Yoosuwa 15

YUUDÂ KEDOH YECEEN BAAXO

1Yuudak rade mari baaxok isi xexxar geeh. Geen baaxo mangah akkuk tenem magideey inteenik, bacarih tan baaxok Xiin deqsita aracay gabbi-qaxak xer exxat raqqa 'yahiyya fan gufak ten. Tohumuu, Edom marih cuduud edde yaade ikkek ten. 2Gabbi-qaxat cuduud edde aadayuk yenem, Rabe Bad deqsita badak gabbi-qaxa raqta exxa. 3Tokkeek cuduud Igix-le-Daaba deqsita aracak gabbi-qaxa le kabuk gacca 'yeh, Xiin deqsita bacarih tan baaxo fan guffa haak, Kaadis-Barniqa deqsitta magaalak gabbi-qaxat raqta baaxo gufak yen. Tokkek cuduud keenik Cesram deqsitta magaalak adda gacca 'yeh Addar deqsitta magaala maadak yen. Tokkeek kaadu Karkaq deqsitta magaala fanah makka 'yah 4bisoh Qaxmon deqsitta magaalah amma 'yaanam fan gufak yen. Tokkeek kaadu Masri cuduudul yan daqar katayak, Maditraaniyah bad fan guffa hayta baaxo inkih kenimik ten.

«Israayil maraw, gabbi-qaxal sin baaxoh cuduud tonnal sugele».

5Ayrô-mawqa le kabuk cuduud keenik Rabe badah yen.

Kilbat le kabuk cuduud keenik akah qimbisem, Ordon weeqayti Rabe Badal edde yaade ikke. 6Tokkeek Beet-Cogla deqsita arac fan maadda haak lakal, Beet-Qaraba deqsita aracak kilbat le kabuk gacca 'yeh, Bohan-Xaa deqsita xaa elle yen arac fan gufak yen. Bohan, Ruuben-baxaay; a arac kay migaaqal muggaaqisen. 7Tokkek bisoh gexak raaqaah Gadaamâ Golo deqsitta golok Dabiir deqsita arac fan gufak yen. Tokkeek kilbat fanah makka 'ta waqdi, Gilgal deqsitta magaalay Adummim Daaba deqsita aracat foocah raqtahiyya fan gufa. Adummim Daaba golok gabbi-qaxat raqta. Tokkeek bisoh gexak, Qensemes buyyi deqsita buyyiik bukka 'ta waqdi, Qenrogel deqsita arac gufa. 8Too aracaak Hinnom-Golok qaxa-qaxa gacca 'yah, gabbi-qaxak Yarusalaam deqsitta magaalay Yabuusâ mari elle yanihiyya fan gufa. Tokkeek cuduud keenikii, Hinnom deqsitta golok ayrô-culma le kabut raqta koomah amoh amma 'yaanam guffa haah, tokket yaade. Tohumuu, Refaayim Golo deqsitta golo kilbat le kabuk edde taadee aracak ten. 9Tokkek xabba haanam cuduud keenik Neftowa deqsita buyyik bisoh gexak Qefron qaleh xaqul tan magaaloolih amma 'yaanam fan gufe. Tokkeek Baqala deqsitta magaalay a saaku Kiryat-Yaqaarim deqsittahiyya fan makka 'yaah; 10tokkeek Baqala magaalak ayrô-culmat raqta baaxo gexxa 'tam gexakaa, Edom rasuk qaleela mango arac fan gufa. Tokkeek cuduud keenik Yaqarim qaley a saaku Kasaalon deqsittahiyyak kilbat fan gexak raaqa. Too qalek obba 'yaah Beet-Semes magaalak bisoh gexak Timna deqsitta magaalal yamaate. 11Tokkeek cuduud keenik Ekron magaalak kilbat le kabut raqta qale fan bacakkuh gexxa 'yaah, Sikkaron deqsitta magaalak Baqala deqsitta qaleh xaquk taturra 'yaah bisoh Yabneel deqsita arac fan yamaate. Cuduud keenik Maditraaniyah badat yaade. 12Ayrô-culma le kabuk cuduud keenik Maditraaniyah badah yen.

