Mateu 25

Isus at Faydayuanan sabaliwa Safuluk Baguina

1“Dius nu gfagtainan kata yangay safuluk baguina mesa e salung ay naduksun laman namablang at nangadadwa fag mangama. 2At lima yud way mamatanganan. Ay at lima mamatanganan tua. 3Ay at yud mamatanganan fag lima, dewa e salung, we buba ya langis ulibu. 4Ay at mamatanganan fag lima, e buba tua langis saman tagsit salung. 5Ay takadadwa fag mangama glugo nu kadasug, ay kafag safuluk baguina natiugun ay dayun wan natiug.

6“Ay gina swabilug yabi, e nauro te, ‘Katsi andasug wan takadadwa fag mangama. Duksuni wan, namablang am anya.’

7“Ay kanya fag safuluk baguina anfulo ay masakit nu gfasalung at mesa salung. 8Ay at yud mamatanganan fag lima get sat mamatanganan fag lima te, ‘Foni emi tiba ay langis, aroro em ngay salung gakarabungun wan.’

9“Ay at mamatanganan fag lima nabalus te, ‘Duan, em langis ro wa kasakan ya sa antam fagayu. Sai yap am tagfalao langis ay bayadi at kasakan ayu.’

10“Ay kaduge kafag lima kamulan, andasug wa mangaro at fainduganan. Ay at mamatanganan fag lima, at mafalganan, nasakbo wan gfadgaloan anya sat bale, laman nangon at fangadadwa fag yafun. Ay e nadingding at sakbawan.

11“Ay arodi at lima andasug yangay ay guro te, ‘Em fun, em fun, luangi, fasakboi emi.’

12“Ay kafag mangama gbalus te, ‘Duan. Matuyan nu glong au ayu te, kwa toglag ayu.’ ”

13Ay Isus nalong yangay anya te, “Mafalganani tua. Aroro wam saful te, ginain fia fag menit ay ginain fag lungud menit nu kadasug au.

Isus at Faydayuanan sabaliwa Tuluk Fagsuguan

Lk 19:12-27

14“Dius nu gfagtainan kata yangay sik taw at ke algan glao sa tangayayu fag talun. Ay kanya nafaful at ngay fagsuguan ay nafatigwanan sa anya at ngay ramraman. 15Kanya nafon sat sadi limak libuk salapi, ay sat sadi at nafon duak libu, ay sat sadi, sik libu. Aroro nu gfon kayu way at mesa fagmakatuun. Ay sanya ginan, kanya nalo wan. 16Ay arodi vtv, at nabul kafag limak libuk salapi, nalo wan, ay nafon sa tibak taw laman namafamut yay kafag salapi. Ay abandi at kinfamut, limak libuk yangayk salapi. 17Ay katanya yangay at nabul duak libuk. Abandi at kinfamut dua yangayk libu. 18Ay at nabul sik libuk salapi nalo yangay ay nananlubgub way at fun at nafatigwanan sa anya fag salapi.

19“Ay nu glugo wan, kafag ngay fagsuguan at tagfayafun noli wan. Ay kanya fag fun nainto sat ngay fagsuguan sabaliwa at salapi at nafatigwanan sa anya fagayu. 20Ay at nabul limak libuk salapi ankakbang sat tagfayafun ay gbuba at nafamato sa anya fag ngay salapi ay anggan at kinfamut takayu yangay nya. Ay nalong te, ‘Fagtainan, na, am nafon sa angku ebi fag limak libuk salapi. Kayu tuy at kinfamut, limak libu.’

21“Ay at tagfayafun nalong anya te, ‘Masine tua am fakamulun. Masine ay matuyan o fag fagsuguan. Matuyan tuo sa talay fag fakamulun. Ay katsi ban namalaga kyay fia sa emu at kayuan gtungud yay ban fia ebi. Ay katsi, useganani fasfuani angku, am tagfayafun.’

22“Ay kafag fagsuguan at nabul duak libuk salapi ankakbang yangay sat tagfayafun ay nalong te, ‘Fagtainan, na, ebi am nafon angku fag duak libuk salapi. Kayu tuy at kinfamut duak libu.’

23“Ay at tagfayafun nalong anya te, ‘Masine tua am fakamulun. Masine ay matuyan o fag fagsuguan. Matuyan tuo sa talay fag fakamulun. Ay katsi ban namalaga kyay fia sa emu at kayuan gtungud yay ban fia ebi. Ay katsi, useganani fasfuani angku, am tagfayafun.’

