मरकुस 4
4
विजा वीतवालोरा पिटो
(मत्ति १३:१-९; लूका ८:४-८)
1येसु असा नहारता टकातिगा उपदेश हिया लागतुर। असके पकाय भीळ ओना हेरे वात ते ओर नहारता उन्दि डोंगातिगा उदितुर, अनि सबोय भीळ नहारता टकाहेरे नितितुरक#लूका ५:१-३। 2अनि येसु ओरकुन पीटोंगते पकाय पोल्लोंग वेहिला लागतुर अनि ओर आपुना उपदेश कियानपा इदाम उन्दि पिटो इतुर: 3“केन्जाट! वरोर विजा वीतवाल मानेय विजा वीतान साटि हतुर। 4अनि विजा वीतानपा हुचुक विजा हरदा हेरे अरतुंग अनि पिटेंग वास अवेकुन तितुंग। 5हुचुक विजा पकाय तोळिय पुटो कलवाले जागादिगा अरतुंग अनि अगा खोल तोळिय पुटो इन्जोर सान्डेय मोळियतुंग। 6मति पोळद पसियत असके ओद विजातुन तोळिय पुटो अनि हिरक पयोंग इन्जोर सान्डेय वतितुंग। 7अनि हुचुक विजा काटापोदेलातिगा अरतुंग, अनि अव काटापोदेलानासंग बोरसुन विजातुन नोवचतुंग अनि अव कायांग हादोंग। 8मति हुचुक विजा सोबाय जागादिगा अरतुंग अनि मोळियतुंग हजोर आस कायांग आतुंग, अनि बोदे तिस पट, बोदे साट पट, अनि बोदे नुर पट फसल ततुंग!” 9अनि ओर इदाम वेहच इतुर, “निमाट बाताल केन्जान्तोरिट अदेन पकाय ध्यानते केन्जुन सम्जेकिम्ट#लूका ८:८।”
इद पीटोंगता उदेश
(मत्ति १३:१०-१७; लूका ८:९-१०)
10येसु वरोरे मतोर असके ओनोर संगवारि बारा चेलालोरक अनि दुसरो लोकुरक ओद पिटोता बारेते येसुन पुच्चेमातुरक। 11येसु ओरकुन इतुर, “मिकुन ते परमेस्वरना राज्यता बारेता रहस्य समजेमातोरिट। मति बाहरटोर लोकुरकुन सबोय पोल्लोंग उदाहरणते वेह लागान्ता। 12बाक्याकि
‘ओर लोकुरक हुळिन्तोरक मति हुळवाप लेहका मन्तोरक।
ओर लोकुरक केन्जान्तोरक मति केन्जवाप लेहका मन्तोरक।
इन्जोर ओर लोकुरक पस्तेमायोरक। ओर लोकुरक पस्तेमायोरक इन्जोर परमेस्वर ओरा पापतुन मापि केवोर!#यश ६:९-१०’ ”
विजा वीतवालोरा पिटोता अर्थ
(मत्ति १३:१८-२३; लूका ८:११-१५)
13असा येसु ओरकुन इतुर, “बाताल निमाट इद पिटोतुन समजेमायविट ते दुसरो पीटोंगना अर्थ बदाम समजेमायकिट? 14कास्तकार बोद वीतान्तोर ओद परमेस्वरना पोल्लो आन्दु। 15अनि बसके ओरक परमेस्वरना पोल्लो केन्जान्तोरक असके सयतान सान्डे वास ओव पोल्लोतुन पेहकस ओन्तोर इन्जोर ओर लोकुरक हरिता हेरे अरता विजा लेहका मन्तोरक। 16अदामे बोद कल्कवाले जागादिगा वीतस मता ओव विजा बोर पोल्लोतुन केन्ज सान्डे गिरदाते स्विकार किन्तोरक आन्दुरक। 17मति ओरक हिर हिले मरा लेहका हुचुक दियांग मन्तोरक। अनि ओरक स्विकार किता परमेस्वरना पोल्लोता कारण दुःख अनि पकाय तकलिप आन्ता ते ओरक सान्डे आपुना विस्वास हरचिंतोरक। 18अनि काटापोदेलातिगा वीतिता विजा येरक आन्दुरक: ओर पोल्लो केन्जान्तोरक; 19अनि आपुना जिवनता बारेता चिन्ता अनि धनसंपतिते लोकुरकुन गिरदा पुटार इन्जोर ओद धनता दोखा अनि बोदे दुसरो चिजता लालुच अगा मिलेमास परमेस्वरना पोल्लोतुन नोवचान्तांग अनि अव नाश आसिन्तांग। 20अनि सोबाय जागादिगा वीतिता ओद विजा परमेस्वरना पोल्लो केन्जुन स्विकार किन्तोरेय मन्तोरक, येरक तिस पट, साट पट, अनि नुर पट कायांग ततान्तोरक।”
वेळिचिता पिटो
(लूका ८:१६-१८)
