बुतोंग 15

येरुसलेम सहेरतिगा येसुना खास चेलाल लोकुरा सभा

1पजा यहुदियाताल हुचुक लोकुरक वास, “मूसाना नियमता अनुसार मिया कतना आयो ते मिया पिसाना आयिला परो#लेव्य १२:३” इन्जोर विस्वासि लोकुरकुन करिहला लागतुरक। 2पोलुस अनि बरनबास ओरा करियानाता विरोद मतोर इन्जोर ओरासंग पकाय वाद-विवाद कितुरक असके पोलुस अनि बरनबास अनि ओरागाडाल हुचुलोर मानेयक इद समस्याता बारेते येसुना खास लोकुरकुन अनि येरुसलेम सहेरता मसिलोकुरा सभाता मुक्याहलोरा हेरे वेहान साटि ओरा हेरे हनिर इन्जोर योजना कितुर। 3इन्जोर अन्ताकिया सहेरता मसिलोकुरा दल ओरकुन येरुसलेमतिके लोहतुरक। अनि ओरक फिनिके अनि सामरिया प्रदेशताल आसोर यहुदि आयोर लोकुरा बदाम येसुना सोबाता पोल्लो येचुन मसि विस्वासतिगा वातोरक इन्जोर सबोय लोकुरकुन वेहतुरक। अदेन केन्जुन सबोय विस्वासि लोकुरकुन पकाय गिरदा आतुरक। 4ओरक येरुसलेम अवतुरक असके मसिलोकुरा सभा अनि येसुना खास चेलाल लोकुरक मसिलोकुरा सभाता मुक्याहलोरक ओरकुन गिरदाते मिलेमातुरक। अनि परमेस्वर आपुनासंग आस बदाम-बदाम बुतो कितोर इन्जोर ओरक वेहतुरक। 5मति येरुसलेमता मसिलोकुरक निकेडाल परीसि लोकुरा दलताल विस्वास कितोरिगाडाल हुचुलोर लोकुरक तेदस, “मसि विस्वास येतितोर यहुदि आयोर लोकुरकुन कतना कियाना अनि मूसाना नियमतुन मानेमायाना आग्या हियाला पहाजे” इन्जोर इतुर।

6असके येसुना खास चेलाल लोकुरक अनि मसिलोकुरा सभाता मुक्यालोरक इद पोल्लोता बारेते चर्च कियान साटि जमा आतुरक। 7अनि पकाय वाद-विवाद आतु पजा पतरस ओरा नडुम नितस ओरकुन इतुर: “हे दादालोरक, नावा द्वारा यहुदि आयोर लोकुरक येसुना सोबाता पोल्लो केन्जुन विस्वास केविर इन्जोर पकाय दियांग मुने मियागाडाल परमेस्वर नाकुन आचतोर इन्जोर निमाट पुन्तोरिट#बुतोंग १०:१-४३ । 8अनि सबोय लोकुरा मन्दा विचार पुनवाल परमेस्वर माकुन हितोर लेहका यहुदि आयोर लोकुरकुन वने पवित्र आत्मा हिसुन यहुदि आयोर लोकुरकुन वने परमेस्वर येतितुर#बुतोंग १०:४४; बुतोंग २:४। 9अनि मावागा अनि ओरागा बाताले भेद ओर हेवोर। ओरक मसिनिगा विस्वास कितुरक असके परमेस्वर ओरा मन्दुन शुद्ध कितुर। 10इन्जोर मावोर आजि-दादिलोर ताह परोर आसि अनि माक वने ताहिला परोम ओद जुवा इदेक चेलाहना गुळंगातिगा इरस बाक्या निमाट परमेस्वरना परिक्षा किन्तोरिट? 11इंगो, प्रबु येसुना दयाते पिसाना पुटहानुर इन्जोर माक विस्वास किन्तोरोम अदामे ओरक वने विस्वास किन्तोरक” इन्जोर पतरस इतुर।

