Fakamulun 7

Esteban Gfoyung sa sangay Taw

1Ay fun tagfon fanggalangun ginto sas Esteban te, “O matuyan kafag ngay taw at ngay longan sabaliwa emu?”

2Ay Esteban nabalus te, “Ku ngay faduksay ay ku ngay fagtainan, dungugani ku longan. Dius at mabalyanan ay at ke fagmasineun ansure sa tam mangaguyang Abrayam ebi sis talun Mesuputamia, gina yud sis talun Karan. 3Ay Dius nalong sa anya te, ‘Loi wan ay ubuni am daga ay am ngay kalongan ay loi wan sa ku foyungan emu fag talun.’#7:3 Fakasigadan 12:1.

4“Nu katanya, Abrayam nalo wan siginans talun Kaldea ay nanamanwan sas furuan Karan. Ay at mama nu nbul wan, Dius nafalin anya stae fag talun tam fagbanwanan katsi. 5Ginanya, Dius ya nafon anya ste fag talun nusdi sik afud. Ay Abrayam deyud e sisian, Dius nafatuyanan sa anya te, ‘Gfon kban sa emu ay sa am ngay kasugfunanan ste fag talun.’ 6Katatuy Dius at longan anya te,

‘Am ngay kasugfunanan ban namanwan sa tibak talun, ay nangafagsuguanan ay nanginkidapan kaduge ufatk sandank banwa. 7Dewa katanya, namaurianan kban kafag talun at ngay taw tagfagsuguan ayu, ay am ngay kasugfunanan ban lumao sanya ginan ay kafoli stie fag talun laman nanseg angku.’#7:7 Fakasigadan 15:13, 14.

8Dius anke nasadian sas Abrayam sabaliwa nu gfae fakatoglagan ngay mangama. Ay Abrayam gina anke munama Isak, nafae fakatoglagan gina sis fawaluk menit, ay katanya yangay Isak at nafakamulun sat munama Akub, ay anggan Akub nafakamulun yangay takatanya sat ngay munama fag labi dua. Kanya at fagsigadan tam ngay mangaguyang.

9“Akub at baguama at sadi Use, ay at ngay faduksay nalabian, nu katanya, nafalao anya sa sik ngay taw tagsas Igiptu, dewa katanya, Dius gufud tua anya. 10Dius nafalangfe anya siginan sangay fagidapun. Ay nafae fagsafulun anya ay nagubuk laman Faraun, talun Igiptu at fun, kaylat tua anya. Nu katanya, Igiptu at fun nafili anya laman sik tagfangguna sis fagdaul talun Igiptu ay nafatigwanan wan sa anya fagayu at ngay fagagbilugun.

11“Ginanya, sas fagdaul talun Igiptu ay talun Kanaan, anke fanlunus. Ay fagayu taw, maksvn nu gidapan, ay tam ngay mangaguyang we fagnamulan ya fakonun. 12Ay Akub nu nadungug te, sis talun Igiptu e fakonun, kanya nasugu tam ngay mangaguyang, ay ginanya at fasadik lo nu sanya fag talun. 13Ay gina at faduak lo, Use nafatoglag anya sat ngay faduksay ay nalong te, ‘Au wan Use.’ Ay anggan fun Faraun nasaful yangay sabaliwa Use at ngay kalongan. 14Ay Use nalong te, ‘Tabani stae ku mama Akub ay fagayu ku ngay kalongan.’ Ay nu fagayu wan fituk safulu e lima. 15Nu katanya, Akub nalao sas talun Igiptu laman namanwan sanya. Ay sanya wan kanya nu kabul anggan tam ngay mangaguyang. 16Ay tiba tam ngay kalongan nanamuba at ngay bilug sas furuan Sekem ay nanamoli sas Abrayam at nabayad fag fagfolian sas Amur at ngay sisian.

17“Dius nu ganamafasludanun wan at fatuyanan sas Abrayam, ngay taw Israel gtaglayun nu kayu sis talun Igiptu. 18Ay talun Igiptu anke bagu fag fun, ay kanya wa nasaful sabaliwas Use.#7:18 Nu Galin 1:8. 19Kafag fun nafauri tam ngay mangaguyang ay nafaidapan ay glong gfabulun te, ‘Ukasi ay ngay sisian at bagu kasalug laman umbul.’