21अनि पजा येसु ओरकुन इतुर, “बाताल टिवरितुन पय्टेकिसुन अळका अडिय या कटुल अडिय इरोर। मति टिवरितुन पय्टेकिसुन कोपेलातिगा इरान्तोरक#मत्ति ५:१५; लूका ११:३३। 22बोदायि पोल्लो मकस इरानुर ते उन्दि दिया ओद पोल्लो दिसार। अनि सबोय गुप्त पोल्लोंग सबोय लोकुरा मुने दिसार#मत्ति १०:२६; लूका १२:२ । 23निमाट बाताल केन्जान्तोरिट अदेन पकाय ध्यानते केन्जुन सम्जेकिम्ट।” 24पजा येसु ओरकुन इतुर, “बाताल केन्जातोरिट इन्जोर हुशार मन्ट। केन्जान साटि पकाय ध्यान किम्ट असके पकाय ग्यान पुटार। अनि परमेस्वर मिकुन असा पकाय ग्यान हियानुर#४:२४ पजा येसु ओरकुन इतुर, “बाताल केन्जातोरिट इन्जोर हुशार मन्ट। बोद मापते निमाट काहान्तोरिट ओदे मापते मिकुन वने काहच हियानुर अनि मिकुन पकाय वने हिया लागार।”#मत्ति ७:२; लूका ६:३८। 25बाक्याकि बोरक केन्जान्तोरक ओरकुन असा पकाय ग्यान हियानुरक। मति बोरक सोबाय मन लावेकिस केन्जोरक, ओराकेडाल ओरक बाताल समजेमातोरक अदेन वने परमेस्वर वापस येतानुर#४:२५ बाक्याकि बोना हेरे मन्ता ओरकुन हिया लागार अनि बोना हेरे हिले, बोद ओना हेरे मन्ता ओद वने येत लागार। #मत्ति १३:१२; २५:२९; लूका १९:२६।”
उपजेमायवांग विजाता उदाहरण
26पजा येसु इतुर, “परमेस्वरना राज्य बोरायि मानेय दरतितिगा विजांग वीताना लेहका मन्ता। 27अनि ओर नरका हून्जतुर अनि पियाल तेदितुर अनि अव विजांग मोळयिस अनि बदाम बरसान्ता इन्जोर ओन समजेमायोर। 28दरति आपुन-आपुने पहले विजतुन मोळयिस पजा आकिंग, अनि पजा कायांग इदाम कायांग पन्डतांग ततान्ता। 29मति कायांग पन्डान्तांग असके कोयाना सीजन वास मन्ता इन्जोर कास्ताकार मानेय हटाळते सान्डेय अव कोयिन्तोरक#जोये ३:१३ ।”
रायि पळेदा पिटो
(मत्ति १३:३१,३२-३४; लूका १३:१८-१९)
30पजा येसु ओरकुन इतुर, “परमेस्वरना राज्यता बोद चिज लेहका मन्ता? अनि बोद उदाहरणते नना अदेना वर्णन कियाका? 31ओद रायिना कायांग लेहका मन्ता; दरतितिगा वीतान्तोर असके दरतिता सबोय कायांगताल हुडलो आन्ता। 32मति वीतितुरक असके मोळयिस सबोय मराताल हजोर आन्ता अनि अवेना इदाम हजोह कोहक पसियान्तांग इन्जोर आबारतांग पिटेंग अदेना दळमिते मन्दिला परान्तांग।” 33अनि येसु ओरकुन इदाम पकाय उदाहरण हिस-हिस ओरकुन समजेमायानाता अनुसार ओरकुन पोल्लो वेहतुर। 34अनि उदाहरनता सिवायि ओर ओरकुन बाराय इनोर आन्दुर, अनि ओर वरोरे मतेक ओर आपुनोर चेलालोरकुन सबोय पोल्लोंगना अर्थ वेहन्दुर।
येसु वळियतुन शान्त किन्तोर
(मत्ति ८:२३-२७; लूका ८:२२-२५)
35ओद दिया पोळद मुळयित असके येसु आपुना चेलालोरकुन इदाम इतुर, “वाट माक होदपाकाळ दाकाट।” 36अनि ओरक भीळतुन तासिस येसुनासंग डोंगातिगा उदितुर अनि सान्डे येसुन ओन्दुरक अनि ओनासंग असा वने हुडिला डोंगांग मन्दुंग। 37असके पकाय हजोर वळिय वात अनि पळवाह डोंगातिगा आदळे मान्दुंग इन्जोर डोंगा एरते निदिन्द। 38मति येसु डोंगाता परके भागतिगा गादितिगा हुन्ज मतोर असके ओरक ओन तेहच इतुरक, “हे गुरु माक हायिला आतोरोम इन्जोर बाताल निकुन चिन्ता हिले?” 39असके ओर तेदस वळियतुन रांगतुर अनि पळवाहतुन इतुर, “कमेक मन! पोसा” अनि सान्डेय वळिय रोमतु अनि पकाय कमेक आतु। 40अनि ओर ओरकुन इतुर, “निमाट बाक्या इदाम वरयान्तोरिट? बाताल मिकुन इदेकवनाह विस्वास हिले?” 41ओरक पकाय वरियतुर अनि आपसते वळकतुरक, “वळिय अनि पळवाह वने येना आग्या मानेमान्ता, येर बोर आन्दु?”
Currently Selected:
मरकुस 4: fmu
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.