Wongeela Maarqoos 10
10
Yesus Waayee Fuudhaa Barsiisuu Isaa
(Mat 19:1-12; Luq 16:18)
1Yesus achii ka'ee, laga Yoordaanosii gara dhiyaatiin dabrree, gara arddii Yihuda'aa ni deeme. Namoonni haalaan baayi'ee'llee deebi'anii gara isaa wol ni gayan, inni'llee akkuma aadaa isaa titti isaan ni barsiisa ture.
2Fariisoota keessa'llee muraasonni gara isaa ni dhiyaatan, isa qormaatu'uuf'llee barbaadanii, «Naminni haadha worraa isaa akka hiiku seeraan eeyyamameefii jira?» jechu'uun, ni gaafataniin.
3Yesus'llee, «Museen waayee waan kanaa maal isin ajaje?» isaaniin jedhe.
4 #
Mat 5:31. Isaan'llee, «Museen ammoo woraqaa raga'aa hiikkamuu isi'ii muldhisu kenneefii, akka hiikuun eeyyamee jira» isaan jedhan.
5Yesus'llee akkana jechu'uun isaanii ni deebise, «Museen ajaja kana ka isiniif barreesse, onneen keessan hadooddee waan isin hin dhageenneef. 6Garuu jalqaba uumamaatii kaasee, ‹Waaqinni dhiiraa fi dubarttii isaan taasisee ni uume, 7kanaaf naminni haadhaa fi abbaa isaa dhiisee, haadha worraa isaatiin wolitti ni dabalama. 8Lamaanuu qaama tokko ni ta'an› achii duubatti'llee lama ta'uun isaanii hafee, tokko ni ta'an. 9Eegaa ka Waaqinni wolitti maraare naminni addaan hin baasuu» jedhe.
10Gara manaa yeroo deebi'anitti barattoonni isaa waayee kanaa deebi'anii Yesusiin ni gaafataniin, 11#Mat 5:32; 1Qor 7:10, 11.inni'llee akkana jechu'uun isaanii ni deebise, «Haadha worraa isaa hiikee dubarttii bira'aa ka fuudhu, haadha worraa isaa irratti sagaagalee jira. 12Akkuma kana abbaa worraa isi'ii hiikittee dhiira bira'aa titti dubarttiin heerumttu, sagaagalttuu taatee jirtti jechu'u.»
Yesus Daa'imman Eebbisuu Isaa
(Mat 19:13-15; Luq 18:15-17)
13Yesus akka isaan qaqabuuf daa'imman gara isaa ni fidan, barattoonni isaa garuu namoota daa'imman gara isaa fidanitti, ni baanatan. 14Yesus'llee kana arguu isaatiin dallanee, barattoota isaatiin akkana ni jedhe, «Mootummaan Waaqaa isaan akkana jiran kanniiniif waan taateef daai'mman gara kiyya haa dhufanii dhiisaa, isaan hin dhoogina'a, 15#Mat 18:3.Dhugamaan isiniin jedha, Mootummaa Waaqaa akka daa'immanii ta'ee ka ufitti hin fudhanneen, gonkumaa itti hin aseenu.» 16Kanaan duubatti daa'imman ammateeti, harka isaa'llee isaan irra kaayee isaan ni eebbise.
Qabeenna Arddi'iitii Fi Mootummaa Waaqaa
(Mat 19:16-30; Luq 18:18-30)
17Yesus achii bayee deema'aa uduma jiru, naminni tokko gara isaa fiigee isa duranatti jilibbiiffateeti, «Yaa barsiisaa arjjaa, jireenna bara baraa argachu'uuf maal raawwachu'utu narraa mala?» jechu'uun, ni gaafateen.
18Yesus'llee akkana jechu'uun ni deebiseef, «Waayee maaliif arjjaa naan jetta? Waaqa tokko malee eennu'llee arjjaan hin jiru. 19Ajajoota ni beekitta, isaan'llee, hin ajjeesin, hin sagaagalin, hin hatin, dharaan ragaa hin bayin, hin sobin, abba'aa fi haadha kee kabaji, ka jedhaman.»
20Namichi'llee, «Yaa barsiisaa, ajajoota kanniin ammoo ijoollummaa kiyya irraa jalqabee eegee jira» jedheen.
