aan Gara Yerusaalemii Titti Aseenuu Isaa

(Mat 21:1-11; Luq 19:28-40; Yoh 12:12-19)

1Yesusii fi barattoonni isaa gara Yerusaalemii yeroo dhiyaatanitti karaa Beetfaage'eetii fi Bitaaniya'aatiin gara gaara ejerssaa jedhamuu ni gayan. Achiin duubatti'llee Yesus barattoota isaa keessaa lamaan akkana jechu'uun ni erge, 2«Gara ganda isiniin durana jiruu durssa'aatii deemaa, achi'llee akkuma geettaniin bakkumatti ilmmayyoon harre'ee ka eennu'llee haga ammaa titti hin yaabbatin hidhamee ni argattan, hiika'aatii garana fida'aanii. 3Naminni kumi'llee ‹maali'iif kana raawwattan?› yoo isiniin jedhee, ‹Gooftaan waan isa barbaaduuf jedhaa, bakkumatti deebisee ni ergaan› jedhaanii.»

4Isaan'llee deemanii ilmmayyoo karaa bira balbala manaa titti hidhamee argataniinii ni hiikaniin. 5Yeroo sanitti'llee namoota achi dhaabatanii turan keessaa tokko tokko, «Ilmmayyoo harre'ee ka hiikittan maali'iif?» jechu'uun, isaan ni gaafatan.

6Isaan'llee waan Yesus jedhe isaanitti ni himan, namoonni'llee isaan ni dhiisan. 7Barattoonni isaa'llee ilmmayyoo harre'ee gara Yesusii ni fidan, uffata isaanii'llee dudda ilmmayyo'oo irratti rarannii, Yesus ni yaabbateen. 8Namoonni baayi'een uffata isaanii karaa irratti ni afan ture, kuuniin'llee muka bosonaa irraa damee mura'aa, karaa irratti ni afan ture. 9Worra duranaa dabrranii fi worra duubaan horddofan marrinuu, «Hoosa'inaa! Ka Maqaa Goofta'aatiin dhufu, ka eebbifame! 10Mootummaan abbaa keenna Daawiitii ka dhufu, ka eebbifame. Hosa'ianaa ol sami'itti!» jedha'aa, ni iyyan ture.

11Yesus'llee Yerusaalemiin yeroo gayetti gara Mana Waaqeffanna'aa ni aseene, waan naannaya jiru mara'llee ni laale, guyyaan'llee dhiyee waan tureef barattoota isaa kudha lamaan woliin, Yerusaalemiin keessaa bayee gara Bitaaniyaa ni deeme.

Muka Harbbu'uu Ka Yesus Abaare

(Mat 21:18-19)

12Bariisaa'llee Bitaaniya'aa yoo deebi'an, Yesus ni beelaye. 13Baalli isi'ii ka lalise mukattii harbbu'uu takka'llee fagotti argee, mee waan firiin irratti argamu yoo ta'e jechu'uun gara isi'ii ni dhaqe, garuu gara isi'ii yeroo dhiyaatetti yeroon ji'a harbbuun itti daraarttuu waan hin turiniif, baala malee womaayyuu isii irra hin arganne. 14Kanaaf Yesus mukattii harbbu'uutiin, «Ammaa achitti eennu'llee si irraa firii hin nyaatin!» jedheen.

Kana'llee yoo dubbattu, barattoonni isaa ni dhagayan.

Yesus Worra Mana Waaqeffanna'aa Titti Wol Gabayatan Baasuu Isaa

(Mat 21:12-17; Luq 19:45-48; Yoh 2:13-22)

15Gara Yerusaalemii yeroo gayanitti'llee Yesus gara Mana Waaqeffanna'aa aseenee, namoota keessatti gurguranii fi bitatan baasuu jala ni qabe, minjaalota qarshii jijjiirttotaatii fi barcumoota worra handarii gurgurtootaa'llee ni garagalche. 16Naminni kumi'llee meeshaa kamiinuu baadhatee, moonaa Mana Waaqeffanna'aa keessa asii fi achi akka dabrruuf, hin eeyyamaminne. 17Akkana'llee jechu'uun isaan ni barsiise, « ‹Manni kiyya ummata maraaf mana kadhanna'aa jedhama!› jedhamee, hin barreeffaminne moo? Isin garuu goda saamttotaa ni taasfittaniin.»

