युहनाल 8

येसु व्यभिचारि आळदुन मापि किन्तोर

1मति येसु जेयतुन मराकना मटा पोरो हतुर। 2अनि जुन्जुरकायि ओर असा मन्दिरतिगा वातुर। अनि सबोय लोकुरक ओना हेरे वातुरक असके ओर ओरकुन करिहला लागतुर। 3असके मूसाना नियमतुन करिहवालोरक अनि परीसि लोकुरक उन्दि आळदुन ततुरक अनि ओद आळदुन व्यभिचार कियानपा पयस मतोरक। अनि अदेन लोकुरा नडुम नितस येसुन इतुरक, 4“हे गुरु इद आळदुन व्यभिचार कियानपा पयतोम। 5इदाम आळदुन कल्कने हेविर इन्जोर नियमतिगा मूसाल माकुन आग्या हितोर; इन्जोर निमा इद आळदा बारेते बाताल इन्तोन#लेव्य २०:१०; व्यव २२:२२-२४ ?” 6अनि ओरक येसुन फसेकियान साटि इदाम पोल्लोंग इतुरक बाक्याकि ओनिगा दोष लावेकियान साटि पोल्लो हुळन्दुरक मति येसु अडिय वकसुन वळिन्जते जागातिगा कोटिला लागतुर। 7बसके ओरक ओन पुच्चेमास मतोरक असके ओर सिदो आस ओरकुन इतुर, “मियागडाल बोर पाप केवोर, ओरे पहले अदेन कलदे हेविर।” 8अनि असा अडिय वकसुन येसु जागातिगा वळिन्जते कोटिला लाकतुर। 9असके ओरक इद केन्जुन हजोरताल हुडलोरवनाह वरोर वरोर जन पसियस हतुरक अनि येसु वरोरे मतोर अनि अद आळ वने अगाय नडुम नितस मता। 10अनि येसु सिदो आस अद आळदुन पुच्चेमातुर, “हे बायि, ओरक बेके हतुरक? बाताल बोरे निकुन दन्ड हियाना आग्या हेवोर बहे?” 11अनि अद आळ इतु, “हे प्रबु बोरे दन्डता आग्या हेवोर।” अनि येसु अदेन इतुर, “नना वने निकुन दन्डता आग्या हेवोन, निमा हन अनि असा पाप केमा।”)

येसु दुनियातोर वेळिचि

12अनि येसु असा लोकुरकुन इतुर, “नना दुनियाता वेळिचि आन्दान; बोराय नावा परके वायनुर ओर आन्दारते ताकोर आयनुर मति जिवन हेवाल वेळिचि पुटहानुर#भज ११९:१०५।” 13परीसि लोकुरक येसुन इतुर: “निमा आपुना गवाहि आपुने हिन्तोन इन्जोर निया इद गवाहि खरोय हिले#युह ५:३१।” 14अनि येसु ओरकुन इतुर, “नना आपुना गवाहि आपुने हिन्तोना ते वने नावा गवाहि खरोय मन्ता बाक्याकि नना बगाडाल वातोना अनि बगा दान्तोना इन्जोर नना पुन्तोना मति नना बगडाल वान्तोना अनि बगा दान्तोना इन्जोर निमाट पुनविट। 15अनि निमाट दुनिया बदाम न्याय किन्ता अदाम न्याय किन्तोरिट मति नना बोनाय न्याय केवोन। 16अनि नना न्याय कियाका ते वने, नावा न्याय खरोय मन्ता बाक्याकि नना वरोरे आयो। मति नना नाकुन लोहतोर नावोर बाबोनासंग मन्तोना। 17अनि इवुर लोकुरक मिलेमास हिता गवाहि खरोय मन्ता#व्यव १९:१५ इन्जोर मिया नियमतिगा वने कोटता मन्ता। 18अनि नना आपुना आपुने गवाहि हिन्तोना अनि नाकुन लोहतोर ओर बाबो वने नावा गवाहि हिन्तोर।” 19अनि ओरक येसुन पुच्चेमातुरक, “नियोर बाबो बगाडुर?” अनि येसु ओरकुन इतुर, “निमाट नाकुन पुनविट अनि नावोर बाबोन वने पुनविट, नाकुन पुन्ज मनेरिट ते नावोर बाबोन वने निमाट पुन्ज मनेरिट।” 20अनि इव पोल्लोंग ओर मन्दिरतिगा उपदेश हियानपा भेट पुटता चिजतुन इराना खोलिता हेरे इतुर। अनि परमेस्वरना योजना पुरा कियाना बेरा वायो आसि इन्जोर बोरे ओन पयोरक।

