Lukas 2

Isus nu Kasalug

Mt 1:18-25

1Ginanya fag buknga, tagfunan sis Ruma, Augustus. Kanya nasugu laman nanginsaful nu seyu at fagfanggunaun fag ngay taw. 2Ginanya at fasadi ginan gtap ngay taw gina Kirinu gfunan sis talun Sirya. 3Nu katanya, ngay taw noli sat ngay mesa furuan laman namariruk at ngay ngayan.

4Ay Use nalao siginans furuan Nasaret sis talun Galilea, sas Betleem, fun Dabid at furuan sis talun Udea. Aroro Use, siginan fun Dabid at kasugfunanan. 5Use nalo gadgaloan at bubay ban Maria, laman namariruk. Ay ginanya, Maria gafasalugun wan. 6Ay gina andasug sanya, antunggu Maria gfasalug wan. 7Ay kanya nafasalug taguna at sisian, sik munama, ay nasagmak ay nafatukan sas fagbaugan, aroro we bale ya at fagtaglayunan.

Sik ngay Tagbarita Ansure sa sangay Tagalaga Tupa

8Sanya fag talun e ngay tagalaga tupa sis fagfafangonan, ay kanya fagayu gintiugunan gulit at ngay tupa sad yabi. 9Ay tam Fun at tagbarita at sadi ansure sa kafag ngay tagalaga, ay tam Fun at fagmasineun nadamlag sat ligung, ay kafag ngay tagalaga maksvn nu kalimu. 10Ay kanya fag tagbarita nalong te, “Lag kalimu, aroro gfoyung au sa ayu at masine fag barita, sik fagusegananun umdasug ban sas fagayu taw. 11Aroro katsi ay Tagfalangfe ansalug wan sis fun Dabid at furuan, ay kanya tam Fun, Dius at nafili. 12Katatuy ay fakasafulan: lumag ban am sik ngenge mafasafungan ramit gtukan si sik fagbaugan.”

13Arodi vtv, ngayuk tagbarita ansure gfasfuan anya, ay gseg Dius ay glong te,

14“Segi Dius tagsi tiba tungud fag banwa.

Kanya nafae fagmanabayanun sas fagdaul daga,

sat fakesugun fag ngay taw.”

15Kafag ngay tagbarita nu nfoli wan sas banwa, kafag ngay tagalaga glodlongan te, “Bastam, glo watam sas furuan Betleem, laman nanlag at kinfasludan, tam Fun at nafoyung antam.”

16Ay kafag ngay tagalaga gabanganan glao. Ay kanya fagayu nu ndasug, nalag Maria ay Use, ay nalag yangay at ngenge gtukan sisad fagbaugan. 17Ay kanya fagayu nu nalag, nafadungug sa sangay taw, tagbarita at nalong sabaliwa kafag sisian. 18Ay fagayu at nadungug ngay tagalaga tupa at longan andulo maksvn. 19Ay Maria namatang at ngay nadungug ay gamatangan gugat te, nataw at masuad. 20Ay kafag ngay tagalaga noli wan ay maksvn nu gseg Dius, aroro sat nadungug ay at nalag, kata kafag tagbarita at nalong.

21Nu nlangfe waluk menit, nu nafae fakatoglagan wan kafag sisian gfaning taw Udyu at faugali, at fagtainan nafangayan anya te, Isus, kata tagbarita at nalong gina kafag sisian yay yud ansalug.

Nu Gfatigwanan Isus sas Dius

22Andasug wan at buknga Use ay Maria nu glao sas Erusalem, laman gfaning Muisis at Faugali sabaliwa sik mangena at nafasalug. Ay kafag dadwa nabuba yangay Isus sas Erusalem laman namatigwanan sa tam Fun. 23Kata at marirukan si tam Fun at Faugali te, “Fagayu kaka munama, fatigwanani sa tam Fun.”#2:23 Nu Galin 13:2,12. 24Laman Maria umsik yud e malong, nafon yangay fanggalangun gfaning tam Fun at faugali at nalong te, “foni duak labikung mannga duak riangan udkuruan.”#2:24 Lebitiku 12:8.

