Matiyu 18

Yɛ́nee kaamɔɔndhye ŋo bɛ́ lɔ mɔɔnba óle?

Maki 9.33-37; Luka 9.46-48

1O wáati kée ŋó lɔ, kaamɔɔndhye ŋolu í mángbaa Ɛnza nan kɛ a manɲaankɛ kó: «Yɛ́ɛtii é bɛ́ lɔ mɔɔnba óle sángboo ó Mansaya ó lɔ?» 2Ɛnza ŋé dhyémuu lɔ́ kíi kɛ alalɔ i cɛ́man 3tó kɛ fɔ kó: «Tó ní fɔ a yɛ́ tínɲan in ne ngó, ni a mán yɛ́ɛman kɛ kɛ́ óyoo dhyémuu lú, a táa lo sángboo ó Mansaya ó lɔ tún. 4Mɔɔn mínnu wɛ́ɛ í bhóo síi Ala yɛ́ Mansaya ó kɔɔ, mɔɔn mín ŋé fɛ́ kɛ kɛ́ o mɔɔn ó bɛ́ lɔ mɔɔnba óle, o tíi ó kákan kɛ í mányii lé kɛ kɛ́ óyoo dhyé mín ɲé nín. 5O kwɔ, ni mɔɔn mín ngɛ í ɲán síi dhyémuu míin nzúu o kɔ́ɔ né tá ɲiinɲan mán, o tíi óo í ɲán síila né lé kɔ́ɔ wé.»

Ɛnza ngó kɛ í yɛ́ɛ myaan

Maki 9.42-48; Luka 17.1-2

6«Dhyémuu mínnu wɛ́ɛ lá né la, ní mɔɔn mín ngɛ kɛ́ sɔ́ɔbu le kɛ o kée ngúnnɔn cáan, mín ndɛ́ɛ físaa o tíi o mán o lée kɛ káwaguun mbelebeleba le gúun o tíi o kannan kɛ a tii o bé kɔɔji o cɛ́man. 7Dínɲan ó mɔɔn mín núu kɛ́la sɔ́ɔbu le kɛ i mɔɔnɲɔɔn ólu kúnnɔn cáan, kunnangboya lo ɲé olu yɛ kɛ́yi! Dhyaalagboya lé sɔ́ɔbu yáa kɛ́ mɔɔn ólu kúnnɔn cáan ŋó la. Wáa íle mɔɔn mín ngɛ kɛ́ o sɔ́ɔbu le, kunnangbeya é í yɛ́! 8Ni í bhóo ó wáman í sé ŋó kɛ́ kɛ́ sɔ́ɔbu le kɛ́ í bhyáa yúumukɛ ó lɔ, a tɛɛ í lá kɛ a lafii. Í bhóokeenanman ŋó wáman í séngeenanman ŋó kɛ́ lo ɛliyanan o lɔ, o a físaa í mán í bhóo fyáa óni í sé nváa ó tó ó lé í lá kɛ́ í láfii yaananman tá o lɔ. 9Tó ni í ɲándhye ŋó kɛ́ kɛ́ sɔ́ɔbu le kɛ í bhyáa yúumukɛ ó lɔ, a bhɔ́ í lá kɛ a lafii. Í ɲánkeeman ŋó ló ŋó ɛliyanan o lɔ, o a físaa í mán í ɲandhye nvyáa ó tó ó lé í lá kɛ́ í láfii yaananman tá o lɔ.»