येहुदि लोकुरक येसुना बारेते बाराय पुनोरक

21अनि येसु ओरकुन इतुर, “नना दान्तोना, निमाट नाकुन पळकिकिट, अनि आप आपुना पापते निमाट हायकिट#८:२१ निमाट बिना मापिते आपुना पापते हायाकिट।। अनि बगा नना दान्तोना अगा निमाट वाय परविट।” 22असके येहुदि अदिकारि लोकुरक इतुरक, “ ‘बगा नना दान्तोना अगा निमाट वाय परविट’ इदाम ओर इन्तोर, बाताल ओर आपुनतुन हव्कस वाटनुर बहे?” 23असके येसु ओरकुन इतुर, “निमाट दरतितिगा जनम आतोरिट ते दरतितोर आतोरिट, नना स्वरगतिगाडाल वातोना इन्जोर दरतितोर आयोन। 24पवित्र पुस्तकतिगा बोन ‘नना आन्दान’ इन्जोर कोटता मन्ता ओर ननाय आन्दान इन्जोर नना दावा कितान। ओद पोल्लो निमाट विस्वास केवि आयकिट ते निमाट आपुना पापते हायकिट इन्जोर नना मिकुन इन्ज मतोना।” 25अनि ओरक येसुन इतुरक, “निमा बोर आन्दि?” येसु ओरकुन इतुर, “बोद पहलेटाल नना मिकुन वळकसोर वातोना। नना ओरे आन्दान। 26मिया बारेते नाकुन पकाय इन्दाना मन्ता अनि न्याय कियाना मन्ता मति नाकुन लोहवाल खरोय मन्तोर अनि बोद नना ओनाकेडाल केन्जान्तोना अदे दुनियाता लोकुरकुन इन्तोना” इदाम इतुर। 27अनि ओर आपुना बाबोना बारेते वळकिला आतोर इन्जोर ओरकुन समजेमायो। 28असके येसु इतुर, “निमाट नना मानेयतोर मरिन कुरुस पोरो अन्जिहच हव्किट असके बोन ‘नना आन्दान’ इन्जोर पवित्र पुस्तकतिगा कोटता मन्ता ओर ननाय आन्दान इदाम नना दावा किस मतोना अद पोल्लो बराबर मन्ता अनि नना आपुना मन्दे बाराय केवोन मति बदाम नावोर बाबो नाकुन करिहतोर अदामे नना इव पोल्लोंग इन्तोना इन्जोर वने निमाट पुन्किट। 29नाकुन लोहवाल नावासंग मन्तोर; नना दरोज ओन गिरदाकियाना बुतो किन्तोना इन्जोर ओर नाकुन वरोरे इरोर” इन्जोर इतुर। 30अनि ओर इव पोल्लोंग वेहानपा पकाय लोकुरक ओनागा विस्वास कितुरक।

खरोय मिकुन स्वतन्त्र कियार

31असके येसुनिगा विस्वास कितोर येहुदि लोकुरकुन येसु इतुरक, “निमाट नावा करहानातिगा दरोज मान किसोर मनकिट ते निमाट खरोय नावोर विस्वासि आयकिट। 32निमाट परमेस्वरना खरोय बाताल इन्जोर पुन्किट ते ओद खरोय मिकुन दासता बन्दनताल स्वतन्त्र कियानुर।” 33असके ओरक ओन इतुर, “माक ते अब्रहामना पिळिते जनम आतोम, अनि बसकेय बोनाय दास आयोम। ते ‘निमाट दासताल स्वतन्त्र आयकिट#मत्ति ३:९; लूका ३:८’?” इदाम निमा बाक्या इन्तोन।

34येसु ओरकुन उत्तर हितुर, “बोरायि पाप किन्तोर ओर पापता अदिकारते मन्तोर इन्जोर नना मिकुन खरोय खरोय इन्तोना। 35दास दरोज लोन मनोर, मति मरि दरोज लोन मन्तोर। 36इन्जोर मरि#८:३६ नना परमेस्वरनोर मरि मिकुन स्वतन्त्र कियानुर ते खरोय निमाट पापता अदिकारताल स्वतन्त्र आयकिट। 37निमाट अब्रहामना वंशतोर आन्दिट इन्जोर नना पुन्तोना ते वने निमाट नाकुन हव्काना इच्चा किन्तोरिट बाक्याकि नना बोद पोल्लोंग मिकुन करहान्तोना ओद पोल्लोतुन निमाट स्विकार केविट। 38अनि नावोर बाबो बोद नाकुन तोहतोर अदे मिकुन इन्तोना, मति मिवोर बाबो बोद मिकुन इतोर अदेन निमाट किन्तोरिट।”

