Markus 16

Isus nu Gdog Gleleg

Mt 28:1-8; Lk 24:1-10

1Famiangalay fag Menit nu nlangfe wan, Maria Magdalena, ay Salume, ay anggan Santiagu at mina fag Maria, nanamayad sik famaebebanglu, laman ro at fanrarus sas Isus at bilug. 2Ay balabag di sLinggu, menit gina bagu kasure, kafag ngay mangena nalao sas fagfolian. 3Ay gidgintoan te, “Sinu ro manga at magubuk antam namadaging at faningding fag gang siginans sakbawan fagfolian?”

4Ay nu nabanawan, manlag di at faningding fag gang madagingan wan, dewa gbia. 5Ay kafag ngay mangena nu nasakbo sas fagfolian, manlag di sik baguama malunggung sis fasiunan baliwa. At lanbung malaksi ay ngaba ay kafag ngay mangena anlimu. 6Kafag baguama nalong sanya fag ngay mangena te, “Lag am kalimu, saful au te, grvbvy am Isus tagsiginans Nasaret, ebi at natuktuk sas fasulungan kayu. Kanya gdog yay gleleg ay wa ste ya. Damai at fagfolian anya. 7Loi wan ay nanlong am sat ngay tagadal, kaugat wan sas Pedru te, Isus ban gumuna ayu sas talun Galilea. Sanya ban nu glag am anya, kata at longan ebi.”

8Nu katanya, kafag ngay mangena naduksun siginans fagfolian ay natarung, gtadtaruyan ay kadulo, ay we nafoyung nusdi sas sadik taw, aroro maksvn nu kalimu.

Tibak Taw at Famamut Tuy fag Rirukan

9Isus gina nadog yay gleleg sis Linggu sbalabag sirut, kanya ansure sas Maria Magdalena. Ebi Isus naiyan siginan anya fituk mauri fag falad. 10Ay Maria nalao sas Isus at ngay tagadal, ay nafoyung sa anya fagayu te, nalag Isus. Ginanya kafag ngay taw gwayway aroro maksvn nu kabalu. 11Ay at ngay tagadal wa gafanud nu nadungug te, Isus gleleg wan ay Maria nalag anya. 12Abandi, kaduge at tagadal at dua glao sas gamasun, Isus ansure, ay ansaman at kayaunanan. 13Ay kanya fag duak tagadal anfoli sas Erusalem ay nafoyung sat ibama. Ay at ibama wa gafanud.

14Sanya ginan, gina at ngay tagadal fag labi sadi gfangon, Isus ansure ay nagras anya fagayu aroro wa gafanud ay kamaogatun at amatanganan, dewa e nafoyung te, kanya gleleg wan. 15Ay Isus nalong sat ngay tagadal te, “Loi wan sas fagdaul daga, ay namoyung am at Masine fag Barita sas fagayu taw. 16Nusnga sinu ban tagafanud ay nu nsurung, umlangfe ban. Ay nusnga sinu at yud gafanud, umfaurianan ban. 17Ay fagayu ban tagafanud mafakamulun at madulo siginan ku fagmabalyananun, ay maiyan ban at mauri fag ngay falad ay maringang ban tibak fangaringang. 18Ay kanya ban fagayu dewa nated sik ule, ay dewa nainum at maganga, di gaganga. Ay nu nafatayuk ban at daluap sa sangay ke fakasaitun, kafia.”

19Ay tam Fun Isus nu nalong wan sat ngay tagadal takatanya, e nafabat anya sas banwa ay kanya nananmalunggung sas Dius at siun baliwa. 20Ay at ngay tagadal nalo wan ay namoyung sas fagayu talun. Ay tam Fun nagubuk anya fagayu, siginan nu gfon at fagmabalyananun gfakamulun at ngay madulo, laman famafanud te, matuyan at longan.

Currently Selected:

Markus 16: OCCT

Highlight

Copy