Yuudak rade mara baaxok guftem ta gidek ten.

KAALIB DEQSITA NUM ISI BAAXO AKAH YIBBIXE'NNA

13YALLI Yoosuwa elle amrise innal, Yuudâ-baaxok tu takkem Yafunnê-Kaalibih yecee. Arbaq deqsita numuy Qanak deqsita mari akak radehiyyah migaaqal xisen magaalay migaaqah Cebron akak iyyaanahiyya Kaalibih yecee. 14Qanakak-rade marak Sesay kee Aciiman kee Talmayi deqsita sidooca gulub too magaalal dabaaqah suge. Kaalib too mara inkih too magaalak yeyyeeqe. 15Tokkeek Dabiir deqsitta magaalal yan mara yabbixe'gidih gexe. Too dabaanal ta magaala migaaqah Kiryat-Sefer deqsitak ten. 16Kaalib iyyemii, «Kiryat-Sefer qeebit yabbaxu waa numuh inni baxáy Qaksa deqsitta digibih aceeyyo» iyye.

17Toh yoobbe waqdi Kaalib-toobokoytih-baxay migaaqah Qotniyel deqsitahiyya woo magaala yibbixe. Too waqdi Kaalib isi baxá Qaksa digibih kaah yecee. 18Digib yekke saaku, qibna qaruusuk inteemih, «Yi abbak baqurê-baaxo neh acuya innek, maca le?» kaak inte.

Qibna edde sugte dananak obba 'teh abba fan temeete. Abba, «Maca faxxa, yi baxáy?» teetik iyye. 19Too waqdi, «Yi abbaw, barkatah, lee le baaxo yoh teceem kok faxa. Duma atu yoh tecee baaxo lee elle tan baaxo hinnak, lee le baaxo yoh ucuy» kaak inte. Too waqdi Kaalib daga raaqa buyyi kee guba raaqa buyyi teetih yecee.

YOOSUWA YUUDÂ KEDOH YECEE MAGAALOOLI AH TEETI

20Yuudah yooboke marah yeceen baaxo ah teeti. 21Gabbi-qaxat raqqa 'ta magaalooliy Edom rasut cuduuduh raqqa 'tay keenih yeceenihiyya: Kabxaqel kee Qeeder kee Yagur kee 22Kiina kee Dimoona kee Qadqada kee 23Kedes kee Caxor kee Yitnan kee 24Diif kee Teelem kee Baqlot kee 25Caxor-Hadatta kee, Karyot-Cesramay Caxor kaadu akak iyyaana kee, 26Amam kee Samaq kee Molada kee 27Caxar-Gadda kee Cesmon kee Beet-Falat kee 28Caxar-Suqal kee Bersabaq kee Bidyotya kee 29Baqala kee Qiyim kee Qexem kee 30Eltolad kee Kasil kee Corma kee 31Xiklag kee Madmanna kee Sansanna kee 32Labayot kee Silhim kee Qayin kee Rimmon deqsitta magaalooli ken maadde. Tittat labaatanna kee sagla magaala ken maadde. Tohuk kalah ta magaaloolik dariifal enna 'ta gaandoodi inkih kenim tekke.

33Mango koomaami le baaxol raqqa 'ta magaalooliy keenih yeceenihiyya ah teeti. Estool kee Xorqa kee Asna kee 34Danowac kee Qen-Gannim kee Taffuwac kee Qenam kee 35Yarmut kee Qadullam kee Sooko kee Qadeeka kee 36Saqrayim kee Qaditayim kee Gadeera kee Gadrotayim deqsitta magaalooli inkih kenim tekke. Ta magaalooli elle tenem, qaleela-ragidik ten. Tittat taban kee affara magaala akkuk teneeh; ta magaaloolik sah xaqul tan gaandoodi kaadu kenim tekke.

