बुतोंग 14

इकुनिया सहेरतिगा पोलुस अनि बरनबास

1इकुनिया सहेरतिगा पोलुस अनि बरनाबास यहुदिलोरा समाज मन्डलितिगा हतुरक, यहुदिलोरक अनि युनानिलोरक येर इवुरासनिगाडाल पकाय लोकुरक विस्वास कितुरक अचोन सोबाय ओरक परमेस्वरना पोल्लो वळकतुरक। 2मति विस्वास केवोरक यहुदि आयोर लोकुरक मसि विस्वासि लोकुरा विरोदते यहुदि आयोर लोकुरकुन भळकेह किस ओरा मन्दुन होंगते निहचितुरक। 3मति ओरक पकाय दियांगवनाह अगा मन्जुन प्रबुन साटि हिमतते वेहिन्दुरक। अनि ओरा कयदे चिन्ह अनि चमत्कारता बुतोंग किहिस प्रबु येसु आपुना दयाता पोल्लोता सबुतता हिसोर मतोरक। 4मति सहेरता लोकुरकनिगा फुट अरस मता, हुचुलोर लोकुरक यहुदिलोरा बासा अनि दुसरो हुचुलोर लोकुरक येसुना खास चेला लोकुरा बासा हतुरक। 5मति ओरा अपमान किस ओरकुन कलदे हियान साटि यहुदि आयोर लोकुरक अनि यहुदिलोकुरक आपुना अदिकारि लोकुरासंग ओरा परके वितितुरक। 6ते पोलुस अनि बरनाबास इद पोल्लोतुन पुतुरक अनि लुकावुनिया प्रदेशता लुस्त्रा अनि दिरबे सहेरतिगा अनि हेरे-गुरेटा प्रदेशतिगा वितितुरक। 7अनि अगा सुसमाचार केन्जिहला लागतुरक।

लुस्त्रा अनि दिरबे सहेरतिगा

8लुस्त्रातिगा काल्क कमजोर मतांग वरोर मानेय मतोर। ओर जनमताले लंगळाल मतोर, ओर बसकेय ताकोर आसि। 9ओर पोलुस वळकानपा केन्जसोर मतोर। अनि पोलुस ओनाके टकलावेकिस हुळतुर; ओन बेस आयाना विस्वास मन्ता इन्जोर पोलुस हुळस ओर लंगळाल मानेयतुन, 10“आपुना काल्कने सिदो निता” इन्जोर जोरदे इतुर; असके ओर डेयस वलियला लागतुर। 11पोलुस किता इद बुतोतुन लोकुरक हुळस लुकावुनियाता बोलिते जोरदे इतुरक, “पेन मानेयता रुपते आस मावा हेरे रयस वातोर।” 12ओरक बरनबासतुन जेयुस#१४:१२ जेयुस युनानि लोकुरा हजोर पेन मन्तोर अनि पोलुसतुन मुक्या वळकवाल मतोर इन्जोर हिरमेस#१४:१२ युनानि लोकुरा विस्वासता अनुसार हिरमेस वरोर पेनता पोल्लो दुसरो पेनतासंग वळकवाल मन्तोर। इदाम पोरोय इतुर। 13नगरता बाहरो बनेमाता जेयुसना मन्दिरतोर वरोर याजक लुस्त्रा सहेरता दरवाज मुने कोन्दा अनि पुंगारता हार तचुन लोकुरासंग बलिदान हियाना विचार किन्दुर। 14मति येसुना खास चेलालोरक बरनबास अनि पोलुस इद केन्जुन दुःखते आपुनांग सन्दरांग हरिहतुरक अनि ओरक लोकुरा भीळतिगा हन्जुन जोरदे इन्दिला लागतुरक: 15“हे लोकुरक, निमाट बाताल किन्तोरिट? माक वने मिया लेहका सुख-दुःखवाले मानेय मन्तोरोम, अनि निमाट इव बेकार पोल्लोताल अलग आस स्वरग अनि दरति अनि समुद्र अनि अगा सबोय बनेहकितोर#निर २०:११; भज १४६:६ जिवित परमेस्वरनिके मलाट इन्जोर ओद सुसमाचार माक मिकुन वेहान्तोरोम। 16होनेटा काळदे परमेस्वर सबोय जातितुन आपुना आपुना हरिते ताकिला हितुर। 17ते वने ओर आबारताल पिरता अनि कायावाले सीजनक मिकुन हिस, जेवन अनि गिरदा हिसोर मिया मन्दुन निहचोर मतोर। इदाम परमेस्वर सोबाय पोल्लो किस आपुना बारेता गवाहि हिसोर मतोर” इन्जोर इतुर। 18पोलुस अनि बरनाबास इदाम इन्जुन ओरा साटि लुस्त्रा सहेरता लोकुरक बलिदान केमाकिर इन्जोर पकाय तकलिपते लोकुरकुन रोके कितुरक।

