Niji auritai o ilpu Apostolo 8

Nuarin-tas alupas 8.

1IS ika a Saulo et upene yi mas aien. An naopan iyehki is esjilid natmas vai nup an nakalasia Jerusalem; eris terimterim ara asega, um apan irai iji uari pece Jutaia im Samerya; eris amen ache a ilpu apostolo.

2Eris imyiapan Stifanus a ilpu atimi upene, um atelmoi yin, um imyitaig alupas yin.

3Ja is esjilid natmas o Saulo vai nup an nakalasia; is apan aien irai eom asega, um leucse ilpu atamaig im ilpu takata, um ikni ra anliin neom ipjin.

4Va nedo ineigki eris apan irai iji uari-pece ara sji eigki eris terimterim ara, um asuptecnaig intas-upene.

5IS apan a Filipus an nuarinpece is ethi Samerya, um asuptecnai Kristo ehele ra.

6Eris wat atahaijeg natimi is ahinag um ecetai niji auritai ehka is ago a Filipus, eris ehras imyiaiji ara nitai iji eigki is asaig aien.

7Eris ahlaig ijinies a ilpu agelo has, um atceijaig natimi is ahinag eris amen ira ra ara: eris lep cehcehe natimi is ahinag eris emehe ara va napalse, im ilpu atimi asvahteuc neduora.

8Is esjilid nimyiacitak an nuarin-pece iyehki.

9Ja is eteuc natimi is ethi, nidan Saimona, is ahraces aien itu acen an nuarin-pece iyehki, eris imyiali yin a nupu Samerya, is ika aien is atimi esjilid:

10eris imyiimtacimtac yin ara asega, ilpu atimi alupas im tup atimi, um ika, Et emda esjilid a natimi ineigki vai Atua,

11Eris imyiimtacimtac yin ara va nedo ahraces o un ineig, eris imyiali yin vaig ara itu acen.

12Ja eris wat imyiisjis ninivaijec intas asuptecnaig o Filipus ara, va niji itai upene an nelcau o Atua, im nidai Iesu Kristo, eris leh nabaptiso ira ra a ilpu atamaig im ilpu takata.

13Is lep imyiisjis ninivaijec a Saimona, um leh nabaptiso iran, um amen ehele Filipus, um imyiali, is wat almoi aien niji auritai ehka im niji auritai esjilid acen eris ago.

14Eris wat atahaijeg a ilpu apostolo Jerusalem, nikavaig, eris leh intas o Atua a nupu Samerya, eris abraig pan ehele ra Pitrus im Joanes ara:

15erus wat yetpan arau, erus alaigaheni arau vai ra, mika eri leh Nesgan Upene ara:

16is eti fi asuol pam ehelen tah ira ra aien an naopan iyehki: eris leh nabaptiso ache ira ra ara an nidai Iesu Natimarid.

17Erus atijai nikmarau ira ra arau, ja eris par leh Nesgan Upene ara.

18Is wat almoi a Saimona, nikavaig, erus wat atijai nikmarau ira atimi ahwat apostolo erahki, eris leh Nesgan Upene ara, is imyiapan nimtan ehele rau aien,

19um ika, Alupai nyak nemda ineigki aijaurau, mika, ek wit atijai nikmak ainyak iran tah, yi leh Nesgan Upene aien.

20Ja is um ika ehelen a Pitrus, Uhpu auahas euc pan irai mune unyum, va nedo unyum, nikavaig, na mun aktaktai aiek mika an auanimtan nitai tup ahtai o Atua irai mune:

21et ti nahaijin unyum im inuarin unyum an nitai ineigki: et eti inivaijec inliinmopom aiek an nuhup o Atua:

22etmu adumoij inliinmopom aiek va nedo has unyum, um ugni Atua, kit uhpu eti aru iram va naktaktai u inliinmopom:

23ek ato ainyak, nikavaig, et eteuc nitai acen anliinmopom aiek, et lep arore euc nedo has.

24Is tas a Saimona, um ika, Arumu ugni Natimarid vai nyak aijaurau, va yi jim yetpam irak nitai iji eigki erau mun asaig vai nyak aijaurau.

25Erus esege arau, um asuptecnaig intas o Natimarid, ja par lep adumoij pan alaig Jerusalem, um asuptecnaig intas-upene irai iji uari-pece is ahinag o nupu Samerya.

26IS tas a nagelo o Natimarid ehele Filipus, um ika, Atidai aiek, um apan an nuarin ineig et ahes nuritoga iran, an nefalaig et ahes Jerusalem um yetpan Cesa, et amasacen.

27Is um atidai aien, um apan: is ecet natimi alupas is ethi aien, nupu Idiopya, is aheca esjilid o Kantasi aien natimarid takata Idiopya, is aminjinaig inpadiaig asega o un aien; is apan Jerusalem aien mika yi alaigaheni;

28is wat adumoij pan aien, is ateuc aien an nitai atga o un, um esvi intas o Aiseya naprofeta.

29Is ika a Nesgan Upene ehele Filipus, Aiheucaiheuc aiek, um uhum nitai atga naico.

30Is athut pan ehelen a Filipus, um atahaijeg yin nesvivaig intas o Aiseya naprofeta, um ika, Na ato aiek nitai ineig na esvi aiek, ka oʼo?

31Is um ika aien, Et ehka, et ti natimi par esege imtak. Is ika aien ehele Filipus yi aridjai aien um ateuc ehelen.

32Is esvi intas ineigki aien, eris aged, um ika. “Eris imyiapan yin is idivaig siip par atgei yin; is eti tas aien, is idivaig inhakli siip an nuhup u natimi eucsei nalau iran:

33an naopan iyehki is wat upoupo nedo o un, eris atipagki yin vai intas alep ura: etpu asuptecnaig naopan o un a di? va nitai ineig, nikavaig, eris atgei yin an nobohtan.”

34Is tas a natimi alupas ehele Filipus, um ika, Asaig ehelek, is asan tas ineigki a naprofeta vai di? vai yin, ka vai intak atimi?

35Is asalgei nipjineucsen a Filipus, um atupun an tas iyehki eris aged, um asuptecnai Iesu ehelen.

36Erus atga arau an nefalaig um yetpan an wai is ethi: is um ika a natimi alupas, Almoi inwai ineigki aiek; ek auri ainyak par eti leh nabaptiso irak?

37Is um ika ehelen a Filipus, El et imyiisjis ninivaijec anliinmopom asega aiek, el et upene. Is tas aien, um ika, Ek imyiisjis ninivaijec nitai ineig ainyak, nikavaig, et Hal o Atua a Iesu Kristo.

38Is ika aien yi aiji nitai atga o un: erus asuol an wai arau, Filipus im lep natimi alupas; is baptiso iran aien.

39Erus ahes an wai arau, ja is par leh Filipus a Nesgai Natimarid, is um tup eti ecet yin a natimi alupas: ja is atga o un aien an nefalaig, um imyiacitak.

40Ja eris um lep ecet Filipus an nuarin-pece Asotus: is atga asuptecnaig intas-upene aien irai iji uari-pece asega, um yetpan Sisaria.

Currently Selected:

Niji auritai o ilpu Apostolo 8: VAO63

Highlight

Copy