Luka 16

Ɲɛ́nmɔɔn ó yɛ́ saanan ó

1Ɛnza ŋé fɔ a yɛ kaamɔɔndhye ŋólu yɛ kó: «Nanfootii lɔ tɛ́ɛ yé. A tɛ wɛɛ mɔɔn lɔ tá kɛ́ bhyáa a yɛ nanfoo ó kunnan. Mɔɔn ólu nan fɔ a kunndii ó yɛ kó cɛ míin i yɛ nanfoo ó kunnan, aa a mán kɛ a cáan. 2A kunndii óo a kíi kɛ́ fɔ a yɛ kó: ‹Ní mín myɛ́nnan í yɛ kó ó lɔ, o mán ndí. Ii bháala ó kɛ́la ɲán mín mán, nan o ɲánfɔ né yɛ, kɛ mansɔɔ í tɛ́ sé kɛ tó né yɛ nanfoo ó kunnan bhée.› 3Nanfoo kunnansiibhaa óo fɔ́ ko: ‹Né káa mínnɛɛn lé kɛ, kɛ mansɔɔ né kunndii ó káa né bhɔ́ a yɛ nanfoo ó kunnan. Faan tɛ́ né lɔ kɛ́ sɛɛn kɛ. Kɛ dɛ́lili kɛ, ó yáa kɛ́ maloya le né bhóo. 4Né káa mínngɛ ní o lɔ, ní a kɛ né gbɛ́ kɛ bhɔ́ bháala míin ngunnan, ké mɔɔn lɔ́lu a né labhyɛ i bhóo lúman.›

5O lɔ, a kunndiicɛ o yɛ yúu tɛ́ɛ mɔɔn óo mɔɔn lá, aa ólu bɛ́ kíi kée ngée. Míin nan jónan, aa ó mánɲaankɛ kó: ‹Né kunndiicɛ ó yɛ́ yúu mín ŋé í la, yée lée o le?› 6Óo fɔ kó: ‹Túu gbóngbo ngɛnmɛn.› Áa fɔ o yɛ kó: ‹I yɛ yúu ta sɛ́wɛ ó mánfɛɛ nín, i síi kɛ túu gbóngbo bíloolu sɛ́wɛ jónan.› 7O kwɔ́, aa fɔ lɔ́gbɛɛ yɛ kó: ‹Ile wɛ́, yée lée ile tá o le?› Oo fɔ kó: ‹Béle#16.7 Béle ó lée kɛ́la faanimuu ó lé. bhɔɔ kɛnmɛn.› Aa fɔ o yɛ kó: ‹I yɛ yúu ta sɛ́wɛ ó mánfɛɛ nín, i síi kɛ bhɔɔ bísɛɲin nzɛ́wɛ.›

8A kunndiicɛ óo o kóman ó myɛ́n aa nanfoo kunnansiibhaa kóyoongɛbhaa ó tando a yɛ gée ŋó kósɔn. Kɛ mansɔɔ dínɲan mɔɔn ólu á ɲɔɔn myaan séɲan ó lɔ kɛ tínmin Ala dhyé ŋólu ka mínnuu kɛ́ɛnɲan ó lɔ.»

Nanfoo ó myáanseɲan ó

9Ɛnza ngo: «Ní fɔ́la a yɛ ngó aa a táamanɲɔɔn ólu ɲíinnan dínɲan nanfooyoo ŋó le cɛ́man kɛ mɔɔn ólu dhyɛman, kɛ twáanva ɲiin ó lé, ní a kɛ́wɛɛ wáati mínnɔn, ké ólu a sé kɛ a labhyɛ ɛliyanan ó lɔ́. 10Mɔɔn mín ngɛ kɛ mɔɔn téenin né kófitiinin ŋó lɔ́, oo mɔɔn téenin né lé kóba ó lɔ́ ikwɔ. Wáa ní mɔɔn mín ngɛ kɛ mɔɔn téemɛɛ le kófitiinin ŋó lɔ́, oo mɔɔn téemɛɛ le lé kóba ó lɔ́ ikwɔ. 11Ni álee mán kɛ́ mɔɔnbhɛɛ lé dínɲan nanfooyoo nɔ́ɔnnin ngó o lɔ, yɛ né káa lá álee la kɛ a yɛ nanfoobhɛɛ o kɛ́ɛfa álee mán? 12Ni álee mán kɛ́ mɔɔn téenin né mɔɔn olu ta wɛ́ɛ ó tá sháafɛ, míin nan kɛ álee gbúlu tá o le yɛ́ɛtii káa ó di a mán?

13Mɔɔn sí tɛ sé kɛ bháalakɛ kunndii fyáa yɛ, kɛ mansɔɔ kée ɲáan gbóya a yɛ a tɔ kée ŋó yáa dhyáa a yɛ, wáman a yáa í gbɛ́nnɛn kée ŋó mán kɛ í mán bhɔ́ a tɔ kée ŋó la. A tɛ́ sé kɛ bháalakɛ Ala yɛ, tó kɛ bháalakɛ nanfoo ó yɛ ikwɔ.»

Ɛnza ɲɛ́n ládhyeli lɔ́lu

Matiyu 11.12-13; 5.31-32; Maki 10.11-12

14 Falizɛn ŋólu ó kóman ólu myɛ́n mínngɛ, i tɛ́ɛ yɛ́ɛkɛla Ɛnza mán, kɛ mansɔɔ nanfoo ó ko tɛ́ɛ dí í yɛ. 15Wáa Ɛnza ŋé fɔ i yɛ kó: «Áa a yɛ́ɛ kɛ́la mɔɔnteenin nu lé mɔɔn ólu ɲanla, wáa Ala á yósokun ŋó lɔ, kɛ mansɔɔ Adamandhye ŋólu fé mín yacela fémba lé, óo fé nɔ́ɔnnin né le Ala ɲánla.

