युहनाल 7

येसु अनि ओनोर तमो

1इव पोल्लोता पजा येसु गलील प्रदेशते वलियसोर मतोर बाक्याकि यहुदिलोकुरक ओन हव्काना साटि कोसिस किन्दुरक इन्जोर ओर यहुदियातिगा वलियला इच्चा केवोर। 2अनि यहुदिया लोकुरा मन्डाकना हनुम हेरे वास मता#लेव्य २३:३४; व्यव १६:१३। 3इन्जोर ओनोर तमोलोरक ओन इतुर, “बोद चमत्कार बुतो निमा किन्तोन अदेन नियोर चेलालोरक वने हुळिला पहाजे इन्जोर निमा इगाडाल पसिस यहुदिया प्रदेशतिगा हन। 4बाक्याकि लोकुरा मुने हजोर आयाना इच्चा किन्तोर बोरे मकस बुतोंग केवोरक; निमा इदाम बुतोंग किसोर आपुनतुन दरतिता सबोय लोकुरकनिगा तोहा।” 5बाक्याकि ओनोर तमोलोरक वने ओनागा विस्वास केवोर आन्दुरक। 6असके येसु ओरकुन इतुर, “नावा बुतो कियाना बेरा इदेकवनाह वायोय मति मिकुन बुतोंग कियान साटि सबोय बेरा सोबाय मन्ता। 7अनि इद दुनियातोर लोकुरक मिकुन दुश्मन किया परोर मति ओरा बुतो गलति मन्ता इन्जोर नना ओरा विरोदते गवाहि हिन्तोना, इन्जोर ओरक नाकुन दुश्मनि किन्तोरक। 8निमाट हनुम साटि हन्ट। इदेक वनाह नावा बेरा पुरा आयोय इन्जोर नना इद हनुम साटि इदेक हनोन।” 9अनि इव पोल्लोंग ओर ओरकुन इतुर पजा ओर गलील प्रदेशतेय मतोर।

मन्डाकना हनुमतिगा येसु हाजर मन्तोर

10मति बसके ओनोर तमोलोरक हनुमतिगा हतुरक असके ओर आपुन मकस बोने वेहवा गुपित रितिते हनुमतिगा हतुर। 11मति येहुदि लोकुरक हनुमतिगा “ओर बगा मन्तोर?” इदाम इन्ज येसुन पळकिला लागतुर। 12ओद हनुमतिगा लोकुरा पकाय भीळ आतु अनि ओर लोकुरक येसुना बारेते आपसते पकाय वळकिला लाकतुरक, हुचुलोर लोकुरक इदाम इतुरक, “ओर बेस मानेय मन्तोर” अनि दुसरो हुचुलोर लोकुरक, “ओर सबोय लोकुरकुन बहके किन्तोर” इदाम वने इतुरक। 13मति यहुदि अदिकारि लोकुरा वरेता कारणते बोरे मानेय ओना बारते लोकुरा मुने बाताले वळकोरक।

हनुमतिगा येसुना उपदेश

14बसके हनुमता अरदो दियांग मारतुंग असके येसु मन्दिरतिगा हन्जुन उपदेश कियाला लागतुर। 15असके यहुदि अदिकारि लोकुरक ओना करहाना बारेते केन्जुन, “येर मानेय बसकेय मावा दरमता साळातिगा वायोर ते वने इचोन पोल्लो येर बदाम पुन्तोर?” इदाम आश्चरय किस इतुरक। 16असके येसु ओरकुन इतुर, “नना बोद कराहन्तोना ओद नावा करिहता आयो मति नाकुन लोहवाल बाबोना आन्दु। 17बोरायि खरोय परमेस्वरना आग्याता पालन किसोर ताकाना इच्चा किन्तोर ते ओर नावा इद पोल्लो परमेस्वरनिकेडाल आन्दु या नना आपुनिकेडाल इन्तोना इन्जोर पुन्दानुर। 18अनि बोराय आपुना मन्दिगडाल बारायि इन्तोर ते ओर आपुना हजोरपण साटि इच्चा किन्तोर, मति बोर आपुनतुन लोहवालना हजोरपणता इच्चा पळकान्तोर ओरे खरोय मन्तोर अनि ओनिगा बारायि अदरम हिले। 19बाताल मूसाल मिकुन परमेस्वरना नियम हेवोर बहे? ते वने मियाकेडाल बोरे ओद नियमता पालन किस ताकोर। निमाट नाकुन हव्काना साटि बाक्या कोसिस किन्तोरिट?” 20अनि लोकुरक येसुन उत्तर हितुर, “नियागा दुष्ट आत्मा मन्ता, बोर निकुन हव्काना इच्चा किन्तोर?” 21अनि येसु लोकुरकुन उत्तर हितुर, “नना उन्दि चमत्कारता बुतो पवित्र दियाते कितान ते निमाट सबोय लोकुरक आश्चरय किन्तोरिट। 22अनि मूसाल मिकुन कतना कियाना आग्या हितोर। इन्जोर पवित्र दिया वने मिया नुनालना दिया पुरा आतेक निमाट कतना किन्तोरिट#लेव्य १२:३; उत्प १७:१०। (खरोय वेहकान ते इद कतना कियाना मूसानिकेडाल आयो मति मावोर बाबो दादिनिकेडाल वाता।) 23अनि मूसाना द्वारा हिताल नियम दगमाकि इन्जोर निमाट पवित्र दिया वने मानेयना कतना किन्तोरिट। मति बसके नना पवित्र दिया वरोर मानेयतुन सुदरे कितान ते निमाट नाकुन बाक्या होंग किन्तोरिट#युह ५:९? 24निमाट चेहरा हुळस न्याय केमाट, मति अदेन समजेमास खरोय न्याय किम्ट।”

