युहनाल 9

येसु आन्दराल मानेयतुन सुदरे किन्तोर

1येसु हरिते हन्दानपा वरोर मानेयतुन हुळतुर ओर जनमताल आन्दराल मतोर। 2असके ओनोर चेलालोरक येसुन पुच्चेमातुर, “हे गुरुजि, येर आन्दराल आस जनम आयान साटि बोर पाप किस मतोर? येर मानये या येनोर अवाल बाबो?” 3अनि येसु ओरकुन उत्तर हितुर, “येर मानेय या येनोर अवाल बाबो वने पाप केवोर मति लोकुरक ओना जिवनते परमेस्वरना चमत्कारता बुतो प्रगट आयि इन्जोर येर आन्दराल आतुर। 4अनि बोर नाकुन लोहतुर ओना बुतो माकुन ओद बुतो किया परान्तोरोम ओद बेरा कियाला पहाजे, अनि नरका वायार#९:४ नरका मन्जे येसु मसि मावासंगे मनोर आयनुर ते बेरा वायार ओद बेरा बोरे बोदे बुतो किया परोर। ते बोरे बोदे बुतो किया परोर। 5अनि नना इद दुनियाते बचोवनाह मन्तोना अचोवनाह नना इद दरतिता वेळिचि आन्दान#मत्ति ५:१४; युह ८:१२।” 6इदाम इन्जुन ओर दरतितिगा उसकतुर अनि ओद उसकुलते तोळियता गारा बनेकितुर अनि अद तोळियता गारा ओर आन्दरालना कोन्डांग पोरो लावेकितुर। 7अनि ओर ओन इतुर, “सिलोह पोरोयता बोडितिगा हन्जुन नोरा।” (सिलोहाना अर्थ लोहतोर इन्जोर आन्ता।) अनि ओर हन्जुन कोन्डांग नोरतुर अनि ओर हुळसोर मल्स वातुर। 8असके ओनोर हेरेटोरक अनि मुने ओन भीक तलकानपा हुळवालोरक इदाम इन्दिला लागतुरक, “येर अगा उदसुन भीक तलकसोर मतोर ओर मानेय आयोर बहे?” 9अनि हुचुक लोकुरक इतुर, “येर ओरेय आन्दुर।” अनि दुसरो हुचुलोरक इतुर, “आयोर मति ओना लेहकाय दिसिन्तोर।” असके ओर आन्दराल इतुर, “ओर ननाय आन्दान।” 10असके “बोर निया कोन्डानुंग सुदरे कितुर? अनि बदाम निमा हूळ परति?” इन्जोर ओर लोकुरक पुच्चेमातुरक। 11अनि “येसु पोरोयतोर वरोर मानेय दरतितिगा उसकुन ओद तोळिय आचतुर अनि नावा कोन्डांग पोरो लावेकिस नाकुन इतुर ‘सिलोहा पोरोयता बोडितिगा हन्जुन नोरस वाटा’ अनि नना हतान अनि कोन्डांग नोरतान अनि हुळिला लागतान” इन्जोर ओर उत्तर हितुर। 12अनि ओरक ओन पुच्चेमातुर, “ओर बगाडुर?” अनि ओर इतुर, “नना पुनोन।”

परीसि लोकुरक आन्दरालना सुदरेमायनाता बारेते मिळिहिन्तोरक

13अनि लोकुरक ओर सुदरेमातोर आन्दरान परीसि लोकुरकनिके ओतुरक। 14अनि बोद दिया येसु तोळिय आचुन ओनांग कोन्डांग सुदरे किस मतोर ओद येहुदि लोकुरा पवित्र दिया मता। 15पजा परीसि लोकुरक वने ओन पुच्चेमातुरक ओना कोन्डांग बदाम बेस आतुंग। अनि ओर परीसिलोरकुन इतुर, “ओर नावा कोन्डांग पोरो तोळियता गारा लावेकितुर, पजा नना सिलोहा बोडितिगा कोन्डांग नोरतान, अनि इदेक हुळान्तोना#मत्ति ११:२७; लूका १०:२२ ।” 16असके हुचुलोर परीसि लोकुरक इन्दिला लाकतुरक, “येर मानेय परमेस्वरनिकेडाल आयोर बाक्याकि ओर पवित्र दियातुन मानेमायोर।” अनि दुसरो लोकुरक इतुर, “पापि मानेय बदाम इदाम चमत्कार तोह परान्तोर?” आकरिते इद कारणते लोकुरकनिगा फुट आतुरक। 17अनि ओरक आन्दरान असा पुच्चेमातुरक, “ओर निया कोन्डांग सुदरे कितुर ओना बारेते निमा बाताल इन्तोन?” अनि ओर ओरकुन इतुर, “ओर परमेस्वरना पोल्लो वेहवाल आन्दुर।”

