Markus 10
10
Isus at Longan sabaliwa at Naubun at Mangena
Mt 19:1-9
1Isus nalo siginans Kapernaum, ay andasug sa sik afud talun Udea sis dife Liskung Urdan. Ay ngay taw gdog yay andasug sa anya, ay Isus nafoyung sa anya fagayu kata ebi ataw.
2Ay sik ngay taw Fariseu andasug, laman namaskud Isus. Ginto te, “O gfaning tam faugali sik mangama nu naubun at mangena?”
3Ay Isus gbalus te, “Tain Muisis at longan ayu ebi?”
4Ay kanya fagayu glong te, “Muisis nalong te, nu gaubunun wo am mangena, riruki sik famatuyan te, katsi nasaruayan wata, ay arodi aiyani wan anya.”
5Ay Isus glong te, “Muisis at fagnarirukun katanya sa ayu aroro kamaogatun am ay amatanganan.
6‘Ay siginan ngays fakasigadan, Dius nu kawat fagdaul daga, nawat yangay mangama ay mangena.’#10:6 Fakasigadan 1:27.
7‘Nu katanya, sik mangama gubun at mama ay at mina ay nangalo at mangena. Ay kanya fag dua ansadi wan.’#10:7 Fakasigadan 2:24.
8Nu katanya, bunwa dua ya, sadi wan. 9Ay nusnga sinu Dius at nafasadi, lag e namasaruayan.”
10Ay nu ndasug wan sat fagtaglayunan fag bale, at ngay tagadal nainto anya sabaliwa at foyungan. 11Ay Isus nabalus te, “Nusnga sinu at naubun at mangena, ay nu gdog yay kamubay, kanya gfanugtug way. 12Ay sik mangena nu naubun at mangama ay nu ndadwa way sa tiba, kanya kamatugtug yangay.”
Isus Nafadante sik ngay Sisian
Mt 19:13-15; Lk 18:15-17
13E nabuba sik ngay sisian ayu sirut sas Isus, laman Isus namatayuk at daluap sa anya fagayu. Ay Isus at ngay tagadal gsalag nu namuba sa anya. 14Ay Isus nu nasaful, nagras at ngay tagadal te, “Fabayani wan kafag ngay sisian nu kakbang sa angku. Lag am gsalag, aroro takata kanya fag ngay sisian katap ban sas Dius at fagfagtainanan. 15Matuyan nu glong au ayu te, nusnga sinu at yud kaylat Dius nu gfagtainan anya kata sik sisian sirut nu kaylat, kanya ban wa manangatap sat fagfagtainanan.”
16Ay arodi Isus naurugan kafag ngay sisian ayu sirut ay nafatayuk at daluap sa anya fagayu ay nadante.
Sik Maramraman fag Mangama
Mt 19:16-30; Lk 18:18-30
17Isus gina galoun, sik mangama masakit nu kakbang sa anya ay natudan sit daga salubangan, ay nainto anya te, “At matuyan fag Takamoyung, setain manga ku fakamulun, laman magbilug ktua leleg at yud e fakatabuan?”
18Ay Isus nabalus anya te, “Wain ro am fagnafangayanun angku te, ‘Matuyan’? We taw matuyan. Dius way lang at matuyan. 19Saful wo Dius at ngay suguan te,
‘Lag gfabul, lag gfanugtug, lag gfangkamul, lag o kamuag nu gfatuyan o am iba at fakamulun, lag gfandaya am iba laman namul at ramraman, ay suyui am mama ay am mina.’ ”#10:19 Nu Galin 20:12-16.
20Ay kafag mangama nalong sas Isus te, “Takamoyung, nafaning kwan kanya fagayu siginan nu mabaguama au.”
21Ay Isus nu nadama kafag mangama, kesug tua ay nalong te, “Dewa katanya, sadi ya am kurang. Falaoi am ramraman fagayu ay at nagbulan foni sat yud e kwa, laman e ramraman tua ban o sas banwa. Ay sanya ginan, aloi angku.”
22Ay kafag mangama nu nadungug, nalo mabaluanan, aroro maksvn nu maramraman.
23Ay Isus nadama ngay taw ay nalong sat ngay tagadal te, “Maidap mandi at maramraman fag ngay taw nu manangatap sas Dius at fagfagtainanan.”
24Ay at ngay tagadal andulo nu nadungug Isus at longan. Ay Isus nalong yangay te, “Ku ngay sisian, maidap tua at nangatap sas Dius at fagfagtainanan. 25Amasakit yap sik kamelyu nu nansulun sasad fansimat ramit at sulat, sa sik maramraman fag taw nu manangatap sas Dius at fagfagtainanan.”
26Ay at ngay tagadal andulo maksvn ay naidgintoan te, “Ay nu katanya, sinu ban at kumlangfe?”
27Ay Isus nadama at ngay tagadal ay glong te, “Ngay taw at fagyudun mafafakamulun, Dius mafafakamulun tua.”
28Pedru nalong sas Isus te, “Ami, naubun wami fagayu em ngay ramraman laman nangalo ami emu.”
