Malakyas 1
1
1Katatuy Yawi at foyungan sas Malakyas#1:1 Malakyas: at masuad, Ku Tagfosuk Barita. laman sa sangay taw Israel.
Yawi Kesug ngay Taw Israel
2Yawi nalong te, “Kesug au ayu. Nu katanya, wain ay fagintoun yay te, ‘Tain nu kesug o emi?’ O nunda wam nasaful te, Isaw ay Akub dewa duksay, ku fakesugun#1:2 fakesugun: ay mannga, fagfiliun. Akub tua, 3ay kwa nesug Isaw. Ay narasras kwan Isaw at fagagbilugun fag ngay buksul, ay tagbanwan sanya, ngay mela way lang.
4“Ay ngay taw Edum ban lumong te, ‘Em furuan ban dewa anrasras, gfadog yay ban mi kawat.’ ”
Nu katanya, Yawi at Mabalyanan glong te, “Kanya ban fagayu dewa nafadog nawat at furuan, grasras kyay ban fia. Ay kanya ban fagayu kangayan te, ‘At mauri fag talun at ngay taw,’ ay ‘Yawi at fakadotamaun fag ngay taw.’ 5Lumag ban am kafag ngay taw nu kamin ay ginanya ban glong am te, ‘Yawi mabalyanan tua, nusnga nday fag talun.’ ”
Yawi Gsalag ngay Tagfon Fanggalangun
6Yawi at Mabalyanan nalong sa sangay tagfon fanggalangun te, “Sik sisian gsuyu tua at mama ay sik fagsuguan gsuyu yangay at tagfayafun. Ay am, wain ay fagyudun gsuyu angku ay au oma ay mama ay ay tagfayafun? Takatanya ay fakamulun gfauri am angku. Dewa katanya, ginto yayam te, ‘Ay setain nunda nu gfauri ami emu?’
7“Nafauri am angku siginan nu girug am at masuya fag ngay fanggalangun sas fagirugan.
“Ay ginto yayam te, ‘Tain em fanggalangun nu kasik masuya?’
“Ay ngay fanggalangun masuya aroro nalong am te, ‘We masuad ya fagirugan fanggalangun.’
8“Ay fanggalangun sa angku ngay fagbaugun way at yud glag, ay tagalbi ay at ke fakasaitun. Takatanya fagayu masuya way! Ay agvd, namon am takatanya fag ngay fanggalangun sa ay fun, o guseganan ro?”
9Malakyas nalong te, “Am fag ngay tagfon fanggalangun, eti sas Dius laman kanya kafanyu antam. Ay nu katanya way ay ngay fanggalangun, Dius wa guseganan ayu. Katanya Yawi at Mabalyanan at longan.”
10Yawi at Mabalyanan nalong yay fia te, “Am tua ban nangus at sadi tagdingding ku sakbawan bale, laman wam namae afuy sas fagirugan nu dway matuyan! Dewa katanya, kwa guseganan ayu ay kwa kaylat ay ngay fanggalangun sa angku. 11Ngay taw ban tagsis fakamenitan anggan tagsis fakayabian gfauseganan angku. Ay nusnga nday ban kanya fagayu girug famaebebanglu ay gfon fanggalangun sa angku. 12Dewa katanya, gfauri am ku ngayan siginan nu glong am te, fagirugan masuya wan, ay anggan tagsanya fag ngay fanggalangun. 13Ay glong yangay am te, ‘Kalufuy wami gfon fanggalangun.’ Ay fagayu am gfauri am ku fagirugan. Ay fanggalangun fag ngay fagbaugun ay nafangkamul way, ay tagalbi ay at ke fakasaitun. O nu glong ro am kaylat au takatanya? 14Gfauri au tagsi ayu fag ngay takamuag tagfatuyanan te, nangirug at masine fag ngay fagbaugun, ay aroro mangaro, at fanggalangun at ke malong way. Gfaurianan au takatanya fag taw, aroro au wan at mabalyanan fag Fun ngay talun at fakalimuun. Au, Yawi at Mabalyanan, taglong tuy.”
Currently Selected:
Malakyas 1: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