20“Ginanya, Muisis ansalug, ay kanya sik maylat fag munama sas Dius. Ay at fagtainan nalaga anya kaduge tuluk magdanun. 21Ay gina nafamato anya sisad liskung, fun Faraun at baguina nalag ay nabul ay nafagurang kata at sadili sisian. 22Ay nafoyung sas Muisis ngay taw Igiptu at fagsafulun, ay kanya ansik mabalyanan sit longan ay sit fakamulun.

23“Ay Muisis nu ufat wak safuluk banwa, namatangan laman nansibo at kaiban fag ngay taw Israel. 24Ay gina nanansibo, kanya nalag sik taw Igiptu nu gfaidapan sik taw Israel, ay nagubuk at usama fag taw Israel, ay nafabul kafag taw Igiptu, laman gfasud. 25Siginan at nafakamulun takatanya Muisis namatangan te, at ngay kaiban fag ngay taw Israel sumaful te, siginans Dius at gubuk, kanya ban at namalangfe anya fagayu, ay dewa katanya, kanya fagayu wa nasaful. 26Ay balabag di, Muisis nalag duak taw Israel nu gawayan. Ay kanya nananwabilug duama ay glong te, ‘Ku ngay faduksay, wain ay fagawayanun, ay gsud way am taw Israel?’

27“Ay tagfaidapan at usama natulud Muisis ay glong te, ‘Sinu at nafili emu laman gfunan o emi ay em tagwabilug? 28O gfabul yangay ro wo angku kata nu gfabul o egmenit fag taw Igiptu?’ 29Ay Muisis nu nadungug takatanya, nalagyu ay nanamanwan sas talun Midyan, ay Muisis nafamubay sanya, ay anke munama dua.

30“Ay nu nlangfe ufatk safuluk banwa, Dius at tagbarita at sadi ansure sa anya siginan sik fun kayu tagigang sis talun at yud e taw, munakbang sis Buksul Sinay. 31Ay Muisis nu nalag andulo, ay nanangakbang laman nanlingaman, ay kanya nadungug tam Fun nu glong te,

32‘Au wan am mangaguyang Abrayam, Isak ay Akub at Dius.’#7:32 Nu Galin 3:6.

Ay Muisis gtadtaruyan kalimu ay wa madama ya anya. 33Nu katanya, Fun nalong sas Muisis te, ‘Buli am lapak aroro am fagmalindugan di e malong fag buknga. 34Ku fagindasugun, laman namalangfe au ku ngay taw, aroro nalag au ngay taw Egiptu nu gfaidapan anya fagayu ay nadungug kyangay nu gwayway. Nu katanya, falganani aroro gsugu kban emu sanya.’#7:34 Nu Galin 3:5, 7, 8, 10.

35“Ebi ngay taw Israel maksvn nu kauri Muisis ay glong te, ‘Sinu at nafili emu laman o em tagfangguna ay em tagwabilug?’ At kinsure fag tagbarita si tagigang fag fun kayu, kanya at nagubuk Muisis gina Dius nasugu anya laman namalfas ngay taw Israel siginans talun Egiptu. 36Muisis nafangguna ay nafalfas ngay taw Israel siginans talun Igiptu. Ay kaduge ufatk safuluk banwa, kanya nafakamulun at ngay madulo ay at mabalyanan fag ngay fakamulun tagfatoglag te, Dius si anya. Anfasludan takatanya gina kanya fagayu glao siginans talun Igiptu ay gina gdife sis Dagat Maraska ay sit yud e taw fag talun.

37“Muisis yay fia at nalong sa sangay taw Israel te,

‘Dius ban gfili sik taglong kata angku siginan ay ngay kasugfunanan.’#7:37 Deuterunumyu 18:15.

38Ay gina sis talun at yud e taw, Muisis gufud tam ngay mangaguyang magamut tagbarita at nafakamatoan anya sis Buksul Sinay. Sanya wan fag buksul nu gfon sas Muisis tagfon leleg fag longan, at fagnamonun sa antam.

39“Ay tam ngay mangaguyang wa gfaning Muisis at foyungan. Abat ngate, kauri way, ay at fakaylatun kafoli way sas talun Igiptu. 40Ay kafag ngay taw Israel nalong sas Arun te,

‘Awati em ngay fagsegan tagguna ban emi, aroro wami nasaful nataw at kindasug sas Muisis at nataban emi siginans talun Igiptu.’#7:40 Nu Galin 32:1.

