Niji auritai o ilpu Apostolo 7
7
Nuarin-tas alupas 7.
1IS um ika a natimi esjilid an nahlap, Et idim ucco nitai iji eigki, ka oʼo?
2Is um ika aien, Ak ilpu atimi alupas, ilpu etoak, akumu atahaijeg nyak aijaua: Is ehcohos pan a Atua esjilid ehele etpoija Ebraham, an namen o un Mesopotemya, ja is par lep han amen Heran aien;
3is um ika ehelen aien, “Ude inpece unyum aiek, im ilpu atimi ehpan iram, um apam an pece ineigki ekpu asuptecnaig ehelum ainyak.”
4Is ude inpece o nupu Kalti aien, um han amen Heran: is wat mas a etman, is atipagki yin eahki a Atua um imyiapam yin an pece ineigki, eka amen iran aijaua.
5Is eti fi atceijaig tah inuarin nobohtan imi yin aien, is idim ti inuarin ineig nathaivaig neduon iran: ja is upyi asaig aien mika yi alupai yin inpece ineig yipu ohuun aien, im ilpu mapon; ja is eti fi eteuc inhal o un an naopan iyehki.
6Is um ucco intas o Atua, is ika aien, “erupu amen a ilpu mapon an taka pece, erupu ikni ra ara mika eri aheca ura ara, um agahas ira ra, irai mesese inyi tor huntret.”
7Ja is ika a Atua, “Ekpu aru ainyak irai nup uran pece iyehki eri aheca o atimi iran ara; erupu lep ahes eahki ara, um atga ura, um ham, um alaigaheni vai nyak igcaki.”
8Is alupai yin intas-etipup aien va naperitome: is apos Aisak a Ebraham, um aperitome iran an nadiat eet; is apos Jakob a Aisak; is apos ilpu retpoija is twelv a Jekob.
9Ja eris auatitai a ilpu retpoija vai Josef, um ahtai yin imi atimi alaig Ijipt: ja is amen ehelen a Atua,
10um imyiatamaig yin va nohocred asega o un, um alupai yin narapakau an nuhup o Fero natimarid an pece Ijipt, um ago upene inliinmopoi Fero vai yin; is ati yin aien mika yi atimi alupas an pece Ijipt aien, im lep an nimnim o un asega.
11Ja is eteuc numlaig has an pece Ijipt asega im lep Kenan, is esjilid nohocred o atimi, is ti nitai caig o ilpu retpoija,
12Is wat atahaijeg a Jekob, nikavaig, is eteuc hwiit Ijipt, is uhup aien um abraig pan ilpu retpoija eahki.
13Eris ehcero apan ara, ja is par ehvai yin a Josef ehele ilpu etoan; eris lep ehvaig ehele Fero ilpu atimi ehpan irai Josef.
14Is abrai ra a Josef, um ika, yi apan ehelen a etman Jekob, im ilpu atimi ehpan iran asega, eris atimi is sevente faiv ara.
15Is apan Ijipt a Jekob, um mas eahki, im lep ilpu retpoija,
16eris imyiapan ra Sikem, um ikni ra an mun nij iyehki is aua-nimtan irai mune a Ebraham imi ilpu mapoi Hemor etmai Sikem.
17Is wat ubutpotet pan u naopan iyehki etpu ehneijid intas upyi asaig iyehki, is asig yi aktit a Atua ehele Ebraham, eris asvalav atimi um atamerit an pece Ijipt,
18um yetpan an naopan iyehki is atidai a natimarid is eche, is eti ato Josef aien.
19Is ago nedo efaifa aien vai ilpu atimi ehpan iraija, um agahas irai ilpu retpoija; eris erekhaig ilpu hal ura ara inhadi, mika eri jim umumoh ara.
20Eris apos Moses an naopan iyehki, is eklim upene aien, eris aminjinai yin anliin neom o etman an mohoc is eseij:
21eris ethai yin ara, ja is pah leh yin a inhalav atahaig o Fero, um aminjinai yin mika yi hal o un.
22Eris esege imi Moses narapakau asega o nupu Ijipt; is esjilid intas o un im nedo o un.
23Is wat forte inmesese iran, is ika anliinmopon aien yi ateghe ilpu etoan nupu Isreel.
24Is ecet natimi is ethi aien ira ra eris agahas iran, is imyiahras yin aien, um ejejei yin eris ago nedo has vai yin, um atgei nupu Ijipt iyehki:
25is aktaktai aien, mika eris ato a ilpu etoan mika etpu imyiatamumoh ra a Atua an nikman; ja eris eti ato ara.
26Is wat lahlah an tak apnyin, is ehcohos pan aien ehele natimi is ero erus ehtauo arau, um ika yi asan neigpa an nehtauo urau, um ika, Ak ohwat raigki, arau raimu aijaurau; erau auri aijaurau par ago nedo has jipe vai caurau?
27Ja is ahtahlo yin a natimi ineig is agahas irai etoan aien, um ika, Is ati euc a di mika an atimi alupas aiek, um atimi aru nedo unyima?
28na ika aiek an lep atgei nyak, et idivaig natgei nupu Ijipt iyehki unyum ianiv, ka oʼo?
29Is aha a Moses vai intas ineigki; is amen ehcid aien an pece Mityan, um apos inhalav atamaig o un is ero eahki.
30Is wat ti pan itac inmesese is forte, is ehcohos pan ehelen an namasacen ubutpotet u nedoon Saine a nagelo o Natimarid an nalauma u incop an cai.
31Is wat ecetai a Moses, is imyiali aien va nitai ineig is ecetai aien: is apan ubutpotet aien par almoi, is atahaijeg nohrai Atua aien,
32is ika, “Ek Atua o ilpu retpom ainyak, Atua o Ebraham, im; Atua o Aisak, im Atua o Jekob.” Is ucjucjucaij a Moses, um imtitaig nalmoivaig.
