Malakyas 2
2
Faurianan sa Takamabo fag ngay Tagfon Fanggalangun
1-2Yawi at Mabalyanan nalong yangay sa sangay tagfon fanggalangun te, “Gfararang au sa ayu te, nu dway ban am gdungugan ku longan ay gfae masuad nu gfauseganan am angku, gfaurianan kban ayu gasfuan ay nabul nusnge wain. Nafakamulun kwan takatanya sa ayu aroro wam nafae masuad nu gfauseganan am angku.
3“Dungugani! Aroro siginan ayu, namaurianan kban ay kasugfunanan. Namatayuk kban sa ay ngay kamatan ay nafon sa angku fag ngay fanggalangun at kek ay nangukas kban ayu sas fagukasan nakaurian. 4Nu katanya, sumaful am te, nafararang kwan sa ayu takatanya laman gfataglayun au ku nasadian sa ay mangaguyang fag ngay taw Lebi. 5Si em nasadian, nafatuyanan au sa anya fagayu te, kanya ban fagayu nu gsuyu tua angku gfon kban sa anya fagayu leleg ay fagmanabayanun. Ay kanya fagayu nafakamulun tua takatanya, 6ay matuyan tua nu gfoyung ay di kamuag. Ay gugali tua gugat manabayan ay at matuyan. Nu katanya, kanya fagayu nagubuk ngayuk taw laman gubun at ngay asalanan.
7“At matuyan, am wan fag ngay tagfon fanggalangun tagfoyung sa sangay taw at matuyan sabaliwa angku. Ay kanya nangus fag ngay taw gfainfoyung tua sa ayu aroro am wan ku ngay fagsuguan. 8Dewa katanya, wam nafaning ku balyawvtan. Ay ngay foyungan nafae asalanan way ngayuk taw. Au, Yawi at Mabalyanan, glong au te, nafauri am ku nasadian sa ay mangaguyang fag ngay taw Lebi. 9Nu katanya, nafauri au ay nafapla ayu si sangay taw at daga salubangan aroro wam nafaning ku ngay balyawvtan. Ay nu gfoyung am e fagfili wayam.”
Ngay Taw Israel wa Matuyan Ya
10Malakyas nalong sa sangay taw Israel te, “O nunda tam mama wa sadi? Ay o nunda wa sadi at nawat antam? Wain ay fakadkamuaganun? Nu katanya, nafa yud tam e masuad Yawi at nasadian sa tam ngay mangaguyang.
11“Ngay taw Uda nafamabo. Kanya fagayu nafakamulun at ngay mauri sas Erusalem ay sas fagdaul talun Israel. Ay nafauri Yawi at bale siginan nu gfafamubay at ngay baguama sa sangay baguina tagseg tibak fagsegan. 12Fagayu ban at nafakamulun takatanya, wa katap ya te, Akub at kasugfunanan, dewa yay ban gfon fanggalangun sas Yawi at Mabalyanan.
13“Ay katatuy ya ay fakamulun, gwayway am maksvn sis Yawi at daga salubangan aroro kanya wa kasalag ya ayu, ay wa kaylat ay ngay fanggalangun. 14Ay ginto am te, ‘Wain faginfasludanun takatanya?’ Anfasludan sa ayu takatanya aroro Yawi wan tagfatuyan te, naubun am ay ngay mesa mangena ay wam nafae masuad ay nasadian gina am kadadwa.
15“O nunda wam nasaful te, Dius nafasadi ayu sis bilug ay sis falad. Wain at fagnafasadiun ayu? Yawi kaylat nu kae ngay sisian am laman tagseg anya. Tuyani fia te, di ban am kalyam ay nasadian sa ay mesa mangena gina am kadadwa.”
16Yawi, Israel at Dius, nalong te, “Kwa kaylat sik dadwa nu gsaruayan. Sik mangama nu naubun way at mangena, kanya gfauri way at mangena.”
Nu katanya, dirii ay ngay amatanganan ay lag gfalyam ay fagafanudun.
Yawi nu Gfaurianan fag Menit
17Malakyas nalong yangay sa sangay taw Israel te, “Nafauri am Yawi siginan ay ngay nalong.
“Dewa katanya, ginto am te, ‘Nataw nunda em ngay nalong at mauri ay at yud matuyan sa anya?’
“Nalong am te, ‘Tagfakamulun at mauri, masine way sis Dius at daga salubangan. Nu katanya, dada wan Dius at matuyan nu gfawabilugan?’ ”
Currently Selected:
Malakyas 2: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
