Matiyu 19

Ɛnza ngó fúusa ó mánɲin

Maki 10.1-12

1 Ɛnza ŋé wɛɛ o ládhyelikɛ ólu lá mínngɛ, aa bhɔ́ Galile kɛ táa Zude mála ŋo lɔ́ Zuludɛn ma ó ɲán dɔ́ o mán. 2Yamanba é táa a kwɔ́ka ó ywáa ó lɔ́, aa i lákɛɛnya o ywáa o lɔ. 3Falizɛn nɔ lúu í mángbaa a lá á lɔswaan móo man, ii a manɲaankɛ tá kó: «A láanin ɲe ké cɛ o waa a muso o fúu sá kún mbɛ́ súu la a?» 4Ɛnza ŋé i yawi kó: «Á man ó kála ma ŋan? Ko dínɲan lamyaan ó lɔ, Ala é cɛ ní muso lé la 5tó kɛ fɔ kó: O lé kósɔn cɛ óo bhɔ́la a wóobhaa ni a fa lú ka kɛ í gbɛ́nnɛn a muso mán, tó i fyáa óo kɛ́ fásisoo kéene. 6O ɲán o mán, i tɛ́ mɔɔn fyáa lé bhée, fɔ́ fasisoo kéembe. O lé kósɔn Ala wɛ́ɛ fé mín ngɛ kéene mɔɔn sí mánngan kɛ olu fála.» 7Falizɛn ŋolu a manɲaankɛ kó: «Aa kɛ́ díi ló tó Musa é fɔ kó ni cɛ ólu fɛ́ kɛ i muso ólu fúu o sá, kó i kákan né kɛ fúusa sɛ́wɛ tɛɛ kɛ a lo i muso ólu bhóo?» 8Ɛnza ŋé i yawi kó: «Céla Musa é fɔ kó áa sé kɛ fúu o sá, á yɛ́ tóolagbɛya lé kósɔn. Ni o tɛ, a tɛ tɛ́ kála cé kɔ́ɔ. 9Wáa, tó ní fɔ a yɛ́ ngó cɛ óo cɛ kɛ́ í bá a muso lɔ kéni ó mán ɲɔnmɔɔnya kɛ, kɛ muso gbɛ́ɛ ta, o cɛ ó wɛ́ɛ ɲɔnmɔɔnya lé kɛ́ wé.»

10Ɛnza ɲɛn kaamɔɔndhye ŋolu kó a yɛ kó: «Ni fúu ó wɛ́ɛ tó o lé mán, musota ó tɛ́ í lábhyaa o lɔ́ kéene a?» 11Ɛnza ŋé i yawi kó: «Ŋwɛ́ɛn a kála kó mínnan wé, cɛ o bɛ́ tɛ́ sé í bhóo síila o kɔɔ, fɔ́ Ala kɛ́ o ní ó bhyáa mɔɔn mín ngɔɔnnɔn. 12Kún gbɔ́gbɔ lée musotabhɛɛya o lɔ: Cɛ lɔ́ lúu wóo ké i tɛ cɛya lɔ, mɔɔn ólu lɔ́ gbɛ́ɛlu bhɔ́la cɛya lɔ́, tó lɔ́ lúu í kúnnzii la musotabhɛɛya o kɔ́ɔ kɛ́ a kún ngɛ sángboo ó Mansaya o le! Mɔɔn mín ŋé sé í bhóo síila o kóman ólu kɔɔ, o tíi o a í bhóo síi a kɔɔ!»

Ɛnza ni dhyémɛnsɛn ŋólu cɛ o

Maki 10.13-16; Luka 18.15-17

13Mɔɔn olu nan dhyémuu lɔ́lu lé Ɛnza ɲɛn kó aa í bhóo lá i kúnnɔn kɛ í sɛ́ɛ i yɛ, wáa kaamɔɔndhye ŋólu yámanngɛ o mɔɔn ólu mán. 14Oo kɛ́ mínngɛ Ɛnza ŋé fɔ kó: «Áa dhyémuu ólu tó yé ké ii nan ne mán, a kɛ́nan í síi i ɲan lɔ. Kɛ mansɔɔ mɔɔn mín núu óyoo dhyémuu míinnu sángboo ó Mansaya ó ólu ta le le.» 15Ɛnza é í bhóo lá i kúnnɔn, kɛ bhɔ́ ó ywáa ó lɔ.