41Nu katanya, Arun nawat sik fagsegan kata sik baka riangan, ay kanya fagayu guseganan ay gfon at ngay fanggalangun sat nafawat fag fagsegan. 42Ay siginan takatanya, Dius natalyuyan anya fagayu ay nafabayan nu gseg ngay galeme. Kata ngay taglong at rirukan te,

‘Ngay taw Israel, gina am sis talun at yud e taw kaduge ufatk safuluk banwa, gfon am fanggalangun, dewa katanya, wa sa angku nu gfon am.

43Nabuba am ay fagsegan Mulek at bale, ay anggan sik galeme takata ay fagsegan Refan.

Nawat am kanya fagayu laman ay fagsegan.

Nu katanya, gaiyan au ayu tsiuy tua baliwas talun Babilunya.’#7:43 Amus 5:25-27.

44Ay sis talun at yud e taw tam ngay mangaguyang nawat bale ramit laman fagfasakboan Dius at Nasadian. Kanya fagayu nawat sik bale ramit kata Dius at longan sas Muisis, gfaning at nafalag sa anya fag fagaloan. 45Ay kanya fagayu nabuba kafag bale ramit, gina Uswe gfangguna anya fagayu laman nangagbilug Dius at naiyan fag ngay gaban taw at talun. Kanya fag bale sanya yay anggan sis Dabid at buknga. 46Dius guseganan Dabid, nu katanya, kanya naet sas Dius te, ‘Aylati nu namawat au sik bale laman sa emu, ay Akub at ngay kasugfunanan nangaful sanya laman nanseg.’ 47Dewa katanya, Sulumun way at nafawat Dius at bale.

48“Dewa katanya, Tiba Tungud fag Dius wa gbanwan sis taw at nawat fag bale. Kata at taglong at longan te,

49‘Tam Fun glong te, Banwa ku faglunggungan ay daga ku darafa at fagsiadan.

Nu katanya, setain fag bale am fagnangawatun laman sa angku?

Ay inda nunda at masine ku fagfiangalayan?

50O nunda kanya fagayu bunwa ku nawat?’ ”#7:50 Isayas 66:1, 2.

51Sanya ginan, Esteban nalong te, “Kamaogatun am ay amatanganan! Ay wam kaylat gdungugan ay gfaning Dius at foyungan. Nu setain ay mangaguyang at fakamulun, katanya yangay ay fakamulun. Ay gfauri am gugat at Masine fag Falad. 52Ay ngay mangaguyang nafauri Dius at taglong fagayu. Ay kanya fagayu nafabul fagayu tagfoyung te, Kadasug ban at Matuyan. Ay kanya nu ndasug nafoyung am anya sat mauri fag ngay taw ay nafabul. 53Muisis nafon oma sa ayu at Faugali siginan sangay tagbarita, dewa katanya, wam nafaning.”

Ngay Taw Nafana Esteban

54Ay taw Udyu at ngay tagfangguna nu nadungug takatanya, maksvn nu kauri Esteban, sak gfaringgit at bagang. 55Ay at Masine fag Falad antayuk sas Esteban, ay kanya natangda sas banwa ay nalag Dius at fagmatuyanun ay nalag yangay Isus nu malindug sit siun baliwa. 56Ay Esteban nalong te, “Damai, glag au banwa maluangan ay Isus, Taw at Baguama nu malindug sis Dius at siun baliwa.”

57Ngay taw tagdungugan anya nataup at ngay talinga ay guro, ay nagamat anya, 58ay naguyudan sas day furuan laman namana anya ngay gang. Ngay takamuagan fag ngay tagfatuyan sabaliwas Esteban nabul at ngay lanbung ay nafamato sa sik baguama at ngayan Saulu.

59Kaduge ngay taw gfana, Esteban gdarangin te, “Ku Fun Isus, gfatigwanan kwa sa emu ku falad.” 60Ay nu ntabu gdarangin, natudan ay guro te, “Ku Fun, lag o gamatangan tuy fag ngay taw at asalanan.” Ay kanya nu nalong wan takatanya, anbul wan.

Currently Selected:

Fakamulun 7: OCCT

Highlight

Copy