Luka 17

Yafali ó kúnnɔn cáan ó

Matiyu 18.6-7,21-22; Maki 9.42

1Ɛnza ŋé fɔ a yɛ kaamɔɔndhye ŋólu yɛ kó: «Dhyaalagboya lée a le lɔ́lu yáa kɛ sɔ́ɔbu le kɛ́ mɔɔn ólu kúnnɔn cáan, wáa mɔɔn mín ngáa kɛ o sɔ́ɔbu óle, kunnangboya é ó tíi ó yɛ. 2Ní mɔɔn lɔ kɛ kɛ sɔ́ɔbu le kɛ́ dhyémuu míin ngée ngúnnɔn cáan kɛ́ a láfii, mín ŋán físaa o tíi ó mán o lée kɛ káwaguun mbelebeleba lɔ gúun a kannan kɛ a lafii kɔɔji ó lɔ. 3Áa a yɛ́ɛkɔɔsi o kó ólu mán.

Ní í bhádhye ŋó lɔ kɛ́ i yáacɛ tá, íi a kíi kɛ́ a yɛ fii ó yáa a lá. Ní a kɛ díminsa, yafa a mán. 4Ní a kɛ i yáacɛ tá síɲan wóonvyaa kɛ́ tée kée ŋó kɔɔnnɔn, ní a kɛ́ i kwɔ́sɛɛ i mán a síɲan wóonvyaa ó bɛ́ lɔ kó íi yafa a mán, kó ale wɛɛ díminsa, íi yafa a mán.»

Ɛnza ɲɛn kaamɔɔndhye ŋólu yɛ lánanya ó

Matiyu 17.20

5Ɛnza ɲɛn céladhye ŋólu fɔ a yɛ kó: «Mantii ó, lɔ́ fala án ɲɛ lánanya ó ka.»

6Mantii ó fɔ i yɛ kó: «Ní a yɛ lánanya ó bwóɲan ó tɛ́ɛkɛ óyoo mútaalikoo o, a tɛ́ɛnan sé fɔ́la yíiba míin ɲɛn kó aa bwɔ́ kɛ bhɔ́ ya kɛ́ táa í gbáan kɔɔji ó lɔ. A tɛ́ɛnan sɔ́n ó mán.

7Ní bháalakɛdhye ngɛ́ kɛ a lɔ́ bhóo, ní áa sɛ́ɛn kɛ́la í yɛ, wáman ní aa i yɛ bhyáa ŋólu kunnansiila, ní a kɛ́ i kwɔ́sɛɛ kɛ bhɔ́ sɛɛn mán wáati mínnɔn, a yáa fɔ a yɛ kó aa í lateeya kɛ́nan lɔ́minkɛ! 8Ɔn-ɔn. A káa fɔ ó bháalakɛdhye ŋó yɛ le kó: Aa í lɔ́bhyɛ kɛ́nan a yɛ súnman ŋó dí a mán. Ní ale kɛ́wɛɛ lɔ́minkɛ ó la wáati mínnɔn, o kwɔ́ bháalakɛdhye ŋóo tó lɔ́min kɛ́la kɛ mínnin kɛ. 9Bháalakɛdhye ŋó kunndii ó yáa a tɔ́ɔɲwaan fɔ a yɛ bháala kɛ́nin ŋó kósɔn an? Mán lá o la. 10O ɲán ó mán, álee lu, bháala mín ŋwɛ́ɛn kɛ́ɛfa álee mán ní a kɛ́wɛɛ ó kɛ́la, aa fɔ kó: Án néelu án ni bháalakɛdhye née lú le cé. Án ngákan kɛ mín ngɛ́ án ŋwɛ́ɛn ó lé kɛ.»

Ɛnza ŋé kwaantɔ tá nákɛɛnya la

11Ɛnza ndɛ́ɛ táala Yeluzalɛmu, aa Samali mala óni Galile mala ó lɔ́tinmin. 12A ló ndɔ́ ó só ó kɔɔnnɔn, kwáantɔ tá ŋé nan a lɔ́bhyɛ. Ii í lɔ́ ywáaja nɔn kɛ́ cɛ dɔ́ɔnin ndó ile ní Ɛnza njɛ́. 13Íi gbáa kɛ fɔ kó: «Kaamɔɔn Ɛnza, hínnɛn án nan.»

14Ɛnza ŋé i yé mínngɛ, aa fɔ i yɛ́ kó: Áa táa a yɛ́ɛ yáa faanlɛɛɲansebhaa ólu la. Kɛ́ i tó táala sháa ó ka, í bɛ́ɛ kɛ́ɛnya. 15I cɛ́man Kée ŋé yé mínngɛ óo a wɛɛ kɛ́ɛnya, oo i kwɔ́sɛɛ kɛ táa Ɛnza nzaala, ké áa Ala tandola ni kannanyɛɛnin ne. 16Aa sé Ɛnza ndɔ́ɔfɛ mínngɛ, aa i kúnmɛɛn nɔ́kɛɛ a kɛɛnnan kɛ i ɲán ó bíin lúuman kɛ́ bálika bhɔ́ a yɛ, o cɛ ó tɛ́ɛ Samalika lé le. 17Ɛnza ŋé fɔ a yɛ kó: «Mɔɔn tá ŋó bɛ́ mán kɛ́ɛnya a? A tɔ́ kɔɔnndɔ ŋólu mín? 18Mɔɔn sí mánsɔɔ kɛ i kwɔ́sɛɛ kɛ́nan bálika bhɔ́ Ala yɛ fɔ́ lónannjɛ míin ngée ŋán!» 19O kwɔ́, aa fɔ cɛ ó yɛ kó: «I wíi íi táa, i wɛ́ɛ kísi í yɛ lánanya ó bháaka lɔ.»

