Lukas 1
1
Lukas at Famasigad fag Longan
1Fagtainan Teufilu, ngayuk taw nariruk sa baliwa at kinfasludan wan si antam. 2Kanya fagayu nariruk kata em nadungug fag ngay fansulitan siginan at nalag at kinfasludan ebi taguna ay at nafoyung Dius at Longan. 3Ay nu nadal au fia at kinfasludan takatanya fagayu, naylat kyangay griruk laman gfasaful sa emu. Aroro, glugo wan nu gadal au tuy fagayu siginans fakasigadan. 4Nariruk au sa emu, laman sumaful o te, matuyan at ngay foyungan sa emu.
Nu Gfoyung sabaliwa Uan Tagfasurung nu Kasalug Ban
5Gina Erudes gfunan sis talun Udea, e sik tagfon fanggalangun at ngayan Sakaryas. Kanya kataip yangay sa sik ngay tagfon fanggalangun tagsis Abyas fag gaban. Sakaryas at bubay, Elisabet, kanya siginan yangay Arun at kasugfunanan. 6Kafag dadwa matuyan tua sas Dius at daga salubangan, ay gfaning tam Fun at ngay longan ay at ngay faugali. 7Ay kafag dadwa we sisian, aroro Elisabet garanas, ay anggan dadwa gsud wan mafagtainan.
8Ay andasug at menit, Sakaryas at gaban at namon fanggalangun sas Dius at daga salubangan. 9Kata at faugali, kafag ngay tagfon fanggalangun nafafidfilian laman ginsaful te, sinu ban at nansakbo sa tam Fun at bale laman nangirug famaebebanglu. Ay at nafili, Sakaryas. 10Ay gina Sakaryas girug famaebebanglu, ngay taw gdarangin sis day bale.
11Ay ginanya, tam Fun at tagbarita at sadi ansure sas Sakaryas. Ay kanya malindug sis day fagirugan famaebebanglu, sis fasiunan baliwa. 12Ay Sakaryas anlipsik ay maksvn nu kalimu. 13Ay kafag tagbarita nalong te, “Sakaryas, lag o kalimu, aroro Dius nadungug am darangin. Am bubay Elisabet gfasalug ban sik munama, ay gfangayan ban o anya te, Uan. 14Ay gina ban ansalug, guseganan o ay kaylat anya, ay ngayu yangay ban ktaw taguseganan. 15Aroro am baguama ban sik mabalyanan sa tam Fun at daga salubangan, ay kanya ban wa ginum fanlangu, ay siginan yay nu yud ansalug, at Masine fag Falad siwa anya. 16Ay kanya ban namafoli ngayuk taw Israel sat Fun Dius, 17ay kanya ban gguna tam Fun, laman namafalganan ngay taw gina tam Fun kadasug. Ay siginan at Masine fag Falad at gubuk ay at fagmabalyananun, kanya ban namakamulun, kata Elyas at nafakamulun ebi. Kanya ban namoyung ngay fagtainan, laman kesug tua at ngay sisian, ay namae fagsafulun ngay takamabo, laman umsik matuyan. Nu katanya, kanya namalganan sik ngay taw laman sa tam Fun.”
18Ay Sakaryas nalong sa kafag tagbarita te, “Mafufuama kwan, ay anggan ku bubay mafufuina wan. Tain ban nu sumaful au te, umfasludan am longan?”
19Ay tagbarita nabalus Sakaryas te, “Au wan Gabriel, kabavn gfakamulun au sis Dius at daga salubangan. Kanya nasugu angku laman namadungug au sa emu tuy fag barita at masine. 20Ay aroro wo gafanud, wa ban o maringang yakmay ban anfasludan ku nalong sa emu. Aroro matuyan, umfasludan waban fia nu ndasug tam Dius at nafalganan fag buknga.”
21Ay kafag ngay taw kaduge gfanya Sakaryas, kanya fagayu kadulo te, “Wain manga at fagngadugeun nu masakboan sis Dius at bale?” 22Sakaryas nu naduksun wan, wa maringang ya, gyafe way lang at take. Nu katanya, kanya fagayu namatangan te, tam Dius nafalag sa anya sik taginfan. Ay siginan ginanya, Sakaryas wa maringang ya.
