Mateu 26

Taw Udyu at ngay Fagtainan Kaylat Gfabul Isus

Mk 14:1-2; Lk 22:1-2

1Ay Isus nu ntabu wan nu gfoyung takatanya fagayu, nalong sat ngay tagadal te, 2“Nasaful wam te, nu nlangfe duak menit, umdasug ban fagmafulun sabaliwas Tagbarita nu Glangfe. Ay ginanya, e gfoyung ban angku, Taw at Baguama, sa tibak taw laman gtuktuk angku sas fasulungan kayu.”

3Ay arodi ngay fun tagfon fanggalangun ay taw Udyu at ngay fagtainan anful sas Kayfas at bale. Kayfas tiba tungud fag tagfon fanggalangun. 4Ay kafag ngay taw gkamatoan nu setain nu magamat ay mafabul Isus laman ngay taw wa nasaful.

5Ay kanya fag ngay taw nalong te, “Toyap katsi gina e fagmafulun fag ngay menit, laman ban sanya fag ngay taw at maful di namawayan antam.”

Sik Mangena Nafatayuk Famaebebanglu sas Isus

Mk 14:3-9; Lk 7:37-38; Uan 12:1-8

6Ay Isus sis furuan Betanya, sis Simun at bale. Simun ebi ataw gabangbang. 7Ay sik mangena ankakbang sas Isus gbuba famaebebanglu at yud e suglat at mabyat nu kabayad, at fagsuadan mawatan siginans gang alabastru.#26:7 alabastru: sik malumak fag gang fangawat nusnge wain. Ay kanya naugwag at ba famaebebanglu sas Isus at alfuyu kaduge Isus malunggung gfangon. 8Ay Isus at ngay tagadal kadotama nu nalag takatanya, ay gkamatoan te, “Wain manga at fagnafangulanun? 9Nu nafaebayad di, ngayu ro at nagbulan ay mafon yay ro at nagbulan fag salapi sa sangay taw at yud e kwa.”

10Ay Isus nu nasaful at ngay tagadal at longan, kanya nalong te, “Wain ay fakauriun tuy fag mangena? Masine tua at nafakamulun sa angku. 11Aroro at yud e kwa ste way gugat, ay dewa katanya nu magamut au si ayu, bunwa kabavn. 12Ay tuy fag mangena naugwag sa ku bilug kafag famaebebanglu, laman gfalganan nu namoli ban angku. 13Matuyan nu glong au ayu te, nusnga nday ban nu e kamoyung sas fagdaul daga at Masine fag Barita, e gfoyung yangay ban anggan tuy fag mangena at nafakamulun, laman ban kanya kamatang tua gugat.”

Udas Namoyung Isus sat Mauri fag ngay Taw

Mk 14:10-11; Lk 22:3-6

14Sanya ginan, Udas Iskariute, Isus at labi duak tagadal at sadi, nanangakbang sa sangay fun tagfon fanggalangun, 15ay nainto te, “Nataw ban ay fon angku nu nafoyung ktua ban Isus sa ayu?” Ay kafag ngay taw nafon anya tuluk safuluk salapi. 16Ay sanya ginan, Udas gfanya sik buknga laman mafoyung Isus sanya fag ngay taw.

Isus at ngay Tagadal Gfalganan at Yafun sabaliwa Tagbarita nu Glangfe

Mk 14:12-21; Lk 22:7-13; Uan 13:21-30

17Andasug taguna fag menit sis fagmafulun sabaliwa Tinapay at yud e Famabia. Ay ginanya fag menit, Isus at ngay tagadal nainto sa anya te, “Dada ro am fakaylatun nu namalganan ami sabaliwa Tagbarita nu Glangfe fag yafun?”

18Ay Isus nabalus te, “Loi wan sas furuan ay rvbvyi ku nalong ayu ebi fag taw. Ay longi anya te, ‘Tam Takamoyung glong sa emu te, Munakbang wan Dius at nafalganan sa angku fag buknga. Kaylat au gyafun sim bale gasfuan ku ngay tagadal, gina fagmafulun sabaliwa Tagbarita nu Glangfe.’ ” 19Ay at ngay tagadal nafaning Isus at longan, ay nafatama sanya at yafun sabaliwas fagmafulun.

