युहनाल 6

येसु सयुंग हजार लोकुरकुन तिहान्तोर

(मत्ति १४:१३-२१; मर ६:३०-४४; लूका ९:१०-१७)

1असके पजा येसु गलील प्रदेशता तिबिरियास सेहेरता हजोर नहारता होद पकाळ हतुर। इद नहेरतुन गलील नहार अनि तिबिरियास नहार इदाम रन्ड पोरोय मता। 2अनि ओर बिमार लोकुरकनिगा तोहन्दुर ओद चमत्कारतुन हुळसुन उन्दि हजोर भीळ ओना परके वातुरक। 3असके येसु मटा पोरो हन्जुन आपुनोर चेलालोरासंग अगा उदितुर। 4अनि यहुदि लोकुरा पसहा हनुम हेरे वास मता। 5बसके येसु नालुंगास बासा हुळस उन्दि हजोर भीळ आपुनिके वायानपा हुळतुर। असके “येर लोकुरकुन जेवन तिन्दान साटि माक बगडाल रोटिंग अस ततकाट?” इन्जोर येसु फिलिप्पुसतुन इतुर। 6ओर इद पोल्लो ओरकुन परिक्षा कियान साटि पुच्चेमातुर बाक्याकि ओर बाताल कियालाय दान्तोर इन्जोर ओर आपुन पुन्दुर। 7फिलिपुस ओन उत्तर हितुर, “गुरुजि अगडाल वरोर वरोर जनतुन हुचुक हुचुक हियान साटि रन्ड नुहक दिनारता#६:७ उन्दि दिनार वरोर बुतोकेवालना उन्दि दियाता रोजिता बराबर मता। रन्ड नुहक दिनार वरोर बुतोकेवालना आट महिनाना रोजिता बराबर मता। रोटिंग वने कमि आयनुंग!” 8अनि ओनोर चेलानिगाडाल शमोन पतरसिन तमो अन्दरियास ओन इतुर, 9“इगा वरोर पेकाल मन्तोर ओना हेरे जवारिता सयुंग रोटिंग अनि रन्ड मीनक मतांग। मति इचोर लोकुरकुन इव हालोंग आयनुंग?” 10असके “सबोय लोकुरकुन जेवन कियान साटि उदिला वेहाट” इन्जोर येसु इतुर। अनि ओद जागातिगा पकाय रोन्डा मता इन्जोर सबोय लोकुरक जेवेकियान साटि रोन्डा पोरो उदितुरक अगा लगभग सयुंग हजार मानेयक मतोरक। 11असके येसु रोटिंग पयतुर अनि ओरा साटि परमेस्वरना धन्यवाद किस आपुनोर चेला लोकुरकुन तुसिला हितुर। असा मीन्क वने पयसि अदामे कितुर अनि लोकुरकुन बचोन पहाजे अचोक हितुरक अनि ओर लोकुरक पकाय जेवन कितुरक। 12बसके ओरा पोटा निन्दित असके “पिसता रोटिंग निमाट सकलेकिम्ट बाताले हरचिमाट” इन्जोर येसु चेलालोरकुन इतुर। 13आकरिते ओरक सकले कितुरक अनि सयुंग हारितांग तिनवालोरिगडाल पिस मतांग अवेना बारा सिबलांग निदितुंग। 14असके ओद चमत्कार किस तोहतुर अदेन लोकुरक हुळसि, “दरतितिगा वायवाल मन्तोर ओर परमेस्वरनोर पोल्लो वेहवाल खरोय येरेय आन्दुर” इदाम इन्दिला लागतुरक।

15लोकुरक नाकुन पयस राजा बनेहकियाना इच्चा कियाला आतोरक इदाम पुन्ज येसु असा वरोरे मटा पोरो हतुर।

येसु एर पोरो ताकान्तोर

(मत्ति १४:२२-३३; मर ६:४५-५२)