23Ay nu ntabu wan nu gfakamulun, Sakaryas noli wan. 24Abandi, Elisabet gfafion wan, ay kaduge limak magdanun, wa batang gduksun siginan sad bale. 25Ay Elisabet nalong te, “Tam Fun matuyan tua. Kanya nafalyam tua ku fakaplaun sa sangay taw.”
Nu Gfoyung Isus nu Kasalug ban
26Ay gina sis faunumk magdanun Elisabet nu gfafion, Dius nasugu at tagbarita, Gabriel, sas Nasaret, sik furuan sis talun Galilea. 27Sanya sik baguina at yud batang e nasa anya. Kanya fag baguina, Use at algan ban at bubay, at ngayan Maria. Use, Dabid at kasugfunanan. 28Ay kafag tagbarita nu ndasug, nalong sas Maria te, “Useganani, aroro tam Fun ggubuk tua emu ay si yangay emu.”
29Ay Maria nu nadungug, gafanawa, ay gamatangan te, “Nataw manga at longan angku at masuad?”
30Ay kafag tagbarita nalong te, “Maria, lag o kalimu, aroro Dius kesug emu. 31Dungugani. Gfafion ban o, ay gfasalug ban o sik munama, ay gfangayan ban o anya te, Isus. 32Kanya ban mabalyanan ay gfangayan ban te, Tiba Tungud at Baguama. Ay Dius tam Fun namon ban anya at mangaguyang Dabid at fagmafunanun. 33Ay kanya ban gfagtainan Akub at ngay kasugfunanan, ay wa ban e fakatabuan nu gfagtainan.”
34Ay Maria nalong sanya fag tagbarita te, “Tain ro nu kafasludan, ay kye indugan?”
35Ay tagbarita nabalus te, “At Masine fag Falad umdasug ban sa emu, ay anggan Tiba Tungud at fagmabalyananun umtayuk ban sa emu, laman ban am fagfasalugun fag sisian yud e malong gfangayan ban anya te, Dius at Baguama. 36Ay katanya yangay anggan am kalongan Elisabet, dewa mafufuina wan, katsi gfafion. Fagayu taw saful te, sia sik tagaranas way. Ay katsi nu gfafion unum wak magdanun, 37aroro Dius mafafakamulun nusnge wain.”
38Ay Maria nalong te, “Tam Fun au at fagsuguan. Umfasludan ban nangus am longan sa angku.” Ay tagbarita nalao wan.
Maria Nansibo Elisabet
39Ginanya fag ngay menit, Maria nafalganan ay gabanganan glao sa sik furuan sis talun Udea at fagagbilugun fag ngay buksul, nu inda Sakaryas at fagbanwanan. 40Ay kanya nu ndasug sanya fag furuan, nasakbo sas Sakaryas at bale laman namakamatoan Elisabet. 41Ay Elisabet nu nadungug Maria at aringang, at fafionan maksvn nu gfanleleg, ay at Masine fag Falad antayuk sas Elisabet. 42Ay Elisabet maksvn nu glong te, “Dius nu ggubuk emu gtungud tua tibak mangena. Ay Dius nagubuk yangay anggan am fagfafionun. 43Sinu au, laman ku Fun at mina nangadasug sa angku? 44Nu nadungug au emu, ku fafionan maksvn nu gfanleleg aroro guseganan. 45Ay mauseganan tuo, aroro gafanud tuo te, umfasludan ban tam Fun at longan sa emu.”
Maria at Alubad
46Maria nalong te,
“Gseg au tam Fun sas fagdaul ku basad taw.
47Ay ku falad guseganan sas Dius, ku Tagfalangfe.
48Aroro Dius namatang tua angku at mafalingun fag fagsuguan.
Dungugani, siginan katsi, fagayu taw at sugfun gfangayan angku te, sik mauseganan.
49Aroro at Mabalyanan fag Dius at nafakamulun sa angku maksvn nu madulo.
At ngayan we malong.
50Ay kanya kafanyu fagayu kasugfunanan tagseg anya.
51Dius nafalag at mabalyanan fag fakamulun.
Ay kanya naiyan wan fagayu takamatungudun sat amatanganan.