बाताल येसुये मसिहा आन्दुर?

25असके येरुसलेमतोर हुचुक लोकुरक इन्दा लागतुरक, “ओरक हव्कान साटि कोसिस कियाला आतोरक ओर मानेय येरे आयोर बहे? 26मति हुळाट ओर ते सबोय लोकुरा मुने हिमतते करिहला आतोर, अनि करहाना बेरा बोरे ओन बाताले इनोर। बाताल अदिकारि लोकुरक येरेय मसिहा आन्दुर इन्जोर खरोय पुतोर बहे? 27येर बगाडोर आन्दुर इन्जोर माक ते येन पुन्तोरोम मति मसिहा वायनुर असके बोरायि ओर बगाडोर आन्दुर इन्जोर पुनोर आयनुर” इदाम इतुरक। 28अनि येसु मन्दिरतिगा उपदेश कियाला लागतुर असके जोरदे इदाम वेहतुर, “नना बोर आन्दान अनि बगाडाल वातोना? इन्जोर खरोय निमाट पुन्तोरिट मति नना आपुना अदिकारते वायोन, बोर नाकुन लोहतोर ओर खरोय परमेस्वर मन्तोर मति ओन निमाट पुनविट। 29मति नना ओनाकेडाल वातान अनि ओरेय नाकुन लोहतोर इदाम नना ओन पुन्तोना।” 30असके ओरक ओन पयाना इच्चा कितुरक, ते वने ओना पयाना अनि हव्काना बेरा वायिवाय मता इन्जोर बोरे ओन पयिला परोरक। 31ते वने भीळताल पकाय लोकुरक, “मसिहा वायनुर असके बाताल इदेनताल वने पकाय चमत्कार ओर तोहानुर बहे?” इदाम इतुरक अनि ओन मसिहा समजेमास ओनागा विस्वास कितुरक।

येसुन पयान साटि कोसिस

32लोकुरक ओना बारेते इव पोल्लोंग मकसोर मकसोर इन्दानपा परीसि लोकुरक केन्जतुरक। असके मुक्याल याजक अनि परीसि लोकुरक ओन पयान साटि मन्दिरतुन केपवालोरक सिपायि लोकुरकुन लोहतुर। 33असके येसु इतुर, “नना हुचुक बेरावनाह मियासंग मन्तोना, पजा आपुनोर लोहवालना हेरे दाका। 34अनि निमाट नाकुन पळकिकिट मति कलियवि आयकिट; अनि बगा नना मनका अगा निमाट वाय परविट” इन्जोर इतुर। 35असके यहुदि लोकुरक वरोन दुसरोनासंग इदाम इन्दिला लागतुरक, “माक येन मिलेमाय परो आयकोम इदाम येर बगा दायनुर? बाताल ओर मावा देशता बाहरो सहेरते हन्जुन अगा मावोर यहुदिलोकुरक युनानि लोकुरासंग मन्तोरक अनि ओरकुन वने उपदेश हियानुर बहे? 36‘निमाट नाकुन पळकिकिट मति कलियवि आयकिट अनि बगा नना मन्तोना अगा वाय परविट?’ इन्जोर ओर वेहतोर इद पोल्लोता अर्थ बाताल मन्ता” इदाम ओरक इतुरक।