16बसके नुलपे बेरा आत ते ओनोर चेलालोरक नहारता टका हेरे हतुरक। 17अनि डोंगातिगा हन्जुन नहारता ओद पकाड कफरनहुम सेहेरतिगा हन्दिला लागतुरक। ओद बेरा आन्दार आस मता अनि येसु अचोनवनाह ओरा हेरे वायोर आसि। 18असके पकाय हजोर दुन्दाळ वळियता कारणते नहारतिगा पळवा वान्दुंग। 19बसके ओर डोंगा ताकिसोर ताकिसोर रन्ड कोसक#६:१९ उन्दि कोस मून्ड किलोमिटर आन्ता। हतुरक असके ओरक येसुन एरता पोरो ताकसोर डोंगाता हेरे वायानपा हुळतुरक अनि वरियतुरक। 20मति येसु ओरकुन, “नना आन्दान; वरियमाट” इन्जोर इतुर। 21असके ओर लोकुरक येसुन डोंगातिगा वायिला हितुरक, अनि सान्डे ओद डोंगा ओरकुन बगा हन्दाना मता ओद टकातिगा अवतु।

लोकुरक येसुन पळकान्तोरक

22दुसरो दिया नहारता ओद पकाडता लोकुरा भीळ अगा केवल उन्दि डोंगा मता अनि ओद डोंगातिगा केवल येसुनोर चेलालोरक हन्ज मतोरक मति येसु ओरासंग हनोर आसि इदाम पुन्ज मतोरक। 23असके परमेस्वरतुन धन्यवाद हिस प्रबु लोकुरकुन जेवन हिस मतोर ओद जागा हेरे तिबिरियास पोरोयता सहेरताल हुचुक डोंगांग वातुंग। 24येसु इगा हिलेर अनि ओनोर चेला लोकुरक वने हिलेरक इन्जोर भीळता लोकुरक समजेमातुरक असके लोकुरक डोंगातिगा हन्जुन येसुन पळकसोर कफरनाहुमतिगा अवतुरक।

येसु जिवनता रोटि आन्दुर

25अनि नहारता ओद पकाड येसुन मिलेमातुरक असके, “हे गुरुजि, निमा इगा बसके वाति?” इदाम ओरक पुच्चेमातुरक। 26अनि येसु ओरकुन उत्तर हितुर, “नना मिकुन खरोय खरोय इन्तोना, निमाट चमत्कार हुळतोरिट आयो मति पोटा पन्जनाहका रोटिंग तितोरिट इन्जोर नाकुन पळकान्तोरिट। 27अनि इद दरतिता जेवन नाश आन्ता इन्जोर ओद नाश आयवाल जेवन साटि निमाट मेहनत केमाट, मति अनन्त जिवन पळकना साटि निमाट मेहनत किम्ट। अनि नना मानेयतोर मरि ओद अनन्त जिवन मिकुन हियानुर बाक्याकि ओद हियान साटि परमेस्वर बाबो केवल नाकुनेय अदिकार हितोर।” 28असके ओरक येसुन इतुरक, “परमेस्वरना बुतो कियान साटि माक बाताल कियाकोम?” 29येसु ओरकुन उत्तर हितुर: “परमेस्वरना बुतो इद आन्दु, परमेस्वर लोहतोर नावा पोरो निमाट विस्वास किम्ट इन्जोर मन्ता।” 30असके ओरक येसुन पुच्चेमातुरक, “निकुन परमेस्वर लोहतोर इदाम माक विस्वास कियाना साटि बोद चमत्कारतुन तोहान्तोन? अदेन हुळस माक नियागा विस्वास कियाकोम। 31अनि मावोर बाबो दादिलोरक वारु पल्लातिगा हन्जोर मतोरक असके ओरकुन चमत्कार रितिते मन्ना पोरोयता जेवन#६:३१ परमेस्वर वारु पल्लाते लोकुरकुन मन्ना पोरोयता जेवन हितुर। तिन्दिला हितुर अनि ओरक तितुर बाक्याकि ‘परमेस्वर ओरकुन तिन्दान साटि स्वरगताल रोटि हितुर#निर १६:४-१५; भज ७८:२४’ इन्जोर पवित्र पुस्तकतिगा कोटता मन्ता#निर १६:४,१५; भज ७८:२४ ।” 32असके येसु ओरकुन इतुर, “नना मिकुन खरोय खरोय इन्तोना, मूसाल मिकुन ओद मन्ना पोरोयता रोटिंग स्वरगताल हेवोर मति नावोर बाबो मिकुन खरोय रोटितुन स्वरगताल हिन्तोर। 33बाक्याकि परमेस्वरना रोटि ते ओद स्वरगताल रयसुन दरतिता लोकुरकुन जिवन हिन्ता मन्ता।” 34असके ओरक येसुन इतुरक, “हे प्रबु इद रोटिंग माकुन दरोज हिसोर मन।”