29Ay Isus nalong te, “Matuyan nu glong au ayu te, nusnga sinu at naubun at bale ay at faduksay ay at mina ay at mama ay at sisian ay at daga, aroro gafanud sa angku ay sat Masine fag Barita, 30kanya ban namul ayu yap tua at naubun: ngay bale, ngay faduksay, ngay mina, ngay sisian, ngay daga, anggan ngay faurianan, ay abandi ban kanya mul tua leleg at yud e fakatabuan. 31Ay katsi at naguna tiba, kanya ban gaguyanan, ay at naguyanan, kanya ban gumuna.”
Isus at Fatulu Ginan Gfoyung sabaliwa nu Kabul Ban
Mt 20:17-19; Lk 18:31-33
32Ay Isus ay at ngay ufud gundaud sa sangaba dalan tagsas Erusalem, ay Isus tagguna at ibama. Ay Isus at ngay tagadal andulo nu gdungug Isus at longan, ay tagsit guyan vtv fag ngay taw kalimu. Ay Isus gdog yay an-gamut sat tagadal fag labi dua, ay nafoyung takafasludan ban sat sadili, 33ay glong te, “Amatangani, katsi sa watams Erusalem, ay abandi e moyung angku, Taw at Baguama, sa sangay fun tagfon fanggalangun ay sa sangay tagfoyung Muisis at Faugali. Ay kafag ngay taw ban nanfantabugan angku laman namabul, ay namatigwanan sas yud Udyu fag ngay taw. 34Ay at yud Udyu fag ngay taw ban gfalingun angku, ay gtufe angku ay gfalang ay gfabul. Ay nu nlangfe ban tuluk menit gdog kyay gleleg.”
Santiagu ay Uan at Fagetun sas Isus
Mt 20:20-28
35Santiagu ay Uan, Sebedeu at baguama fag dua, ankakbang sas Isus ay nalong anya te, “Takamoyung, e fagetun ami sa emu.”
36Ay Isus nalong sas duksay te, “Nataw ay fakaylatun ku fakamulun sa ayu?”
37Ay duksay nabalus anya te, “Gina ban o gfagtainan, falunggungi ban emi gsumbalian emu.”
38Ay Isus nalong te, “Duan, wam nasaful ay fagetun at masuad. O nunda manandalan ban am ku fagnandalanun fag fagidapun? O magwanta ban am ku fagnangagwantanun fag faurianan?”
39Ay duksay nabalus anya te, “Sabv.”
Ay Isus nalong te, “E, kin. Gdalan ban am takatanya fag fagidapun ay fag faurianan. 40Ay dewa katanya, at nanmalunggung ban gsumbalian angku bunwa au tagfili. Kafag ngay faglunggungan ku Mama tua at nafalganan sat ngay nafili.”
41Ay at safuluk tagadal nu nadungug katanya, kauri Santiagu ay Uan. 42Ay Isus nafaful at ngay tagadal sa anya ay nalong te, “Nasaful wam te, at yud Udyu fag ngay taw at kintoglag te, sik ngay fun, maksvn nu gsugu, ay nusnga setaw at fakaylatun, at fagfanggunaun fag ngay taw gfaning. 43Ay am, lag katanya. Nusnga sinu am takaylat nangabalyanan, afagsuguani way ay iba. 44Ay nusnga sinu am takaylat tagtungud tibak taw, katai yakman sik fagsuguan. 45Katanya kyangay au, Taw at Baguama. Ku fagindasugun bundi au taw at fagnanggubukun, nu bunway nanggubuk au ngay taw, ay namon au ku leleg laman namul au ngayuk taw siginans fakabulun.”
Isus Nafafia Bartimeu
Mt 20:29-34; Lk 18:35-43
46Isus ay at ngay tagadal andasug sas furuan Eriku. Ay gina glao sanya ginan gfasfuan ngayuk taw, kanya fagayu nadalan sik taw at yud glag malunggung sis tigyangan dalan ay gfanget. At ngayan Bartimeu, at masuad te, Timeu at baguama. 47Ay Bartimeu nu nasaful te, Isus fag taw Nasaret gdalan, kanya guro te, “Isus, fun Dabid at kasugfunanan, afanyui angku.”
48Ay ngayuk taw tagsalag anya laman wa garingang. Abat ngate gasalagan, kaugat yay nu guro te, “Fun Dabid at kasugfunanan, afanyui angku.”
49Ay Isus anragang ay nalong te, “Tabanani anya stie.”
Ay tibak taw nalong sa kafag taw at yud glag te, “Lag gafanawa, malindugi, Isus nalong te, tabanani emu sa anya.”
50Ay Bartimeu masakit nu gbul at lanbung daul, ay masakit nu kalindug ay nasas Isus. 51Ay Isus nalong anya te, “Nataw ro am fakaylatun ku fakamulun sa emu?”
Ay kanya nabalus sas Isus te, “Takamoyung, ku fakaylatun glag ktua nangus.”
52Ay Isus nalong anya te, “Loi wan, aroro siginan am fagafanudun anfia o.”
Ay arodi vtv kanya glag wan ay nanangalo Isus sas dalan.
Currently Selected:
Markus 10: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