21Yesus'llee laaleeniiti ni jaalateen, akkana'llee ni jedheen, «Wonitti tokko qoftti si hafee jira, deemii, waan qabddu maraa gurgurii hiyyeesotaaf kenni, qabeenna wolitti qabame sami'itti ni argata, kanaan duubatti koottuu, ana horddof.» 22Namichi'llee kana yeroo dhagayetti fuulli isaa gaddaan ni gurraachate, qabeenna baayi'ee ni qaba waan tureef, gadda'aa ni deeme.
23Yesus'llee ufi irra garagalee laaleeti barattoota isaatiin, «Dureesotaaf gara Mootummaa Waaqaa titti aseenuun attam rakkisa'a!» isaaniin jedhe.
24Barattoonni isaa'llee dubbii isaatiin ni maalalffatan, Yesus garuu deebisee akkana isaaniin ni jedhe, «Yaa ijoolle! Gara Mootummaa Waaqaa titti aseenuun attam rakkisa'a! 25Naminni dureessi gara Mootummaa Waaqaa titti aseenuu irra, gaalli qaawwa marfe'eetiin uduu hulluuqee irra salphaa ta'a.»
26Barattoonni isaa'llee haalaan maalalaniiti, «Eegaa haala kanaan eenutu fayyu'uuf danda'aa ree?» woliin jedhan.
27Yesus'llee gara isaanii laalee, «Dhugaa wonitti kun nama biratti hin danda'amu, Waaqa biratti garuu ni danda'ama. Waaqaa wonitti marrinuu ni danda'amaaf» isaaniin jedhe.
28Phexiros'llee, «Kunoo nu'u waan maraa dhiifinnee, si horddofnnee jirra» jedheen.
29Yesus'llee akkana jechu'uun ni deebise, «Dhugamaan isiniin jedha, waayee kiyyaa fi waayee wongeelaatiif jedhee, mana isaa yookiin obboleeyyan isaa yookiin obboleettiiwwan isaa yookiin haadha isaa yookiin abbaa isaa yookiin ijoollee isaa yookiin qabiyyee isaa naminni dhiisu, caala'atti ni argata. 30Baruma kanattuu ari'ataman woliin manniin, obboleeyyan, obboleettiiwwan, haadhotii, ijoollee, qabiyyee dachaa dhibbaan ni fudhata, biyya dhufttutti'llee jireenna bara baraa ni argata. 31#Mat 20:16; Luq 13:30.Haa ta'u malee ka duranaa worri ta'an baayi'eewwan worra duuba irraa ni ta'an, worra duuba irraa ka ta'an'llee worra duranaa ni ta'an.»
Yesus Waayee Du'uu Isaatii Fi Du'aa Ka'iinssa Isaa Yeroo Sadaffaatiif Durssee Akka Dubbate
(Mat 20:17-19; Luq 18:31-34)
32Karaa gara Yerusaalemii fidu irra uduma jiran, Yesus isaan dura dura ni deema ture, barattoonni isaa'llee waan kanaan ni maalaliffatan, worri duuba irraan isa horddofaniin'llee soodaatanii jiran turan. Deebi'ee'llee kudha lamaan gara isaa dhiyeessee, waayee waan isa irra gayu'uuf jiruu, akkana jechu'uun isaanii ni ibise. 33«Kunoo, gara Yerusaalemii deemuu keenna, Ilmi Namaa itti gaafatamoota qeesotaatii fi barsiisota seeraatiif dabarffamee ni kennama, isaan'llee murtii du'aa itti ni murtteessan, ummata Waaqa dhugaa titti hin amanneef'llee dabarssanii ni kennaniin. 34Ummanni Waaqa dhugaa titti hin amanne'llee itti baldan, itti ni tufan, ni dhaananiin, ni ajjeesaniin'llee. Garuu guyyaa sadihiin duubatti, du'aa ni ka'a.»
Kadhaa Yaaqoobiitii Fi Yohaannisii
(Mat 20:20-28)
35Ijoolleen Zabdewoosii Yaaqoobii fi Yohaannis gara Yesusii dhiyaatanii, «Yaa barsiisaa, waan si kadhannu maraa akka nuuf taasfttuuf ni barbaanna» ni jedhaniin.