52Dius nafababa ngay funan siginan at fagmafunanun,
ay nafabat ngay taw tagafalingunan.
53Dius nafon at masine sa takalunus, laman kapsug.
Ay kanya naiyan at maramraman, yud e buba.
54Dius nagubuk at fagsuguan fag ngay taw Israel,
laman namafasludan at nafatuyanan te, ‘Kafanyu au anya fagayu kabavn ban.’
55Katanya at longan sa tam ngay mangaguyang,
sas Abrayam ay sat ngay kasugfunanan.”
56Maria nu gbanwan sis Elisabet, malgau tuluk magdanun, ay sanya ginan, noli wan.
Uan Tagfasurung nu Kasalug
57Andasug wan at buknga Elisabet nu gfasalug, ay kanya nafasalug sik munama. 58Elisabet at ngay fasabale, anggan at ngay kalongan, nadungug te, tam Fun maksvn nu ggubuk Elisabet. Ay kanya fagayu gfasfuan Elisabet guseganan.
59Ay nu siwas fawaluk menit siginan kafag ngenge nu kasalug, at ngay fasabale ay at ngay kalongan andasug laman namae fakatoglagan kafag ngenge kata ngay taw Udyu at ugali. Ay kanya fagayu nafangayan kafag ngenge te, Sakaryas, kata at mama at ngayan. 60Ay kafag ngenge at mina nasalag te, “Duan! Uan way at ngayan.”
61Tiba nalong anya te, “Wam e ngay kalongan at ke ngayan takatanya.”
62Ay kanya fagayu nayafe sat mama laman sumaful at fangayan sat ngenge. 63Ay Sakaryas get sik fagrirukan, ay nariruk te, “At ngayan Uan.” Ay sanya fag ngay taw andulo. 64Ginanya yay, Sakaryas maringang wan, ay gfauseganan Dius. 65Fagayu at fasabale andulo maksvn. Ay fagayu taw sis talun buid Udea gfoyung at nadungug. 66Ay fagayu at nadungug gamatangan maksvn ay ginto te, “Nataw ban manga kafag sisian at fakamulun nu nfagtainan? Aroro matuyan, tam Fun at fagmabalyananun si anya.”
Sakaryas Gseg Dius.
67At Masine fag Falad antayuk sas Sakaryas, Uan at mama, ay kanya gfoyung te,
68“Segi tam Fun, taw Israel at Dius,
aroro kanya andasug laman namalangfe at ngay taw.
69Kanya nafadasug sa antam sik mabalyanan fag tagfalangfe
siginan at fagsuguan Dabid at kasugfunanan,
70kata Dius at fatuyanan ebi at nalong sat ngay taglong.
71Ay Dius namalangfe antam siginan tam ngay fawayan
ay siginan fagayu takadotama antam.
72Ay Dius nafalag at fakafanyun at nafatuyanan sa tam ngay mangaguyang,
ay namafasludan ban at yud e malong fag nasadian,
73at nafatuyanan sa tam mangaguyang Abrayam.
74Kanya namalangfe antam siginan tam ngay fawayan,
laman nu gfaning tam anya wa tam e fakalimuun ya,
75ay laman masine tua ay matuyan tua tam fakamulun sis Dius at daga salubangan, kaduge tam gleleg.
76Ay o, ku munama, gfangayan ban emu te, Tiba Tungud fag Dius at Taglong.
Aroro gumuna ban o tam Fun, laman ban namasine o at dalan,
77ay laman namoyung ban o sas Dius at ngay taw te,
‘Dius wan tagfalangfe ay tagfalyam ay ngay asalanan,’
78aroro tam Dius mafangafanyu tua ay mafangesug sa antam,
ay namadasug sa antam sik tagfalangfe, kata menit nu bagu kasure,
79laman nandamlag ngay taw tagsi yay sad dulum, ay takalimu sas fakabulun,
ay laman namoyung ban antam, laman tam darafa lumao sat manabayan fag dalan.”
80Ay kafag sisian an-gurang wan ay anbitsug at amatanganan, ay kanya nanamanwan sas talun at yud e taw yakmay namoyung wan sa sangay taw Israel.
Currently Selected:
Lukas 1: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