12अनि पतरस वेहता पोल्लो केन्जुन ओद सभातिगा मन्तोर सबोय लोकुरक कमेक आतुरक। असके परमेस्वर आपुना द्वारा यहुदि आयोर लोकुरकनिगा हजोह-हजोह चिन्ह अनि चमत्कार तोहतुर इन्जोर बरनबास अनि पोलुस वळकाना सभातोर सबोय लोकुरक पकाय ध्यानते केन्जिला लागतुरक। 13ओरा वळकाना आतपा याकुब इन्दिला लागतुर: “हे तमोलोरक, नावा केन्जाट; 14यहुदि आयोर लोकुरकनिकेडाल हुचुलोरकुन आपुना लोकुरक आस आचान साटि परमेस्वर पहले ओरा नडुम बदाम बुतो कितुर इन्जोर शिमोन वेहतुर। 15पकाय वरसांग मुने परमेस्वरना पोल्लो वेहवालोरक वने इदे पोल्लोता बारेते पवित्र पुस्तकतिगा कोटतोरक।

16‘इदेना पजा नना असा वास दावुदना मुटता तम्बुतुन असा बनेकियाका;

अदेना कळियता पिसता भागतुन असा बनेकिस अदेन निपिहका;

17इन्जोर पिसतोरक सबोयि मानेयक मन्जे सबोय यहुदि आयोर लोकुरक प्रबुन पळकिरक इन्जोर

18पकाय मुनेटाले सबोय पोल्लोतुन तोहवाल ओर प्रबु इन्तोर#आमो ९:११,१२ ’

इदाम पवित्र पुस्तकतिगा कोटस मन्ता। 19इन्जोर यहुदि आयोर लोकुरकनिकेडाल परमेस्वरनिके मलान्तोरक, ओरकुन माक तकलिप हेवोम आयकोम इन्जोर नावा विचार मन्ता। 20मति ओरक मूरतिता मुने बलि हिता जेवन तिनमा बाक्याकि ओद अशुद्ध मन्ता अनि व्यभिचार केमा अनि गुळंगा आहच हव्कता जानवरता हवि तिनमा अनि नतुर उन्मा इन्जोर ओरकुन कोटस लोहाट#निर ३४:१५-१७; लेव्य १८:६-२३; लेव्य १७:१०-१६। 21बाक्याकि पिळि पिळिता मुनेटाले नाट-नाटेने मूसाना नियम सबोय पवित्र दिया समाज मन्डलितिगा इदेकवनाह वाचे किन्दुरक” इन्जोर याकुब इतुर।

यहुदि आयोर मसि विस्वासि लोकुरक साटि पत्र

22असके आपुनिगाडाल हुचुक मानेयकुन आचुन पोलुस अनि बरनबासनासंग अन्ताकियातिगा लोहिर इन्जोर येसुना खास चेलाल लोकुरक अनि मुक्यालोरक अनि मसिलोकुरा सभाता सबोय लोकुरक ठहरे कितुरक। विस्वासि लोकुरकनिकेडाल मुक्याल मतोरक बर-सब्बा पोरोयतोर यहुदा अनि सिलासतुन इदेन साटि आचतुरक। 23ओरक ओरा कयदे इदाम कोटस लोहतुर: “येसुना खास चेला लोकुरक अनि मसिलोकुरा सभाता मुक्याल मन्तोर मियोर तमोलोरक अन्ताकिया अनि सिरिया अनि किलिकियातिगा मन्वालोर मसि विस्वास स्विकार कितोरक यहुदि आयोर मावोर बायि-दादालोरकुन नमस्कार किन्तोरोम। 24मावानिगाडाल हुचुक लोकुरक अगा वास आपुना पोल्लोंगते मिकुन तकलिप किस मिया मन्दुन दुःख कितुरक इन्जोर माक केन्जतोम मति ओर लोकुरकुन माक बाताले आग्या हेवोम आसि। 25इन्जोर माक हुचुलोर मानेयकुन आचतोम; मावोर प्रबु येसु मसिना पोरोय साटि आपुना जिवा वने दोखाते वाटतोरक 26आपुनोर प्रिय बरनबास अनि पोलुसनासंग मिया हेरे लोहिला पहाजे इन्जोर माक उन्दि मन आस बराबर समजेमातोम। 27इन्जोर माक यहुदा अनि सिलासतुन मिया हेरे लोहतोरोम, ओरक आपुना टोडिते वने इव पोल्लोंग इन्दानुरक। 28माक मिया पोरो असा पकायि वजा हेमाकिर इन्जोर पवित्र आत्मा माकुन समजे किस हितुर। इन्जोर निमाट इव जरुरि पोल्लोंग कियान साटि ध्यान किम्ट: 29अनि निमाट मूरतिता मुने बलि हिता जेवन तिनमा अनि नतुर उन्मा अनि गुळंगा आहच हव्कता जानवरता हविंग तिनमा अनि व्यभिचार केमाट। इव पोल्लोताल लक मनकिट ते मिया भला आयार। धन्यवाद।”