Saa mín ŋwɛ́ɛn túun kɛ́wɛɛ kɛ yé

Luka 15.3-7

10«Áa í yɛ́ɛ myaan! Ŋwɛ́ɛn dhyémuu mínnu yɛ kóman kɛ sɛ́n ni ŋwé, a kɛ́nan o súu súu lɔ́ɔya. Tó ní fɔ a yɛ́ tínɲan in ne ngó i yɛ malɛɛka olu sé kɛ táa nvá fɛ́ yénɔn kúdɛyi sá ŋó lɔ. 11[Mɔɔn mínnu tɛ́wɛɛ túun, mɔɔn Dhyénjɛ óo nan o lée lú kísi tɔ́ɔ lɔ.] 12A tá ɲánla ó lɔ, ni saa kɛnmɛn kɛ́ kɛ́ mɔɔn lɔ́ bhóo ké o kée ŋan túun, o tíi ó mánfaa saa bíkɔɔnndɔ ni kɔɔnndɔ ŋo tó tii o ka kɛ táa kée mín wɛɛ túun wé kɛ táa ó ɲiin ŋan? 13Tó ní fɔ a yɛ́ tínɲan la ngó, ni a kɛ saa túunnin ŋó yé, a nisɔ yáa dhyáa kɛ tínmin saa bíkɔɔnndɔ ni kɔɔnndɔ ŋólu tuunmɛɛya ó ka. 14Aa céne, a Fá mín ŋé sá ŋó lɔ, o tɛ́ fɛ́ ké dhyémɛnsɛn ŋó sí a túun.»

Yúumu mín ngɛ kɛ́ lánanbhaa olu cɛ

15«Ni í mɔɔnɲɔɔn o kɛ́ i yáacɛ tá, táa a saala kɛ ó fɔ a yɛ́ i kéenan. Ni a kɛ í kómankan ŋo lɔ́myɛn, ké í wɛ́ɛ ale ní íle cɛ o lɔ́bhyɛ né wé. 16Wáa ni a kɛ í bá kɛ i lɔ́myɛn, íi mɔɔn kée ni mɔɔn fyáa lú sí la í ka kɛ táa a ládhye, kɛ mansɔɔ Musa yɛ́ tɔ́ ŋo kó kó ó bɛ́ a í lɔ́bhyɛ sɛ́ɛya fyáa wáman sawa ɲánla. 17Ni a man sɔ́n o bɛ́ kwɔ, aa á cɛ o lɔ́ko ó lábhɔ lánanbhaa olu ɲánla. Ni a lo mán sɔ́n kɛ lánanbhaa olu lɔ́myɛn, aa á yace lánanbhɛɛ le wáman nísɔɔnmyaanbhaa le. 18Tó ní fɔ a yɛ́ tínɲan in ne ngó, álee kɛ́ fé ŋóo fé nzíli lúukolo ó ka, o sílinin ɲáan kɛ́ sá ŋó lɔ, á kɛ́ fé ŋóo fé nvwée lúukolo ó ka, o yáa fwée sá ŋó lɔ.

19Tó ní fɔ a yɛ́ tínɲan in ne íkwɔ ngó, ni mɔɔn fyáa kɛ́ bhyɛ kée mán lúukolo míin nga kɛ kó lɔ́ ɲíin Ala fɛ́ sɛ́ɛ o lɔ, Nvá mín ŋé sá ŋó lɔ, o yáa o kó ó kɛ́ í yɛ. 20Aa céne, ni mɔɔn fyáa wáman mɔɔn sawa kɛ́ ɲɔ́ɔn nadhyɛ né kósɔn ywáa óo ywáa lɔ, ní olu fɛ́ yénɔn lé wé.»