18मति ओर आन्दराल मतोर अनि इदेक हुळान्तोर इन्जोर यहुदि अदिकारिलोकुरकुन विस्वास आयो आत, असके ओर आन्दरालना अवाल बाबोन केयसुन 19ओरकुन पुच्चेमातुरक, “बाताल येर मिवोर मरि आन्दुर बहे? अनि ओर जनमताल आन्दराल जनमे मास मतोर ते पजा इदेक ओर बदाम हूळ परान्तोर?” 20अनि ओनोर अवाल बाबो उत्तर इदाम हितुर, “ओर मावोर मरि आन्दुर इन्जोर माक ते पुन्तोरोम अनि जनमताल आन्दराल आस जनमे मतोर। 21मति इदेक बदाम हुळान्तोर इन्जोर माक पुनोम अनि ओना कोन्डांग बोर सुदरे कितुर अद वने पुनोम। ओर लयोर मन्तोर; इन्जोर ओने पुच्चेमाम्ट ओर आपुना बारेते सबोय वेहानुर।” 22अनि ओनोर अवाल बाबो यहुदि अदिकारिलोकुरकुन वरियन्दुर इन्जोर इदाम उत्तर हितुर बाक्याकि ओर मसिहा आन्दुर इन्जोर बोरायि इनिर ते ओन समाज मन्डिलिताल बाहरो पसिहला पहाजे इन्जोर यहुदि अदिकारि लोकुरक उन्दि आस योजना किस मतोरक। 23इन्जोर ओनोर अवाल बाबो इतुर, “ओर लयोर मन्तोर ओने पुच्चेमाम्ट।”

24असके यहुदि अदिकारि लोकुरक आन्दराल मतोर ओर मानेयतुन दुसरो बेरा केयस, “परमेस्वरना महिमा किम बाक्याकि ओर मानेय पापि मन्तोर इदाम माक पुन्तोरोम” इन्जोर इतुरक। 25अनि ओर ओरकुन इतुर, “ओर पापि मन्तोर या हिलेर इन्जोर नना पुनोन। नना आन्दराल मतोना अनि इदेक हूळ परान्तोना इन्जोर नना उन्दि पोल्लो पुन्तोना।” 26अनि यहुदि अदिकारि लोकुरक ओन असा पुच्चेमातुरक, “ओर नियासंग बाताल कितुर? अनि बदाम निया कोन्डांग सुदरे कितुर?” 27ओर ओरकुन उत्तर हितुरक, “नना मिकुन बाताल इतान अदेन निमाट केन्जविट बहे; इदेक दुसरो बेरा बाक्या केन्जाना इच्चा किन्तोरिट? बाताल निमाट वने ओनोर चेला आयाना इच्चा किन्तोरिट?” 28असके यहुदि अदिकारि लोकुरक होंगते ओन इतुर “निमाय ओनोर चेलाल आन्दि! मति माक ते मूसाना चेलालोरक आन्दोम! 29अनि परमेस्वर मसिनासंग वळकतोर इन्जोर माक पुन्तोरोम मति येर बगाडोर आन्दुर इन्जोर माक पुनोम।” 30अनि ओर ओरकुन उत्तर हितुर, “ओर नावांग कोन्डानुंग सुदरे कितुर ते वने ओर बगाडोर आन्दुर इन्जोर निमाट ओन पुनविट ते इद आश्चरयता पोल्लो मन्ता। 31अनि परमेस्वर पापि लोकुरा केन्जोर इन्जोर माक पुन्तोरोम मति बोरायि परमेस्वरतुन मया किस ओना पोल्लो मानेमान्तोर ते परमेस्वर ओना केन्जान्तोर। 32अनि आन्दराल आस जनम आतोर मानेयना कोन्डांग सुदरे कितुर इन्जोर बोरे दुनिया बनेमाता असकेडाल बसकेय केन्जोरक। 33अनि येर मानेय परमेस्वरनिकेडाल वायोर आस मनेर ते, ओर बारायि कियापरोर आस मनेर” इन्जोर ओर उत्तर हितुर। 34अनि यहुदि अदिकारि लोकुरक ओन इतुर, “निमा ते पापताल जनम आतोन निमा माकुन बाताल करहान्तोन?” अनि ओरक ओन बाहरो पसिहस हितुरक#भज ८२:६।

आत्मिक आन्दारपन

35अनि यहुदि अदिकारि लोकुरक ओन बाहरो पसिस हितुर इन्जोर येसु केन्जतुर अनि बसकेय येसु ओन मिले मातुर असके, “बाताल निमा स्वरगताल वातोर परमेस्वरनोर मरिनिगा विस्वास किन्तोन?” इन्जोर येसु ओन पुच्चेमातुर। 36अनि ओर येसुन इदाम उत्तर हितुर, “हे प्रबु, ओर बोर आन्दुर नना ओनागा विस्वास कियाका?” 37अनि येसु ओन इतुर, “निमा ओन हुळतोन वने अनि मियासंग वळकिला आतोन ओरेय आन्दान” इन्जोर येसु ओन इतुर। 38अनि ओर इतुर, “हे प्रबु, नना विस्वास किन्तोना इदाम इन्जुन ओर येसुना आरादना कितुर।” 39असके येसु इतुर, “बोर हूळ परोर ओर हुळिर अनि बोर हूळ परान्तोर ओरक आन्दराल आयिर इदाम लोकुरकुन न्याय कियान साटि नना इद दरतितिगा वातान।” 40अनि ओनासंग मतोर परीसि लोकुरकनिकेडाल हुचुलोरक इव पोल्लोंग केन्जुन, “बाताल माट वने आन्दराल मन्तोरोम#युह १:२८?” इन्जोर ओन इतुर। 41अनि येसु ओरकुन इतुर, “निमाट आन्दराल लोकुरक मनेरिट ते परमेस्वर मिया पापतुन मापि किस मनेर। मति माक हुळिन्तोरोम इदाम निमाट इन्तोरिट इन्जोर मिया पापतुन परमेस्वर मापि किया परोर।”

Currently Selected:

युहनाल 9: fmu

Highlight

Copy