Markus 9

1Ay Isus nalong sanya fag ngay taw te, “Matuyan nu glong au ayu te, am tiba at malindug ste, ya ban am kabul yakmay ban am nalag Dius at fagfagtainanan nu kadasug ke fagmabalyananun.”

Isus at Kawalungan Anbali

Mt 17:1-13; Lk 9:28-36

2Ay nu nlangfe unumk menit, Isus nataban Pedru ay Santiagu ay anggan Uan, ay naundaud sa sik buksul ngabat yud e taw. Ay Isus at kawalungan anbali gina sit ibama at salubangan. 3Isus at lanbung malaksi ay maksvn nu masulo, nusnga sinu fag taw we mafafalaksi takaksvn nya. 4Ay sik duama nsure, kanya Muisis ay Elyas, ay gfakamatoan Isus.

5Ay Pedru nalong sas Isus te, “Takamoyung, fadi iste tuami. Nangawat ro mi tuluk balean, at sadi sa emu, ay at sadi sas Muisis, ay at sadi sas Elyas.” 6At kaksvnan at ngay tagadal nu kalimu, Pedru wa nasaful at longan at masuad.

7Ay arodi sik linyabu nafarum anya fagayu. Ay sanya ginan sad linyabu e naringang te, “Kanya wan ku fakesugun ku Baguama, dungugani anya.” 8Ay arodi vtv at ngay tagadal nu nafamanawan, we lagan ya duama, Isus way lang.

9Ay gina Isus ay at tuluk tagadal gtagbung siginans buksul, Isus nafataganan te, “Lag gfoyung ay ngay nalag nu dyakmay au, Taw at Baguama, nadog naleleg.” 10Ay at ngay tagadal nafaning, ay gidgintoan Isus at longan at masuad, at nalong te, “Gdog kyay ban gleleg.”

11Ay kafag tuluk tagadal nainto sas Isus te, “Nataw at masuad, ngay tagfoyung Muisis at Faugali at fagnalongun te, Elyas fag taglong gguna ban kadasug?”

12Ay Isus nalong anya te, “Matuyan Elyas umdasug laman namalganan nusnge wain. Ay wain at faginrirukun sis Dius at Longan te, Taw at Baguama ngayu at fagnandalanun fagidapun, ay tiba bank taw gaiyan anya? 13Ay glong au ayu te, Elyas andasug wan ay kafag ngay taw at fakamulun sa anya gfaning way at ngay sadili fakaylatun, kata ebi ataw at marirukan sabaliwa anya sis Dius at Longan.”

Isus Nafafia Sik Baguama ke Mauri fag Falad

Mt 17:14-20; Lk 9:37-43

14Isus ay at ufud fag tulu nu ndasug, manlag di ngayuk taw maligung sit naubunan fag ngay tagadal. Ay tibak tagfoyung Muisis at Faugali gfabadbaboan anya fagayu. 15Ay arodi vtv fagayu taw nu nalag Isus, maksvn nu kadulo ay ankakbang masakit ay gfakamatoan anya.

16Ay Isus nainto te, “Nataw aro ay fagbadbaboanun?”

17Sik taw siginan swa taw gbalus te, “Takamoyung, aro nataban au ku baguama, ay grvbvy au emu, aroro e mauri fag falad tagfayud maringang. 18Ay kafag falad galay natayuk ku baguama, gukas anya sas daga ay at bibig gbura ay gfaringgit at bagang ay katurun at bilug. Ay naet koma sam ngay tagadal laman gaiyan at mauri fag falad, ay wa mafaiyan.”

19Ay Isus nabalus te, “Sik ngay taw wayam at yud gafanud. Seduge ya ban nu gbanwan au si ayu ay nu gagwantan au galo ayu? Agvd, kin, tabani stie.”

20Ay tiba nataban kafag baguama sas Isus. Ay at mauri fag falad nu nalag Isus, nafatadtaruy kafag baguama. Ay at baguama ntong sas daga ay nafadfarangan ay gbura at bibig.

21Ay Isus ginto sat mama te, “Seduge nu katatuy?”

At mama gbalus te, “Siginan wa nu alay. 22Ay ebi ataw ngayu ginan wan kafag mauri fag falad nu gukas ku baguama sas afuy ay sas mamam, laman gfabul anya. Nu mafakamulun tuo nusnge wain, afanyui emi ay gubuki emi.”

23Ay Isus nalong te, “Wain ro am fagnalongun te, ‘Nu mafakamulun tuo?’ Ay sik taw nu gafanud tua, nusnge wain umkatanya wa fia.”

24Ay arodi vtv at mama maksvn nu guro te, “Gafanud au, gubuki angku ku fagfainfolianun ku amatanganan.”

25Ay Isus nu nalag sik ngay taw masakit nu kaful, nagras kafag mauri fag falad te, “O fag falad tagfayud maringang ay tagfayud gdungug, glong au emu te, ubuni wa anya ay lag gdog ya katayuk sa anya kabavn.”