20Ay nu nyabi wan, Isus malunggung gfangon gfasfuan at tagadal fag labi dua. 21Ay gina kanya fagayu gfangon, Isus glong te, “Matuyan nu glong au ayu te, si ayu ro at sadi namoyung angku sat mauri fag ngay taw.”

22Ay at ngay tagadal maksvn nu kabalu. Ay gsadsadian ginto sas Isus te, “Em Fun, au way manga?”

23Ay Isus nabalus te, “Tagfasfuan angku gfasurung at fakonun sasad taya, kanya wan at namoyung angku sat mauri fag ngay taw. 24Ay au, Taw at Baguama, umbul au kata at marirukan sas Dius at Longan. Ay ida at namoyung angku sat mauri fag ngay taw. Kanya nangus fag taw wa nsalug ya.”

25Ay Udas, at namoyung ro anya, ginto Isus te, “Takamoyung, au way manga?”

Ay Isus gbalus anya te, “Kin, o wo wan at nalong.”

Tam Fun at Yafun

Mk 14:22-26; Lk 22:14-23; 1Ku 11:23-25

26Gina kanya fagayu gfangon, Isus nabul sik tinapay, ay nu naseg Dius, nalungud, ay nafon sat ngay tagadal, ay nalong te, “Tuy ku bilug. Buli ay oni.” 27Ay Isus nabul yangay sik taya, ay nu naseg Dius, kanya nafon sat ngay tagadal ay nalong te, “Fagayu am inumi wan. 28Tuy ku taguk takabusbus ban laman gfalyam ngayuk taw at asalanan, ay famatuyan Dius at nasadian sa sangay taw. 29Ay glong au ayu te, kya ban gdog ginum rawvg ubas at mamam, yakmay kban gfasfuan ayu ginum at bagu si ku Mama at fagfagtainanan.” 30Ay nu nalubad wan sik alubad kanya fagayu nalo wan sas Buksul Ulibu.

Isus Nafaguna Nalong Pedru nu Kamuag sabaliwa Anya

Mk 14:27-31; Lk 22:31-34; Uan 13:36-38

31Ay ginanya Isus glong sat ngay tagadal te, “Katsi ro fag yabi, fagayu am gubun ro am angku, kata at marirukan te,

‘Gfabul au tagalaga,

ay at ngay tupa sumaruayan.’#26:31 Sakaryas 13:7.

32Ay gina kban nadog naleleg, gguna au ayu sas talun Galilea.”

33Ay Pedru nalong anya te, “Ku iba ro fagayu dewa naubun emu, au kwa gubun emu.”

34Ay Isus nalong te, “Matuyan nu glong au emu te, katsi ro fag yabi gina tabag yud natarakit, tulu ginan ro nu kamuag o te, wo toglag angku.”

35Ay Pedru gbalus Isus te, “Duan, dewa ro au nangabul gasfuan emu, kwa ro glong te, kwa toglag emu.” Ay katanya yangay fagayu at tagadal at longan.

Isus Gdarangin

Mk 14:32-42; Lk 22:39-46

36Ay Isus nalo wan gasfuan at ngay tagadal sa sik tanuman at ngayan Getsemane. Ay kanya glong sat ngay tagadal te, “Malunggungi yap ste kaduge au snay tdayu nandarangin.” 37Ay Isus nataban Pedru ay Sebedeu at baguama fagdua. Ay Isus gfasigad kabalu ay maksvn nu gidapan sit amatanganan. 38Ay kanya nalong sat ufud fag tulu te, “Katsi maksvn nu kabalu au kata kwan nu mabulan au. Ste yap am ay mataganani tua kata angku.”

