बुतोंग 13

बरनबास अनि शावुलिन पवित्र आत्मा आचतोर

1अन्ताकिया सहेरता मसिलोकुरा सभातिगा परमेस्वरना पोल्लो वेहवालोरक अनि परमेस्वरना पोल्लोतुन करिहवाल मतोरक। ओरक बरनबास अनि निगर पोरोयतोर शिमोन अनि कुरेनीतोर लुकियुस अनि हेरोद अन्तिपास#१३:१ हजोर राजाल हेरोदेस ओना नालुंग मरक साटि नालुंग भाग अलग किस मतोरक। हेरोदेस अन्तिपास ओद देशता चवतो भागतोर राजाल मन्जे गलीलि अनि पिरिया प्रदेशता राजाल मन्तोर। राजानासंग हुडलोरपणताले पालेकितोर ओर मनायेन अनि शावुल इदाम लोकुरक मतोरक। 2ओरक प्रबुन आरादना किस उपास किसोर मतोर असके, “बरनबास अनि शिमोनिन नना केयतान ओद बुतो साटि ओरकुन नावा साटि अलग किम्ट” इन्जोर पवित्र आत्मा इतुर। 3असके ओरक उपास अनि प्रार्थना किस ओरा पोरो कय इरस परमेस्वरना बुतो कियान साटि ओरकुन हन्दाना सार कितुर।

पोलुसना पहलि बेरा येसुना सोबाता पोल्लो वेहान साटि हन्दाना

4पवित्र आत्मा बरनबास अनि शावुलिन लोहतुर असके ओरक समुद्रा हेरे मता सिलुकिया#१३:४ सिलुकिया सहेर अन्दियोक्या सहेरताल २६ किलोमिटर लक पश्चिम भाग मता। इद सहेर समुद्र हेरे मता। इगाडाल सयिप्रस टापु हन्दान साटि उन्दि दियाता सफर हिले आसि। सहेरतिगा हतुरक, अनि अगडाल जहाजतिगा उदस समुद्र नडुम मता सयिप्रस पोरोयता टापुतिगा हतुरक। 5अनि ओरक सयिप्रस टापुतिगा सलमीस सहेरतिगा अवतपा, परमेस्वरना पोल्लो यहुदिलोरा समाज मन्डलितिगा वेहतुर। ओद बेरा मरकुस पोरोयतोर युहन्ना ओरा मदत किस ओरा संग मतोर। 6ओरक समुद्र नडुम मता सबोय टापुताल यात्रा किस पाफुस सहेरवनाह अवतुरक। अगा ओरकुन बर-येसु पोरोयतोर वरोर होदाल मानेयतुन मिलेकितुरक। ओर आपुनास परमेस्वरना पोल्लो वेहवाल आन्दोम इदाम खोटाल वळकवाल वरोर यहुदि मानेय मतोर। 7ओर पकाय बुद्धिमान मानेय सिरगियुस पोलुस पोरोयतोर राजपालना सेवक मतोर। ओर सयिप्रस टापुता राज्यपाल मतोर। अनि सिरगियुस पोलुस परमेस्वरना पोल्लो असा केन्जान साटि बरनाबास अनि शावुलिन केयस मतोर। 8मति होदाल इलिमास (युनानि बोलिते बर-येशुना पोरो इलिमास इन्जोर मता) बरनाबास अनि शावुलिना विरोद किस राज्यपाल मसिनिगा विस्वास कियाना रोके कियाना कोसिस कितुर। 9असके पोलुस पोरोयतोर शावुल पवित्र आत्माता पुरा नियत्रणते आस इलिमासनिके पकाय ध्यानते हुळस इतुर। 10“हे सबोय दोखा अनि कपटिते निन्दितोर सयतानोर सन्तान, परमेस्वरना मुने येताना योग्य मन्ता सबोय बुतोता दुश्मन, निमा प्रबुना बारेता खरोय पोल्लोतुन वकळे कियाना बाताल तासिवि आयकि? 11इदेक प्रबु निकुन दन्ड हियानुर, अनि निमा हुडुक बेरावनाह पोळदा वेळिचि हुळवि आयकि आन्दराल मनकि” इन्जोर इतुर। असके सान्डेय ओन आन्दारी वातु अनि आन्दराल आतुर, अनि बोरे ओना कय पयस ओयिर इन्जोर इलिमास कय हिके-होके किस पळकसोर हतुर। 12असके अगा सबोय आता पोल्लो राज्यपाल हुळस प्रबुना उपदेशते चकित आस प्रबु येसुनिगा विस्वास कितुर।

