Uan 16

1“Nafoyung au sa ayu takatanya, laman ban di kamomuy nu gafanud am sa angku. 2Ngay taw ban gaiyan ayu siginan sangay bale fakafulan. Ay kadasug ban tibak buknga nusnga sinu ban at nafabul ayu gamatangan te, kanya fagayu gfaning Dius. 3Kafag ngay taw ban namakamulun takatanya, aroro wa toglag tam Mama ay wa yangay toglag angku. 4Nafoyung au sa ayu takatanya, laman ban nu ndasug ginanya fag buknga, gamatang tuam te, nafoyung kwan sa ayu takatanya. Ebi taguna kya nafoyung ayu aroro galo kyay ayu.

At Masine fag Falad at Fakamulun

5“Ay katsi kafoli kwan sat nasugu angku. Ay nusdi si ayu at sadi we ginto sa angku te, ‘Dada ban o?’ 6Ay maksvn nu kabalu am aroro nalong au sa ayu takatanya. 7Dewa katanya, gfoyung au ayu at matuyan te, ku fagloun sa tua ban ay fagmanabayanun, aroro kway ban nalao, Tagfasun ban ayu wa kadasug. Ay nu nalao kwa ban, gsugu au anya sa ayu. 8Kafag Tagfasun ban nu ndasug, namatuyan sas fagayu taw sas fagdaul daga sa baliwa at ngay asalanan, ay sabaliwas Dius at fagmatuyanun ay sa yangay ban nu gtuyan te, sinu ban takalangfe ay sinu tagafaurianan. 9Kanya ban namatuyan sabaliwas asalanan, aroro ngay taw wa gafanud sa angku. 10Ay namatuyan yangay ban sabaliwas Dius at fagmatuyanun, aroro sa kwa ku Mama, ay wa ban am glag ya angku. 11Ay namatuyan yangay ban anggan sabaliwas faurianan, aroro ste swa daga at fun anfaurianan wan.

12“Ngayu yay ku fagyafoyungun ayu, ay yam matogdungug. 13Ay nu ndasug ban kanya fag Falad tagfasure at matuyan sabaliwa Dius, kanya ban ggubuk ayu laman sumaful am sabaliwas fagmatuyanun. Aroro kanya ban at foyungan bundi siginan at sadili longan, nu bunway siginan tua at nadungug, ay gfoyung yangay ban sa ayu nusnge wain takafasludan ban. 14Kanya ban namauseganan angku, aroro siginan angku at foyungan ayu. 15Fagayu tagsi ku Mama si yangay angku. Katanya ku fagnalongun te, siginan angku at Masine fag Falad at foyungan ayu.

Fakabaluun umsik Fagusegananun

16“Wa ban glugo ya wa ban am glag ya angku, ay nu nlangfe ban sik buknga sirut, gdog yay ban am lumag angku.”

17Tiba at ngay tagadal gkamatoan te, “Nataw manga fia at longan at masuad at fagnalongun te, ‘Wa ban glugo ya, ay wa ban am glag ya angku, ay nu nlangfe ban sik buknga sirut, gdog yay ban am lumag angku’ ay anggan nalong yay te, ‘Aroro sa kwa ku Mama.’? 18Nataw manga fia at longan at masuad te, ‘nu nlangfe ban sik buknga sirut’? Ya tam nasaful at longan fia at masuad.”

19Ay Isus saful way at ngay tagadal at fagyaintoun, ay glong anya fagayu te, “O gidgintoan am sabaliwa ku nalong te, ‘Wa ban glugo ya, wa ban am glag ya angku, ay nu nlangfe ban sik buknga sirut, gdog yay ban am lumag angku’? 20Matuyan nu glong au sa ayu te, gwayway ban am, ay kabalu ban am, ay ste ban swa daga fag ngay taw guseganan. Ay maksvn ban nu kabalu am. Dewa katanya, ay fakabaluun ban umsik fagusegananun. 21Sik mangena nu gfasalug, maksvn nu gidapan, ay dewa katanya, nu nafasalug wan, wa gidapan ya, aroro guseganan te, at ngenge ansalug wan ste swa daga. 22Katanya yangay ban am, katsi kabalu am, ay nu nadog ban tam naladlagan, maksvn tua ban nu guseganan am, ay wa ban e maago siginan ayu ay fagusegananun.

23“Ginanya ban fag menit wam nanget#16:23 nanget: ay mannga, nanginto. ya sa angku. Matuyan nu glong au sa ayu te, nusnge wain ban ay fagetun sa ku Mama sa ku ngayan, kanya gfon waban fia ayu. 24Dasug katsi yam e naet sa anya sa ku ngayan. Katsi eti ay mul wam fia, laman maksvn nu guseganan am.

Isus Nababo at Mauri Ste Sfagdaul Daga

25“Aro ku ngay foyungan sa ayu sik ngay faydayuanan way. Nu ndasug ban tibak buknga nu gfoyung au ayu, wa katanya ya. Gfafayamagun kwa ban fia nu gfoyung au ayu sabaliwa ku Mama. 26Ginanya ban fag menit get ban am sa anya sa ku ngayan. Kwa glong te, au ban taget sa ku Mama laman sa ayu. 27Ku Mama kesug tua ayu aroro kesug tuam angku ay gafanud tuam te, siginan au ku Mama. 28Siginan au ku Mama ay andasug au ste swa daga, ay katsi glo kwan ste ginan ay kafoli kwan sa ku Mama.”

29Ay at ngay tagadal glong te, “Katsi gfafayamagun wo fia nu gfoyung o emi, bunwa faydayuanan ya. 30Ay nasaful wami te, nasaful wo fagayu nusnge wain. Nusnga sinu fag taw wa masine ya ginto sa emu. Nu katanya, gafanud wami te, siginan tuo sDius.”

31Isus glong anya te, “O katsi gafanud wam? 32Kadasug ban tibak buknga ay katsi wan, sumaruayan ban am, ay mesa mandi ban am glao, ay gubun ban am angku gsesadian. Dewa katanya, dakdi gsesadian aroro ku Mama gufud tua angku. 33Nafoyung au ayu takatanya laman e fagmanabayanun tuam siginan ay fagmasadiun sa angku. Dumalan ban am fagidapun ste swa daga, ay dewa katanya, faksvni ay amatanganan, aroro nababo kwan at mauri ste swa daga.”

Currently Selected:

Uan 16: OCCT

Highlight

Copy