19मति अन्ताकिया अनि इकुनियाताल हुचुलोर यहुदिलोरक वास लोकुरकुन आपुना बासा कितुरक, अनि पोलुसतुन कलदे हितुरक#२ कुरि ११:२५, अनि ओर हातुर इदाम समजेमास ओन सहेरता बाहरो पिळिंगसोर ओतुरक। 20मति चेलालोरक ओना नालुंगास बासा वास नितितुरक असके ओर तेदच लुस्त्रा सहेरतिगा हतुर अनि दुसरो दिया बरनबासनासंग दिरबे सहेरतिगा हतुर।

पोलुस अनि बरनाबास पिसिदिया प्रदेशता अन्ताकियातिगा असा मलस वान्तोरक

21पोलुस अनि बरनाबास दिरबे सहेरतिगा लोकुरकुन सोबाता पोल्लो वेहिच पकाय चेलाह बनेहकितुर अनि पजा ओरक लुस्त्रा सहेरतिगा मलस हतुरक। अनि लुस्त्राताल इकुनिया सहेर हन्जुन पिसिदिया प्रदेशता अन्ताकियातिगा असा मलस वातुरक। 22“विस्वासते बनेमास मन्ट अनि माकुन पकाय तकलिप ताहच परमेस्वरना राज्यतिगा हन्दा लागार” इदाम उपदेश किस येसुना चेलालोरा मन्दुन स्थिर किसोर मतोरक। 23अनि पोलुस अनि बरनाबास मसिलोकुरा सबोय दल साटि मुक्याल लोकुरकुन ठहरे कितुरक, अनि उपास अनि प्रार्थनातासंग ओरक विस्वास किस मतोरक प्रबुना कयदे ओरकुन सोपे कितुरक।

सिरिया प्रदेशता अन्ताकियातिगा मलस वान्तोरक

24असके पोलुस अनि बरनाबास पिसिदिया प्रदेशताल आसोर ओरक पंफुलिया प्रदेशतिगा अवतुरक। 25पजा पिरगा सहेरतिगा येसुना सोबाता पोल्लो वेहिच समुद्र हेरेटा टका मता अत्तलिया सहेरतिगा वातुरक, 26अनि अगडाल ओरक जहाजते सिरिया प्रदेशता अन्ताकियातिगा मलस हतुरक।, ओरक पुरा कितोर ओद बुतो साटि परमेस्वरना दयातिगा ओरकुन सोपे कितोरक ओद सहेरतिगाडाले मन्ता। 27ओरक अगा अवतुरक अनि पजा मसिलोकुरा सभातुन उन्दि जागा केयस जमा कितुरक अनि परमेस्वर ओरासंगे मन्जोर बदाम हजो-हजोह बुतो किस यहुदि आयोर लोकुरक साटि विस्वासता कवाळ तरियतुर इन्जोर ओरा मुने वेहतुरक। 28अनि ओरक चेला लोकुरासंग पकाय दियांगवनाह अगा मतोरक।

Currently Selected:

बुतोंग 14: fmu

Highlight

Copy