Kɛ́wɛɛ 23

1Pɔli é i ɲángbaan kítitɛɛbhaa olu lɔ kɛ fɔ́ kó: «Mádhye ŋólu, ne kwɛ́ɛn ní ŋé ndáamanseɲan o bhyɛ́ Ala sao o le mán; fɔ kɛ́ nan sé bí mán, ne yóso o tɛ́ ne kɛ́lɛla.» 2Pɔli é o fɔ́ mínngɛ, faanlɛɛɲansebhaa olu kúnndiiba Ananiyasi é fɔ́ Pɔli tɔ́ɔfɛ bháa lɔ́lu yɛ kó ii Pɔli gbási a lá o lɔ. 3Pɔli kó a mán kó: «Íle fyaangafo mɔɔn o, Ala yáa íle gbási. Íle síinin ŋé yánun kɛ kítitɛɛ kɛ́ kéeɲan ni sɛliya o le, wáa íle kó ko ii ne gbási, ké sɛliya o mán o fɔ.» 4Mɔɔn mínnu tɛ́ɛ Pɔli tɔ́ɔfɛ, ólu fɔ́ Pɔli man kó: «Íi Ala yɛ faanlɛɛɲansebhaa olu kúnndiiba o le nɛ́ɛnnan kɛ́ɛ!» 5Pɔli é i yawi kó: «Né bhádhye ŋólu, né tɛ mán lɔ́ ŋóo faanlɛɛɲansebhaa olu kúnndiiba o lée wé. Kɛ mansɔɔ a sɛwɛnin ŋé Kitabu o kɔ́ɔnnɔn kó: ‹Í kɛ́nan kómanyoo nvɔ́ í yɛ́ yamaan o ɲɛ́nmɔɔn o lɔ man.› »#23.5 O kóman ó sɛ́wɛnin ŋé Ɛgizɔdi 22.27.

6Pɔli tɛ́ɛ lɔ́ ŋóo kítitɛɛbhaa olu mɔɔn lɔ́lu tɛ́ɛ Sadusi le lé, lɔ́lu tɛ́ɛ Falizɛn nu le. O kósɔn, áa gbáa kítitɛɛbhaa olu cɛ́man, kɛ fɔ́ kó: «Ne bhádhye ŋólu, né, née Falizɛn né le, ne fá é Falizɛn ne lé. Né yéesiinin ŋé kó sú olu yáa kúun, o le kósɔn kíti é tɛ́ɛla né ka mbí.» 7Pɔli é o kóman o fɔ́ mínngɛ, sɔ́sɔli é ló Falizɛn ŋólu ní Sadusi ŋólu cɛ; yaman o i lɔ́taa fyáa le. 8Kɛ mansɔɔ sadusi olu kó, kó sú olu táa kúun, kó malɛɛka tɛ́ yé, kó ní lo ndɛ́ yé, wáa Falizɛn ŋólu lánin ŋé o bɛ́ la. 9Manngan ŋóo bwóɲan mínngɛ kóyoongɛ; Sɛliya kaamɔɔn mínnu tɛ́ɛ Falizɛn ŋólu ta sɛ́ɛ o lɔ, o lɔ́lu é muluti kɛ i wíi kɛ fɔ́ kó: «Án née kwɛ́nnin mán sɔ ngóo nzɔ́ɔ cɛ míin nan. Ní malɛɛka lɔ́ le wɛɛ kóman a fɛ, bháanin ní lɔ wɛ́ɛ kóman a fɛ a?» 10Sɔ́sɔli o bwóɲan mínngɛ; swáasi kúnndiiba oo sháan, kó i kɛ́nan Pɔli sanmannzanman kɛ a fáa. O kósɔn, áa swáasi lɔ́lu cé kɛ́ táa Pɔli bwási i bhóolɔ kɛ́ táa ni ale swáasi olu yɛ bhó ŋó kɔ́ɔnnɔn.

