Markus 1

Uan Tagfasurung at Foyungan

Mt 3:1-11; Lk 3:2-16

1-2Katatuy at Masine fag Barita sabaliwas Isus, Dius at nafili fag Fun, Dius at Baguama. Nafasigad takatanya gina kafasludan Dius at taglong Isayas at rirukan te,

“Sumugu au ku fagsuguan laman gguna emu,

ay kanya ban tagfasine am dalan.”#1:1-2 Malakyas 3:1.

3“Sik taw guro sis talun at yud e taw te,

Fasinei tam Fun at dalan.

Faturunani at fagnanloan.”#1:3 Isayas 40:3.

4Ay Uan Tagfasurung andasug sas talun at yud e taw ay kamoyung sa sangay taw te, “Foyungi ay ubuni ay ngay asalanan ay asurungi sasad mamam, laman Dius gfalyam ay ngay asalanan.” 5Ay sik ngay taw andasug sas Uan siginans fagdaul talun Udea ay siginans Erusalem. Ay kafag ngay taw nafoyung at ngay asalanan, ay Uan nafasurung anya fagayu sis Liskung Urdan. 6Uan at lanbung mawatan siginans kamelyu at sigyu, ay at ginawang mawatan siginans fagbaugun at balat, ay at fakonun liung ay deut. 7Uan nafoyung te, “Tagguyan ban angku gtungud yay angku, ay kwa masine nusdi at fagsuguan laman at nanluas at fansalod at lapak. 8Gfasurung au ayu sasad mamam ay kanya ban fag taw namasurung ayu sat Masine fag Falad.”

Uan nu Gfasurung Isus

Mt 3:13-17; Lk 3:21-22

9Ginanya, Isus andasug sas Liskung Urdan siginans furuan Nasaret sis talun Galilea. Ay Uan nafasurung anya sanya fag liskung. 10Ay Isus nu nlakwi wan siginan sad lino, manlag di banwa anluang, ay at Masine fag Falad kadaga kata sik labikung ay naafun sa anya. 11Ay e naringang siginans banwa te, “O wan ku fakesugun ku Baguama. Maksvn nu guseganan au emu.”

12Arodi vtv at Masine fag Falad nataban Isus sas talun at yud e taw. 13Isus nu sanya, ufatk safuluk menit, ay Satanas gfaskud anya. Ginanya, Isus magamut si sangay mela, ay Dius at ngay tagbarita ggubuk anya.

Isus Gfasigad Gfoyung

14Ay Uan gina nkubung, Isus nalo sas talun Galilea, ay namoyung at Masine fag Barita sabaliwas Dius. 15Ay Isus nalong te, “Siginan katsi fag menit, munakbang wan Dius nu gfagtainan taw. Ubuni ay ngay asalanan ay afanudi sat Masine fag Barita.”

16Gina Isus glo sis tigyangan Lino Galilea, kanya nalag Simun ay at arian Andres nu gukas at fanggamat albon sasad lino, aroro kafag duksay tagfangalbon. 17Ay Isus nalong anya te, “Wainyayam, aloi angku, ay namoyung au ayu nu gfaful ban am ngay taw kata nu gfaful am albon katsi.” 18Ay arodi vtv kanya fag duksay nafamato at ngay fanggamat albon ay nanangalo Isus.

19Ay Isus nu nyayu wa sirut at nalao, nalag Santiagu ay Uan, Sebedeu at baguama fagdua, sisad sakayan lino gina gsimat at ngay fanggamat albon. 20Ay Isus nagewan kafag duksay. Ay duksay naubun at mama, Sebedeu, anggan at ngay fagsuguan sis sakayan lino, ay nanangalo Isus.

Sik Mangama at ke Mauri fag Falad

Lk 4:31-37

21Isus ay at ngay ufud andasug sas Kapernaum. Ay gina sis Famiangalay fag Menit, Isus nasakbo sas taw Udyu at bale fakafulan ay nafoyung. 22Sanya fag ngay taw andulo nu nadungug Isus at foyungan, aroro nu gfoyung, kata tua sik fun, ay di kata ngay tagfoyung Muisis at Faugali.