16Ɛnza ngó: Kɛ́ tá Musa yɛ sɛliya, óni céla ólu yɛ kitabu ó kóman ó man, fɔ́ kɛ́nan sé Yaya Bátizelikɛbhaa yɛ wáati ó mán. Kɛ tá o mán, Ala yɛ́ Mansaya sanmankanmɛɛ óo í lásela. Óni bɛ́ é fɛ kɛ́ i lɔ́ja kɛ ló o mansaya ó lɔ.

17Sángboo óni lúukolo ó yáa tínmin, wáa sɛliya ó sɛwɛli kóo fítiinin ŋó kée ndáa bé.

18Cɛ óo cɛ kɛ́ í bá a muso lɔ tó kɛ́ muso gbɛ́ɛ tá o tíi ó ɲɔnmɔɔnya le kɛ́la wé. Ní cɛ óo cɛ kɛ muso fúusanin ŋó fúu kɛ, o tíi ó ɲɔnmɔɔnya le kɛ́la wé.»

Nanfootii óni Lazali yɛ ko ó

19«Nanfootii lɔ tɛ́ɛ yé, a tɛ́ɛ i féndiiya faani le lónan kɛ́ faanman nɔ́mi kɛ kɛ́ i ɲáanli ló ŋóo ló. 20Faannda nɔ́ tɛ́ɛ yé a tɔ́ɔ kó Lazali. A fási ó ywáa bɛ́ tɛ́wɛɛ kɛ lá le. A tɛ́ɛ í la lá nanfootii ó yɛ bhónaa ó lé lá. 21Lɔ́min múumuu mínnu tɛ́ɛ bénan nanfootii ó yɛ tabɛli ó kɔɔ, a tɛ́ɛfɛ kɛ́ ólu lɔɔ, wáa a tɛ tɛ́ ó sɔ́ɔla kɛ́ ó lɔɔ. Ó kwɔ́, wúu ólu tɛ́ɛ nánla kɛ a yɛ lá ólu mánnɔn.

22Faannda ŋóo sayakɛ, malɛɛka ólu a tá kɛ táa siilaa di a mán Bulaaman tɔ́ɔfɛ. Nanfootii óo sayakɛ, íi a sú ló. 23Nanfootii ó tɛ́ɛ tɔ́lɔya ó lɔ́ yaananman ó lɔ́, aa i ɲánla yɛ́ɛ kɛ Bulaaman yé ywáaja nɔn ké Lazali é a tɔ́ɔfɛ. 24O wáati ó lɔ, nanfootii ó gbáa kɛ fɔ́ ko: ‹Nvá Bulaaman, hínnɛn né la. A fɔ Lazali yɛ kó aa táa a bhóokwɛɛnnin ŋó sú jí ó lɔ kɛ́nan né kan ŋó láɲiin, kɛ mansɔɔ né tɔ́lɔyanin ɲé kóyoongɛ tá ó kɔɔnnɔn.›

25Wáa Bulaaman é fɔ a yɛ kó: ‹Nyé, i gbú á lɔ ŋóo i tɛ́ɛ dínɲan lɔ mínngɛ, fémɛɛ shɛ́ɛman ndɛ́ɛ i bhóo, ké Lazali é sɛɛ ó lɔ́. Sísan, Lazali é hɛ́lɛ o lɔ, ílee sɛɛ ó lɔ́. 26Yáanin o tɛ́, jáanbelebeleba é án né ní álee cɛ. O lɔ, ni mɔɔn mín ŋé fɛ́ kɛ bhɔ́ yánun kɛ táa a fɛ́ yé, o kɛ́nan sé kɛ táa, óni ké mɔɔn lɔ́ kɛ́nan sé kɛ bhɔ́ álee fɛ́ yé kɛ́nan an née fɛ́ ya.› 27Nanfootii óo fɔ kó: ‹O sán ó lɔ, nvá, ní i dɛ́lila, Lazali bhyáashaa kɛ táa né yɛ lúmanmɔɔn ólu fɛ́ yé, 28kɛ mansɔɔ bhádhye nóo é né fɛ́ yé. A tó ké Lazali á táa ólu lasowi, ké ólu kɛ́nan nan ó tɔ́lɔya ywáa míin nɔn.›

29Bulaaman é a yawi kó: ‹Musa yɛ sɛliya óni céla ólu yɛ sɛ́wɛ ólu é i bhóo, ii ólu kɔ́ɔnnɔn kóman ó lɔ́myɛn.› 30Nanfootii ó kó: ‹Ɔn-ɔn, o táa bhyɛ nvá Bulaaman, wáa ní mɔɔn sayakɛnin nɔ́ kɛ kúun kɛ táa kóman i fɛ́, i yáa díminsa i yɛ́ kóyoo ŋólu la.› 31Bulaaman é wɛ́ɛ kɛ fɔ a yɛ kó: ‹Ní i mán Musa yɛ sɛliya óni céla ólu yɛ sɛ́wɛ ólu kɔ́ɔnnɔn kóman o lɔ́myɛn, yáanin mɔɔn sayakɛnin nɔ́ kɛ kúun kɛ táa kóman i yɛ, i táa lá o la.› »

Currently Selected:

Luka 16: MXX

Highlight

Copy