Jenesis 50
50
Nuarin tas alupas 50.
1 Nehtigtaig vai Jekob. 4 Et leh intas o Fero a Josef mika yi apan um atelmoi etman. 7 Er atelmoi yin. 15 Era ugyi Josef a ilpu etwan va yi jim aru nedo has ura aien, et ago eropse ra a Josef. 22 Niji mesese iran. 23 Et ecet ilpu mapoi ohwat hal o un aien. 24 Et asan tas upyi asaig ehele ilpu etwan aien mika eri adumoij pan ara. 25 Et ika aien eri asig yi aktit intas a ilpu etwan vai niji eduon. 26 Et mas aien, er ati yin an nelcau.
1IS eropse an nesganimtai etman a Josef, um imitaig yin, um aijumnyi yin.
2Is abrai ilpu aheca o un a Josef, ilpu atimi aminjinaig nemehe, mika eri aspi nohui etman: eris aspi nohui Isreel a ilpu atimi aminjinaig nemehe.
3Eris aminjinaig nadiat is forte vai yin; is idivaig nedo ura vai ilpu atimi eris aspi ra: eris imitaig yin a nup Ijipt ira adiat is sevente.
4Is wat ti pan itac nadiat iji ehki eris imitaig yin, is tas a Josef ehele atimi an nimnim u Fero, um ika, El et upene inliiumopomia vai nyak, ek ugyi caua ainyak mika aki tas ehele Fero aijaua, um ika,
5Is leh intas asig yi aktit unyak a etmak, is ika aien, Ekpu idim mas ainyak: namu atelmoi nyak aiek an pece Kenan, an netheso unyak kis ahtai ainyak imi nyak. Va nitai inigki ek ugyi euc ainyak mika an abrai nyak aiek, mika ki apan ainyak um atelmoi etmak, ekpu lep adumoij pam ainyak.
6Is ika a Fero, Namu apan aiek um atelmoi etmam, et idivaig intas upyi asaig unyum ehelen.
7Is apan a Josef mika yi atelmoi etman: eris ahced yin a ilpu aheca u Fero, ilpu atimi alupas an nimnim o un, im ilpu atimi alupas asega an pece Ijipt,
8im natimi asega an nimnim u Josef, im ilpu etwan, im lep ra an nimnim u etman: eris udei ilpu hal ura ache ara, im siip ura, im nanin ura, im kurimatau ura, an pece Cosen.
9Eris ahced yin a ilpu atimi ateuc irai jariot im ilpu atimi ateuc irai hors: eris ahinag acen ara.
10Eris yetpan ara u nuarin nobohtan u Etat eris auud korn iran, an nahaijin Jortan itac, eris taig alupas eahki ara um taig afakatotau: is ika a Josef eri imitaig etman ira adiat is seven.
11Eris wat ecetai intaig ura a nup uran pece, nup u Kenan marom, an nuarin nobohtan u Etat, eris ika ara, Et esjilid nehtigtaig inigki u nup Ijipt: va nitai inigki eris anvi nidan par ika, Ebel-misreem, (Nehtigtaig u nup Ijipt), et eteuc an nahaijin Jortan itac.
12Eris ago a ilpu hal u Jekob, is idivaig is asaig ehele ra aien:
13eris imiapan yin an pece Kenan a ilpu hal o un, um atelmoi yin an netheso an nuarin nobohtan Makpila, is auanimtan a Ebraham ehele Ifron nup u Hed, ubutpotet pan Mamri, va etpu ohuun aien, mika yi etheso.
14Is atelmoi etman a Josef, ja par adumoij pan Ijipt, aien im ilpu etwan, im lep ra asega eris ahced yin ara par atelmoi etman.
15Eris wat ecetai a ilpu etwai Josef mika is mas a etmara, eris ika ara. Kit etpu amcel vai caija a Josef, um aru nedo has asega uja intis ago vai yin akaija.
16Eris abrai natimi is ethi ara mika yi apan ehele Josef, um ika, Is asan tas o un a etmam ja par mas, um ika,
17Akumu tas ehele Josef aijaua, um ika, Ek ugyi euc ainyak, mika an jim aru nedo has u ilpu etwam aiek, im nauatatimi ura; eris ago nedo has vai euc ara: ja ecra ugyi euc aijama mika an jim aru nedo has u ilpu aheca u Atua u etmaija. Eris wat tas ehele Josef ara is taig aien.
18Eris lep apan a ilpu etwan um atpuse an nuhup o un; eris ika ara, Ecra idim ilpu aheca unyum aijama.
19Is ika ehele ra a Josef, Jim imtitaig aijaua: ek eti idivaig Atua ainyak.
20Akis idim aktaktai has vai nyak aijaua; ja is aktaktai upene a Atua, va uhpu imiatamaig atimi inyi ahinag, et idivaig an nopan inig.
21Akumu jim imtitaig aijaua: ekpu alaamia nitai caig ainyak, im ilpu hal unyimia. Is tas updak ehele ra aien va etpu eropse inliinmopora ara.
22Is amen Ijipt a Josef im lep ra an nimnim u etman: is umoh a Josef irai mesese is wun huntret im ten.
23Is ecet ilpu mapoi Ifreem a Josef: is lep atijai an nijin neduon a Josef ilpu hal u Mekir, inhal u Manasi.
24Is ika ehele ilpu etwan a Josef, Ekpu mas ainyak: ja etpu idim ateghe caua a Atua, um iknipagki caua an pece inigki, um imiapan caua an pece iyehki is asig yi aktit intas vaig aien ehele Ebraham, im Aisak, im Jekob.
25Is leh intas asig yi aktit u nup Isreel a Josef, um ika, Etpu idim ateghe caua a Atua, akumu apos pan niji eduok aijaua eahki.
26Is mas a Josef, is eteuc inmesese is wun huntret im ten iran: eris aspi nohun ara, um ati yin an nelcau an pece Ijipt.
Currently Selected:
Jenesis 50: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
