मरकुस 5

येसु दुष्टात्मा पयतोर मानेयिन सुदरे किन्तोर

(मत्ति ८:२८-३४; लूका ८:२६-३९)

1पजा येसु नहारता होदपाकाळ गिरासेनियोना देशते अवतुर। 2ओर डोंगाताल रयतुर असके सान्डेय दुष्टात्मा पयतोर वरोर मानेय बिज गुडिताल पसियस ओन मिलेमातुर। 3ओर बिजगुडितिगा मन्दुर अनि बोरे ओन साकरिते वने दोहिला परोर। 4बाक्याकि ओन पकाय बेरा बेळांग अनि साकरिते दोहच मतोर मति ओर साकरितुन दगिहतुर अनि बेळांगना तुकळांग-तुकळांग किस मतोर अनि बोरे ओन आपुना काबुते किया परोर आस मतोर। 5ओर पकाय पियाल-पोळद गुडितिगा अनि मटा पोरो वलियस दरोज किलसोर आपुने मेन्दुलतुन कलदे जक्मि किन्दुर। 6ओर लकडाल येसुन हुळस विचोर हन्जुन ओन नमस्कार कितुर। 7असके येसु, “हे दुष्टात्मा येर मानेयताल पसियस बाहरो वाय” इदाम दुष्टात्मातुन आग्या हितुर। 8असके ओर पकाय जोरदे इतुर, “हे येसु हजोर परमेस्वरनोर मरि नाकुन नियासंग बाताल बुतो? नाकुन तरास हेमा इदाम नना परमेस्वरना पोरोयते निकुन विनन्ति किन्तोना!” 9अनि येसु ओन पुच्चेमातुर, “निया बाताल पोरोय मन्ता?” ओन येसुन इतुर, “नावा पोरोय सेयना, बाक्याकि माक पकाय लोकुरक मन्तोम” इदाम वेहतुर। 10अनि माक इद देशताल बाहरो लोहमा इन्जोर ओर येसुन पकाय विनन्ति कितुर। 11अगा मटा पोरो उन्दि पदिना गोहडि मेयिला आस मता। 12“माक पदिना लोपा हन्दिला पहाजे इन्जोर माक अव पदीना गोहडितिगा लोहचिम इन्जोर ओरक येसुन विनन्ति किस इतुर।” 13आकरिते ओर ओरकुन आग्या हितुर अनि दुष्टात्मा पसियस पदिंगना लोपा उदितुंग, अनि पदिना ओद गोहडि रन्ड हजार मतांग। अव घाटतिगाडाल सान्डेय नहारतिगा हन्ज अरतुंग अनि मुळियस हातुंग। 14पदिंग मेहवाल वितसोर सेहेर अनि नाट-नाटेने हन्जुन समाचार वेहतुर अनि बाताल आत अदेन लोकुरक हुळिला वातुरक। 15अनि येसुना हेरे वास ओर ओन बगा दुष्टात्मा पयतोर मानेय मतोर अगा ओर सोबाय सन्दरांग लावेकिस अनि कमेक उदस हुळस वरियतुरक। 16हुळवालोरक दुष्टात्मा पयतोर मानेयना जिवनतिगा आता पोल्लोंग अनि पदिना बारेता आता सबोय पोल्लोंग ओरकुन वेहतुर। 17असके ओरक निमा मावा सिवाताल हन इन्जोर येसुन विनन्ति किन्तोर। 18ओर डोंगातिगा अन्जतुर असके दुष्टात्मा मता ओर मानेय नाक मियासंग वायिला हिम इन्जोर विनन्ति किया लागतुर। 19मति येसु ओना विनन्तितुन स्विकार केवोर अनि ओन इतुर, “नियागा मया किस प्रबु निया साटि बचोन हजोर बुतो कितोर इन्जोर आपुना लोन हन्ज आपुनोर लोकुरकुन गवाहि वेहा।” 20अनि येसु नाकुन साटि बदाम हजोर बुतो कितोर इन्जोर ओर हन्ज दिकापुलिस नाटेनिगा वेहिला लागतुर अनि सबोय लोकुरक आश्चरय किन्दुरक।

आयिरोसना हाता पेडि अनि उन्दि बिमार आळ

(मत्ति ९:१८-२६; लूका ८:४०-५६)