18Itti gaafatamoonni qeesotaatii fi barsiisonni seeraa kana yoo dubbatu ni dhagayaniin, ummanni marrinuu barsiisa isaa ni maalalffata waan tureef ni sodaataniin, kanaaf attam taasisaanii akka isa itti balleessaniin, toofittaa ni barbaadan ture.

19Yeroo laftti dhiyetti'llee Yesusii fi barattoonni isaa magaalaa keessaa ni bayan.

Barnnoota Muka Harbbu'uu Irraa Argame

(Mat 21:20-22)

20Guyyaa itti aanutti ganama obboroo kara'aan yoo dabrru, mukattiin harbbu'uu hidda isi'iitiin goddee ni argan. 21Phexiros'llee dhimmicha yaadateeti Yesusiin, «Yaa barsiisaa! Kunoo, mukattiin ati abaarte goddee jirtti» jedheen.

22Yesus'llee akkana isaaniin ni jedhe, «Waaqatti amanaa, 23#Mat 17:20; 1Qor 13:2.dhugamaan isiniin jedha, naminni kumi'llee onnee isaa titti uduu hin shakkin wonitti inni barbaadu akka raawwatamuuf amanee gaara kanaan, ‹asii ka'iitii gara garba ciisa'aa titti darbami› yoo jedhe, ni ta'aaf. 24Kanaaf kadhanna'aan waanuma maraa uduu kadhattanii, akka waan isiniif raawwatamee taasisa'aatii amanaa, wonitti kadhattan marri'llee isiniif ni kennama. 25#Mat 6:14, 15.Abbaan keessan ka sami'ii jiru cubbuu keessan akka isinii dhiisuuf, isin'llee kadhanna'aaf yeroo dhaabattanitti naminni waan tokkoon isin mufachiisee yoo jiraate, dhiifama taasisa'aaf. [ 26Isin balleessaa kaanniiniitiif dhiifama taasisuu yoo dhabaattan garuu, abbaan keessan ka samii jiru, cubbuu keessan'llee dhiifama isinii hin taasisu.»]

Yesus Aangoo Maali'iitiin Akka hojjatuuf Gaafii Dhiyaate

(Mat 21:23-27; Luq 20:1-8)

27Deebi'anii'llee gara Yerusaalemii ni dhufan, Yesus'llee Mana Waaqeffanna'aa keessa dedeebi'aa uduma jiru itti gaafatamoonni qeesotaa, barsiisonni seeraatii fi jaarsotiin gara isaa dhufaniiti, 28«Wonittoota kanniin ka raawwattu aangoo maali'iitiin? Yookiin wonittoota kanniin akka raawwattuuf, aangoo ka si kenne eennu?» jechu'uun, ni gaafataniin.

29Yesus'llee akkana isaaniin ni jedhe, «Ani'llee gaafii tokko isin ni gaafadha, isin deebii yoo naaf kennitan ani'llee wonittoota kanniin aangoo maali'iitiin akka raawwadhu, isinitti ni hima. 30Cuuphaan Yohaannisii Waaqa biraa ture moo, yookiin nama biraayyi? Mee naa deebisaa» isaaniin jedhe.

31Isaan'llee, «Eegaa maal haa jennu?» jechu'uun ufii isaaniitii woliin ni mari'atan, «Waaqa biraayyi yoo jenne, ‹eegaa maali'iif itti amanuu dhabiddan ree?› nuun jedha, 32‹nama biraayyi› yoo jenneen hoo?» kana akka hin jenneef ummanni marri Yohaannisiin, dhugamaanuu nabiyyicha ni jedhaniin waan tureef, ni sodaatan. 33Kanaaf, «Nu'u hin beekinnu.» jechu'uun, ni deebisaniif.

Yesus'llee, «Eegaa ani'llee aangoo maali'iitiin wonittoota kanniin akka raawwadhu, isinitti hin himu» isaaniin ni jedhe.

Currently Selected:

Wongeela Maarqoos 11: ArsiDNT

Highlight

Copy