पोलुस पिसिदिया प्रदेशता अन्ताकियातिगा मलस वास यहुदिलोरकुन उपदेश वेहान्तोर

13पोलुस अनि ओनोर संगवारि सयिप्रस टापुता पाफुस सहेरताल जहाजते पंफुलिया प्रदेशता पिरगा सहेरतिगा वातुरक, अनि अगडाल मरकुस पोरोयतोर युहन्ना ओरकुन तासिस येरुसलेम मलस हतुर। 14मति पिरगा सहेरताताल मुने विळस ओरक पिसिदिया प्रदेशता अन्ताकियातिगा अवतुरक#१३:१४ अन्ताकिया पोरोयता रन्ड सहेर मता उन्दि पिसिदिया प्रदेशतिगा अनि दुसरो सिरिया प्रदेशतिगा मता। , अनि पवित्र दिया यहुदि लोकुरा समाज मन्डलितिगा हन्जुन उदितुरक। 15मूसाना नियम अनि परमेस्वरना पोल्लो वेहवालोरा पुस्तकताल वाचे कित पजा यहुदि लोकुरा समाज मन्डलितोर अदिकारिलोर ओरा हेरे वरोर मानेयतुन लोहतुर, “हे तमोलोरक, लोकुरा उपदेश साटि मिया मन्दिगा बोदे पोल्लो मन्दार ते वेहाट” इन्जोर वळकिहतुर।

16असके पोलुस तेदचुन कयदे इशारा किस इतुर, “हे इस्रायेल लोकुरक अनि परमेस्वरतुन वरियवालोरक केन्जाट, 17इस्रायेल लोकुरा परमेस्वर मावोर आजि-दादिलोरकुन आचतोर अनि मावोर लोकुरक मिस्रि देशतिगा परदेशि मतोरक असके परमेस्वर ओरकुन हजोर बनेहकितुर, अनि परमेस्वर आपुना हजोर लावदेय ओरकुन मिस्रि देशताल बाहरो ततुर#निर १:७; निर १२:५१। 18च्याळिस वरसांगवनाह वारु पल्लातिगा परमेस्वर ओरा कटोर स्वभाव सहन किसोर मतोर#गिन १४:३४; व्यव १:३१। 19अनि कनान प्रेदेशता सात देशतोर लोकुरकुन नाश किस ओरा देश साळे नालुंग नुहक वरसांग वनाह इस्रायेल लोकुरकुन हितुर#व्यव ७:१; यहेशु १४:१। 20इदेना पजा परमेस्वर ओरकुन परमेस्वरना पोल्लो वेहवाल शमुवेलना काळवनाह ओरा साटि न्याय केवालोरकुन हितुर#न्या २:१६; यश ३:२०। 21इदेना पजा इस्रायेल लोकुरक आपुना देश राज कियान साटि वरोर राजान तलकतुर, असके परमेस्वर ओरा साटि बिन्यामिना गोत्रतिगाडाल कीसनोर मरि शावुलिन च्याळिस वरसांग साटि ओरा राजाल आस निवळे कितुर#यश ८:५; यश १०:२१। 22पजा ओन हटा किस दावुदिन ओरा राजाल बनेहकितुर, ओना बारेते परमेस्वर ‘नना इशयिनोर मरि दावुदिन नावा मन्दा अनुसार हुळतान अनि ओरे नावा सबोय इच्चा पुरा कियानुर’ इन्जोर गवाहि हितुर#यश १३:१४; यश १६:१२; भज ८९:२०। 23दावुद राजालना वंशतिगाडाल परमेस्वर आपुना वाचाता अनुसार इस्रायेल लोकुरक साटि वरोर पिसियवाल येसुन लोहतुर। 24ओना वायानाता मुने बपतिस्मा हेवाल युहन्नाल सबोय इस्रायेल लोकुरकुन पस्तेमायानाता बपतिस्माता बारेते वेहतुर#मर १:४; लूका ३:३। 25बपतिस्मा हेवाल युहन्नाल आपुना सेवा पुरा आयाना बेरा: ‘निमाट नाकुन बोर मन्तोना इन्जोर समजेमान्तोरिट? नना मसि आयोन! ओर ते नावा पजा वायवाल मन्तोर, ओनांग काल्कना जोळांग वने टन्डान साटि नावा लायकि हिले#युह १:२०; मत्ति ३:११; मर १:७; लूका ३:१६; युह १:२७’ इन्जोर इतुर।”