36Inni'llee, «Maal akka isinii taasisuuf barbaadan?» isaaniin jedhe.
37Isaan'llee, «Ulfinna Mootummaa keetii titti, tokkoo keenna mirga keetiin, tokkoo keenna ammoo bitaa keetiin akka teennuuf, nuuf eeyyami» jedhaniin.
38 #
Luq 12:50. Yesus garuu, «Waan kadhattanuu hin beekittan, ani ka dhugu duloo #10:38 Duloo:- Meehaa waadaa yoo aseenan ittiin dhugamu rakkinnaa dhugu'uuf ni dandeettanii ree? Akkuma kana cuuphama ani cuuphamu hoo cuuphamu'uuf ni dandeettanii?» isaaniin jedhe.
39Isaan'llee, «Ee, ni dandeenna» jedhan. Yesus'llee akkana isaaniin jedhe, «Dhugamaanuu duloo ani dhugu ni dhugiddan, cuuphama ani cuuphamu'llee ni cuuphamttan, 40garuu, mirgaa kiyyaa fi bitaa kiyyaan taa'uu ka kennu anaa miti, kun ka kennamu namoota Waaqinni isaaniif, qopheesse qofaaf» jedhe.
41Ka hafan kurnnan kana dhagayanii Yaaqoobii fi Yohaannisiin irratti, ni dallanan. 42#Luq 22:25, 26.Yesus mara isaaniituu gara isaa waamee akkana isaaniin jedhe, «Itti gaafatamoota ummata Waaqa dhugaa titti hin amannee jedhamanii ka waamamanii fi durssitoonni isaanii'llee isaan irratti aangoo akka qaban ni beekittan, 43#Mat 23:11; Mar 9:35; Luq 22:26.isin biratti garuu akkana ta'uu hin malu, isin jiddu'uu guddaa ta'uu ka barbaadu, tajaajilaa keessan ta'uu ni qaba. 44Akkuma kana isin jiddu'uu ka ol aanaa ta'uu barbaadu, garbcha maraa haa ta'u. 45Ilmi Namaatuu tajaajilu'uu fi lubbuu isaa gatii namoota baayi'e'ee taasisee kennu'uuf dhufe malee, akka isaa tajaajilaniif hin dhufinne.»
Yesus Barxiimewosii Ijaan Jaama'aa Fayyisuu Isaa
(Mat 20:29-34; Luq 18:35-43)
46Kanaan duubatti Yesus barattoota isaa woliin gara magaalaa Iyyaarikoo ni dhufan. Dabrree'llee magaala'aa bayee yeroo deemutti, ummanni haalaan baayi'e'ee isa ni horddofaniin ture. Karaa bira ammoo ilma Xeemeewosii ka ta'e Barxiimewos ka jedhamu namichi jaamaan tokko taa'ee ni kadhata ture. 47Achiin'llee ka dabrru Yesusii Naazireetii ta'uu isaa yeroo beeketti, «Ilma Daawiitii yaa Yesus, yabo'oo garaa naa laaf!» jedha'aa, iyyuu jala ni qabe.
48Baayi'eewwan, «Caldhisi!» jedhanii, itti ni baanatan, inni garuu, «Yaa Ilma Daawiitii! Yabo'oo naaf nayi!» jedha'aa, caala'atti ni iyye.
49Yesus'llee dhaabateeti, «Waamaanii!» jedhe, isaan'llee jaamichaan, «Jedhi amma jabaadhuu ka'i! Yesus si waamaatii!» ni jedhaniin.
50Inni'llee uffata isaa gateeti utaalee ka'ee, gara Yesusii ni dhaqe.
51Yesus'llee, «Maal akka siif raawwadhu barbaadda?» jechu'uun, ni gaafateen.
Namichi jaamaan'llee, «Yaa barsiisaa, yabo'oo ijji kiyya akka naaf argitu naaf taasisi» jedheen.
52Yesus'llee, «Jedhi deemi, amantiin kee si fayyisee jira» jedheen.
Namichi'llee bakkumatti argu'uuf ni danda'e, kara'atti'llee Yesusiin horddofee ni deeme.
Currently Selected:
Wongeela Maarqoos 10: ArsiDNT
Highlight
Share
Copy
Want to have your highlights saved across all your devices? Sign up or sign in