37Tohuk kalah kaadu Xanaan kee Cadaasa kee Migdalgad kee 38Dilqan kee Mixfa kee Yoktaqel kee 39Laakis kee Boxkat kee Qeglon kee 40Kabbon kee Lacmam kee Kitlis kee 41Gadeerot kee Beet-Dagon kee Naqma kee Makkeda deqsitta magaalooli inkih kenim tekke. Tittat taban kee lica magaala akkuk teneeh; toh lih kaadu woo magaaloolik dariifal sugga 'te gaandoodi inkih kenim tekke.

42Tohuk kalah kaadu Libna kee Qeter kee Qasan kee 43Yiftac kee Asna kee Naxib kee 44Kaqiila kee Akdib kee Mareesa deqsitta magaalooli inkih kenim tekke. Toh tittat sagla magaalak ten. Toh lih kaadu woo magaaloolik dariifal sugga 'te gaandoodi inkih kenim tekke.

45Ekron kee tet dariifal tan magaalooli kee gaandoodiiy 46tonnah kaadu Ekron magaalak xabba haanamaay Maditraaniyah badah amma 'yaanam tan magaalooliy Asdood deqsitta magaalak xayi ikkel sugga 'tehiyya inkih kenim tekke. 47Gaada kee Asdood deqsitta namma magaala kee tet dariifal tan magaalooli kee gaandoodiy Masri cuduudul yan daqar kee Maditraaniyah badak afah amma 'yaanam tanihiyya inkih kenim tekke.

48Qaleela le baaxol sugte Saamir kee Yattir kee Sooko kee 49Danna kee, Kiryat-Seferiy kaadu Dabiir akak iyyaana kee, 50Qanab kee Estamowaq kee Qanim kee 51Gosen kee Colon kee Giilo deqsitta magaalooli kenim tekke. Toh tittat taban kee inki magaalak ten. Toh lih kaadu woo magaaloolik dariifal sugga 'te gaandoodi inkih kenim tekke.

52Tohuk kalah kaadu Arab kee Duuma kee Esqan kee 53Yanim kee Beet-Taffuwac kee Afeeka kee 54Cumta kee Cebron kee Xiqor deqsitta magaalooli kenim akkuk ten. Tittat sagaal akkuk ten. Tohuk kalah woo magaaloolih dariifal tan gaandoodi kaadu kenim tekke.

55Tohuk kalah kaadu Maqon kee Karmel kee Diif kee Yutta kee 56Yidraqel kee Yokdaqam kee Danowac kee 57Kayin kee Gibqa kee Timna deqsitta tabna magaala kenim tekke. Too magaaloolik kalah a magaaloolih dariifal enna 'ta gaandoodi kaadu kenim tekke.

58Tonnah kaadu Calcul kee Beet-Xur kee Gador kee 59Maqrat kee Beet-Qanot kee Eltakon deqsitta magaalooli kenim tekke. Toh tittat lica magaala tekke. Toh lih kaadu woo magaaloolik dariifal sugga 'te gaandoodi inkih kenim tekke.

60Kiryat-Baqalay a saaku Kiryat-Yaqaarim deqsitta kee Rabba deqsitta namma magaala kenim tekke. Toh lih kaadu woo namma magaalah dariifal sugga 'te gaandoodi inkih kenim tekke.

61Bacarih tan baaxol Beet-Qaraba kee Middin kee Sakaaka kee 62Nibsan kee Qasbo-le-Magaala kee Qengeedi deqsitta lica magaala kenim tekke. Tohuk kalah woo magaaloolih dariifal sugga 'te gaandoodi kaadu kenim tekke.

63Tonna'mmay Yuudah yooboke mari Yarusalaam addal yen Yabuusa deqsita mara woo magaalah addak yayyaaqoonu maduudinnon. A saaku fanah woo mari woo magaalal ken lih dabaaqah yanin.

Currently Selected:

Yoosuwa 15: NKM

Highlight

Copy