Nanfoo tɛ́ɛ káweenin mín móo

Maki 10.17-31; Luka 18.18-30

16Cɛ lɔ́ é í mángbaa Ɛnza nan kɛ a manɲaankɛ kó: «Kaamɔɔn, ngákan kɛ kóbhɛɛ mínnɛɛn lé kɛ kɛ ɲáanmanɲan wɛ́ɛbhɛɛ ó sɔ́ɔ?» 17Ɛnza ŋé a yawi kó: «Íi mánɲaankɛla kóbhɛɛ ó tá fa nvɛ́ mínnɛɛn lé la? Ala kéembe lé káɲin. Ni íi fɛ́ kɛ ɲáanmanɲan wɛ́ɛbhɛɛ o sɔ́ɔ, tɔ́ ŋolu bhɔ́ sháa man.» 18Cɛ óo a manɲaankɛ kó tɔ́ mínnɛɛn lu? Ɛnza ngó: Í mánngan kɛ mɔɔn fáa, í mánngan kɛ ɲɔnmɔɔnya kɛ, í mánngan kɛ fwɔnɲan la í mɔ́ɔnninnvinɲɔɔn ó la, í mánngan kɛ soɲan kɛ. 19Í fá ní í wóobhaa bwóɲan. Í mɔ́ɔnɲɔɔn ó a dhyáa í yɛ́ óyoo íle gbú a dí í yɛ́ɛ yɛ ɲán mín man. 20O káweenin ŋoo fɔ kó: «Ŋwɛ́ɛn o tɔ́ ŋo bɛ́ bɛ́ sháa lataaman. Ngákan kɛ mínnɛɛn lé kɛ́ o kwɔ?» 21Ɛnza ŋé a yawi kó: «Ni í tɛ́ fɛ́ ké sɔ ŋan sɔɔ í lá, táa í bhóofe ŋo bɛ́ fele kɛ a wɛɛ o dí faannda ŋólu mán, o kɛ́ kɛ í yáa nanfooba sɔ́ɔ sá ŋó lɔ. Í kɛ́wɛɛ o la, íi bhyáa ngwɔ́.» 22Wáa káweenin ŋoo o kóman ó myɛ́n mínngɛ, aa bhɔ́ yénɔn a ɲanlasiinin ŋó le, kɛ mansɔɔ nanfooba lé tɛ́ɛ a bhóo.

23Oo kɛ́ mínngɛ, Ɛnza ŋé fɔ a yɛ kaamɔɔndhye ŋolu yɛ kó: «Tó ní fɔ a yɛ́ tínɲan in ne ngó, nanfootii ó lo ŋo sángboo ó Mansaya ó lɔ, o lo a gbɛ́ɛ ósɔ! 24Ní fɔ́la a yɛ́ íkwɔ ngó ɲɔ́ɔnmɛɛn ó lo ŋó nɔɔnyanin ɲé kɛ́ɛla ŋó jáan ó fɛ́ kɛ tínmin nanfootii ó lo ŋó ka Ala yɛ́ Mansaya ó lɔ.» 25Kaamɔɔndhye ŋolu o kóman ó myɛ́n mínngɛ, oo i kɔɔnnɔnfii fɔ́ ii ɲɔ́ɔn manɲaankɛla kó: «Yɛ́ɛtii é sé kɛ́ kísi o lɔ wɛ́?» 26Ɛnza ŋé i mánfɛɛ kɛ fɔ i yɛ kó: «Kísili o sé tɛ́ Adamandhye ŋó yɛ, wáa a sé é Ala le yɛ!» 27O lɔ Piyɛli é fɔ a yɛ kó: «Án née mínnu wɛ́ɛ án ngwɔ kɛ fé ŋó bɛ́ la tó kɛ bhyáa í kwɔ́ka, án née káa kɛ́ díi o lɔ wɛ́?» 28Ɛnza ŋé i yawi kó: «Tó ní fɔ a yɛ́ tínɲan in ne ngó, mɔɔn Dhyénjɛ o yáa í síi a yɛ́ mansayagbaanin nɔ́lɔman ŋó ka dínɲan kwáa o lɔ. O kɛ́ kɛ́, ále mín núu ngwɔ́ka, ále yáa í síi mansayagbaanin ndá ni fyáa o ka kɛ Izalayɛli síya tá ni fyáa ólu ta kíti o tɛ́ɛ. 29Tó mɔɔn óo mɔɔn é í kwɔ́ kɛ́ i yɛ bhó ní i bhádhyenjɛman ŋóni bhádhyemusoman ní i fa ní i wóobhaa ni i dhyé nú ní i yɛ sɛɛn ólu lá né kósɔn, o tíi ó yáa olu súu kɛnmɛn sɔ́ɔ, tó a nin ŋé kɛ́ ɲáanmanɲan wɛ́ɛbhɛɛ o le. 30Mɔɔn mínnu é ɲɛ́n bí nín, o shɛ́ɛman ɲáan tó kwɔ́, tó mín núu kwɔ́, olu shɛ́ɛman ɲáan bhyáa ɲɛ́n.»

Currently Selected:

Matiyu 19: MXX

Highlight

Copy