Markus 2

Isus Nafafia sik Taw at Yud Malelegan

Mt 9:1-8; Lk 5:18-26

1-2Nu nlangfe tibak menit, Isus anfoli sas Kapernaum, ay sanya fag ngay taw nadungug te, Isus noli sat bale. Ay ngayuk taw nanangaful sanya, at kayuan, dewa sis sakbawan we fakalindugan ya. Ay Isus nafoyung Dius at Longan sanya fag ngay taw. 3Ay tibak mangama andasug yangay gbuba sik taw at yud malelegan, tagbuba ufatk mangama. 4Ay kanya fagayu wa mabuba sas Isus at akbang aroro ngayu fag taw, ay nu katanya naiklas ugun sis Isus at aturunan, ay nafatagbung kafag taw gtaygilidan sit igyan. 5Ay Isus nu nalag kafag ngay taw at fagafanudun, nalong sanya fag taw at yud malelegan te, “Sama, nalyam wan am ngay asalanan.”

6Tibak tagfoyung Muisis at Faugali at malunggung sanya, gamatangan te, 7“Wain at fagnalongun katanya? Mauri at longan sas Dius, aroro Dius tua at mafafalyam asalanan.”

8Ay Isus masakit nu gsaful kafag ngay taw at amatanganan ay nainto te, “Wain ay fagamatanganun takatanya? 9Amatangani, inday at masakit fag longan sas taw at yud malelegan, nu glong ro te, ‘Nalyam wan am ngay asalanan,’ ay mannga, ‘Alindugi, bangkadi am igyan ay loi wan’? 10Kaylat au nu nasaful am te, au, Taw at Baguama, e fagmabalyananun au ste swa daga gfalyam taw at asalanan.”

Ay Isus glong sat yud malelegan fag taw te, 11“Alindugi wan, bangkadi am igyan ay ulii wan.”

12Ay kanya fag taw anlindug ay arodi vtv nabangkad ay nabuba at igyan, ay nalo wan, siginan sangay taw at salubangan. Ay fagayu taw andulo ay naseg Dius ay nalong te, “Yami batang e nalag takatatuy!”

Isus Nataban Lebi

Mt 9:9-13; Lk 5:27-32

13Isus gdog yay nalo sas tigyangan lino, ay ngayuk taw andasug, ay Isus gfoyung sa anya fagayu. 14Ay arodi nu nalao wa, nalag Lebi, Alfeu at baguama nu malunggung sis bale fagfonan famayad sas fun. Ay Isus nalong anya te, “Aloi angku.” Ay Lebi anlindug ay nanangalo anya.

15Isus ay at ngay tagadal gina gfangon sis Lebi at bale, ngayuk tagbul famayad laman sas fun ay ngay tagasalanan gfasfuan anya fagayu gfangon, aroro tagsanya fag ngay taw ngayu tagalo Isus. 16Ay sanya, ngay taw Fariseu tagfoyung Muisis at Faugali nalag Isus nu gfangon gfasfuan ngay tagasalanan ay tagbul famayad laman sas fun. Ay kanya fagayu ginto sas Isus at ngay tagadal te, “Wain manga Isus nu gfangon fagfasfuanun ngay tagbul famayad laman sas fun ay anggan ngay tagasalanan?”

17Ay Isus nu nadungug, nalong sa anya fagayu te, “Sik taw at yud e fakasaitun wa gayudan tagfafia, kayu way ke fakasaitun. Aroro ku fagnastaeun kwa namaful sa angku at matuyan fag ngay taw, kayu way ke asalanan.”

Sik Fagintoun sabaliwa nu Yud Gfangon

Mt 9:14-15; Lk 5:33-35

18Ginanya, Uan at ngay tagadal ay taw Fariseu wa gfangon laman gdarangin. Ay tibak taw andasug ay nainto sas Isus te, “Wain manga Uan at ngay tagadal ay taw Fariseu at ngay tagadal at fagebukngaun yud gfangon laman gdarangin, ay am ngay tagadal wa gfakamulun takatanya?”

19Ay Isus nabalus anya fagayu te, “O sik bagu kadadwa fag mangama gina gfadgaloan at ngay fagadgalangan, o ginanya ro at ngay fagadgalangan e buknga yud gfangon laman gdarangin? Duan. Aroro kaduge gfadgaloan kafag mangama, at ngay fagadgalangan gfangon tua. 20Ay sa ban tibak menit e gtaban wan kafag mangama. Ay ginanya ya ban at ngay iba nu e buknga yud gfangon laman gdarangin.

21“We taw nansimat sik bagu fag ramit sat dan fag lanbung at girat nu dway nabakbak taguna at bagu laman gfalay. Aroro nu dway katanya, kafag ramit at bagu umkalay ay gfabia at dan fag lanbung at girat. 22Ay we taw nantalin at bagu fag fanlangu sat dan fag fagsuadan mawatan fagbaugun at balat, aroro nu natalin ro sanya, kafag fagsuadan kaltu, ay fagdua gsud kafangulan. Sik taw nu gtalin at bagu fag fanlangu sa tua at bagu fag fagsuadan mawatan fagbaugun at balat.”

Isus Famiangalay fag Menit at Fun

Mt 12:1-14; Lk 6:1-11

23Gina sis Famiangalay fag Menit, Isus ay at ngay tagadal gdalan sa sik gamasun. Ay at ngay tagadal nabul ngay raug trigu. 24Ay sik ngay taw Fariseu nalong sas Isus te, “Damai am ngay tagadal at fakamulun. Wain at fagyudun gfaning tam faugali sabaliwas Famiangalay fag Menit?”

25Ay Isus nabalus te, “O nunda yam natap sabaliwa fun Dabid at nafakamulun ebi gina kanya ay at ngay ufud kalunus ay e fagayudanun? 26Dabid nasakbo sas Dius at bale gina Abyatar tiba tungud fag tagfon fanggalangun, ay naon fanggalangun fag ngay tinapay, Dius at Longan dewa gsalag takatanya. Aroro at masine kon, kayu way ngay tagfon fanggalangun. Ay Dabid nafon yangay sat ngay ufud.”

27Ay Isus glong yangay te, “Dius nawat Famiangalay fag Menit laman sas taw. Dius wa nawat taw laman sas Famiangalay fag Menit. 28Nu katanya, Taw at Baguama, Famiangalay yangay fag Menit at Fun.”

Currently Selected:

Markus 2: OCCT

Highlight

Copy