35अनि येसु ओरकुन इतुर, “जिवनता रोटि नना आन्दान अनि बोर नावा हेरे वायनुर ओन बसकेय करवसो आयार अनि बोर नावागा विस्वास कियानुर ओन बसकेय एर उन्डावसो आयार। 36मति निमाट नाकुन हुळतोरिट ते वने नावागा विस्वास केविट इन्जोर नना मिकुन इन्ज मतोना। 37बाबो नाकुन सोपेकितोर ओर सबोय लोकुरक नावा हेरे वायनुरक अनि बोरायि नावा हेरे वायनुर ओन नना बसकेय टन्डोन आयका। 38बाक्याकि नना आपुना इच्चाते आयो मति नाकुन लोहवाल नावोर बाबोना इच्चा पुराकियान साटि नना स्वरगताल रेयस वातोना। 39अनि ओर नाकुन हितोरिकेडाल उन्दि वने मानेयतुन हरचोन आस, परमेस्वर दरतिता लोकुरा न्याय कियाना साटि असा मलस वायनुर असके ओरक सबोय लोकुरकुन हातोरिगाडाल असा जितो किहिला पहाजे इदाम नाकुन लोहवालना इच्चा मन्ता। 40बाक्याकि बोरायि नाकुन हुळस नावागा विस्वास किन्तोर ओन अनन्त जिवन पुटार इन्जोर नावोर बाबोना इच्चा इद मन्ता अनि नना आकरि दिया न्यायता बेरा ओन हातोरिगाडाल असा जितो कियाका” इदाम इतुर।

41अनि येसु ओरकुन असा इतुर, “स्वरगताल रेयता ओद रोटि नना आन्दान” इदाम ओर इन्ज मतोर इन्जोर यहुदिलोकुरक येसुना विरुद बळबळेमातुरक। 42अनि “बाताल येर यूसुफनोर मरि येसु आयोर बहे? ओनोर अवाल बाबोन वने माक पुन्तोरोम? ते ‘नना स्वरगताल रयतोर आन्दान’ इदाम ओर बदाम इन्तोर?” 43येसु ओरकुन इदाम उत्तर हितुर, “निमाट आप आपुने पुसपुस वेहमाट। 44नाकुन लोहतोर नावोर बाबो बोन नावा हेरे तरोर आयनुर अचोवनाह बोरे नावा हेरे वायिला परोर, अनि नना ओन न्यायता आकरि दिया असा जितो कियाका। 45‘सबोय लोकुरक परमेस्वरनिकेडाल करियतोर मन्दानुर’ इन्जोर परमेस्वरना पोल्लो वेहवालना पुस्तकतिगा कोटता मन्ता। बोरायि बाबोनिकेडाल केन्जुन करियतोर ओरक नावा हेरे वान्तोरक#यश ५४:१३। 46अनि नावोर बाबोन बोरे हुळतुर इदाम आयो मति परमेस्वरनिकेडाल वातोना केवल ननाय ओन हुळतोना। 47नना मिकुन खरोय खरोय इन्तोना, बोरायि नावागा विस्वास किन्तोर ओन अनन्त जिवन मन्ता। 48अनि जिवनता रोटि ननाय आन्दान। 49अनि मिवोर बाबो दादिलोरक वारु पल्लातिगा मन्ना पोरोयता जेवन तितुरक, मति ओरक हातुरक। 50इद ते लोकुरकुन तिन्दिला साटि स्वरगताल रेयता रोटि आन्दु, इद तिनिर ते ओर बसकेय हायोर। 51अनि स्वरगता रेयता जिवनता रोटि ननाय आन्दान बोरायि इद रोटितिगाडाल तिनिर ते ओरक दरोज साटि जितो मन्दानुरक। अनि नना हियाका ओद रोटि दरतिता लोकुरकुन जिवेमायान साटि हियाना नावा मेन्दुल आन्दु।”