जिवन एरता नदि

37पजा मन्डाक हनुमता आकरि दिया वातु, ओद दिया पकाय महत्वता मता। ओद दिया येसु नितितुर अनि जोरदे इतुर, “बोनाय येर उन्डावस मन्दार ते ओर नावा हेरे वास उन्दिला पहाजे#लेव्य २३:३६। 38अनि नावागा विस्वास कियानुर ओनागडाल पवित्र पुस्तकतिगा कोटता लेहका अनन्त जिवन हेवांग नदिंग पोंगसोर पसियानुंग#यहेज ४७:१; जक १४:८ ।” 39अनि इद सबोय ओर पवित्र आत्माता बारेते इन्ज मतोर बाक्याकि बोर येसुनिगा विस्वास किन्तोरक ओरकुन ओर पवित्र आत्मा पुटवाल मन्ता। मति इदेकवनाह येसु हासुन असा जिवे मास स्वरगतिगा हनोर आस मतोर इन्जोर इदेकवनाह ओर पवित्र आत्मा हेवोर आस मतोर।

40असके येसुना पोल्लोंग केन्जुन भीळताल हुचुक लोकुरक इतुरक, “परमेस्वर लोहानुर इदाम वाचा किस मतोर परमेस्वरना ओर पोल्लो वेहवाल खरोय येरेय आन्दुर।” 41अनि दुसरो हुचुलोर इतुर, “येर मसिहा आन्दुर” अनि असा दुसरो हुचुलोरक इतुरक, “मसिहा गलील प्रदेशतिगाडाल जनम आस वायोर आयनुर। 42बाक्याकि मसिहा दावुद राजाना वंशते बेतलहेम सहेरतिगा जनम आयनुर” इन्जोर पवित्र पुस्तकतिगा कोटता मन्ता#२ शाम ७:१२; मीखा ५:२। 43इदाम ओना बारेते लोकुरा बिडतिगा फुट आतुरक। 44अनि ओर लोकुरकनिगाडाल हुचुलोरक ओन पयान साटि इच्चा किन्दुरक, मति बोरे मानेय ओन पयि परोर आतुरक।

यहुदि अदिकारि लोकुरा अविस्वास

45येरुसलेम मन्दिरतोर सिपायि लोकुरक मल्स वातुरक असके मुक्याल याचक अनि परीसि लोकुरक, “निमाट ओन बाक्या तरविट?” इन्जोर ओरकुन पुच्चेमातुर। 46अनि मन्दिरता सिपायि लोकुरक इदाम उत्तर हितुर, “ओर मानेय सोबाय सोबाय करहान्तोर अनि बोरे बसकेय इदाम पोल्लो करिहवोर।” 47अनि परीसि लोकुरक ओरकुन उत्तर हितुर, “बाताल मिकुन वने ओर बहके कितुर बहे? 48अनि बाताल मावोर अदिकारि लोकुरकनिकेडाल या परीसि लोकुरकनिगाडाल बोरे ओनागा विस्वास कितोर बहे? 49मति मूसाना नियमतुन पुनोर येर लोकुरकुन सराप मन्ता।” 50निकुदेमोस पोरोयतोर वरोर परीसि मानेय अगा मतोर। अनि ओर येसुन हुळिलाय पहले ओना हेरे वास मतोर। अनि ओर यहुदि अदिकारि लोकुरकनिकेडाल वरोर मतोर अनि ओर ओरकुन इतुर#युह ३:१,२। 51“बोरायि मानेयतुन ओना पोल्लोंग केन्जुन अनि ओर बाताल बुतोंग किन्तोर इदाम माक ओना बारेते सबोय पुन्दानावनाह मावा नियमता अनुसार माक ओना न्याय किया परोम।” 52अनि ओरक होंगदे निकुदेमोसिन इदाम उत्तर हितुर, “बाताल निमा वने गलील प्रदेशतोर आन्दि बहे? पवित्र पुस्तकतिगा पळक्स हुळा असके गलील प्रदेशताल बोरे परमेस्वरना पोल्लो वेहवाल प्रगट आयो आयनुर इन्जोर निकुन समजेमायार।” 53(असके सबोय लोकुरक आप आपुना लोन हतुरक।

Currently Selected:

युहनाल 7: fmu

Highlight

Copy