24“Ay at nabul sik libuk salapi fag fagsuguan, ankakbang yangay sat tagfayafun ay nalong te, ‘Fagtainan, nasaful au te, yud o gfangalyam fag taw. Ay ggutlu wayo deyud o at natanum. Ay gfaful wayo deyud am nainlufuyan. 25Ay kalimu au, ay nalubgub kway am salapi sasad daga. Ay katsi, na, am salapi.’

26“Ay at tagfayafun nalong anya te, ‘Ida, o at mauri wayo ay at momuy wayo fag fagsuguan. Nasaful wo te, ggutlu kway deyud au at natanum. Ay gfaful kway deyud au at nalayap. 27Ay nu katanya satu ro, ebi nu nafon di o ku salapi sa sik tagbul ay tagfon salapi, laman nu kadasug kwan, namul au ku salapi ay anggan at kinfamut.’

28“Ay at tagfayafun nalong sa tibak fagsuguan te, ‘Buli kafag salapi siginan tuy fag fagsuguan ay foni sat ke safuluk salapi. 29Aroro sik taw at ke kwa, e gfamut yay ban laman umkayu tagsi anya. Ay sik taw nu alay way tagsi anya, e namul yay ban siginan anya. 30Ay ukasi wan sat dayu sasad madulum aro fag fagsuguan at yud masine. Sanya gwayway ban gugat ay gfaringgit at bagang.’

Fanginsafulan Asalanan

31“Au, Taw at Baguama, gina ban au kadasug stae swa daga gasfuan ngay tagbarita fagayu, e fagmasineun ban au daul. Kadugenya gmalunggung au sa ku fagmalunggungan ke fagmasineun, laman namagtainan. 32Ay fagayu talun at ngay taw kaful ban, laman nangakbang sa angku. Ay ginanya ban gfainkafudan au ngay taw, kata sik tagalaga fagbaugun nu gfainkafudan at ngay tupa ay at ngay kambing. 33Ngay tupa ban gfasa ktua ku siun baliwa, ay ngay kambing gfasa kway ku wala.

34“Ay arodi au, ay Fun, glong au sa tagsi ku siun te, ‘Ku Mama nafon ayu fagmasineun. Gewan, agbilugi at fagfagtainanan at nafalganan sa ayu siginan ebi fagdaul daga at fakasigadan. 35Aroro gina au kalunus, nafafangon tuam angku, ay gina au kadanum, nafainum tuam angku, ay gina au sik betaw, nafasakbo tuam angku, 36ay gina au yud e lanbung, nafon tuam angku ay lanbung, ay gina au e fakasaitun, nanangalaga tuam angku, ay gina au maubungan, nanansibo tuam angku.’

37“Ay at matuyan fag ngay taw gbalus ban angku te, ‘Em Fun, duan. Ginain nunda nu glag ami nu kalunus o, ay nafafangon ami emu, ay nu kadanum, o ay nafainum ami emu? 38Ay ginain nu glag ami emu kata sik betaw, ay nafasakbo ami emu, ay nu yud o e lanbung, ay nafon ami emu em lanbung? 39Ay ginain nu glag ami emu nu e fakasaitun o ay nu kaubung o, ay nasibo ami emu?’

40“Ay au, at Fun, gbalus kban anya fagayu te, ‘Matuyan nu glong au ayu te, ay nafakamulun sat sadi ku faduksay at tiba daga, sa angku nu gfakamulun am.’

41“Ay arodi au ay Fun, glong au sa tagsi ku wala baliwa te, ‘Loi wan ste ginan, am tagafaurianan. Sa way am sad afuy at yud karabung kabavn at nafalganan at fagukasan ban Satanas ay anggan at ngay fagsuguan. 42Aroro gina au kalunus, wam nafafangon angku, ay gina au kadanum, wam nafainum angku, ay gina au sik betaw, wam nafasakbo angku, 43ay gina au yud e lanbung, wam nafon angku ay lanbung, ay gina au e fakasaitun ay maubungan, wam nanangalaga angku.’

44“Ay kanya fag ngay taw gbalus ban angku te, ‘Em Fun, ginain nunda nu glag ami emu nu kalunus o, ay nu kadanum o, ay nu kata sik betaw, ay nu yud o e lanbung, ay nu e fakasaitun o ay nu maubungan o, ay nu yud ami ggubuk emu?’

45“Ay au, at Fun, gbalus au anya fagayu te, ‘Matuyan nu glong au ayu te, ay yud nafakamulun sat sadi ku faduksay at tiba daga, sa angku nu yud am gfakamulun.’

46“Ay kafag ngay taw umdasug ban sas faurianan at yud e fakatabuan, ay at matuyan fag ngay taw umdasug tua ban sas leleg at yud e fakatabuan.”

Currently Selected:

Mateu 25: OCCT

Highlight

Copy