Bháalakɛdhye mín ndɛ́ yafala

21Piyɛli é í mángbaa Ɛnza nan kɛ a manɲaankɛ kó: «Mantii o, ní mɔɔnɲɔɔn lɔ kɛ ɲáacɛ tá, ngákan kɛ yafa a man síɲan yée lé kɛ? Síɲan wóonvyaa a?» 22Ɛnza ngó: «Ɔn-ɔn, ndáa fɔ í yɛ́ ngó íi yafa síɲan wóonvyaa lɛ́, wáa fo síɲan bíwoonvyaa síilaaman wóonvyaa. 23O ɲán o mán, Ala yɛ́ Mansaya óo tɛ́nmɛn, o lée nín: Ló nɔ́ la, kunndii lɔ é fɔ kó a yɛ wɛ́ɛ mín ŋé yúu la, a yɛ bháalakɛdhye ŋolu la, kó aa fɛ́ kɛ o lá nɔ́. 24Aa o kóɲanbhɔ ó lámyaan wáati mínnɔn, ii yuutii o kée lánan a saala, wɛ́ɛ mín ɲúu tɛ́ɛ o la, o tɛ́ɛ sháa gbúnigbukɛ. 25Fé ndɛ́ tɛ́ o yuutii o bhóo kɛ a yɛ yúu ó sala. Kó ólu kɛ́ɲan man cé, a kunndii óo fɔ kó kɛ ale ní a muso ní a dhyé ŋó bɛ́ fele yɔɲan bhóoman tó kɛ a bhóota o bɛ́ fele ké aa sé a yɛ yúu ó sálala o ɲán o man. 26Bháalakɛdhye ŋóo í kúnmɛɛn ngɛ́ lúu lɔ́ a kunndii o kɔɔ kɛ fɔ a yɛ kó: ‹Mánkoto! Í yóso swáanya nvɛ́, ɲáan í yɛ́ yúu ó bɛ́ sala!› 27A mánɲwaan é lo a kunndii o lɔ, tó óo yúu o lábe kɛ cɛ ó bhyáa kɛ táa. 28O cɛ ó bhɔ́nin ŋó kwɔ, óo bhyɛ a bháalakɛɲɔɔn ó lɔ́ le. Ale yɛ́ wɛ́ɛgbannan déniye kɛnmɛn tɛ́ɛ o la. Aa o bháalakɛdhye ŋo myáan a kan ŋo man kɛ a já kɛ a ɲaankii gbɛ́nnɛn ni fɔ lé a yɛ kó: ‹Ɲɛ́n yúu ó sala!› 29Bháalakɛdhye ŋó o í kúnmɛɛn ngɛ́ lúu lɔ́ a kɔɔ kɛ a dɛ́li tá kó: ‹Mánkoto! Í yóso swáanya nvɛ́, ɲáan í yɛ́ yúu ó sála!› 30Wáa cɛ óo ó í bá ngbáan tó kɛ a bháalakɛɲɔɔn ó láfii kaso lá sánnin a yɛ yúu ó sála sán o cɛ. 31Bháalakɛdhye ndɔ ólu ɲán é lɔ o kó kɛ́se ŋó lɔ mínngɛ, óo i diin ngbúnigbu kɛ tó ii táa o kó ó bɛ́ lábhɔ i yɛ kunndii o ɲánla. 32Oo kɛ́ mínngɛ, kunndii oo bháalakɛdhye ŋo kíi kɛ fɔ a yɛ kó: ‹Íle bháalakɛdhye ɲóo ŋó, ɲɔ́ɔn née í tá yúu ó lábe kɛ kúun ngɛ́ ndɛ́li ó lá í kwɔ́ lé. 33Aa kɛ́ díi tó íle mán í bháalakɛɲɔɔn ó manɲwaan mánfɛɛ óyoo née mánɲwaan íle lá tɛ́nmɛn?› 34Kunndii o mwɛ́nnɛnkoɲan o mán, aa bháalakɛdhye ŋo bhyáa kaso lá tɔ́lɔya kɔɔ, kó ni ale kunndii o yɛ́ yúu ó mán sála féfe, kó o bháalakɛdhye ŋo táa bhɔ́.» 35Ɛnza ŋé wɛɛ kɛ fɔ kó: «Nvá mín ŋé sángboo ó lɔ, o káa a bɛ́ kée ngéenan myáan o ɲán kée ŋó lé mán ni a mán kɛ́ yafala a mɔɔnɲɔɔn mán i yóso ó bɛ́ lá.»

Currently Selected:

Matiyu 18: MXX

Highlight

Copy