30अनि पजा पोलुस, बरनाबास, यहुदा, सिलास अगडाल पसियस अन्ताकियातिगा अवतुरक। अनि ओरक मसिलोकुरा सभातुन जमाकिस ओद पत्र ओरकुन हितुरक। 31ओरक ओद पत्रता उपदेशता पोल्लो वाचेकिस पकाय गिरदा आतुरक। 32परमेस्वरना पोल्लो वेहवाल मतोरक यहुदा अनि सिलास पकाय पोल्लोते तमोलोरकुन उपदेश हिस विस्वासते स्थिर किहितुरक। 33ओरक हुचुक दियांग ओरासंग मतोरक, पजा यहुदान अन्ताकिया सहेरता मसिलोकुरा सभा ओना लोहवालोर येरुसलेम सहेरता मसिलोकुरा हेरे शान्तिते लोहतुरक#१५:३३ केवल यहुदा अन्ताक्याताल येरुसलेम मलस हतुर अनि सिलास ओरासंगे मतोर बाक्याकि सिलास अन्ताकिया सहेरतिगा मतोर इन्जोर येसुना सोबाता पोल्लो वेहाना पोलुस दुसरो बेरा यात्रा कियानपा पोलुस सिलासिन आचतुर (बुतोंग १५: ४०)। 34(मति सिलास ओरासंग अगा मन्दाना सोबाय लागतु।) 35मति पोलुस अनि बरनबास वने अन्ताकियातिगा मतोरक, अनि असा पकाय लोकुरासंग प्रबुना पोल्लोता उपदेश किसोर अनि सोबाता पोल्लो वेहचोर मतोरक।

पोलुसना दुसरो बेरा येसुना सोबाता पोल्लो वेहान साटि हन्दाना

36हुचुक दियाना पजा पोलुस बरनबासतुन इतुर, “माक प्रबुना पोल्लो वेहिच मतोरोम ओद नाटेनिगा असा हन्जुन ओर लोकुरक विस्वासते बदाम मन्तोरक इन्जोर हुळकाट” इदाम इतुर। 37असके बरनबास मरकुस पोरोयतोर युहन्नान ओरा संगे ओयान साटि विचार कितुर। 38मति पोलुस पंफुलियातिगा ओराताल अलग आस बुतोते ओरासंग हनोर आसि ओर मरकुसिन आपुनासंग ओयाना बेस आयो इदाम विचार कितुर#बुतोंग १३:१३। 39इदाम पोलुस अनि बरनाबास ओर इवुरास पकायि वाद-विवाद आतु इन्जोर ओरक अलग अलग आतुरक। अनि बरनबास मरकुसनासंग जहाजते सायिप्रस टापुतिगा हतुरक। 40मति पोलुस ते सिलासतुन आचतुर अनि अन्ताकिया सहेरता विस्वासि लोकुरक पोलुसिन परमेस्वरना दयाते सोपेकितुरक। 41अनि ओरक अगडाल हतुरक अनि ओरक सिरिया अनि किलिकिया प्रदेशताल आसोर मसिलोकुरा सभातुन विस्वासते स्थिर किसोर हतुरक।

Currently Selected:

बुतोंग 15: fmu

Highlight

Copy