Uan 17

Isus Gdarangin at ngay Tagadal

1Isus nu nafoyung wan takatanya, natangda sas banwa ay nalong te, “Mama, andasug wan at buknga. Fauseganani angku, am Baguama, laman namauseganan kyangay emu. 2Ay nafon wo sa angku fagmabalyananun sas fagayu taw, laman gfon au leleg at yud e fakatabuan sam nafon angku fag ngay taw. 3Katatuy sik taw nu e leleg at yud e fakatabuan: nu natoglag emu te, o wan at matuyan fag Dius, ay nu natoglag yangay angku am nasugu, Isus, am nafili fag Fun. 4Fagdaul daga gfauseganan emu aroro nafatabu kwan am nafafakamulun sa angku fag fakamulun. 5Nu katanya, Mama, fauseganani yangay angku sam day tigyangan kata gina ta magamut, gina yud ankawat fagdaul daga.

6“Nafatoglag kwan emu sam nafon angku fag ngay taw ste sfagdaul daga. Kanya am ngay taw, ay katsi nafon yangay o angku, ay kanya fagayu nafaning tua am longan. 7Katsi kanya fagayu nasaful wa te, fagayu am nafon sa angku siginan emu, 8aroro nafoyung kwa sanya fag ngay taw am nafon angku fag ngay longan, ay kanya nafaning tua. Ay kanya antuyan wa te, siginan au emu, ay gafanud yangay te, o wan at nasugu angku. 9Gdarangin au anya fagayu. Ay kwa gdarangin ngay taw tagfaning ste swa daga at ugali nu bunway fagayu tua am nafon angku, aroro kanya am ngay taw. 10Fagayu ku taw am taw yangay, ay fagayu am taw, ku taw yangay, ay siginan kafag ngay taw kafauseganan au. 11Wa ban glugo ya nu ste au swa daga, kafoli kwa sa emu, ay dewa katanya am nafon fag ngay taw ste yay swa daga. Mama, matuyan o. Dirii kanya fag ngay taw siginan am ngayan at fagmabalyananun, laman siginan kafag ngayan am nafon sa angku, kanya ban fagayu masadi tua kata nu masadi ta. 12Kaduge au magamut kafag ngay taw, nadiri au anya fagayu siginan am nafon angku fag ngayan at fagmabalyananun. Nalaga au fia kafag ngay taw ay nusdi sadi di e nfaurianan sas day kafag taw at nangafaurianan laman gfafasludan kata at marirukan sis Dius at Longan.

13“Ay katsi kafoli kwan sa emu. Katanya ku foyungan kaduge au ste swa daga laman kafag ngay taw maksvn nu guseganan kata nu guseganan au. 14Nafoyung kwan sa ku ngay taw am longan. Ku ngay taw di gfaning ya ste swa daga fag ngay ugali, kata nu yud au gfaning. Nu katanya ste swa daga fag ngay taw kauri anya fagayu. 15Kwa gdarangin sa emu te, buli wan ku ngay taw ste ginan sfagdaul daga, nu bunway dirii anya fagayu siginan at mauri. 16Kafag ngay taw wa gfaning ya ste swa daga fag ugali, kata nu yud au gfaning. 17Ay siginan am fagmatuyanun, fakbangi kafag ngay taw sa emu, aroro matuyan tua am longan. 18Nu setain nu gsugu o angku ste swa daga, katanya yangay, gsugu kyangay anya fagayu sas fagdaul daga laman kamoyung. 19Ay aroro sanya fag ngay taw, gfon au ku sadili sa emu laman sik fanggalangun at yud e malong, laman ban kafag ngay taw, matuyan te, umsik yud yangay e malong.

Isus Gdarangin Fagayu Tagafanud

20“Ku fagdaranginun, bundi lang kafag ngay taw, nu bunway anggan tua tagafanud yay ban sa angku, aroro siginan ban ku ngay taw at foyungan. 21Mama, nangus kanya fagayu masadi tua kata anta. Nu setain nu masadi o si angku ay nu masadi au si emu, katanya yangay nangus kanya fagayu nu masadi si anta, laman fagayu taw ste swa daga gafanud te, o wan at nasugu angku. 22Am nafon angku fag famauseganan nafon kyangay sanya fag ngay taw, laman kanya fagayu masadi, kata nu masadi ta. 23Ay au, masadi au sanya fag ngay taw, ay o, masadi o si angku, laman kanya fagayu masadi fia. Nu katanya, ste swa daga fag ngay taw sumaful te, o wan at nasugu angku, ay kesug o kanya fag ngay taw kata nu kesug o angku.

24“Mama, kaylat au am nafon angku fag ngay taw nu magamut ban si angku sa ku fagnangadasugan, laman ban kanya fagayu lumag am nafon angku fag fagmasineun, aroro kesug o angku siginan ngay nu yud e daga. 25Mama, matuyan tuo. Ste swa daga fag ngay taw deyud gtoglag emu, au gtoglag ktua emu, ay am ngay nafon angku fag ngay taw nasaful tua te, o wan at nasugu angku. 26Nafatoglag kwan emu sanya fag ngay taw ay gfataglayun kyay ban gfatoglag laman am fakesugun sa angku gbanwan si anya, ay au si kyangay anya.”

Currently Selected:

Uan 17: OCCT

Highlight

Copy