Fakamulun 8

1Ay Saulu nafadiuganan nu gfabul Esteban.

Saulu nu Gfaurianan ngay Tagafanud

Siginan ginanya, maksvn nu gfaurianan ngay tagafanud sis Erusalem. Nu katanya, fagayu tagafanud nasaruayan sas talun Uda ay talun Samarya. Ay at yud nalao siginans Erusalem, ngay nasugu way lang. 2Ay sik ngay taw tagseg Dius nanamoli Esteban at bilug ay maksvn nu gwayway aroro kabalu. 3Ay sanya ginan Saulu gfasigad gfaurianan ngay tagafanud. Ay kanya gsakbo sa sangay bale laman nanggamat ngay tagafanud: mangama ay mangena, sanya ginan namuba sas fagubungan.

Felipe Nafoyung at Masine fag Barita sas Talun Samarya

4Ay fagayu tagafanud at nafansaruayan, kamoyung Dius at longan nusnga nday at fakadasugan. 5Ay Felipe nalao sa sik furuan sis talun Samarya, ay nafoyung sanya sabaliwa Dius at nafili fag Fun. 6Ay fagayu taw nu nadungug ay nu nalag at fakamulun tagfatoglag te, Dius si anya, kanya fagayu nadungugan. 7Ay kanya naiyan ngay mauri fag falad ay gina at mauri fag falad gduksun siginan sa ngay taw, guro. Ginanya, nafafia yangay at yud malao ay tagalbi fag ngay taw. 8Nu katanya, sanya fag furuan at ngay taw maksvn nu guseganan.

9Ay sanya e sik mangama at ngayan Simun. Kanya saful gfasure at madulo. Ngaduge wan kanya nu gfakamulun gugat katanya sa sangay taw sis furuan Samarya. Ay kanya nafamatungudun te, e fagmabalyananun. 10Ay sanya fag furuan at ngay taw gdungugan anya, mabalyanan man ay duan. Ay kanya fagayu glong te, “E gfangayan tuy fag taw te, ‘Dius at maksvn fag fagmabalyananun.’ ” 11Ngayuk taw tagdungugan anya, aroro ngaduge wan kanya nu gfasure at madulo fag ngay fakamulun. 12Ay dewa katanya, Felipe nu nafoyung sa kafag ngay taw at Masine fag Barita sabaliwas Dius nu gfagtainan ay sabaliwas Isus, Dius at nafili fag Fun, ngayuk taw at nafanud, ay kanya nafasurung ngayuk mangama ay mangena. 13Ay anggan Simun nafanud yangay, ay nu nsurung wan, nangalo wa Felipe. Ay Felipe nu nafakamulun at ngay madulo, kanya maksvn nu kadulo.

14Ngay nasugu sis Erusalem nu nadungug te, ngay taw Samarya gafanud sas Dius at longan, nasugu sanya Pedru ay Uan. 15Ay duama nu ndasug sas Samarya, nadarangin sanya fag ngay tagafanud laman umke Masine fag Falad, 16aroro kanya fagayu dewa ansurung wan sa tam Fun Isus at ngayan, at Masine fag Falad ya si anya fagayu. 17Nu katanya, Pedru ay Uan nafatayuk at daluap sa kafag ngay tagafanud ay at Masine fag Falad antayuk sa anya fagayu.

18Ay Simun nu nalag te, ngay tagafanud anke Masine fag Falad, siginan duama nu gfatayuk at daluap, kanya kaylat namon salapi laman at famayad 19ay glong te, “Foni angku takatanya fag fagmabalyananun laman ban nu nafatayuk au ku daluap sas nusnga sinu, umke Masine yangay fag Falad.”

20Ay Pedru nabalus te, “Umfaurianan o gasfuan am salapi, aroro namatangan o te, salapi, mafabul way Dius at famonun. 21Wa masine sa emu takatatuy fag fakamulun aroro am amatanganan mauri way sas Dius at daga salubangan. 22Ubuni am asalanan ay darangini sa tam Fun laman Dius gfalyam am mauri fag amatanganan. 23Aroro nasaful au te, gfangalabian o ay gafagsuguanan fagmauriun.”

24Nu katanya, Simun nalong te, “Darangini angku sa tam Fun laman ban di mdasug sa angku kata am nalong.”

25Sanya ginan, Pedru ay Uan nu nafoyung wan Isus at longan, anfoli wan sas Erusalem. Ay duama gina kafoli sas Erusalem, nafoyung yangay at Masine fag Barita sat nadalan fag ngay furuan ayu sirut sis afud talun Samarya.

Felipe Nafablang sik Taw Etiupya

26Tam Fun at tagbarita at sadi nasugu Felipe te, “Loi sas dalan tagsiginans Erusalem tagsas furuan Gasa. Wa ngayu ya at nanlao sanya fag dalan.” 27Nu katanya, Felipe nalao ay nafablang sik taw Etiupya. Kanya tagalaga Kandasi at ramraman. (Kandasi at masuad te, talun Etiupya at fun at mangena.) Kanya guli siginans Erusalem nu inda nu gseg Dius. 28Ay kanya gsakay sit kabayu at faguyudan, ay gtap Dius at taglong Isayas at rirukan. 29Ay at Masine fag Falad nalong sas Felipe te, “Nangakbang o sanya fag faguyudan ay namadgaloan o.”

30Ay Felipe gtarung nangakbang sa kafag taw, ay nadungug nu gtap, ay nainto te, “O nasaful o am tapan at masuad?”

31Ay kanya gbalus te, “Tain ro nu sumaful au, way e gfayamag sa angku?” Ay kafag taw nafasakay Felipe sat sakayan ay nafalunggung sit day tigyangan.

32Katatuy at fagtapun fag afud rirukan sis Dius at Longan:

“Kanya kata sik fagfilasun fag tupa, ay kata sik tupa riangan di guni gina e gufo at sigyu, ay di yangay nafasuang at bibig.

33E nafaplan anya ay we nagubuk.

We mafafoyung sabaliwa at kasugfunanan, aroro wa glugo at leleg ste sdaga.”#8:33 Isayas 53:7-8.

34Ay kafag taw nalong sas Felipe te, “Sinu tuy fag taglong at fagfatungulan? O at sadili wan, o ay mannga tiba wayk taw?” 35Siginan kanya fag rirukan Felipe nafoyung sa anya at Masine fag Barita sabaliwas Isus.

36Ay duama kaduge glao sangaba dalan, andasug sa sik liskung, ay kafag taw nalong te, “Damai iste e mamam. O kya ro manga masine kasurung?”

37Ay Felipe nalong te, “Masine wan, nu gafanud tuo sas fagdaul am amatanganan.”

Ay kafag taw gbalus te, “Gafanud au te, tam Fun Isus, kanya wan Dius at Baguama.” 38Ay kanya nafaragang at sakayan ay duama nasasad lino ay Felipe nafasurung kafag taw. 39Ay duama nu nlakwi wan, tam Fun at Falad nataban Felipe ay kafag taw we lagan ya anya. Ay kanya guseganan guli. 40Ay Felipe nu gamatang wa anya, si was furuan Asutu. Ay kanya gina gfataglayun glao sa sangay furuan, kanya kamoyung at Masine fag Barita sabaliwas Isus anggan andasug sas furuan Sesaria.

Currently Selected:

Fakamulun 8: OCCT

Highlight

Copy