39Ay Isus nalo yay sirut ay namalub sas daga ay gdarangin te, “Mama, nu masine di, buli siginan angku ku fagnandalanun ban fag faurianan. Dewa katanya, lag gfaning ku fakaylatun, nu bunway fadasugi am fakaylatun.”

40Ay Isus anfoli sat tagadal fag tulu ay manlag di, gtiug way. Ay kanya glong sas Pedru te, “Ay wain, o wo maintiuganun ya dewa sik buknga sirut? 41Mataganani ay darangini tua, laman diam gafaskudan asalanan. Ay amatanganan mafalganan tua, dewa katanya, ay bilug mamomuy way.”

42Ay Isus gdog yay nalo sat dayu ay gdarangin yay te, “Mama nu dway masine gbul tuy fag faurianan siginan angku yakmay au nadalan, umfasludan nangus am fakaylatun.” 43Ay Isus gdog yay anfoli ay manlag di at ngay tagadal gtiug yay gugat, aroro maksvn nu gatiugun.

44Ay Isus gdog yay anyayu siginan at ngay tagadal ay gdarangin at fatulu ginan. Ay at longan kata yangay aro taw. 45Ay Isus gdog yay anfoli sat ngay tagadal, ay nalong sa anya fagayu te, “O gtiug yayam gugat ay gfiangalay? Katsi wan, damai, e namoyung wa angku, Taw at Baguama, sa sangay taw tagasalanan. 46Alindugi wan. Bastam wan. In wan at namoyung angku, andasug wan.”

Nagamat Isus

Mk 14:43-52; Lk 22:47-50; Uan 18:1-11

47Ay kaduge Isus garingang, Udas, Isus at labi duak nasugu at sadi, andasug e ufud sik ngay taw ngayu gafisoan ay e famalang. Kanya fagayu, ngay fun tagfon fanggalangun ay taw Udyu at ngay fagtainan at nasugu. 48Ay at namoyung Isus nafae fagsafulan sat ngay ufud te, “Dewa gina ro, nusnga sinu ku nayuk at fingi, kanya wan Isus. Gamati wan.” 49Ay arodi vtv Udas nanangakbang sas Isus ay nalong te, “Masine fag yabi, Takamoyung!” ay nayuk Isus at fingi.

50Ay Isus nalong anya te, “Sama, faningi am algan.”

Ay arodi ngay taw ankakbang sas Isus, ay nagamat Isus ay nataban. 51Ay at sadi Isus at ufud naguyud at fiso ay nabasing tiba tungud fag tagfon fanggalangun at fagsuguan, ay andasdas way lang at talinga at sadi.

52Ay Isus nasalag anya te, “Lagi, fafolii wan am fiso, aroro nusnga sinu at nafabul siginan at fiso kabul yangay ban sas fiso. 53O gamatangan am te, kwa ro mafaet sa ku Mama laman sumugu sa angku labi duak gaban tagbarita taggubuk angku? 54Ay aroro nu nafakamulun kway ro takatanya, setain ro nu kafasludan Dius at Longan ebi at nafoyung te, katanya ban at kumdasug?”

55Ay ginanya Isus ginto sanya fag ngay taw te, “Nataw ay fagsteun ngayu gafisoan ay e ngay ba famalang? O nanggamat am angku kata nu ggamat am sik tagfangkamul? Kayu menit malunggung kway sis Dius at bale ay gfoyung, ay diam nagamat angku. 56Dewa katanya, anfasludan takatanya laman namafasludan Dius at ngay taglong at rirukan.” Ay Isus at ngay tagadal fagayu naubun anya ay nalagyu.

Nu Gtaban Isus sas Taw Udyu at ngay Tagfangguna

Mk 14:53-65; Lk 22:66-71; Uan 18:12-13,19-24

57Ay at nagamat Isus fag ngay taw nataban anya sas Kayfas at bale. Kayfas tiba tungud fag tagfon fanggalangun. Ay fagayu tagfoyung Muisis at Faugali ay at ngay fagtainan maful sanya. 58Ay Pedru gguyan Isus sit dayu. Ay nu ndasug sa tiba tungud fag tagfon fanggalangun at fagawean, Pedru nasakbo sanya, ay malunggung yangay magamut ngay tagulit, laman gdama te, tain ro at kumfasludan.