26पोलुस असा इतुर, “हे दादालोरक, अब्रहामनोर सन्तान, अनि परमेस्वरतुन वरियवालोरक सबोय लोकुरक, मावा हेरेय पिसानाता इद पोल्लो लोहता मन्तोर#व्यव ९:२३; यहुदि ३:१६। 27येसु पिसियवाल मतोर इन्जोर येरुसलेमतिगा मनवालोरक यहुदि लोकुरक अनि यहुदि अदिकारि लोकुरक पुनोर आतुरक। येसुना बारेता परमेस्वरना पोल्लो वेहवालोरा पोल्लो सबोय पवित्र दियांग वाचे किन्तोरक मति ओरकुन समजेमायो आतुरक इन्जोर ओन दोषि ठहरेकितुरक, इदाम परमेस्वरना वेहवालोरा ओव पोल्लोनुंग पुरा कितुरक। 28अनि यहुदिलोरक अनि ओरा अदिकारिलोरक ओन हव्कानाता योग्य बोदे दोष ओनिगा कलियोर आतुरक ते वने ओन हव्किर इन्जोर पिलातुसिन ओरक विनन्ति कितुरक#मत्ति २७:२२,२३; मर १५:१३,१४; लूका २३:२१-२३; युह १९:१५। 29येसुना बारेते कोटतांग सबोय पोल्लोंग पुरा कितु असके ओन कुरुस पोरोडाल रेहच पान्जा लोपा इरतुर#मत्ति २७:५७-६१; मर १५:४२-४७; लूका २३:५०-५६; युह १९:३८-४२ । 30मति परमेस्वर ओन हातोरिगाडाल असा जिवेहकितुर। 31अनि ओनासंग गलीलताल येरुसलेम वास मतोरक ओर लोकुरकुन पकाय दियांगवनाह ओर प्रगट आसोर मतोर, ओर लोकुरक इदेक लोकुरा मुने ओना गवाह मन्तोरक#बुतोंग १३:१८। 32मावोर आजि-दादिलोरकुन परमेस्वर किस मतोर ओद प्रतिज्ञाता बारेता सोबाता पोल्लो माक मिकुन वेहान्तोरोम। 33मावोर आजि-दादिलोरकुन हिता ओद प्रतिज्ञा परमेस्वर येसुन असा जिवेहकिस ओना सन्तान मन्ता मावा साटि पुरा कितुर; दुसरो भजनसंहितातिगा

‘निमा नावोर मरि आन्दि;

नेन्ड ननाय निकुन जनमा हितोना#भज २:७’

इन्जोर कोटता मन्ता। 34अनि असा हासुन कळियमाकिर इन्जोर परमेस्वर येसुन हातोरिगाडाल असा जिवेहकिस तेहतुर अनि परमेस्वर:

‘नना दावुदिन वाचा किस मता पवित्र आशिष खरोय नना मिकुन कियाका#यश ५५:३ ’

इन्जोर इन्ज मतोर 35ओर असा दुसरो उन्दि भजन सहिताते वने

‘निमा आपुना पवित्र सेवकतुन कळियला हेवि आयकि#भज १६:१०’ ”

इन्जोर इतुर।

36पोलुस असा इतुर, “दावुद ते आपुना पिळिते परमेस्वरना इच्चाता अनुसार सेवाकिस हासुन आपुनोर आजि-दादिलोरासंग मिसतुर अनि ओना मुरदा वने कळियतु। 37मति परमेस्वर जिवेहकितुर ओर येसुना मेन्दुल कळियो आतु। 38हे दादालोरक, येर येसुना द्वारा मिया साटि पाप मापिता बारेता सन्देश वेहतोम इन्जोर, 39मूसाना नियमता द्वारा परमेस्वरना मुने येताना योग्य आय परवि आन्दिट मति येसुनिगा विस्वास किन्तोर सबोय लोकुरक येसुना द्वारा परमेस्वरना मुने येताना योग्य ठहरे मान्तोरक इन्जोर निमाट पुन्ट। 40इन्जोर