21येसु असा डोंगाते होदपाकाळ हतुर अनि ओर नहारता टका हेरे मतोर असके उन्दि पकाय भीळ ओनाहेरे जमा आतुरक। 22असके यहुदि समाज मन्डलिता सरदारनिगाडाल आयिरोस पोरोयतोर वरोर वातुर अनि ओन हुळस ओना काल्कनिगा अरतुर। 23अनि “नावा हुडला पेडि हायिला आता, ओद बेस आस जिवित मनि इन्जोर निमा वास ओदेना पोरो कय इरा” इदाम इन्ज ओन पकाय विनन्ति कितुर। 24अनि पजा येसु ओना संग हतुर अनि पकाय भीळ ओना परके आत इन्जोर लोकुरकला पकाय भीळ ओना हेरे आत। 25अनि ओद भीळतिगा उन्दि बायि मता। ओदेन बारा वरसाताल आपुना मेन्दुलतिगाडाल नतुर हन्दाना बिमारि मता। 26ओद पकाय डाक्डरनिकेडाल इलाज साटि पकाय तकलिप सहेनकिस आपुना पुरा धन खरचा कित मति बाराय फायदा आयो असा वने बिमार आस मता। 27ओद येसुना पोल्लोंग केन्जुन, नना येसुना सन्दरानुंग इटका ते बेस आयका इन्जोर ओद विचार किस, 28भीळता परकेडाल वात अनि ओना सन्दरानुंग कय इटत। 29अनि सान्डेय ओदेना नतुर हन्दाना बन्द आत। अनि नना ओद बिमारिताल बेस आतान इन्जोर ओद आपुना मेन्दुलते पुत। 30नावागाडाल लाव पसियत इन्जोर येसु सान्डेय पुतुर अनि भीळताल परके मिळिच, “नावा सन्दरानुंग बोर कय इटतुर?” इन्जोर पुच्चेमातुर। 31ओनोर चेलालोर ओन इतुर, “भीळ नियागा अरिन्ता इन्जोर निमा हुळान्तोन मति नाकुन बोर इटतुर इन्जोर निमा बाक्या पुच्चेमान्तोन?” 32बोद ओन इटस मता ओदेन हुळान साटि सबोय बासा हुळतुर। 33अनि नना बेस आतान इन्जोर ओद आळ पुन्जुन वरियसोर अनि कसिंगसोर वात अनि ओना काल्कनिगा मुटस ओन सबोय हाल-चाल वेहत। 34ओर ओदेन इतुर, “पेडि, निया विस्वासते निकुन सुदरे किता, शान्तिते हन अनि इद बिमारिताल पिसेमास मन।” 35ओर इदाम इन्जोरे मतोर ते समाज मन्डिलितोर मुक्य अदिकारिना लोतिगाडाल लोकुरक वास, “निया पेडि ते हात, इदेक गुरुन बाक्या दुःख हिन्तोन?” इन्जोर इतुरक। 36येसु ओद पोल्लोतुन केन्जवाप समाज मन्डलितोर अदिकारिन इतुर, “वरियमा, केवल विस्वास किम।” 37अनि पतरस, याकुब अनि याकुबनोर तमो युहन्नान तासि बोने आपुनासंग वायिला येसु हेवोर। 38समाज मन्डिलितोर अदिकारिना लोन अवतुरक असके लोकुरक पकाय दुःख आसोर जोरदे किलाना येसु हुळतुर। 39असके ओर लोपा हन्ज ओरकुन इतुर, “निमाट बाक्या पकाय केयान्तोरिट अनि किलान्तोरिट? पेडि हायो मति हुन्जिला आता।” अनि ओरक ओना मजाक कियाला लागतुरक। 40मति ओरक सबोय लोकुरक पसियस पेडिनोर याल-बाबो अनि आपुनोर संगवालोरासंग लोपा पेडि अरस मता अगा हतुर। 41अनि पेडिना कय पयस ओदेन इतुर, “तलिता कुमि” (इदेना अर्थ इदाम मन्ता: “हे पेडि नना निकुन इन्तोना, तेदा!”) 42अनि पेडि सान्डे तेदस वलियला लागतु। ओद बारा वरसाना मता, असके सबोय लोकुरक पकाय चकेमातुरक। 43पजा इद पोलो बोरे पुन्माकिर इन्जोर ओर ओरकुन होंग आस आग्या हितुर अनि अदेन बाताले तिन्दिला हिम्ट इन्जोर वने इतुर।

Currently Selected:

मरकुस 5: fmu

Highlight

Copy