33Is ika ehelen a Natimarid, Atipagki incedpun eduom aiek: nuarin itaup neigki na aiji iran aiek:
34kis idim ecetai ainyak nohocred o ilpu atimi unyak an pece Ijipt, kis lep atahaijeg nahlaig esjum ura ainyak, ek mun asuol ainyak mika ki imyiatamaig ra: apam aiek, ekpu abraig pan euc Ijipt ainyak.
35Moses iyehki eris esjum vai yin ara, um ika, “Is ati euc a di mika an atimi alupas aiek, um atimi aru nedo has?” aien aigki, is abrai yin a Atua mika yi atimi alupas aien, um atimi inyiatamaig ra an nikmai nagelo iyehki is ehcohos pan ehelen an cai.
36Is iknipagki ra aien, ja is upyi hup aien um ago niji auritai imyiali im niji auritai ehka, an pece Ijipt, im lep an jop Cop, im lep an namasacen irai mesese is forte.
37Aien ahki Moses, is ika aien ehele nupu Isreel, “Etpu imyiatidai imi caua Naprofeta inyi ethi a Ihova Atua unyimia irai ilpu etoamia, inyi idivai nyak; akumu atahaijeg yin aijaua.”
38Aien ahki, is amen aien ehele atimi an nasjapicnaig an namasacen ehele ilpu retpoija, im lep ehele nagelo iyehki is tas ehelen aien an nedoon Saine: is leh niji tas umumoh vaig aien par alupai caija:
39ja eris ika a ilpu retpoija eri eti imyiaiji intas o un, eris ahpaadeig pagki yin ara, is ahidaig pan Ijipt inliinmopura ara,
40eris ika ehele Eron ara, “Ago ilpu atua imi cama aiek eri uhup iraija ara: ecra eti ato aijama, nikavaig, et echamecha vai Moses ineigki, is iknipagki caija aien an pece Ijipt”
41Eris ago inhakli kurimatau ara an naopan iyehki, um ahlap vai natmassimai iyehki, um imyiacitak va nauritai irai ikmara.
42Is atidjin ira ra a Atua, um ude ra, mika eri alaigaheni ara va niji itai an nohatag; is idivaig eris aged an nitasvitai u ilpu profeta, um ika, “Ak nupu Isreel, akis ahlap vai nyak aijaua irai iji kurimatau eris atgei, im niji itai ahlap, irai mesese is forte an namasacen, ka oʼo?
43akis idim apos neom atga o Molok aijaua, im lep inmoijeuv o Remfan atua unyimia, nalmuitai iji eigki akis ago aijaua mika aki alaigaheni vaig: ekpu idim imyiapan caua ainyak an nahaijin Babelon itac.”
44Is amen ehele ilpu retpoija an namasacen neom atga, nitai asuptecnaig imi ra, is idivaig is asaig aien, is ika ehele Moses aien, yi ago et idivaig nitai asjaaicnaig is ecetai aien.
45Eris lep imyiapam neom iyehki a ilpu retpoija eris epitpitac ara im Josua, an pece ineig eris ohuun a nup urai taka pece iji ehki, is ahlo ra a Atua an nuhup o ilpu retpoija, um yetpan an naopan iyehki an numoh o Tevit;
46is upene inliinmopoi Atua vai yin, is merit aien necetaivaig neom ahlap vai Atua o Jekob.
47Ja is acta neom imi yin a Solomon.
48Ja et eti amen aien et Esjilid aien irai eom ahlap er ago irai ikma atimi; et idivaig is asaig a naprofeta, um ika,
49“Et ika a Ihova, Et dorona unyak nohatag, um itai atijai neduok iran nobohtan: inyi echamecha neom ineig akupu ago imi nyak aijaua? inyi lep echamecha inuarin ineig ekpu amen iran ainyak?
50kis idim ago niji itai asega iji eigki an nikmak ainyak.”
51¶ Ak ilpu atimi ipjin inliinmopomia, im ilpu atimi eti aperitome anliinmopomia im intikgamia, eka acaijaig Nesgan Upene aijaua irai iji adiat: eka ago nedo o ilpu retpomia aijaua:
52tah ilpu profeta a di neigki eris eti atmas vai yin a ilpu retpomia? eris lep atgei ra sji ehki ara eris upyi asuptecnaig napam o Natimi Upene ara; aien aigki akis aniv yin aijaua um atgei yin:
53akis leh intas alep aijaua, eris ati a ilpu agelo, jam eti imyiaiji.
54¶ Eris wat atahaijeg intas iji eigki ara, is edemda alupas inliinmopura ara, eris aces eijera ara vai yin.
55Ja is amen alupas ehelen a Nesgan Upene, is easji pan aien an nohatag, um ecetai natimi alupas o Atua, im Iesu naijivaig an matai Atua,
56um ika, Ek idim almoi nohatag ainyak eh mun asalgei, im Inhal o natimi naijivaig au matai Atua.
57Eris ahlaig ijinies ara, um ucjipanes intikgara, um ehras telohtelo pan iran,
58um ahlo pan itac yin an nuarin-pece, um asji yin irai hat: eris atise napelumai ura a ilpu atimi asuptecnaig vai yin u neduei intakuras is ethi, nidan Saulo.
59Eris asji Stifanus ara irai hat, is wat alaigaheni aien, um ika, Ak Iesu Natimarid, leh nesgak aiek.
60Is atpuse aien, um ahlaig ijinies, um ika, Ak Natimarid, jim aru nedo has ineigki ura aiek. Is wat ucce intas o un, is umjegse aien.
Currently Selected:
Niji auritai o ilpu Apostolo 7: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