52अनि “येर मानेय आपुना मेन्दुल माकुन बदाम तिन्दिला हिया परान्तोर?” इन्जोर इदेना बारेते यहुदिलोकुरक वरोन दुसरोनासंग बहस कियाला लागतुरक। 53येसु ओरकुन इदाम इतुर, “निमाट बचोवनाह नना मानेयतोर मरिना मेन्दुल अनि नतुर उन्वि आयकिट अचोवनाह मियागा जिवन हिले आयकि इन्जोर नना मिकुन खरोय खरोय इन्तोना। 54नावा मेन्दुल बोर तिन्तोर अनि नतुर उन्तोर असके अनन्त जिवन ओनाय मन्ता, अनि नना न्यायता आकरि दिया ओन असा जितो कियाका। 55अनि नावा मेन्दुल खरोय तिन्दाना जेवन आन्दु अनि नावा नतुर खरोय उन्डाना चिज आन्दु। 56अनि बोर नावा मेन्दुल तिन्तोर अनि नावा नतुर उन्तोर ओर नाकुन मिलेमास मन्तोर अनि नना ओनासंग वने मन्तोना। 57जिवन हेवाल नावोर बाबो नाकुन लोहतोर। अनि नावोर बाबोना द्वारे नना जितो मन्तोना। अदामे बोरायि नाकुन तिन्दानुरक ओरक वने जितो मन्दानुरक। 58अनि स्वरगताल रेयता रोटि ननाय आन्दान; इद रोटि नियोर बाबो दादि लोकुर तिता मन्ना पोरोयता रोटिंग लेहका आयो, ओरक अव रोटिंग तितुरक अनि हातुरक मति बोरायि इद रोटिंग तिन्दानुरक ते ओरक दरोज साटि जितो मन्दानुरक।” 59अनि इव पोल्लोंग येसु कफरनाहुमता उन्दि समाज मन्डिलितिगा उपदेश हियानपा इतुर।

अनन्त जिवनता पोल्लो

60अनि ओना चेलानिकेडाल पकायलोरक इद केन्जुन, “इद पकाय कटिन पोल्लो मन्ता इदेन बोर पालन किपरान्तोर?” इन्जोर इतुरक। 61अनि चेलालोरक आप आपुने बळबळेमायिला आतोरक इन्जोर येसु आपुना मन्दिगा पुन्ज ओरकुन पुच्चेमातुर, “इद पोल्लोते मिकुन टेस लागान्ता बहे?। 62अनि निमाट नना मानेयतोर मरिन पहले बगा मन्दान ओद स्वरगतिगा हन्दानपा हुळकिट असके निमाट बाताल वळकिकिट? 63अनि परमेस्वरना आत्मा जिवन हिन्ता; मानेयता लावते बाराय बुतोता हिले। मानेयतुन ओद जिवन हिया परो। नना मिकुन इतान अव पोल्लोंग मिकुन जिवन हिन्ता बाक्याकि परमेस्वरना आत्माताल इव पोल्लोंग वान्तांग। 64मति विस्वास केवोरक हुचुक लोकुरक मियागा मन्तोरक इदाम इतुर।” बाक्याकि बोर विस्वास केवोरक अनि बोर नाकुन पयपियानुर इव सबोय पोल्लोंग येसु मुनेय पुन्दुर। 65अनि येसु असा ओरकुन इतुर, “इद कारणते मन्ता नना मिकुन इन्ज मतोना, बोरे नावा हेरे वायान साटि नावा बाबो इच्चा केवोर अचोवनाह बोरे नावा हेरे वाय परो।”

पतरसना विस्वास

66असके पजा ओनोर चेलानिगाडाल पकाय चेलालोरक परके मलस हतुरक अनि अदेना पजा ओरक येसुनासंग हनोरक। 67असके येसु बारा चेलालोरकुन इतुर, “बाताल मिया वने परके मल्स हन्दाना इच्चा मन्ता बहे?” 68अनि शमोन पतरस येसुन उत्तर हितुर, “हे प्रबु माक बोना हेरे दाकोम? अनन्त जिवनता पोल्लो नियाय हेरे मन्ता#मत्ति १६:१६; मर ८:२९; लूका ९:२० । 69अनि परमेस्वर लोहतोर पवित्र मानेय निमाय आन्दि इन्जोर माक विस्वास कितोम अनि पुतोम।” 70असके येसु ओरकुन उत्तर इतुर, “बाताल नना मिकुन बारा लोकुरकुन आचोन बहे? मति मियागडाल वरोर मानेय सयतान मन्तोर#६:७० ओर मानेय सयताना नियत्रणते मन्तोर या सयताना अदिकारते मन्तोर।!” 71(इद पोल्लो ओर शिमोन इस्करियोतिनोर मरि यहुदाना बारेते इन्ज मतोर बाक्याकि बारा चेलानिकेडाल येसुन पयपिवाल ओरे मतोर।)

Currently Selected:

युहनाल 6: fmu

Highlight

Copy