Eksotus 1
1
Nuarin tas alupas 1.
1 Et wat mas a Josef, era asvalav a nup Isreel, um ahinag acen. 8 Et ehcerucai alupas ra a natimarid mat. 15 Erau ecen va Atua ahwat takata ehro erau aminjinaig ilpu takata apos ilpu hal ura, um imiaras ilpu halav atamaig. 22 Et tas alep a Fero, um ika eri erekhaigse ilpu halav atamaig an nofowai.
1NIDAI nup Isreel asega im ilpu hal ura eris ahced Jekob ara, um apan Ijipt, ji igki; nan,
2Ruben, im Simeon, im Livai, im Juta,
3im Isakar, im Sebulun, im Benjamin,
4im Tan, im Naftalai, im Cat, im Eser.
5Eris sevente natimi iji ehki asega eris ahes irai Jekob ara: is upyi amen Ijipt a Josef.
6Ja is mas a Josef, im ilpu etwan asega, im natimi asega eris umumoh ara an nopan iyehki.
7Eris asvalav a nup Isreel, um apos ilpu hal ura is ahinag; eris ahinag ara, um esjilid acen; eris ohua ara an pece.
8Ja is eteuc a natimarid is eche an pece Ijipt, is eti ato Josef aien.
9Is tas ehele ilpu dualep o un aien, um ika, Almoi, era ahinag a nup Isreel, um esjilid iraija:
10ti ago nedo efaifa vai ra akaija, va eri jim ahinag acen ara; uhu wit ati nedoa, erupu leh imi ilpu atimi tak atimi iraija ara, um ago nedoa vai caija, um udei inpece, um atga ura.
11Va nitai inigki eris ikni ilpu atimi aminjinaig nauritai ura ara, mika eri ehcerucai ra ara au nauritai ehka. Eris ago inmaliyum ikni itai eraigki imi Fero ara, nan, Paidom im Rameses.
12Ja eris wat ehcerucai ra ara, eris asvalav ara is ahinag acen. Eris ohocred ara vai nup Isreel.
13Eris idim ehcerucai emda nup Isreel a nup Ijipt an nauritai ura:
14eris ohocred ara va nauritai alupas au nosal, im nebrik, im niji auritai asega an nobohtan: eris idim ehcerucai emda ra ara an nauritai asega ura.
15Is tas a natimarid Ijipt, ehele ohwat takata, erus aminjinaig ilpu takata Hibru arau an napos vaig ilpu hal ura, nidan is ethi Sifra, im nidan is eche Pua:
16um ika, Aru wit atau imi ilpu takata Hibru aijaurau an napos vaig ilpu hal ura, aru wit ateuc aijaurau um ato; el et halav atamaig, arumu atgei yin aijaurau: ja el et halav atahig, etmu umoh aien.
17Ja erus imtitai Atua ahwat takata erahki, um eti ago nedo iyehki is asaig ehele rau a natimarid Ijipt, jam imicoho ilpu halav atamaig.
18Is ahlaig vai ohwat takata erahki a Fero, um ika ehele rau, Arus a uri aijaurau par ago nedo inigki, um imicoho ilpu halav atamaig?
19Erus tas ahwat takata erahki ehele Fero, um ika, Era eti idivai ilpu takata Ijipt a ilpu takata Hibru; era auroauro ara um apos ilpu hal ura, ja era par apau ehele ra a ilpu takata atau imi ra.
20Is aiheuc vai ohwat takata erahki a Atua: eris ahinag acen natimi um amen upene.
21Erus imtitai Atua ahwat takata erahki, va nitai inigki is alupai rau neteuc ira rau is ahinag aien.
22Is tas a Fero ehele atimi asega o un, um ika, Akumu ethaig se an nofowai ilpu halav atamaig asega u nup u Hibru aijaua uhpu apos ra, jam imicoho ilpu halav atahig asega.
Currently Selected:
Eksotus 1: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
