बुतोंग 12

हजोर राजाल हेरोदेस याकुबिन हव्किहन्तोर अनि पतरसिन जेहलतिगा वाटान्तोर

1ओदबेरा हेरोदेस राजाल मसिलोकुरा सभाता पकाय लोकुरकुन सतेह कियाना सुरु कितुर। 2ओर युहन्नानोर तमो याकुबिन तलवारते हव्किहतुर। 3यहुदिलोकुरक इदेनते पकाय गिरदा आन्तोरक इन्जोर ओर हुळसुन ओर पतरसिन वने पयतुर। ओव दियांग यहुदि लोकुरा अखमिरि रोटिता पसहा हनुमता दियांग मतांग। 4ओर ओन पयस जेहलतिगा वाटतुर। पसहा हनुमता पजा ओन लोकुरा मुने तरीर इन्जोर हजोर राजाल हेरोदेस विचार किस इदाम कितुर। इन्जोर नालुंग-नालुंग सिपायिलोरा नालुंग दल ओन केपान साटि इरतुर#निर १२:१-२७। 5इदाम पतरसिन जेहलतिगा बन्द किस इरतुर, मति मसिलोकुरा सभा ओना साटि मन लावेकिस परमेस्वरतुन प्रार्थना किन्दुरक।

पतरसिन स्वरगदूत जेहलतिगाडाल बाहरो ततिन्तोर

6हजोर राजाल हेरोदेस पतरसिन लोकुरा मुने तचुन न्याय कियाना विचार किता ओद दियाता मुनेटाल नरका पतरस रन्ड साकरिते दोहच इवुर सिपायिना नडुम हुन्जस मतोर। अनि जेहलता कवाळता मुने केपवालोर सिपायि लोकुरक जेहल केपसोर मतोरक। 7ते सान्डे प्रबुनोर वरोर दूत अगा दिसतुर अनि पतरस कयिदिते मतोर ओद खोलितिगा वेळिचि मान्जतु, अनि ओर पतरसिन कय इटस ओन “सान्डे तेदा” इन्जोर इतुर। अनि सान्डे पतरसिना कयदाल साकरिंग लेंगतुंग। 8असके स्वरगदूत पतरसिन, “नळितुन दोहच जोळांग करा” इन्जोर इतुर। ओर अदामे कितुर। पजा ओर ओन इतुर, “निया सन्दरांग करस नावा परके वाय।” 9पतरस पसियस स्वरगदूतना परके हतुर, मति इद सबोयि खरोय स्वरगदूत कियाला आतोर इन्जोर ओर पुनोर आन्दुर, मति नना इद दर्शन हुळिला आतोना इन्जोर ओर विचार कितुर। 10ओरक पहले अनि दुसरो कवाळता केपवालोरकुन तासिस मुने विळसोर सहेरतिके दान्ता कचिता पाटक हेरे अवतुरक। ओद पाटक ओरा साटि आपुनास तरियतु। अनि ओरक अगडाल बाहरो पसियस उन्दिय गलिताल हतुर, अनि सान्डेय स्वरगदूत ओन तासिस हतुर। 11असके पतरस आपुना जिवनते बाताल आतु इन्जोर सोबायि समजेमास “इदेक प्रबु आपुनोर स्वरगदूत लोहच नाकुन हेरोदेसना कयदाल अनि यहुदि लोकुरा सबोयि खराब योजनाताल नाकुन पिसिहतोर इन्जोर खरोय नना पुतान” इन्जोर इतुर।

12पतरस आपुना जिवाते बाताल आतु इन्जोर सोबाय पुन्जुन ओन मरियमना लोन हतुर। ओद मरकुस पोरोयतोर युहन्नाना अवहारि मता। मरियमना लोतिगा पकाय लोकुरक जमा आस प्रार्थना किसोर मतोरक। 13पतरस मरियमना लोतिगा हन्जुन कवाळतुन बाहरोटाल कोहकतुर असके रुदे पोरोयता उन्दि दासि हुळान साटि कवाळ हेरे वातु। 14पतरसना लेंग पुन्ज ओद गिरदाते कवाळ तरयो आस वितसोर लोपा हतु अनि पतरस कवाळ मुने नितितोर इन्जोर वेहतु। 15ओरक विस्वासि लोकुरक अदेन इतुर, “निमा बयहि मन्तोन।” मति ओद ते विस्वासते इतु, “आयो ओरे आन्दुर।” असके ओरक इतुर, “येर पतरसिन केपवाल स्वरगदूत मन्दानुर।” 16मति पतरस कवाळतुन कोहकसोरे मतोर; आकरिते ओरक कवाळ तरियतुर असके ओरक पतरसिन हुळस सबोयि विस्वासि लोकुरक चके मातुरक। 17कमेक मनिर इन्जोर पतरस ओरकुन कयदे इशारा कितुर। अनि प्रबु बोद रितिते ओन जेहलताल पसहिस ततुर इन्जोर ओरकुन वेहतुर। इद पोल्लो “याकुब अनि दुसरो तमोलोरकुन वेहचिकिट” इन्जोर इतुर। असके पतरस पसियस दुसरो जागा हतुर।

18सकार आतपा पतरस बेके हतुर इन्जोर सिपायि लोकुरकनिगा पकाय वरे आतु। 19हेरोदेस ओन पकाय पळकतुर मति ओन कलियोर आतुर, असके केपवालोर सिपायि लोकुरकुन न्याय किस ओरकुन हव्किर इन्जोर आग्या हितुर। अनि पजा हेरोदेस यहुदिय प्रदेशतुन तासिस कयसरिया सहेरतिगा हन्ज मन्दिला लागतुर।

हजोर राजाल हेरोदेसना हायाना

20हेरोदेस राजाल सूर अनि सिदोन सहेरतोर लोकुरा विरोद पकाय होंग मतोर। जेवन साटि हेरोदेसना देशता मदत ओरक येतिन्दुरक, इन्जोर सूर अनि सयदातोर लोकुरक उन्दिय विचार किस बलास्तुस पोरोयतोर राजानोर वरोर नोवकरिन मानेहकिस आपुना बासा किस हेरोदेस राजाना हेरे हतुरक, अनि हेरोदेसनासंग मिलेह किस मन्दाना साटि विनन्ति कितुरक। 21ठहरे किता दिया राजाना सन्दरा करस हेरोदेस सिंहासनतिगा उदितुर, अनि लोकुरकुन वळकिला लागतुर। 22असके लोकुरक जोरदे इन्दिला लागतुर: “इद ते मानेयना पोल्लो आयो मति पेन्दा पोल्लो आन्दु!” 23ओर परमेस्वरतुन महिमा केवोर आतुर इन्जोर ओदे बेरा प्रबुनोर वरोर स्वरगदूत सान्डेय ओन हाहतुर, अनि ओर पुळिय लागस हातुर।

24मति परमेस्वरना पोल्लो विळसोर अनि सबोय जागातिगा फयलेमासोर हतु।

25बरनबास अनि शावुल आपुना सेवा पुरा कितुर असके मरकुस पोरोयतोर युहन्नानासंग ओरक येरुसलेम मलस हतुरक।

Currently Selected:

बुतोंग 12: fmu

Highlight

Copy