11O sú o lɔ, Mantii o i lɔ́ Pɔli tɔ́ɔfɛ kɛ fɔ́ kó: «Í yóso lágbɛya; ii né sɛ́ɛya ládi ɲán mín man Yeluzalɛmu, í kákan kɛ́ ne sɛ́ɛya ládi o ɲán kée ŋó le mán Lɔmu.»

Yánva o Pɔli man

12Kɛ́ɛn oo bhɔ́ mínngɛ, Yawudhyaa lɔ́lu yánva síi Pɔli mán. Ii i shɛ́n ɲɔ́ɔnɲɛn kó i táa lɔ́min kɛ́, i táa jí min, fɔ́ ní i kɛ́ Pɔli fáa. 13Yawudhyaa mínnu tɛ́ wɛɛ o yánva o sii, olu tɛ́ɛ sháa mɔɔn bínaannin le. 14O mɔɔn ólu táa Faanlɛɛɲansebhaa ólu kúnndiiba ólu ní cɛba ólu fɛ yé, kɛ fɔ́ olu yɛ kó: «Án ŋwɛ́ɛn án nzhɛ́n Ala la kó án nzí táa lɔ́minkɛ, fɔ́ ni an ngɛ́ Pɔli fáa. 15Ále ní kítitɛɛbhaa tɔ́ olu bɛ́, áa táa swáasi kúnndiiba o fɛ yé kwáalenin, kɛ a dɛ́li kó aa Pɔli dí a mán, kɛ kɛ́ óyoo áa fɛ kɛ a yɛ kó ó ɲanbhɔ cɛ́ɛne le. Án née kwɛnnin nɔ́bhyɛnin ɲé kɛ a mankɔɔn sháala, kɛ a faa sánnin aa sé á mán.»

16Wáa Pɔli bhádhyemuso o dhyénjɛ é o yánva o myɛ́n mínngɛ. Aa bwée kɛ táa swáasi olu yɛ bhó ŋo kɔ́ɔnnɔn kɛ táa o lɔ́sɔɔ Pɔli yɛ. 17O wáati o lɔ, Pɔli é swáasi kúnndii lɔ kíi kɛ́ fɔ́ o yɛ kó: «Táa káwee míin né swáasi olu kúnndiiba fɛ yé; kóman lɔ é a fɛ kɛ́ fɔ a yɛ.» 18Swáasi kúnndii ó táa ní káweenin ŋó le swáasi olu kúnndiiba o fɛ́ yé kɛ táa fɔ́ a yɛ kó: «Kasodhye Pɔli lée ne kíi kɛ́ ɲíin né fɛ kó ni nan ní káweenin míin né í fɛ́ ya, ko kóman lɔ é a fɛ kɛ́ o fɔ́ í yɛ.» 19Swáasi olu kúnndiiba ó káwee ŋó myaan a bhóoman kɛ́ táa ní ale i kéenan kɛ a manɲaankɛ kó: «Mínnɛɛn lée i fɛ kɛ fɔ́ ne yɛ?» 20Káwee ŋóo a yawi kó: «Yawudhyaa olu wɛ́ɛ bhyɛ́ a lɔ kó i káa nan i dɛ́li síin, kó ii Pɔli bhyáa kɛ táa kítitɛɛbhaa olu fɛ yé. Kó i káa a yɛ ko ó yace myaan cɛ́ɛne kɛ o ɲanbhɔ. 21Wáa í kɛ́nan lá i la! Kɛ mansɔɔ i yɛ́ mɔɔn lɔ́lu káa i lóonaan kɛ́ sháa o la kɛ́ Pɔli mánkɔɔn. Ii sháa mɔɔn bínaannin lé. I wɛɛ í shɛ́n Ala la kó i táa lɔ́min kɛ́, i ló ndáa jí min fɔ́ Pɔli kɛ́ faa. I lɔ́bhyɛnin ɲé kɛ bhá. Ii íle yɛ́ kóman o le mánkɔɔnnan.» 22Swáasi olu kúnndiiba óo fɔ́ káwee ŋó yɛ́ kɛ a mánngbɛya kó: «Mɔɔn gbɛ́ɛ kɛ́nan o kóman o myɛ́n. O kwɔ ii káwee ŋo bhyaa kɛ táa.»

