Jenesis 32

Nuarin tas alupas 32.

1 Et ahuumtidec a Jekob Mehaneem. 3 Intas o un ehele Isa. 6 Et imtitaig aien va napam u Isa. 9 Et ugyi Atua aien mika yi imiatamaig yin aien. 13 Et imiapan nitai tup ahtai imi Isa aien. 24 Et acescas imi nagelo aien Penaiel, er anvi nidan Isreel eahki. 31 Et atga adjo aien.

1IS lep atga o un a Jekob, eris aubilid yin a ilpu agelo o Atua.

2Is wat alum ra a Jekob, is ika aien, Era ilpu eucsupo o Atua ara sji igki: is anvi nidan nuarin iyehki aien par ika Mehaneem.

3Is abrai ilpu aheca o un a Jekob mika eri uhup iran ara um apan ehele Isa etwan an pece Sier, inpece u nup Itom.

4Is tas ehele ra aien, um ika, Akumu asan tas inigki aijaua ehele Isa natimi alupas unyak, um ika; Et ika a Jekob naheca unyum, Kis atau imi Leban ainyak, um amen eahki um imihum pam an nopan inig:

5et eteuc kurimatau unyak, im togke, im siip, im ilpu aheca atamaig, im ilpu aheca atahig: ja ek mun abraig hal ainyak mika eri asaig ehelum, ak natimi alupas unyak, mika an aiheuc vai nyak aiek.

6Eris adumoij pan ehele Jekob a ilpu aheca o un, um ika, Ecris yetpan ehele Isa etwam aijama, ja et lep apam aien par aubilid euc; era ahced yin natimi et for huntret.

7Is imtitaig alupas a Jekob, um eucjeucjeucaij: is atiakoai ilpu atimi ahced yin aien, im lep siip, im nanin, im kamela, is ero inpak ira ra;

8um ika, El et ehtet an pak ira ra et ethi a Isa, um auud ra, etpu umoh inpak ira ra et eche.

9Is ika a Jekob, Ak Atua u Ebraham etpok, um Atua u Aisak etmak, ak Ihova, as tas ehelek aiek, um ika, Namu adumoij pan an pece unyum aiek ehele ilpu atimi ehpan iram, ekpu ago nedo upene vai euc ainyak:

10ek eti upene ainyak inleh vaig tah naiheuc unyum, im tah intas inveijec unyum ehele naheca unyum; kis algaunyi nofowai inigki Jortan ainyak, um apos niseuc unyak ache; ja et eteuc niji iran unyak et ero an nopan inig.

11Ek ugyi euc ainyak, mika an imiatamaig nyak aiek va nikmai Isa etwak: ek imtitai yin ainyak, va yi jim apam aien um atgei nyak, im lep ilpu takata, im ilpu hal ura.

12As ika aiek, Ekpu idim ago nedo upene vai euc ainyak, um ika eri ahinag a ilpu mapom et idivaig nauanavig, et ehka nesvi vaig va nahinag iran.

13Is amen eahki aien an nepig iyehki; is leh nahaijin niji itai o un aien, nitai tup ahtai imi Isa etwan; nikavaig,

14nanin atahig is tu huntret, im nanin atamaig is twente, im siip atahig is tu huntret, im siip atamaig is twente,

15im kamela atahig is dirte im ilpu hal ura, im kurimatau atahig is forte, im kurimatau atamaig is ten, im togke atahig is twente, im nakli togke is ten.

16Is ikni ra ehele ilpu aheca o un aien, is aheiachei niji ira ra; um ika ehele ilpu aheca o un, Akumu uhup irak aijaua, um algaunyi nofowai, um apohod jipe vai iji pak i irai itai eklim edo irai pece.

17Is tas aien ehele natimi uhup, i um ika, Etu wit uhum pam euc a, Isa etwak, um ahodai euc, um ika, Na aheca u di aiek? nalaig eda nigki unyum? niji itai u di sji igki ehelum?

18Namu asuptecnaig aiek, um ika, Niji itai u Jekob naheca unyum; nitai tup ahtai nigki imi Isa natimi alupas o un: et lep apitac cama aien.

19Is lep uce intas o un ehele natimi juju, im natimi apitac, im lep ra asega eris ahced niji pak irai itai eklim edo irai pece ara, um ika, Aku wit ecet Isa aijaua, etpu idim uco intas unyimia ehelen.

20Akumu lep ika aijaua, Et apitac cama a Jekob naheca unyum. Is ika aien, Ekpu ago updak inliinmopon ainyak an nitai tup ahtai et uhup irak, ja ekpu apitac ainyak um almoi nesganimtan; kit etpu aiheuc vai nyak aien.

21Eris imialgaunyi nofowai nitai tup ahtai, um uhup iran: ja is amen ehele atimi aien an nepig iyehki.

22Is atidai aien an nepig, um lucsei ohwat ehnaa o un, im ohwat aheca atahig o un, im ilpu halav atamaig o un is eleven, um algaunyi nofowai Jabok.

23Is lucsei ra aien un imialgaunyi nofowai ra, is lep imialgaunyi niji itai asega o un aien.

24Is echim amen a Jekob; is acescas imi yin a natimi is ethi, um yetpan an nauhoig yi amud u nadiat.

25Is wat ecetai a natimi iyehki mika is eti esjilid iran aien, is atcei pan inpujvai Jekob aien; is es-jiliek nijin yau u Jekob, an na-cescas vaig urau.

26Is ika a natimi iyehki, Udei nyak aiek, et mun auhoig yi amud nadiat. Is ika a Jekob, El et acis yi alwai nyak aiek, ekpu atcijai euc ainyak.

27Is ahodai yin aien, um ika, Nidam di? Is ika ehelen aien, Jekob.

28Is ika aien, Eri jim lep anvi nidam par ika Jekob ache, jam Isreel, (Natimi inig et emda an nuhup u Atua aien): na mun emda an nuhup Atua aiek et idivaig natimarid, napu lep esjilid ira atimi aiek.

29Is ahodai yin a Jekob, um ika, Ek ugyi euc ainyak mika an asaig nidam aiek. Is ika aien, Na a uri aiek par ahodaig nidak? Is acis yi alwai yin aien eahki.

30Is anvi nidan nuarin iyehki a Jekob par ika Penaiel, (Nesganimtai Atua): Is ika aien, Ek mun idim almoi nesganimtai Atua ainyak, jam eti mas.

31Is wat atga o un aien Penaiel, is aridjai nagesega iran, is atga has aien vai inpujvan.

32Va nitai inigki era eti caig inwau iyehki a nup Isreel is urauo, um imihum pam an nopan inig: is idim atcei pan inpujvai Jekob aien an wau iyehki is urauo.

Currently Selected:

Jenesis 32: VAO63

Highlight

Copy