‘हे निन्दा केवालोर, ध्यानते हुळाट, अनि आश्चरय किस नाश आम्ट;

बाक्याकि नना मिया काळदे उन्दि बुतो किन्तोना;

बोरे अदेना वर्णन केविर ते वने निमाट बसकेय विस्वास केवि आयकिट इदाम बुतो मन्ता#भज १:५ ’

41इन्जोर परमेस्वरना पोल्लो वेहवालना पुस्तकतिगा परमेस्वर वेहतोर ओद पोल्लो मियागा वायमाकि इन्जोर हुशार मन्ट।”

42पोलुस अनि बरनाबास वळकना मारिच ओद यहुदि लोकुरा समाज मन्डलि तासिस हन्दानपा दुसरो पवित्र दिया माकुन इव पोल्लोंग असा वेहिर इन्जोर ओर लोकुरक ओरकुन विनन्ति कितुरक। 43यहुदि लोकुरा समाज मन्डलिता ओद सभा मारतु असके पकायि यहुदिलोकुरक अनि यहुदि दरमतुन स्विकार कितोर भक्त लोकुरकनिगाडाल पकाय लोकुरक पोलुस अनि बरनबासना परके हतुरक, अनि परमेस्वरना दयातिगा विस्वास किस दरोज मन्दिला पहाजे इन्जोर पोलुस अनि बरनाबास ओरकुन समजेह किस हिमत हितुरक।

पोलुसना द्वारा यहुदि आयोर लोकुरकनिगा येसुना सोबाता पोल्लो वळकानाता सुरुवात

44दुसरो पवित्र दिया पिसिदिया प्रदेशता अन्ताकिया सहेरता सबोय लोकुरक परमेस्वरना पोल्लो केन्जान साटि यहुदि लोकुरा समाज मन्डलितिगा जमा आतुरक। 45मति यहुदिलोर भीळतुन हुळस पकाय हेवाते पोलुसना पोल्लोता विरोदते निन्दा किस वळकिला लागतुरक। 46असके पोलुस अनि बरनबास हिमतते वळकिलातोरक, “परमेस्वरना पोल्लो पहले मिकुन वेहिला पहाजे इन्जोर जरुरि मता मति निमाट अदेन इन्कार किन्तोरिट, अनि अनन्त जिवन साटि निमाट आपुनतुन योग्य हिलेर इदाम ठहरे किन्तोरिट इन्जोर माक ते इदेक यहुदि आयोर लोकुरकनिके दान्तोरोम। 47बाक्याकि

‘निमा दरतिता कोन्टावनाह पिसानाता कवाळ आयान साटि

नना निकुन दुसरो जाति साटि उन्दि वेळिचि लेहका निवळे कितोना इदाम प्रबु माकुन आग्या हितोर#यश ४२:६; ४९:६’ ”

इन्जोर इतुरक।

48यहुदि आयोर लोकुरक इद केन्जचुन गिरदा आस परमेस्वरना पोल्लोतुन महिमा कियाला लागतुरक। अनि अनन्त जिवन साटि ठहरेकिस मतोर सबोय लोकुरक पोलुस वेहता ओद पोल्लो विस्वास कितुरक। 49प्रबुना पोल्लो ओद सबोय देशतिगा फयलेमायिला लागतु। 50मति यहुदिलोरक सहेरता दुसरो लोकुरकुन अनि सोबाय आदर हेवांग परमेस्वरना वरे इरेंग आसक अनि अन्ताकिया सहेरता मुक्या लोकुरकुन भळकेह किस पोलुस अनि बरनबासना विरुद तकलिप हिस ओरकुन आपुना सिवाताल पसिहसितुरक। 51असके पोलुस अनि बरनबास ओरा मुने आपुना काल्कना डुन्डोतुन कसिय्सि इकुनिया सहेरतिगा हतुरक#मत्ति १०:१४; मर ६:११; लूका ९:५; १०:११। 52अनि चेलालोर गिरदाते अनि पवित्र आत्माता सबोय नियत्रणते आसोर मतोरक।

Currently Selected:

बुतोंग 13: fmu

Highlight

Copy