26Kafag mauri fag falad nu nauro ay nu maksvn wa nu gfafatfat kafag baguama, naubun. Ay at baguama kata wa nu nbul. Ay nu katanya wan ngayuk taw nalong te, “Nbul wan.” 27Ay Isus nated at daluap laman namalindug, ay kanya nlindug.

28Ay Isus nasakbo sa sik bale. Ay gina yud sanya tibak taw, at ngay tagadal nainto te, “Wain manga ami em fagyudun mafafaiyan kafag mauri fag falad?”

29Ay Isus glong te, “We tibak fangaiyan, darangin way at mafafaiyan.”

Isus Gdog yay Nafoyung sabaliwa nu Kabul Ban

Mt 17:22,23; Lk 9:44,45

30Isus ay at ngay tagadal nalo wan ay nadalan talun Galilea. Ay Isus wa kaylat gasafulan te, gdalan ro Galilea, 31aroro Isus gfoyung at ngay tagadal. Glong te, “E namoyung ban angku, Taw at Baguama, sat mauri fag ngay taw. Ay kanya ban fagayu gfabul angku, dewa katanya, si bans fatuluk menit, gdog kyay ban gleleg.”

32Ay at ngay tagadal ya nasaful at longan at masuad ay kalimu nanginto.

Tagtungud Ban sas Dius at Fagfagtainanan

Mt 18:1-5; Lk 9:46-48

33Isus ay at ngay tagadal andasug sas Kapernaum ay gina sis bale, Isus nainto sat ngay tagadal te, “Nataw aro ay fagbadbaboanun sangaba dalan?”

34Ay at ngay tagadal wa gbalus aroro at fagbadbaboanun sabaliwa nu sinu ban si anya fagayu tiba tungud.

35Ay Isus malunggung ay nafaful at labi duak nasugu ay glong te, “Sik taw takaylat gtungud at iba, katai tiba daga fag taw, ay fagayu taw at fagsuguan.”

36Ay Isus nataban sik sisian sirut ay nafalindug sit ngay tagadal at wabilug. Ay Isus naurugan anya ay glong sat ngay tagadal te, 37“Nusnga sinu tua takaylat sik sisian sirut takata tuy fag sisian, aroro kesug angku, kaylat yangay angku, ay nusnga sinu takaylat angku, bundi lang angku at fakaylatun, nu bunway anggan tua at nasugu angku.”

Nusnga Sinu at Yud Gfawayan Antam, Gfadiuganan Tua Antam.

Lk 9:49-50

38Uan nalong sas Isus te, “Takamoyung, nalag ami sik mangama naiyan at mauri fag ngay falad siginan am fagmabalyananun ay nasalag ami anya, aroro wa galo antam.”

39Ay Isus nalong te, “Lag gsalag anya, aroro sik taw nu e mabalyanan fag fakamulun siginan angku, di ban e longan mauri sa angku, 40aroro nusnga sinu at yud gfawayan antam, gfadiuganan tua antam. 41Matuyan nu glong au ayu te, nusnga sinu at nafon ayu dewa way sik taya mamam aroro am wan Dius at Nafili fag Fun at taw, wa ban kalyam ya at fagnamulun siginans Dius.

E Gfae Asalanan ban

Mt 18:6-9; Lk 17:1-2

42“Ay nusnga sinu tagfae asalanan sik sisian sirut tagafanud sa angku, amasine yap sa anya nu e gsiuk at liug sa sik fanligis trigu fag gang ay nu gukas sasad fagngabasadan dagat. 43-44Am daluap nu gfae asalanan way emu, gatvngi wan. Aroro amasine yap dewa sadi am daluap nu e leleg tua ngap ban o at yud e fakatabuan, dewa ngap dua am daluap, nu gaukasan way ban o sas afuy daul yud ban karabung kabavn. 45-46Ay am darafa, nu gfae asalanan way emu, gatvngi wan ay ukasi. Aroro amasine yap dewa sadi am darafa nu e leleg tua ngap ban o at yud e fakatabuan, dewa ngap dua am darafa, nu gaukasan way ban o sas afuy daul. 47Ay am mata nu gfae asalanan yangay emu, guladi wan ay ukasi. Aroro amasine yap dewa sadi am mata, nu kadasug tua ban o sas Dius at fagfagtainanan, dewa dua am mata nu gaukasan way ban o sas afuy daul. 48Sanya fag ngay ulud wa kabul ay afuy wa karabung.#9:48 Isayas 66:24.

49“Sik afuy tagsalag fagayu taw laman di gasalanan, kata sik barara nu gsalag sik fakonun laman di vtv kadan.#9:49 Sik afuy… kadan: sas Griegu, Fagayu taw kae ayat siginans afuy. 50Masine barara. Dewa katanya, sik barara nu dway mayat ya, tain ro nu gdog kae ayat? Ay ugali katai sik barara taggubuk taw, ay gudgubukani laman e fagmanabayanun am.”

Currently Selected:

Markus 9: OCCT

Highlight

Copy