Mɔɔn Dhyénjɛ ó kwɔ́sɛɛ ko ó

Matiyu 24.23-28,37-41

20 Falizɛn ŋólu Ɛnza mánɲaankɛ kó Ala yɛ́ Mansaya ó káa nan wáati mínnɛɛn lé lɔ. Aa i yawi kó: «O táa kɛ óyoo mɔɔn ólu i tá ó yéla ɲán mín mán. 21A táa fɔ kó: ‹Aa ya› wáman: ‹Aa yéenɔn.› Kɛ mansɔɔ Ala yɛ́ Mansaya óo a cɛ́man kɛ bhá.»

22O kwɔ́, aa fɔ kaamɔɔndhye ŋólu yɛ́ kó: «Ló nɔ́ yáa sé, mɔɔn Dhyénjɛ ó yélɔɔ yáa kɛ́ a lá tée kée mán, wáa a táa a yé.

23I yáa fɔ a yɛ kó: ‹A mánfɛɛ, aa ya,› wáman: ‹Aa yéenɔn.› A kɛ́nan táa, a kɛ́nan bwée, 24kɛ́ mansɔɔ sá ŋóo í bhóo lábhɔla sángboo ó kún ndɔ́ o la ɲan mín mán, kɛ táa sé a kún ndɔ́ ó mán ɲan mín mán, mɔɔn Dhyénjɛ ó káa nan o ɲan ó lé mán. 25Wáa sannin o ló ŋó á sé, dhyáalagboya lée ké mɔɔn Dhyénjɛ ó á tɔ́lɔya kóyoongɛ óni ké bímɔɔn ólu á í bá a lɔ.

26Kó míin kɛ Nuwo yɛ tée ó lɔ, o ɲɔ́ɔn né káa kɛ́ mɔɔn Dhyénjɛ ó nan wáati ó lɔ. 27Mɔɔn ólu tɛ́ɛ lɔ́min kɛ́la, i tɛ́ɛ mínnin kɛ́la, cɛ ólu ní muso ólu tɛ́ɛ fúu kɛ́la, fɔ kɛ́nan sé Nuwo ló ŋó mán kúunmba ó kɔ́ɔnnɔn. Tó sámba óo nan kɛ i bɛ́ látuun. 28A káa kɛ o ɲan kée ŋó le mán óo Lɔti ta wáati o. Mɔɔn ólu tɛ́ɛ lɔ́min kɛ́la, kɛ mínnin kɛ́la, i tɛɛ sannin kɛ́la, kɛ fée kɛ́, kɛ sɛɛn kɛ́, kɛ́ bhó ŋólu lɔ. 29Wáa Lɔti é bhɔ́ Sodɔmu só ó kɔɔnnɔn ló mínnan, Ala é tá óni fɔlɔ ó bhɔ́ sángboo ó lɔ kɛ mɔɔn ólu bɛ́ hálaki. 30A káa kɛ céne mɔɔn Dhyénjɛ o kwɔ́sɛɛ ló ŋó la.

31O ló ŋó la, Mɔɔn mín ngɛ kɛ bhó ŋó kúnnɔn, ké a bhóofe ŋólu bhó ŋó kɔɔnnɔn, o tíi ó kɛ́nan i yíi kɛ a bhóofe ŋólu tá. Ni mɔɔn mín ngɛ kɛ sɛɛn mán, o tíi ó kɛ́nan i kwɔ́sɛɛ a bhóo lúman. 32Kó míin kɛ́ Lɔti muso la, aa í mili ó mán. 33Mɔɔn míin fɛ kɛ́ a ní ó látaan, o tíi ó yáa bɔɔn a ní ó lɔ. Wáa ní mɔɔn mínngɛ bɔɔn a ní ó lɔ, o tíi ó yáa a ní ó sɔ́ɔ. 34Ní fɔ́la a yɛ ngó, o sú ó lɔ́, mɔɔn fyáa yáa kɛ́ láfe ngée ŋó ka, kée ɲáan tá kɛ́ tɔ kée ŋó tó yé. 35Muso fyáa yáa tó koonduu ó la kée né, kée ɲáan tá kɛ́ a tɔ kée ŋó tó yé. 36[Cɛ fyáa yáa kɛ sɛɛn kée ngɔɔnnɔn, kée ɲáan tá, kɛ a tɔ kée ŋó tó yé.]»

37Kaamɔɔndhye ŋólu Ɛnza manɲaankɛ kó: «Mantii ó, o káa kɛ ywáa mínnɛɛn lé lɔ?» Ɛnza ŋé i yawi kó: «Fénzu kɛ́ kɛ ywáa mínnɔn, lwaa ólu í ladhyɛla o ywáa ó lé lɔ.»

Currently Selected:

Luka 17: MXX

Highlight

Copy