59Ay ngay fun tagfon fanggalangun ay taw Udyu at ngay tagfangguna fagayu grvbvy at ngay famatuyan takamuag sabaliwas Isus at fakamulun laman sak gfabul anya. 60Dewa katanya we nalag, dewa ngayu takamuagan nu gfoyung sabaliwas Isus. Ay arodi duak taw ansure, 61ay nalong te, “Tuy wa fia fag taw ebi at nalong te, ‘Au waban at nanrasras Dius at bale. Ay gdog kyangay ban kawat ay gfatabu sis fatuluk menit.’ ”

62Ay tiba tungud fag tagfon fanggalangun anlindug ay ginto sas Isus te, “O wo gbalus in fag ngay taw at ngay fanlonganan sabaliwa emu?” 63Ay Isus wa garingang.

Ay tiba tungud fag tagfon fanggalangun nalong yangay sas Isus te, “Balusi emi sa tagleleg fag Dius at daga salubangan, o o wan Dius at nafili fag Fun,#26:63 Dius at nafili fag Fun: sas Griegu, Kristu. Anggan t.68. Dius at Baguama?”

64Ay Isus nabalus te, “Kin, kata wa am longan. Ay glong au ayu fagayu te, siginan katsi lumag ban am angku, Taw at Baguama, nu malunggung au sit Mabalyanan at siun, ay nu kadasug au siginan sad linyabu sis kiwang.”

65Ay tiba tungud fag tagfon fanggalangun nagirat at lanbung, ay nalong te, “Mauri tuy fag taw at longan sas Dius. Lag tam kaylat ya tibak taw tagfoyung at asalanan, aroro nadungug watam at longan mauri sabaliwas Dius. 66Setain ay algan?”

Ay taw Udyu at ngay fagtainan nabalus te, “Fabuli anya.”

67Ay kanya fagayu natufe Isus at kamatan. Ay tiba nasuntuk anya ay nafalang. 68Ay kafag ngay fagtainan nalong sas Isus te, “Nu o wan Dius at nafili fag Fun, foyungi emi, sinu at nafalang emu.”

Pedru nu Kamuag te, wa Toglag Isus

Mk 14:66-72; Lk 22:54-62; Uan 18:16-18,25-27

69Ay ginanya Pedru malunggung sis day bale, sisad fagawean. Ay sik fagsuguan baguina, nanangakbang sa anya ay nalong te, “O o at sadi tagalo Isus tagsiginans talun Galilea?”

70Ay Pedru kamuagan sas fagayu taw tagsanya te, “Duan, kwa saful am longan at masuad.”

71Ay arodi, Pedru nalo sas sakbawan alad, ay sanya yangayk sadik fagsuguan baguina, ay nu nalag anya gfoyung sat ngay iba te, “Tuy wa fia fag mangama at sadi tagalo Isus tagsiginans furuan Nasaret.”

72Ay Pedru gdog yay gfaksvn nu kamuagan te, “Matuyan ku longan te, kwa toglag kanya fag taw.”

73Ay arodi at sadi at malindug sanya nanangakbang sas Pedru ay glong yangay anya te, “Matuyan o wa fia at sadi kafag taw at ufud. Newa nu garingang o, kata taw Galilea.”

74Ay Pedru maksvn nu gfafanud te, “Matuyan ku longan te, au kwa toglag kanya fag taw.”

Ay ginanya yay vtv sik tabag gtarakit. 75Ay Pedru namatang ebi ataw Isus at longan anya te, “Gina ro tabag yud natarakit, tulu ginan ro wo kamuag te, wo toglag angku.” Ay Pedru naduksun ay maksvn nu gwayway.

Currently Selected:

Mateu 26: OCCT

Highlight

Copy