23Ay sis bale fakafulan e sik mangama at ke mauri fag falad, ay kanya nauro te, 24“Isus fag taw Nasaret, nataw am fagyafakamulunun sa emi? O am algan namalyam wo em fagmabalyananun? Saful au te, o wan Dius at nasugu at Yud e Malong.”

25Ay Isus maksvn nu gsalag te, “Lag garingang. Ubuni wan kanya fag taw.” 26Ay kafag mauri fag falad nafatadtaruyan kafag taw, ay gina gduksun guro.

27Ay fagayu taw andulo ay gidgintoan te, “Nataw tuy? Bagu fag foyungan at ke fagmabalyananun! Aroro nu nasugu sat mauri fag ngay falad, kanya fagayu gfaning.” 28Nu katanya, masakit barita nu kafagdaul sas talun Galilea at ngay taw sabaliwas Isus.

Isus Nafafia Ngayuk Taw

Mt 8:14-16; Lk 4:38-41

29Isus ay at ngay ufud nu naduksun siginans bale fakafulan, nataglayun sas Simun ay Andres at bale. Ay Santiagu ay Uan galo anya. 30Ay Simun at nugangina gtaygilidan aroro garagnat, ay tibak taw nanamasaful wa vtv sas Isus. 31Nu katanya, Isus nanangakbang sas Simun at nugangina ay nated at daluap ay nafalunggung, ay at ragnat anfia wan. Ay kafag mangena nafalganan sik fakonun laman sas Isus ay at ngay ufud.

32Nu gakayabiun wan, ngay taw nanamuba sas Isus at ke ngay fakasaitun ay at ke mauri fag falad. 33Ay fagayu taw sanya fag furuan maful sis day sakbawan bale. 34Ay Isus nafafia ngayuk taw, nusnga setaw fag fakasaitun ay naiyan ngayuk mauri fag falad. Isus gsalag kafag ngay mauri fag falad nu garingang, aroro toglag anya.

Isus Gfoyung sa sangay Taw

Lk 4:42-44

35Balabag di sdaga kamenit, Isus nu nfulo wan, nalo sas talun at yud e taw laman nandarangin. 36Ay Simun ay at ngay ibama grvbvy anya. 37Ay nu nalag wan, nalong sas Isus te, “Ngayuk taw grvbvy emu.”

38Ay Isus nalong te, “Bastam, sa watam tibak furuan, laman namoyung au sanya fag ngay taw, aroro katanya ku fagindasugun.” 39Ay Isus gdalanan fagdaul furuan Galilea ay gfoyung sa sangay taw Udyu sa sangay bale fakafulan, ay gaiyan at mauri fag ngay falad.

Isus Nafafia sik Tagabangbang

Mt 8:2-4; Lk 5:12-14

40Sik taw tagabangbang nanangakbang sas Isus ay gfainfanyuan te, “Nu kaylat o, fafiai angku laman masine kwan.”

41Isus anfanyu kafag taw ay nafalugde at take ay nated kafag taw at ke fakasaitun, ay nalong te, “Sabv, kaylat au nu kafia o.” 42Ay arodi kanya anfia wan.

43-44Ay Isus maksvn nu gsalag te, “Lag kamansulit sas nusdi sadik taw. Loi wan ay namalag o emu sas tagfon fanggalangun. Ay foni sik fanggalangun kata ebi Muisis at longan, laman sik famasaful sa sangay taw te, anfia.” Ay sanya ginan Isus nalong anya te, “Agvd, loi wan.” 45Kanya fag taw nalo wan ay maksvn nu gfoyung sas fagayu taw ay nu gfarapyag at barita. Nu katanya, Isus wa manangasure sa sangay furuan ayu daul, ay nu glo sa way sangaba talun at yud e taw. Ay ngay taw kadasug sa anya dewa ndaginan.

Currently Selected:

Markus 1: OCCT

Highlight

Copy