Pɔli é Felisi ɲankɔɔ

23O kwɔ́, swáasi olu kúnndiiba óo swáasikunndii fyáa kíi kɛ fɔ́ i yɛ kó: «Áa swáasicɛ kɛnmɛn fyáa tá, óni sótii bíwoonvyaa, óni káa ndíi kɛnmɛn fyáa. I bɛ́ a i lɔbhyɛ́; ni sú ó kɛ́ kwó, i yáa táa Sezale. 24Áa so lɔ́lu lɔ́bhyɛ Pɔli yɛ, ké aa sé ɲán mín man yámaantii Felisi fɛ́ yé kɛ́ɛnya lɔ, lá kɛ́nan bhɔ́ a man.» 25Aa sɛ́wɛ kɛ, kɛ a látaa Felisi mán kó: 26«Né Kolodi Lisiyasi é sɛ́wɛ miin bhyáashaala yámaantii Felisi mán; ní i twáala. 27Yawudhyaa olu tɛ́ wɛɛ cɛ míin myaan, i tɛ́ɛ fɛ́ kɛ́ a faa. Ní myɛ́n wáati mín nɔn kó Lomɛn yamaan dhyé ŋó lɔ lée ale, ní ɲɛ́n swáasi lɔ́lu bhyáa kɛ táa a bwási i bhóolɔ. 28A tɛ́ wɛɛ kó kée mínngɛ tó Yawudhyaa ólu a kɛ́lɛla, né tɛ́ɛfɛ kɛ o lɔ́. O le kósɔn ní táa ní ale i yɛ kítitɛɛbhaa olu saala. 29Wáa ni a lákɔɔsi kɛ a yé óo ii a kɛ́lɛla la mínnɔn, óo i gbúlu yɛ sɛliya kó le le; ní o tɛ́, a man kóyoo nzí kɛ́ mín é se kɛ́la a fáakun ne, wáman kɛ a bhyáa kasola. 30Ii ne lasowi kó ii fɛ kɛ a fáa lóonɔn. O le kósɔn, ní a bhyáashaa í mán. Ii a kɛ́lɛla kun mínnan, ŋwɛ́ɛn fɔ i yɛ ngó ilee gbúlu a táa o lɔ́sɔɔ í yɛ́.»

31Míin fɔ́ swáasi olu yɛ, ii o le kɛ́, ii Pɔli tá sú o lɔ kɛ táa fɔ́ Antipatilisi. 32O lúusɔgbɛ o, swáasi mínnu tɛ́ɛ i sénan, ólu i kwɔ́sɛɛ kɛ́ ló i yɛ́ bhó ŋó kɔ́ɔnnɔn. Mínnu tɛ́ɛ só o ka, ólu táa ni Pɔli le. 33Ii sé Sezale mínngɛ, ii sɛ́wɛ o dí yámaantii o mán, kɛ́ Pɔli yáa a lá. 34Yámaantii o sɛ́wɛ o kála mínngɛ, aa Pɔli manɲaankɛ kó: «Ii bhɔ́la yamaan mínnɛɛn le lɔ́?» Pɔli é a yawi kó Silisika lée né le. 35Aa fɔ Pɔli yɛ kó: «Íle ní mɔɔn mínnuu ɲɔ́ɔnnan, olu kɛ́ táa nan san mín nɔ́n, né yáa i lɔ́myɛn.» Aa fɔ kó ii Pɔli bhyáa Elɔdi yɛ́ bhómba o kɔ́ɔnnɔn, kɛ í yáakiito a lɔ.

Currently Selected:

Kɛ́wɛɛ 23: MXX

Highlight

Copy