39ओरक येसुन उत्तर हितुर, “माक अब्रहामना वंशते जनम आतोम।” अनि येसु ओरकुन इतुर, “निमाट खरोय अब्रहामना वंशतोर लोकुरक मनेरिट ते अब्रहाम बोद बुतोंग कितोर ओदेय बुतोंग निमाट वने किस मनेरिट। 40परमेस्वरनिकेडाल केन्जतोना ओद खरोय पोल्लो नना मिकुन वेहान्तोना। मति इदेक निमाट नाकुन हव्काना इच्चा किन्तोरिट। इदाम अब्रहाम ते बसकेय केवोर आसि। 41मति मिवोर असलि बाबो बोद बुतो कितुर अदे निमाट वने किन्तोरिट।” ओरक ओन इतुर, “माक व्यभिचारते जनम आयोम। अनि मावोर वरोरे बाबो मन्तोर ओर परमेस्वरेय आन्दुर।” 42येसु ओरकुन इतुर, “खरोय परमेस्वर मिवोर बाबो मनेर ते निमाट नाकुन मया किस मनेरिट, बाक्याकि नना आपुना अदिकारते वायोन मति ओरे परमेस्वर नाकुन लोहतोर इन्जोर नना इगा मन्तोना। नना आपुना अदिकारते इगा वायोन; मति ओरे परमेस्वर नाकुन लोहतोर। 43निमाट नावा पोल्लोंग बाक्या समजेमायविट? बाक्याकि नावांग पोल्लोंग स्विकार कियान साटि निमाट तयार हिलविट। 44मिवोर बाबो सयतान आन्दुर अनि निमाट ओनोरे मरि आन्दिट। बोद इच्चा येर किन्तोर अदे निमाट कियाना इच्चा किन्तोरिट। ओर ते मुनेटाले हव्कवाल मन्तोर, अनि दरोज परमेस्वरना खरोय पोल्लोता विरोदि मन्तोर, बाक्याकि ओनागा बाराय खरोय हिले, ओर खोटाल मन्तोर अनि जुटाह वळकवालोरा बाबो आन्दुर। इन्जोर आपुना स्वभावते ओर खोटाल वळकान्तोर। 45नना खरोय पोल्लोंगे वळकान्तोना इन्जोर निमाट नावा विस्वास केविट! 46अनि मियागडाल बोरायि नना पापि मन्तोना इदेना गवाहि हिया परान्तोर बहे? अनि नना खरोय वळकान्तोना ते बाक्या निमाट नावा विस्वास केविट? 47अनि बोर परमेस्वरनोर लोकुरक मन्तोरक ओरक परमेस्वरना पोल्लोंग केन्जुन मानेमान्तोरक। मति निमाट परमेस्वरनोर लोकुरक आयविट इन्जोर निमाट परमेस्वरना पोल्लोंग केन्जुन मानेमायविट।”

येसु अनि अब्रहाम

48इद केन्जुन येहुदि लोकुरक ओन इतुरक, “निमा सामरि लोकुरक लेहका मन्तोन अनि नियागा उन्दि दुष्टात्मा मन्ता इदाम माक इन्तोरोम ओद बराबर मन्ता बहे।” 49येसु ओरकुन उत्तर हितुर, “नावागा दुष्टात्मा हिले, मति नना आपुनोर बाबोना आदर किन्तोना, अनि निमाट ते नावा अपमान किन्तोरिट। 50मति नना आपुना मान साटि इच्चा केवोन मति नावा मान साटि इच्चा किन्तोर अनि सबोय लोकुरा न्याय केवाल वरोर मन्तोर। 51बोरायि मानेय नावा पोल्लोतुन समजेमास मानेमायनुर ते ओर मानेय बसकेय हायोर आयनुर इन्जोर नना मिकुन खरोय इन्तोना।” 52असके यहुदिलोकुरक ओन इतुर, “नियागा दुष्टात्मा मन्ता इन्जोर इदेक माक सबोय रितिते पुतोम बाक्याकि अब्रहाम अनि परमेस्वरना पोल्लो वेहवालोरक वने हातोरक, मति बोरायि नावा पोल्लोतुन समजेमास मानेमायनुर ते ओर बसकेय हायोर आयनुरक इन्जोर निमा इन्तोन। 53मावोर बाबो अब्रहाम ते हातुर, बाताल निमा ओनाताल वने हजोर मन्तोन बहे? अनि परमेस्वरना पोल्लो वेहवाल वने हातुरक, निमा आपुनतुन बाताल समजेमान्तोन?” 54येसु उत्तर हितुर, “नना आपुने आपुना मान कियाका ते नावा मान बाराय हिले। मति नावोर बाबो नावा मान किन्तोर। ओन निमाट मियोर परमेस्वर इन्जोर मानेमान्तोरिट, 55अनि निमाट ते ओन पुनविट, मति नना ओन पुन्तोना। नना ओन पुनोन इन्जोर इन्का ते नना मिया लेहका खोटाल वळकवाल आयका, मति नना ओन पुन्तोना अनि ओना पोल्लोता पालन वने किन्तोना। 56नावा दरतितिगा वायाना दियातुन हुळाना आशा इरस मिवोर बाबो अब्रहाम पकाय गिरदाते मतोर। अनि ओर इव दियांग हुळतुर अनि गिरदा आतुर।” 57यहुदि अदिकारि लोकुरक ओन इतुर, “इदेकवनाह निमा पन्नास वरसानोर आयविय ते वने निमा अब्रहामिन हुळतोन बहे?” 58येसु ओरकुन इतुर, “अब्रहामना जनमा आयानाता मुने नना मन्तोना इन्जोर नना मिकुन खरोय खरोय इन्तोना।” 59असके येसु आपुनतुन परमेस्वर लेहका समजेमान्तोर इन्जोर लोकुरक ओन हियान साटि कल्क ताहतुरक मति येसु मकसुन मन्दिरता बाहरो पसियस हतुर।

Currently Selected:

युहनाल 8: fmu

Highlight

Copy