Simyun Naseg Dius

25Sis Erusalem e sik taw at ngayan Simyun. Kanya sik matuyan fag taw ay gafanud sas Dius, ay at Masine fag Falad si yangay anya. Ay kanya mafanyan tua gugat ngay taw Israel at tagfalangfe nu kadasug. 26At Masine fag Falad nalong sas Simyun te, “Ya ban o kabul yakmay o nalag tam Dius at nafili fag Fun.”#2:26 nafili fag Fun: sas Griegu, Kristu. 27Ginanya fag menit, siginan at Masine fag Falad at gubuk, Simyun nalao sas Dius at bale. Ginanya, dadwa nanamuba Isus sas Dius at bale laman namatigwanan gfaning at Muisis at Faugali, ay Simyun nalag kafag ngenge. 28Ay Simyun nasalilian Isus ay naseg Dius te,

29“Ku Fun, katsi mafalganan kwan kabul

aroro anfasludan wan am nafatuyanan ebi sa angku,

30aroro ku mata nalag wan em Tagfalangfe,

31aroro siginan ebi nafalganan wo anya laman sas fagayu taw,

32Ay kanya ban sik salung sas yud Udyu fag ngay taw at yud yay natoglag emu,

ay sik fagmasineun sa am ngay taw Israel.”

33Kafag ngenge at mama ay at mina andulo Simyun at longan sabaliwa anya. 34Ay Simyun nafadante dadwa ay nalong sas Maria te, “Nafalganan tuy fag sisian laman ban ngayuk taw umsik afanyuan ay ngayu yangay ban ktaw umsik mafanud. Ay kanya ban sik fakasafulan tagsiginans Dius, ay ngayu ban ktaw glong mauri sabaliwa anya. 35Aroro siginan ban at fakamulun, ngay taw ban at amatanganan at mauri, umsure. Ay gidapan yangay ban o gamatangan, kata nu e naurus am baga.”

Ana Naseg Dius

36Ginanya, Dius at taglong Ana sanya yangay, kanya Fanuel at baguina, ay siginans Aser at kasugfunanan. Ana mafufuina wan, ay kanya nu madadwaan, fitu way kbanwa, 37ay abandi kanya ansik fagbubayun. Ginanya, Ana at banwa waluk safulu e ufat. Ay kanya si gugats Dius at bale, ay gseg Dius kayu menit ay yabi ay wa gfangon laman gdarangin. 38Ay ginanya Ana nkakbang sas talanan. Ay kanya gseg Dius ay nafoyung sabaliwas Isus sas fagayu tagfanya Dius nu gfalangfe furuan Erusalem at ngay taw.

Talanan Noli wan sas Furuan Nasaret

39Use ay Maria nu nafakamulun wan fagayu kata tam Fun at Faugali, kafag talanan noli wan sas furuan Nasaret sas talun Galilea. 40Ay at sisian an-gurang ay anbitsug, ay ngayu at fagsafulun, ay Dius ggubuk anya.

Isus sis Dius at Bale

41Kayu banwa, Isus at fagtainan nangaful sas Erusalem laman sat fagmafulun sabaliwa Tagbarita nu Glangfe. 42Ay Isus at banwa nu labi dua wan, talanan gdog yay nalao sas Erusalem, kata ebi ginan at fakamulun. 43Ay nu ntabu wan at fagmafulun, noli wan. Dewa katanya, Isus anfamato yay, ay at fagtainan wa nasaful. 44Ay dadwa namatangan te, Isus nanangalo way at ngay iba, ay nu katanya, gtaglayun glao fagngabak menit. Ay arodi gfasigad gfanrvbvy anya sat ngay kalongan ay sat ngay fagadgalangan. 45Ay dadwa we nalag anya, nu katanya, anfoli yay sas Erusalem laman nanrvbvy. 46Ay sis fatuluk menit, dadwa nalag Isus sis Dius at bale malunggung magamut ngay tagfoyung Muisis at faugali. Ay Isus gdungugan ay ginto. 47Ay fagayu at nadungug andulo Isus at fagsafulun ay at ngay famalus. 48Ay Isus at fagtainan nu nalag anya, andulo. Ay at mina nalong sa anya te, “Wain am fagnafakamulunun sa emi takatatuy? Ami am mama maksvn nu gafanawa ami grvbvy emu.”

49Ay Isus nabalus te, “Wain ay fagrvbvyun angku? O wam nasaful te, masine nu si au ku Mama at bale?” 50Ay at fagtainan wa nasaful Isus at longan at masuad.

51Ay Isus noli wan sas Nasaret gfadgaloan at fagtainan. Ay Isus gfaning at fagtainan at longan. Ay at mina gamatangan gugat takatanya fagayu. 52Isus anbia wan ay ngayu at fagsafulun. Ay Dius, anggan ngay taw guseganan anya.

Currently Selected:

Lukas 2: OCCT

Highlight

Copy