Yoosuwa 14

ORDONUK AYRÔ-CULMA LE KABUT RAQTE BAAXO ELLE KUREN INNA

1Kanqaan rasuk Ordon weeqaytuk ayrô-culma le kabut raqta baaxo Israayil marah elle yeceen innat yabna. Sek Alqedar kee Nuun-Yoosuwa kee Israayil makaabon a baaxo Israayilih yooboke marah kuren. 2YALLI dumaak Muusak iyyemii, «Israayilik sagla kedo kee garabah baaxo teceen waqdi, saami caxxa elle qidak#14:2 saami caxxa elle qidak Mawqa deqsita kitaabal 28:30 wagita. Israayil mari, *Urim kee Tummim deqsitta duyye qidak, woo duyyel Yalli faxam aaxaguk yenen. keenih ucuya»#Loowo 26:52-56 'yaanam iyyeh yen. 3-4Muusa, Ordonuk ayrô-mawqa le kabut raqta baaxo dumaak Israayilik nammay takke kedo kee sidochaytô kedok garabah kureh yen. Muusa, Leewih yooboke mara baaxok cabeh. Baaxo magennoonu'mmay, dabaaqah elle gacan magaalooli kee, lac elle yayloolen baaxo keenih yecee. Yuusufuk rade mari namma ikkel baxsimeh yen. Tohum Manasse kee Efrayim deqsitta kedok ten. Uxih sagla kedo kee garab baaxo gee'kal akah raqtem, tohih sabbata. 5YALLI, Muusak, «Israayil ummatah baaxo ucuya» elle iyye innal, Israayil mari keenih kure.

YOOSUWA CEBRON MAGAALA KAALIBIH IKOYTAH YECEE

6Israayil mari Gilgal deqsita aracal yan waqdi, Yuudah tooboke labha Yoosuwal temeete. Too marak numuk teeni Yafunnê-Kaalib deqsita numuy Keniida deqsita gulubuh yaabukehiyyak ten. Too num kaak iyyemii, «Koo kee yi giddinaamak Kaades-Barniqa deqsita aracal nan saaku, YALLIH numuh yen Muusak iyyem taaxigeh. 7YALLIH naqasuh yen Muusa, a baaxo gibiteh amaate'gidih yoo ruube saaku, barak morootom karmat en. Too saaku gibah gexeh elle uduure ikkel, dirab sinni nummâ-xaagu gabat baahe. 8Yo'lih gexe mari sinam akak meysitta xaagu gabat baahen. Yoh tu gactek, YALLAY yi Dagelta kinnihiyyah yaabal digga exceeh baguuk kibaal kaal hee. 9Too saaku Muusa yok iyyeemih, ‹Baguuk YALLAL kibaal hayteemih sabbatah, usuk atu ibah adda akak gacteh temeete baaxo koh aceele. Too baaxo koo kee ku buxah marih ikoytah raaqele› axcuk xiibite. #Loowo 14:24 10-11YALLI Muusak woh iyyeemiiy akke morootom kee koona liggidi nel gaceh yani'mmay, qandeh Muusa gibah yoo rubbu hee saakih innal an. A saaku barak bacra-taban kee koona karmat ani'mmay, Israayil ummat bacarih tan baaxol meekitak ten sanoota inkih, YALLI elle inxicca iyye innal, kuwwat kee xagarak nagay yoo yabbixe. A saaku fanah carbik baysam mayyu; wohuk kalah abaanam tenek, caylah akah ene'nnah an. 12Tonna'mmay ta saaku kok faxaamahaa, woo saaku gibak elle nuduure ikkel, YALLI ‹Koh aceeyyo› axcuk qahdi yoh akah cule baaxoy qaleela mangohiyya yoh taceem kok faxa. Qanaakim akak iyyan maray kaxxa masu kee xexxar lehiyya buxah elle yanim, tokke kinnim, gibah genxe saakuuk atu isih toobbeh ten. Too mari elle yan magaalat maroh gasoosa tan. YALLI yoo elle cateleeh; anu qeebit baaxok ken ayyaaqeyyo'mmay, ken baaxo yoh ucuy» 'yaanam iyye.

13Yoosuwa, Kaalibih dooqa abba heek gamadal, Cebron magaala ikoytah kaah yeexege. 14Too magaala ta saaku fan Kaalibik rade mari ikoytah leeh; Kaalib YALLAY Israayil doore Dagelta kinnihiyyal baguuk kibaal heeh kay yab digga luk duuduse numuk yeneemih sabbatah, YALLI ta magaala ikoytah kaah yecee. 15A magaala Kaalib carbit raaqissa haamak dumal, migaaqah Arbaq magaala teetik axcuk yenen. Arbaq deqsitak yen num Qanaakim deqsita marak kaxxa numuk ten. Tohuk lakal ummatta carbik toffoofeh raqte.

Currently Selected:

Yoosuwa 14: NKM

Highlight

Copy